විවාහ විමට සූදානමින් සිටින තරුණියක්ද?
විවාහ අපේක්‌ෂිත තරුණියන් හා නුදුරු දිනක විවාහ විමට සූදානමින් සිටින තරුණියන් දෙපිරිස අතර කාල පරාසය ගෙවන තරුණියන් මුහුණ දෙන ගැටලු සහ අභියෝග විවිධය. පළමුවෙන්ම පෙම්වතුන්ගේ අධික දුම්බීම, මත්පැන්, මත් ද්‍රව්‍ය භාවිතය හා වෙනත් තරුණියන් බහුලව ඇසුරු කිරීම යන ගැටලුව පිළිබඳ කථා කරමු.
ඇතැම් පෙම්වතුන් අධික දුම්පානයට, මත්පැනට, විෂ මත් ද්‍රව්‍ය භාවිතයට හුරු වී සිටිති.
ඔවුන්ගෙන් සමහරු විවාහ වූ පසු එම පුරුදු අතහරින බව පවසන අතර සමහරු එම පුරුදු අතහැරීමට සූදානම් නැත. තරුණියක්‌ විවාහ වන්නේ දහසක්‌ පැතුම් පොදි බැඳගෙනය. එම විවාහය තුළ රණ්‌ඩු සරුවල් ඇතිවීම, තම දෑස්‌ ඉදිරිපිට අගාධයකට වැටීම කිසිවෙක්‌ ප්‍රාර්ථනා නොකරයි. අධික දුම්බීම, මත්පැන්, විෂ මත් ද්‍රව්‍ය ආදියට පුරුදු වීමෙන් මුලින්ම තට්‌ටු වන්නේ තම මුදල් පසුම්බියටයි. ඊළඟට රටේ ලෝකේ අයගෙන් ණයට මුදල් ලබා ගනී. ඊළඟ පියවර මුදල් සොරකම් කිරීමයි. අවසානයේ ගේ දොර බඩු මුට්‌ටු විකුණා මුදල් ලබා ගනී. භාර්යාවගේ කන කර ආභරණ විකුණා දමයි. විෂ මත් ද්‍රව්‍යවලට ඇබ්බැහි වූ එක්‌තරා පියෙක්‌ තම අවුරුදු දෙකක්‌ වයසැති සිගිති දියණියගේ සපත්තු දෙක විකුණා එම මුදලින් විෂ මත් ද්‍රව්‍ය ගත් සිද්ධියක්‌ මම දනිමි. තම විවාහ ජීවිතය සුරක්‌ෂිත කිරීමට සුන්දර කිරීමට තිබෙන මුදල්, එලෙස විනාශ මුඛයට යෑවීමට විවාහ අපේක්‌ෂිත කිසිම තරුණියක්‌ කැමති නැත. මේ නිසා තම පෙම්වතා අධික දුම්බීම, මත් පැන් බීම, විෂ මත් ද්‍රව්‍ය භාවිතයට හුරු වී සිටී නම් පළමුව එම පුරුදුවලින් මුදවා ගත යුතුය. අඩු තරමින් පුනරුත්ථාපන මධ්‍යස්‌ථානයකට ගෙන ගොස්‌ හෝ එම පුරුදු අත්හැර ගැනීමට කටයුතු කළ යුතුයි. විවාහ වූ පසුව නවතන බව කියන කථා තනිකරම මුසාබස්‌ය. පෙම්වතියට අවංකව ආදරය කරන තරුණයෙක්‌ නම් පළමුව කළ යුත්තේ එම වැරදි පුරුදු අත්හැරීමයි.
අධික ලෙස වෙනත් තරුණියන් ඇසුරු කිරීමද මෙවැනි ගැටලුවකි.
