උපත් පාලන ක්‍රමයක් තෝරාගැනීමේදී සැලකිලිමත් වියයුතු කරුණු
උපත් පාලන ක්‍රමයක් කිව්වම ඉතින් ඕනම කෙනෙක් දන්නවනෙ ඒ මොකක්ද කියල. නොදන්න කෙනෙක් ඉන්නවනම් ඔන්න දැනගන්න. උපත් පාලන ක්‍රමයක් කියන්නෙ අනවශ්‍ය ගැබ් ගැනීමක් වළක්වගන්න භාවිතා කරන ක්‍රමවේදයන්ටයි. කසාදයක් බැඳපු ජෝඩුවකට තමන්ගේ පවුල අවශ්‍ය විදිහට සැලසුම් කරගන්න වගේම බැඳපු, නොබැඳපු, ලිහපු ඕනම කෙනෙක් අනවශ්‍ය ගැබ් ගැනීම් වළක්වා ගන්නත් මේ උපත් පාලනය ගැන නිවැරදි දැනුමක් ලබාගෙන ඉන්න එක හරිම වැදගත්. මොකද ලංකාවේ නීතිය අනුව ගබ්සාව කියන්නේ බරපතල වරදක්. සමහර ආගමික විශ්වාසයන් අනුවත් එහෙමයි. ඒ නිසා හොඳම විදිහ තමයි කලින් දැනගෙන ගැබ් ගැනීම වළක්වන එක. උපත් පාලන ක්‍රම ගැන අපි මීට කලින් කතා කරපු ලිපිය මෙතනින් බලන්න. මේ කියන්න යන්නෙ ඔය කියල තියෙන ක්‍රම අතරින් තමන්ට සුදුසු උපත් පාලන ක්‍රමය මෙන්න මේකයි කියල තෝරගන්න කලින් හිතල බලන්න ඕන කාරණා මොනවද කියන එකයි.
1. ඵලදායීතාවය
ඔන්න අපි උපත් පාලනය ගැන, ඒ ක්‍රම ගැන කියවලා මූලික අවබෝධයක් ගත්ත කියමුකෝ. දැන් ඊළඟට හොයල බලන්න ඕන ඒ ඒ ක්‍රම වල තියෙන ඵලදායීතාවය, ඒ කිව්වෙ ඒ ක්‍රම වලින් උපතක් වළක්වන්න තියෙන හැකියාව කොච්චරක්ද කියන එක. මොකද ඔය උපත් පාලන ක්‍රම අතරින් ස්වභාවික ක්‍රම, ඒ කිව්වෙ කැලැන්ඩර් ක්‍රමය, withdrawal නැත්තම් pull and pray ක්‍රමය වගේ ක්‍රම වරදින්න තියෙන සම්භාවිතාව අනික් ක්‍රම වලට වඩා ටිකක් ඉහළයි. හැබැයි ඒ කියන්නෙ ඒ ක්‍රම වැරදියි කියන එකත් නෙමෙයි. සමහරුන්ට සුදුසු නොවෙන්න පුළුවන්. ඒ නිසා හොඳට හොයල බලල තමන්ට ගැලපෙන, වඩා ඵලදායී ක්‍රමය මොකක්ද කියල තෝරාගන්න ඕන.
