මනෝ මූලික ලිංගික ගැටලු ගැන ඔබ දැනුවත්ද?
මිනිසාගේ සෞඛ්‍ය සම්පන්නතාව සඳහා කායික සෞඛ්‍ය, මානසික සෞඛ්‍ය මෙන්ම ලිංගික සෞඛ්‍ය ද වැදගත් වේ. මිනිස් සිරුර ක්‍රියාත්මක කරන මූලික අවයවය ලෙස මනස හැඳින්විය හැකිය. පුද්ගලයාට ඇතිවන ආකර්ෂණය, ආශාව, උත්තේජනය වීම යන සියලු ක්‍රියාවචලින් චක්‍රාකාරව ශරීරය තුළ ඇති වේ. එහෙයින් මිනිසාගේ ලිංගික ක්‍රියාවලිය ද චක්‍රයකි. මෙය මනෝමූලික චක්‍රය ලෙසද හඳුන්වයි.
වත්මන් සමාජයේ මවුපියන්, වැඩිහිටියන් මෙන්ම ගුරුවරුන්ද දරුවන්ගේ කායික වර්ධනය, බුද්ධි වර්ධනය පිළිබඳ වැඩි අවධානයක් යොමු කළ ද ලිංගික වර්ධනය කෙරෙහි එතරම් අවධානයක් යොමු නොකරති. ලිංගික වර්ධනයත් සමඟ දරුවා තුළ සිදුවන කායික වෙනස් වීම සහ හෝමෝන වෙනස් වීම මත දරුවාගේ චර්යාවද වෙනස් වීමකට භාජන වේ. පරිණතභාවය නැතහොත් වැඩිවියට පැමිණෙන දරුවා නව යෞවනයකු යෞවනියක ලෙස සමාජයට පැමිණේ. ඔවුන් තුළ මේ කාලසීමාවේදී ආදර හැඟීම්, ලිංගික හැඟීම් උද්දීපනය වන්නට පටන් ගනී. මෙය ස්වාභාවික තත්ත්වයකි.
වැඩිහිටි වියට පත් තරුණ තරුණියන්ට ලිංගිකත්වය පිළිබඳ නිසි අවබෝධයක් දැනුමක් ලබාදිය යුතු වන්නේ ඔවුන්ගේ නොදැනුවත්කම මත වැරදි ලිංගික චර්යා කෙරෙහි යොමු වීමේ ප්‍රවණතාව වැඩි හෙයිනි. තරුණ තරුණියන්ගේ අනවබෝධය හේතුවෙන් විවිධාකාර ලෙස ලිංගික අතවරයට ලක්වීම, විකෘති ලිංගික චර්යා ප්‍රදර්ශනය කිරීම, අවබෝධයෙන් තොරව ස්වයං වින්දනයට ඇබ්බැහි වීම, සමලිංගිකයකු බවට පත්වීම යනාදී ගැටලුවලට මුහුණ පාමින් ඔවුහු ජීවිත විනාශ කරති. වත්මන් සමාජයේ බොහෝ අපරාධයන්ට, දූෂණයන්ට එනම්, එකම පවුලේ සහෝදරයා අතින් තම එක කුස උපන් සහෝදරිය දූෂණය කිරීම, බාලක බාලිකා පාසල්වල සමලිංගික ගැටලු පිළිබඳ වාර්තා වීම, පොදු ස්ථානවල විකෘති ලිංගික චර්යා ප්‍රදර්ශනය කිරීම යනාදී ගැටලු සඳහා ප්‍රධාන හේතුව වී ඇත්තේ ලිංගිකත්වය පිළිබඳ පවතින නොදැනුවත්කමය. මේ හේතුවෙන් තරුණ තරුණියන් තම පාසල් කටයුතු අඩපණ කරගනී. විවාහකයකු නම් තම විවාහය දික්කසාදයෙන් අවසන් කරයි. රැකියාවක නියැළෙන්නකු නම් රැකියා ස්ථානයේ ගැටුම් ඇති කරගනී. මෙම තත්ත්වයෙන් මිදීම සඳහා මූලික වශයෙන් මනෝ ලිංගික ගැටලු මොනවාද යන්න හඳුනාගැනීම වැදගත් වේ.