තම පෙම්වතා වෙනත් තරුණියන් සමග ඇසුරු පවත්වයි නම් ඒ බව තමා හොඳින් දන්නේ නම් අවවාද කර එම පුරුද්දෙන් මුදවා ගැනීම අවශ්‍යය. විවාහ වූ පසු සිදු වූ මෙවැනි සිද්ධීන් නිසා පවුල් ජීවිත කොපමණ ප්‍රමාණයන් මේ වන විට දෙකඩ වී ඇත්ද යනු සිතා බැලිය යුතුයි. බොහෝ පෙම්වතියන් තම පෙම්වතා ඉහත පුරුදුවලට කොපමණ ඇබ්බැහි උනත් අධික බැඳීම නිසා ඒවා ඉවසා සිටිති. නමුත් අවසානයේ විවාහ වූ පසු අපා දුක්‌ විඳිති. පෙම්වතියක්‌ වූ පමණින් ආදරයෙන් අන්ධ විය යුතු නැත. පෙම්වතා තම අවවාද ගණන් නොගනී නම් ඔහු සමග විවාහ වීම පිළිබඳව දෙවරක්‌ සිතිය යුතුයි. මෙවැන්නන් සමග විවාහ වී ජීවිතය අගාධයකට වැටීම හෝ නොවැටීම තම තීරණය මත තිබෙන බව අවබෝධ කරගැනීම හොඳය.
මීළඟට තම පෙම්වතා චණ්‌ඩ පෞරුෂයෙන් යුක්‌ත වීම පිළිබඳ බලමු.
ඇතැම් තරුණියන්ගේ පෙම්වතුන් අධික චණ්‌ඩතාවයකින් යුක්‌ත වේ. සුලු දෙයින් කිපෙන නිතරම රණ්‌ඩුවලට පටලැවෙන ඇතැම් විට පෙම්වතියන්ටත් සැර පරුෂ ආකාරයට බනින, පහර දෙන පෙම්වතුන් සිටිති. ආදරයේ නාමයෙන් මෙවැන්නන් සමග විවාහ වීමට සූදානම් වීමද දෙවරක්‌ සිතා බැලිය යුත්තකි. ආදරය නම් උත්තරීතර හැඟීමකි. මෙවැනි චණ්‌ඩ පෞරුෂය ඇත්තන් තම අවවාද අනුව හෝ වෙනත් සුදුසු ආයතනයකට යොමු කිරීමෙන් හෝ සංසුන් කළ හැකි නම් එය වාසනාවකි. එසේ නැතිනම් පෙම්වතා අත හැරීමට නොහැකි කමින් ඔහු සමග විවාහ වනවාද විවාහ වී සැමියාගෙන් බැනුම් අසමින් පහර කමින් කල් ගෙවනවාද යන්න තරුණියන්ගේ තීරණයකි.
තරුණියන් මුහුණ දෙන තවත් ගැටලුවක්‌ වන්නේ තම පෙම්වතා සමග විවාහ වීමට කලින් අඹු සැමියන් ලෙස එක්‌වීමයි.
එවැනි අත්දැකීමකට ලක්‌ වූ තරුණියන් පසු වන්නේ දැඩි මානසිත ආතතියකිනි. ඒ මන්ද යත් පෙම්වතා තමා හැරයයිද විවාහ කරගනීද යන්න පිළිබඳවය. අප ජීවත් වන්නේ පෙරදිග සංස්‌කෘතික රාමුවක්‌ තුළ බැවින් අපට ආවේනික සමාජ සිරිත්වලට ගරු කිරීමද අවශ්‍ය දෙයකි. බොහෝ පෙම්වතුන් තම පෙම්වතියන් සමග අඹුසැමියන් සේ එක්‌වීමෙන් පසු තම පෙම්වතියගේ කලින් දුටු වටිනාකම ආදරය අඩු වී යයි. ඇයව තමාට ඕනෑ පරිදි නැටවීමට පෙළඹෙති. ඇතැම් පෙම්වතුන් පෙම්වතිය හැර යයි. මේ නිසා විවාහ වූ පසු කළ යුතු දේවල් ඉන් පෙර අත්විඳීමට යාම නොකළ යුතු දෙයක්‌ බව තරුණියන් සිත් හි තබා ගැනීම වැදගත්වේ.
ඇතැම් තරුණියන් තුළ තිබෙන තවත් ගැටලුවක්‌ නම් විවාහ වීමට බිය සහ පිරිමින් කෙරෙහි පවතින සැකයයි.