2. ඔබේ පවුලේ සැලසුම
ඒ වගේම ඊළඟට හිතල බලන්න ඕන දේ තමයි ඔයාල පවුලක් සැලසුම් කරන කාලය. ඒ කිව්වේ විවාහක යුවළක් නම් ඉක්මනින් හෝ අවුරුද්දක් වගේ ඇතුළත දරුවෙක් ලබන්න කැමැත්තෙන් ඉන්නවනම් එහෙමත් නැත්තම් පළවෙනි දරුවා ලැබිල යම්කිසි කාලසීමාවක් ඇතුළත ඊළඟ දරුවා ගැන හිතන්න බලාගෙන ඉන්නවනම් ඒ ඒ කාරණේට අනුව තෝරගන්න ඕන උපත් පාලන ක්‍රමයත් වෙනස් වෙනවා. විවාහ වෙලා අවුරුද්දක් ඇතුළත දරුවෙක් හදන්න ඉන්න යුවළක් නම් ලූප් එකක් හෝ ජඩෙල් වගේ ක්‍රමයක් භාවිතා කරන එක තේරුමක් නැහැ. මොකද ඒ දේවල් තැන්පත් කරන්න සහ ඉවත් කරන්න යන කාලය, වෛද්‍යවරයෙක් හමුවෙන්නම ඕන වීම, වියදම වගේ දේවල් බැලුවම ඊට වඩා කෙටිකාලින උපත් පාලන ක්‍රමයක් තෝරගන්න එකයි සුදුසු.
ඒ වගේම සමහර උපත් පාලන ක්‍රම භාවිතය නතර කළත් ඒවගේ තියෙන හෝර්මෝනමය බලපෑම නිසා ගැබ් ගැනීමක් වෙන්න යම්කිසි කාලයක් ගතවෙන්න පුළුවන්. උදාහරණයක් හැටියට ජඩෙල් හෝ එන්නත් මඟින් මෙහෙම වෙන්න පුළුවන්. ඒ නිසා යම්කිසි කාලෙකට පස්සේ ඉක්මනින් ගැබ් ගන්න ඕන යුවළක් නම් කොන්ඩම් හෝ ගිලින පෙති වගේ ක්‍රමයකට යන එක තමයි සුදුසුම.
3. භාවිතා කරන අවස්ථා
අනිත් එක තමයි භාවිත කරන අවස්ථා, එහෙම නැත්තම් වාර සංඛ්‍යාව. විවාහක, එකට ජීවත්වන යුවළක් නම් ගිලින පෙති, ලූප්, ජඩෙල් වගේ දීර්ඝ කාලීන ක්‍රමයක් තෝරාගන්න එක ගැටළුවක් නැහැ. නමුත් කලාතුරකින් හමුවෙන, රැකියා හෝ වෙනත් හේතු මත ස්ථාන දෙකක, රටවල් දෙකක ජීවත් වෙන යුවළක් නම් දීර්ඝ කාලීන ක්‍රමයකට නොයා ස්වභාවික ක්‍රම හෝ කොන්ඩම් භාවිත කරන එක තමයි හොඳ.
4. ලබාගන්න පහසුද?
ඔය මොන දේ බැලුවත් වැඩක් නැහැනෙ අවශ්‍ය වෙලාවට හොයාගන්න අපහසු ක්‍රමයක්නම්. ගිලින පෙති, කොන්ඩම් කියන්නෙ ලංකාවෙ බොහොම පහසුවෙන් ෆාමසි වලින් ගන්න පුළුවන් උපත් පාලන ක්‍රම. හැබැයි ඉතින් ෆාමසියකට ගිහිල්ල කොන්ඩම් එකක් ඉල්ලගන්න විචිකිච්ඡාවයි වගේ නම් මේ ක්‍රම හරියන්නෙ නැහැ. ලූප්, ඉම්ප්ලාන්ට්, එන්නත් කියන ක්‍රම අර කලින් කියපු ක්‍රම තරම්ම ලබා ගන්න පහසු නැහැ. වෛද්‍යවරයෙක් හමුවෙලා වෙලාවක් වෙන් කරවාගෙන කරගන්න ඕන. ලංකාවේ ක්ලිනික් වලිනුත් ඔය දේවල් කරගන්න පුළුවන්. ඒත් ක්ලිනික් එකෙන් දෙන වෙලාවට, දවසට අපි යන්න ඕන. ඒ වගේම තමයි ඉතින් මේක තාමත් ටිපිකල් සිරි ලංකාවනේ. නොබැඳපු අයට එහෙම ක්ලිනික් වලින් නෝ චාන්ස්. ලූප් කෙසේ වෙතත් ගහල පන්න ගනී.