ලිංගික අප්‍රාණීකත්වය හෙවත් ලිංගික බෙලහීනතාවය
ලිංගික අප්‍රාණීකත්වය හෙවත් ලිංගික බෙලහීනතාවය (Erectile Impotence) මනෝ ලිංගික ගැටලු අතර ප්‍රධානය, මෙවැනි තත්ත්වයන්ගෙන් පෙළෙන පුද්ගලයන්ට ලිංගික කාර්යය සම්පූර්ණ කරගැනීම පිණිස ලිංගික අවයවය ප්‍රාණවත් ලෙස පවත්වා ගැනීමට නොහැකි වේ.
අපගේ සියලුම හැඟීම් දැනීම් ජනනය වන්නේ මොළය හරහාය. මොළයේ සාමාන්‍ය ක්‍රියාකාරීත්වයට බාධා ඇති වූ විට එය ලිංගික සක්‍රියතාවට ද බලපෑම් ඇති කරයි. ජීවිතයේ යම් ගැටලුවක් නිසා ඔබ නිතර මානසික පීඩාවකින් කාලය ගෙවන්නේ නම් එය ඔබගේ ලිංගික ජීවිතයට බලපෑම් ඇති කරයි. අධික ලෙස මත්පැන්, මත්ද්‍රව්‍ය භාවිතය, දිගුකාලීනව පවතින රෝග (අධික රුධිර පීඩනය/දියවැඩියාව, ස්නායු දුර්වලතා) සඳහා වේදනානාශක භාවිත කිරීම, අධික තරබාරුව, අධික ලෙස කාම දර්ශනය නැරඹීමට පුරුදුවීම යනාදී හේතූන් ද මේ සඳහා බලපෑම් ඇති කරයි.
මෙහිදී දක්නට ලැබෙන තවත් එක් ප්‍රධාන දුර්වලතාවක් වන්නේ ලිංගික ක්‍රියාව සඳහා මැළි බවක් නැතහොත් අතෘප්තියක් දැක්වීමයි. ඔබ රැකියාවක නියැළෙන්නකු නම් එහි ඇති වගකීම් සමඟ ඇතිවන වෙහෙසත් සමඟ මේ තත්ත්වය ඇතිවිය හැකිය. එසේ නැතිනම් පවුල තුළ දැරීමට සිදුවන වගකීම් හේතුවෙන් අවිවේකීව කාලය ගත කිරීම නිසාද මෙම තත්ත්වය ඇති විය හැකිය.
ලිංගික ක්‍රියාවලියක් සාර්ථක වීමට නම් සහකරුවා හා සහකාරිය අතර ඒ සඳහා කැමැත්තක් මෙන්ම දෙදෙනා තුළ ආදරණීය හැඟීමක් පැවැතිය යුතුය. එකිනෙකා කෙරෙහි තරහින් සිටිනා විටද ලිංගික ප්‍රබෝධමත්භාවය හීන විය හැකිය. මෙම ක්‍රියාවලිය යාන්ත්‍රික ක්‍රියාවලියක් නොවන හෙයින් එය ස්වාභාවික ලෙස පවත්වාගෙන යෑමට ආත්මීය ආදරණීය හැඟීම් දෙදෙනාම අතර පැවැතීම වැදගත් වේ. මෙය දිගු කාලීනව නොපැවැතීම හේතුවෙන් විවාහය දික්කසාදයෙන් අවසන් වීමට ද පුළුවන.