විවාහ වූ පසු තමාට ආදරය, රැකවරණය ලබා දිය හැකි පෙම්වතෙක්‌/සැමියකු තමාට ලැබේ යෑයි පවතින සැකය ඇතැම් තරුණියන් තුළ ඇත. බිය පිළිබඳව ගතහොත් දෙයාකාර බියක්‌ දැක්‌විය හැකිය. පළමුවැන්න නම් පිරිමින් කෙරෙහි පවතින අවිශ්වාසයයි. බොහෝ විට තම පියා තම මව සමග රණ්‌ඩු වීම මවට සහ තමාට බලවත් ලෙස පහර දෙනු ලැබූ විට එම අමිහිරි අත්දැකීම විවාහ වූ පසු සැමියාගෙන්ද ලැබේ යයි පවතින බියයි.දෙවැනි බිය නම් ලිංගික එක්‌වීමට ඇති බියයි. ඇතැම් තරුණියන් විවාහ පසු සැමියා සමග ලිංගික එක්‌වීමට අධික බියක්‌ දක්‌වයි. මනෝ විද්‍යාවේ මෙම තත්ත්වය වැජිනිස්‌මස්‌ යනුවෙන් හදුන්වනු ලැබේ. තරුණියන් තුළ පවතින මෙම තත්ත්වය මනෝ ප්‍රතිකාර සහ උපදේශනය තුළින් සමනය කළ හැකි තත්ත්වයකි. එම නිසා එවැනි බිය සහ සැකය තිබේ නම් සුදුසු මනෝ ප්‍රතිකාර සඳහා යොමු වීම වැදගත් වේ.
විවාහ අපේක්‌ෂිත තරුණියන් තුළ පවතින තවත් ගැටලුවක්‌ නම් එක්‌ පෙම්වතෙකු සමගින් තෘප්තිමත් නොවිය හැකි බවයි.
පෙම්වතා කොපමණ ආදරය කළත් ඔහු සිටිද්දීම හෝ ඔහු හැර දමා වෙනත් තරුණයකු ඇසුරු කිරීමට තරුණිය පෙළඹේ. මෙවැනි තරුණියන් බොහෝ විට විවාහයට කලින් තම කන්‍යාභාවයද සිඳ ගනු ලබති. විවාහ වූ පසුද මෙම පුරුද්ද දිගටම යා හැක. උපදේශන සේවා මගින් මෙම පුරුදු බොහොමයක්‌ නවතා ගත හැකි නමුත් තවත් සමහර අයට ජානමය බලපෑමක්‌ හේතුවෙන්ද සිදුවිය හැක.විවාහ අපේක්‌ෂිත තරුණියන් තුළ තිබිය යුතු වැදගත් ලක්‌ෂණයක්‌ නම් විශ්වාසයයි. තමාගේත් පෙම්වතාගේත් අෙන්‍යාන්‍ය විශ්වාසය තහවුරු කර ගැනීමයි. පෙම්වතියගේ පෞද්ගලිකත්වය පෙම්වතා ආරක්‌ෂා කළ යුතු අතර පෙම්වතාගේ පෞද්ගලිකත්වය පෙම්වතිය ආරක්‌ෂා කළ යුතුය. ඔවුනොවුන් එකිනෙකාගේ තොරතුරු වාචාලකමට කථා නොකල යුතුය. එකිනෙකා ගේ ආත්ම ගරුත්වයට ගරු කල යුතු වේ. එමෙන්ම එකිනෙකාගේ මතවලට ගරු කළ යුතුය. විශේෂයෙන් පෙම්වතුන් පෙම්වතියන් ආගම් අතින් සංස්‌කෘතින් අතින් වෙනස්‌ වූ විට එකිනෙකා ගේ ආගම් සංස්‌කෘතින් සිරිත් විරිත් හෙලා දැකීමට කළ යුතු නොවේ.
තරුණියන්ගේ විවාහය ප්‍රමාද වීමට බලපාන තව සාධකයක්‌ වන්නේ මාන්නයයි.
