කේක් ආකෘතිය මනාලියගේ සාරියට ගළපන්න

සුදුසු කේක් ආකෘතියක් :
ඔබේ මංගල්‍යයට සුදුසු කේක් නිර්මාණය පිළිබඳ අදහසක් ඔබ සතුවීම වැදගත්. අද වන විට මේ සම්බන්ධව දැනුම්වත් වීමට ඇති අවස්ථා රාශියකි. වරින් වර පවත්වන ප්‍රදර්ශන, පුවත්පත්, සගරා මෙන්ම රූපවාහිනී වැඩසටහන් ඉන් කිහිපයක්. මෙම අවස්ථා ප්‍රයෝජනයට ගනිමින් ඔබේ මංගල්‍යයට සුදුසුම කේක් නිර්මාණය ඔබට තෝරාගත හැකිය.

කේක් නිර්මාණ ශිල්පියා :
මනාල යුවළ මෙම කරුණු පිළිබඳ සැලැකිලිමත්ව කේක් නිර්මාණ ශිල්පියා හමුවිය යුතුය. කේක් නිර්මාණ ශිල්පියා තෝරා ගන්නා විට ඔහුගේ හෝ ඇයගේ පෙර නිර්මාණයන් පිළිබඳ දැනුම්වත් වන්න. එවිට සුදුසුම නිර්මාණ ශිල්පියා සොයා ගැනීමට පහසු වනවා සේම ඔබට ඔහු කෙරෙහි විශ්වාසයද තහවුරු වේ. නිර්මාණ ශිල්පියා තෝරාගත් පසු ඔබේ මංගල සාරියේ වර්ණ, ඔබ සිත්ගත් කේක් නිර්මාණ ආදිය අතැතිව ඔහු හමුවීමට යන්න. ඔහුට ඔබේ සිතැගි පරිදි කේක් නිර්මාණය සිදුකිරීමට එය පහසුවක් වේවි. ඔබේ අවශ්‍යතාවත් වඩා හොඳින් ඉටුකර ගැනීමට මෙය පහසුවකි. විවාහ මංගල්‍යයට මාස 3කට වත් පෙර කේක් නිර්මාණ ශිල්පියා හමුවීමට යා යුතුය. එලෙස කල් තියාම ඇණවුම් භාරදීම ඔබට මෙන්ම නිර්මාණකරුටද පහසුවක් වේවි.

තේමාව :
වර්තමානයේ මංගල උත්සව සංවිධාන වන්නේ තේමා මුල්කර ගනිමිනි. වර්ණ මෙන්ම මල් සැරැසිලිද ඒ අනුව නිර්මාණය කරයි. මේ සියල්ල කේක් නිර්මාණය සමගද ගළපා ගත යුතුය. බොහෝ විට මෙම වර්ණ තෝරාගනු ලබන්නේ දෙවැනි මනාලියන් හැඩවන වර්ණයන්ගෙනි. ඒත් නවතම විලාසිතාව වන්නේ මනාලියගේ සාරියේ වර්ණය සමග කේක් ආකෘතිය ගළපා ගැනීමයි. මංගල උත්සව ශාලාව සරසන මල් සැරැසිලිද කේක් නිර්මාණය හා ගළපා ගත යුතුය. කේක් නිර්මාණයේ හැඩය, ප්‍රමාණය හා සැරැසිලි තීරණය කළ යුත්තේ ඔබ විසිනි. එය ඔබ අත ඇති මුදලට සරිලන අයුරින් නිර්මාණය වියයුතු වීමත් වැදගත්.

ප්‍රමාණය :
කේක් නිර්මාණයේ ප්‍රමාණය හා හැඩය එය පිහිටි අවකාශය සමගත් ගැළපිය යුතුය. එම නිසා සුවිසල් පෙනුමකින් යුත් මංගල ශාලාවකට ප්‍රමාණයෙන් උස කේක් නිර්මාණයක් වඩා උචිතය. උත්සව ශාලාවට ගැළපේ නම් මනා නිමාවෙන් යුත් නිර්මාණාත්මක කුඩා කේක් නිර්මාණයක් වුවත් කාගෙත් ආකර්ෂණය දිනා ගැනීමට සමත්ය.

විවාහ ගිවිස ගැනීම :
අතීතයේ විවාහ ගිවිස ගැනීම ඉතාම චාම් අයුරින් සිදුවිය. එහෙත් අද වන විවාහ උත්සවයක් තරමටම උත්කර්ෂවත්ව මෙය සමරනු ලබයි. මෙහි වෙනත් සැරැසිලිවලට එතරම් අවධානය යොමු නොවන නිසාම කේක් ආකෘතියට වැඩි ආකර්ෂණයක් හිමිවිය යුතුයි. මෙනිසා විවිධ අයුරින් වර්ණවත්ව කේක් ආකෘති හැඩගැන්වෙන අවස්ථාද ඇත.

නව අංග :
කේක් නිර්මාණය සැරැසීමේදී මල් මෙන්ම විවිධ අංග එයට එක්වේ. කේක් අලංකරණයට එක්වන නවතම අංගය වන්නේ ක්‍රිස්ටල්ය. ක්‍රිස්ටල් වැල් හා තේමා වර්ණයන්ගෙන් ආලෝකකරණය කිරීමත් මේ දිනවල වැඩි වශයෙන් දක්නට ලැඛෙන්නක්.

සාම්ප්‍රදායික ක්‍රමයට :
සාම්ප්‍රදායික විවාහ උත්සවයකට සූදානම් වේ නම් කේක් ආකෘතිය පිළිබඳ සැලැකිලිමත් විය යුතුමයි. සාම්ප්‍රදායිකත්වය සුරැකෙන අයුරින් කේක් ආකෘතිය නිර්මාණය කිරීමට වගබලා ගන්න. එහිදී පුන්කලස, ගල් කණු, හංසයන් ආදී ආකෘති මේ සඳහා මුල්කර ගනියි.

පාරිභෝගික සේවා :
කේක් නිර්මාණකරු තෝරා ගන්නා විට ඔවුන්ගේ සේවාවන් ගැනත් අවධානයෙන් පසුවන්න. කේක් එක නිමවා නියමිත වේලාවට පෙර ප්‍රවාහනය කර ලබා දෙන්නේ නම් එය ඔබටත් වඩා පහසුවක් වනු ඇත. එවන් සේවාවක් සපයන ස්ථානයක් තෝරා ගන්න. මංගල දිනට පෙර දිනයේදී කේක් ආකෘතිය ඔබට බැලීමට හැකි නම් එය වැදගත්. මන්ද ඔබ ඒ පිළිබඳ තෘප්තිමත් නොවුණොත් යම් වෙනසක් සිදු කිරීමට මෙහිදී අවකාශ ලැබේ.

ප්‍රවීණ කේක් නිර්මාණ ශිල්පිනී ලංකා චාන්දනී
උපුටා ගැනීම මව්බිම පුවත් පතඇසුරෙනි