ශුක්‍ර මෝචනය
ලිංගික සංසර්ගය අතරතුරේදී ඉතා අඩු කාලයකින් (සාමාන්‍යයෙන් විනාඩියක පමණ) ශුක්‍රාණු පිටවීම ක්ෂණික මෝචනය (Premature Ejaculation) ලෙස හඳුන්වයි. ශුක්‍ර මෝචනය පාලනය කරනු ලබන්නේ මොළයේ විශේෂිත කලාපයකිනි. ස්නායු පද්ධතිය හරහා ලැබෙන පණිවුඩ අනුව ශුක්‍රාණු පිට කිරීම තීරණය කරනු ලබයි. මෙම පණිවුඩකාරක ස්නායුවල පවතින දෝෂයක් නිසාත් මෙම තත්ත්වය ඇති විය හැකිය. සාමාන්‍යයෙන් මේ සඳහා ශාරීරික හේතු පමණක් නොව මානසික හේතු ද බලපානු ලබයි. ශාරීරික රෝගී තත්ත්වයක් මත ක්ෂණික මෝචනය සිදුවන්නේ නම් එම ශාරීරික රෝගය සඳහා ඔෟෂධ ප්‍රතිකාර ලබාගැනීම වැදගත්ය. නමුත් ඇතැමකුට කුඩා අවධියේ මුහුණපෑමට සිදු වූ ලිංගික අතවරයක් හේතුවෙන් හෝ ලිංගිකත්වය පිළිබඳ ඇති අත්දැකීම් අඩුකම හෝ ඒ කෙරෙහි දක්වන අධික ලැජ්ජාවද මේ සඳහා බලපෑ හැකිය. එසේම පුද්ගල ආත්ම විශ්වාසය බිඳ වැටීම, පවුල් ජීවිතය හා රැකියා ජීවිතයේ ගැටලු, මානසික ආතතියෙන් කල්ගෙවීම යන හේතු ද බලපෑ හැකිය. මේ සඳහා නිසි මාර්ගෝපදේශයක් ලබාගැනීමට මනෝ ලිංගික උපදේශකවරයකු වෙත යොමු වීම වැදගත් වේ.
මනෝ ලිංගික ගැටලු පවතින්නේ පුරුෂයන්ට පමණක් නොව ස්ත්‍රීන්ටද මෙවැනි ගැටලු රාශියක් පවතී. විවාහ ජීවිතය අතෘප්තිමත් කරලීමටත් විවාහ ජීවිත දෙදරා යෑමටත් මෙම ගැටලු ඇතැම් විට සෘජුවම බලපෑම් ඇති කරයි.
වැජිනිස්මස්
බොහොමයක් ස්ත්‍රීන්ට බලපාන මනෝ ලිංගික ගැටලුවක් ලෙස වැජිනිස්මස් (Vaganismes) තත්ත්වය පෙන්වා දිය හැකිය. නව යුවළක් පළමුවෙන් ලිංගිකව එකතු වීමේදී මේ තත්ත්වයට කාන්තාව මුහුණපායි. මෙහිදී කාන්තාවගේ පාලනයෙන් තොරව යෝනි ප්‍රදේශයේ පටක තද වීමෙන් වේදනාවක් ඇති වේ. කාන්තාවට දැනෙන වේදනාවක් සමඟ ලිංගික කාර්යයේ නියැළීමට ඇය බියක් දක්වයි. එසේම ලිංගික සතුට නැති වී යයි. බොහෝ කාන්තාවන් මෙය බලාපොරොත්තු නොවන අනපේක්ෂිත තත්ත්වයකි. මෙම වැජිනිස්මස් තත්ත්වය ඇති වීමට ප්‍රධාන වශයෙන් කාන්තාවගේ මානසිකත්වයට බලපානු ඇත. ඇය ලිංගික ක්‍රියා වේදනාව දෙන්නක් බව අපේක්ෂාවෙන් සිටීම, ළමා කල ඇති වූ කම්පිත ලිංගික අත්දැකීම් ඇත්නම් ඒවා අලුත් කොට සිතීම, ලිංගිකත්වය පිළිබඳ උනන්දුවක් නැතිවීම යන ආකල්ප ද මේ සඳහා බලපෑ හැකිය. ලිංගික එක්වීම කෙරෙහි කාන්තාවගේ ඇති තැතිගැන්ම ද හේතු විය හැකි මුත් මෙම තත්ත්වය කාන්තාවකගේ වරදින් හෝ ඇය සිතාමතා හෝ කරන දෙයක් නොවන බව විශේෂයෙන්ම සඳහන් කළ යුතුය. මෙම තත්ත්වයට භාජන වී ඇත්තේ මනෝවිද්‍යාත්මක හේතූන් නිසා නම් ඔවුන්ගේ මනසට වධ දෙන ගැටලු සහ හැඟීම් නිදහසේ පවසන්නටත් ඒ සඳහා මනෝ ලිංගික උපදේශකවරයකු හා සම්බන්ධ වීමත් වැදගත් වේ. මෙහිදී උපදේශකවරයා හරහා කාන්තාවට කායික හා මානසික වශයෙන් සන්සුන් වීමට උපදේශනය ලබා දේ. එසේම තම සහකරු සමඟ තැති ගැන්මකින් තොරව ලිංගික කාර්යයේ යෙදීමට උපදෙස් ලබා දේ.