ජාති ආගම් කුල වශයෙන් හෝ අධ්‍යාපනික තත්ත්වය සමාජ තත්ත්වය ආදී කරුණු මුල් කරගෙන ඇති කරගත් මාන්නය හේතුවෙන් බොහෝ තරුණියන්ට විවාහය කර ගත නොහැකිව ලත වෙන ආකාරය සමාජය දෙස බැලීමෙන් පෙනේ. අවබෝධය තුළින් ආකල්ප වෙනස්‌ කර ගැනීමෙන් මෙම තත්ත්වයෙන් මිදුන හොත් විවාහය පිළිබඳ ශුභවාදී අපේක්‌ෂාවන් උදාකර ගත හැකි වනු ඇත.
විවාහ අපේක්‌ෂාවෙන් සිටින තරුණියන් මුහුණ දෙන තව ගැටලුවක්‌ වන්නේ අතීතයේ යම් අවස්‌ථාවකදී ලිංගික අතවරයකට මුහුණ දී සිටීමයි.
ඇතැම් විට ඥාතියකු අතින් හෝ සාහසිකයකු අතින් මෙවැනි අනතුරු සිදු වුනා විය හැකියි. තම සත්‍ය තත්ත්වය වසන් නොකර පැවසීමෙන් ආදරය හඳුනන කරුණාවන්ත පුද්ගලයකු මුණ ගැසීමට හැකියාවක්‌ ඇති අතර තම පෞරුෂය වර්ධනය කර ගැනීමත් මානසිකව කඩා නොවැටීමටත් වග බලා ගත යුතුයි.
තම පෙම්වතා තමා හැර යාම නිසා සියලු පිරිමින්ට ද්වේශ කරමින් විවාහ නොවීමට තීරණය කිරීමද ගැටලුවකි.
තමා තුළ හටගත් අධික කලකිරීම කෝපය සහ ඉච්චා භංගත්වය මීට හේතු විය හැක. මොවුන්ද මනෝ ප්‍රතිකාර සහ උපදේශන සේවයකට යොමු වීමෙන් මොවුනගේ ආකල්ප වෙනස්‌ කර ගැනීමටත් ඉන් සමබර මනසකින් යුක්‌තව විවාහය පිළිබඳ යහපත් බලාපොරොත්තු ඇති කරගැනීමටත් හැකිය.
විවාහ වීමට අපේක්‌ෂාවෙන් සිටින නමුත් විවාහයට බියක්‌ පසු බෑමක්‌ දක්‌වන තවත් තරුණියන් පිරිසක්‌ සමාජයේ දක්‌නට ඇත.
ඔවුන්ගේ පසු බෑමට හේතුව නම් තම ලිංගික අවයව හෝ පියයුරු ප්‍රමාණයෙන් කුඩා යයි පවතින විශ්වාසයයි. මෙය බොහෝ විට මානසිකව ඇති වන ගැටලූවකි. නමුත් මෙවැනි ගැටලූ සඳහා සාර්ථක මානසික ප්‍රතිකාර මෙන්ම කායික ප්‍රතිකාරද ඇත. සුදුසු ස්‌ථානයකට යොමු වීමෙන් එම ගැටලූවලට සහනයක්‌ ලබාගත හැකිය.
තරුණියන්ගේ විවාහය ප්‍රමාද වීමට බලපාන තවත් හේතුවක්‌ නම් සම ලිංගික සේවනයයි.
මෙවැනි පුරුද්දකට යොමු වූ අයට විවාහ වීමට අවශ්‍යතාවක්‌ නැත. පිරිමින් කෙරෙහි බැඳීමක්‌ ඇති නොවේ. නමුත් ඉන් මිදීමට ඒ අවංක අවශ්‍යතාවයන් ඇති අයට ස්‌ථිරවම සහනය ලබා දිය හැකි ප්‍රතිකාර තිබෙන බවත් ඉන් විවාහය පිළිබඳ ශුභදායක අපේක්‌ෂාවන් ඇති කර ගත හැකි බවත් පැවසිය හැක.