5. වියදම
කොයි වැඩේටත් වගේ මේ කාරියටත් ඉතින් සල්ලි තමයි ඉස්සර වෙන්නෙ. ඒ රාජකාරියත් අඩු වියදමකින් කරගන්න හිතනවනම් ඔන්න මේකත් හොයල බලන්න ඕන. කැලැන්ඩර් හෝ withdrawal ක්‍රමයනම් free of charge. ගිලින පෙති, කොන්ඩම් කියන්නෙ වියදම සාපේක්ෂව ඉතාම අඩු ක්‍රම. එතනින් එහාට එන්නත්, ඉම්ප්ලාන්ට්, ලූප් වගේ ක්‍රමවල වියදම ටිකක් වැඩියි. හොයල බලල පොකට් එකටත් වාසි ක්‍රමයක් තෝරගෙන වැඩේට බහින්න කියල තමයි මේ කියන්නෙ ඉතින්.
6. අතුරු ආරක්ෂාව
කලිනුත් කිව්ව වගේ ඕනෑම කෙනෙක් මූලිකවම උපත් පාලන ක්‍රමයක් තෝරාගන්නෙ අනවශ්‍ය ගැබ් ගැනීමක් වළක්වගන්න. හැබැයි මේ උපත් පාලන ක්‍රම වලින් වෙන තවත් වාසියක් තියෙනවා. ඒ තමයි STD – Sexually Transmitted Diseases ඒ කිව්වේ ලිංගිකව සම්ප්‍රේෂණය වෙන රෝග වලට ලැබෙන ආරක්ෂාව. සරලවම කිව්වොත් ඒඩ්ස්, හර්පීස්, ගොනෝරියා ඇතුළු සමාජ රෝග ලිංගික කර්තව්‍ය අතරෙදි බෝවෙන එක වළක්වාගන්න පුළුවන් කියන එක. විශ්වාසදායී එක සහකාරයෙක් හෝ සහකාරියක් එක්ක අහවල් කාරියට අත ගහන්න කිව්වට කෝ අපේ උන්දැලා අහනවයෑ ඉතින්. අන්න එහෙම අයට වැදගත් මේ උපත් පාලන ක්‍රම වලින් ලැබෙන ආරක්ෂාව ගැනත් හිතල බලන එක. එක ගලෙන්ම කුරුල්ලො දෙන්නම මරාගන්න පුළුවන්. හැබැයි ඉතින් මේ තියෙන උපත් පාලන ක්‍රම ඔක්කොම අතරින් ලිංගික රෝග සම්ප්‍රේෂණය වළක්වන්න පුළුවන් ගැහැණු හෝ පිරිමි කොන්ඩම් වලින් විතරයි.
7. අතුරු ආබාධ
කොයි දේ තෝරගන්නත් කලින් හිතල බලන්න ඕන තව කාරණාවක් තමයි ඒකෙ අතුරු අබාධ මොනවද කියන එක. ඉතින් මේ කාරණේදිත් එහෙමම තමා. ස්වභාවික ක්‍රම සහ කොන්ඩම් වලනම් ගැබ් ගන්න තියෙන පුංචි අවදානම ඇරුනම වෙන කිසිම අතුරු අබාධයක් නැහැ. හැබැයි ගිලින පෙති, ලූප්, ජඩෙල් වගේ හෝර්මෝනමය ක්‍රම වලින් ඇඟ මහත් වීම, ඔසප් චක්‍රයට බාධා ඇතිවීම වගේ අතුරු ආබාධ තියෙන්න පුළුවන්. ඒ වගේම තමයි මේ හෝර්මෝනමය ක්‍රම වලින් ඔසප් චක්‍රය ක්‍රමවත් වීම, ඔසප් වේදනා අවම වීම වගේ වාසිදායක තත්ත්වයනුත් ඇතිවෙන්න පුළුවන්.
උපුටා ගැනීමකි.