සුරතාන්තයට පත් නොවීම
සාමාන්‍යයෙන් කාන්තාවන් සිය සහකරුවා සමඟ ලිංගික සංසර්ගයේ යෙදීමේදී සුරතාන්තයට පත් නොවන බවත් ඉන් තෘප්තියක් පමණක් ලබන බවත් වාර්තා වේ. මෙයට හේතු වන්නේ ලිංගික කාර්යය අතරතුරේදී කාන්තාවට එය එපාවීමක් හෝ මානසික තත්ත්වය බිඳ වැටීමකට පත් වීමය. නැතහොත් දෙදෙනා අතර පූර්ව ලිංගික ක්‍රියා නොතිබීම තුළින් ලිංගික සංසර්ගයට අවශ්‍ය පදනම සැකසී නොමැති නිසාත් විය හැකිය. මෙය දෙදෙනා අතර ආදරය සන්නිවේදනය කරන ක්‍රමයක් හා ලිංගික එක්වීමකට මානසික වශයෙන් පෙලඹවීමක් ඇති කරන ක්‍රමයක් ලෙස හඳුන්වා දීමට පුළුවන. මේ නිසා කාන්තාවන්ට මෙම තත්ත්වය කරා යෑමට නොහැකි වීමට හේතු වේ.
සමලිංගිකත්වය
ප්‍රතිවිරුද්ධ ලිංගිකයන් අතර රාගික හැඟීමක් ඇති වීම ලොව බොහෝ දෙනා පිළිගත් සම්මතයයි. නමුත් ලිංගිකත්වය පිළිබඳ පවතින විකෘති අදහස හේතුවෙන් බොහෝමයක් පිරිස් සමලිංගික (Homosexuality) ඇසුරට හුරු වී ඇත. මේ හේතුවෙන් පුද්ගලයාට විවිධාකාර ගැටලු පැන නඟී. මේ සඳහා බලපෑ හැකි හේතු ගණනාවක් පවතී. නව යොවුන් විය පසු කරන පිරිස් අත්දැකීම් ලබාගැනීමේ අවශ්‍යතාවයෙන් පෙළේ. ඔවුන් තුළ පවතින කුතුහලය සහ ආශාව නිසාත් ප්‍රතිවිරුද්ධ ලිංගික ඇසුරට ඉඩකඩ ප්‍රමාණය අවම නිසාත් මොවුන් සමලිංගික ආශ්‍රය මඟින් තම අවශ්‍යතා සපුරා ගැනීමට පෙලඹෙති. කාන්තාවක් වෙනත් කාන්තාවක් ආශ්‍රය කිරීම, පිරිමියෙක් වෙනත් පිරිමියෙක් ආශ්‍රය කිරීම සමාජ සම්මතයකි. නමුත් ඒ හේතුවෙන් පුද්ගලයා තම ලිංගික අවශ්‍යතාව ද ඒ ඇසුරේදීම ඉටු කරගැනීමට උත්සාහ දැරීම ගැටලුකාරී තත්ත්වයකි. ඇතැම් පිරිස් පිරිමියකු ලෙස ඉපිද තමන් ස්ත්‍රියකු යැයි සිතින් සිතා වැඩි ආකර්ෂණයක් පුරුෂයන් කෙරෙහි දක්වයි. මෙවැනි තත්ත්වයන් හේතුවෙන් එවැනි පුද්ගලයන් සමාජයේ මානසික වශයෙන් බොහෝ ගැටලුවලට මුහුණපානු ලබයි.
ශ්‍රී ලංකාවේ පවතින නීතියට නීත්‍යනුකූල නොවන මෙම සමලිංගික ගැටලුව සුලබ වශයෙන් බාලක බාලිකා පාසල් අතර දැක ගැනීමට පුළුවන. එයට හේතුව වන්නේ සමලිංගිකත්වය පිළිබඳ පවතින නොදැනුවත්කමය. මේ තත්ත්වය සාර්ථක විවාහ ජීවිතයකට සෘජුවම බලපාන හෙයින් ඉන් මිදීම සඳහා මනෝ උපදේශනය වෙත යොමු වීම වැදගත් වේ.
මනෝ ලිංගික ගැටලු අවම කරගැනීමට නම්
මනෝ ලිංගික ගැටලු අවම කර ගැනීම තුළින් සාර්ථක විවාහ ජීවිතයක් ගත කිරීමට හැකිය. කායික හා මානසික ලිංගික දුබලතා නැති කරවා ගැනීම තුළින් ජීවිතයේ සුන්දරත්වය උදා කරගැනීමට හැකිය. ඔබගේ පෞද්ගලික ජීවිතයේ හෝ යුග ජීවිතයේදී ඇතිවන විවිධාකාර අසහනකාරී පීඩා තත්ත්වයන්ගෙන් මිදී සුවදායී නිරෝගී මනසක් ගොඩනඟා ගැනීමටත්, ලිංගික පෞරුෂය වර්ධනය කරගැනීමෙන් සමාජීය හා ආධ්‍යාත්මිකත්වය වර්ධනය කරගැනීමත් මෙහි ලා වැදගත් වේ. මෙහිදී විවාහකයන් අතර පවතින ආදරය සහ අනේ‍යාන්‍ය අවබෝධය ද වැදගත්ය. කාලය ගෙවී යෑමත් සමඟ විවාහකයන් අතර නොයෙකුත් හේතූන් මත ඇතිවන අමනාපකම්, එපා වීම මතද මේ ගැටලුව ඇති විය හැකිය. ඒ සඳහා පුද්ගල චර්යාවන් මෙන්ම අවට පරිසරය ද බලපෑ හැකිය. තමන් ජීවත්වන වටපිටාව මනසට සුවදායී ලෙස නිර්මාණය කරගත යුතුය. වයසින්ද මුහුකුරා යන ඔබගේ සෞඛ්‍ය තත්ත්වය හා බාහිර පෙනුම පිළිබඳවද අවධානයක් යොමු කළ යුතුය.
වත්මන් සමාජයේ බොහොමයක් තරුණ තරුණියන් විවාහ පත් වන්නේ ලිංගිකත්වය පිළිබඳ නිසි අවබෝධයකින් තොරවය. හැඟීම්වලට වහල් වීම මත සිදු කරගන්නා විවාහය තුළ ලිංගිකත්වයේ සැබෑ ආශ්වාදය ගිලිහී යයි. ලිංගිකත්වය කෙරෙහි බියක් දැක්වීමද ප්‍රධාන ගැටලුවකි. තවත් කෙනකු තම ලිංගික හැසිරීම පිළිබඳව දැනගනීවි යන සාවද්‍ය ආකල්පයන් නිසාද බිය හට ගනී. මේ තත්ත්වයන් අවම කරගැනීම සඳහා දෙදෙනා අතර විශ්වාසය, අනේ‍යාන්‍ය සබඳතාව ධනාත්මක ලෙස පැවැතිය යුතුය.
වත්මන් සමාජයේ බොහෝ දෙනකු ලිංගිකත්වය කෙරෙහි විකෘති අදහස් දක්වන්නෝය. ලිංගික හිංසන, අපයෝජන, අනියම් සබඳතා සුලබ වන්නට හේතු වී ඇත්තේ ද මේ හේතුවය. මේ තත්ත්වයන් මඟ හැර ගැනීම සඳහා නිවැරදි මාර්ගෝපදේශයක් අත්‍යවශ්‍ය වේ. තරුණ වියට එළැඹෙන දරුවන්ගේ සිරුරේ සිදුවන බාහිර මෙන්ම අභ්‍යන්තර වෙනස්කම් පිළිබඳ අවබෝධයක් මෙන්ම ලිංගික කරුණු පිළිබඳ නිවැරදි ලිංගික අධ්‍යාපනයක් ලබාදීම අත්‍යවශ්‍ය වේ. ලිංගිකත්වය පිළිබඳ දක්වන සාවද්‍ය ආකල්ප නිරවද්‍ය කිරීම තුළින් මනෝ ලිංගික ගැටලුවලින් ඉවත් වී සෞඛ්‍යවත් ලිංගික අත්දැකීම් සමඟින් යහපත් පවුල් සංස්ථාවක් ගොඩනඟා ගැනීමට හැකිවනු ඇත.
උපුටා ගැනීම මව්බිම
.jpg "මනාලිය විලාසිතා කුඩුවක් නොවේ")
