විවාහයට සූදානම් වන ඔබට...
විවාහය යනු ආදරණීය දෙහදක එක් වීමකි. සාර්ථක විවාහ ජීවිතයක් ගත කිරීමට වැදගත්වන කරුණු රාශියකි. ඔබගේ විවාහ දිනය ගැන ඔබ කෙතරම් සැලකිලිමත් වේද යත්, ඔබගේ මංගල ඇඳුම, ආහාර, විවාහය සිදු කරන ස්ථානය, මල් සැරසිලි සහ එදින මංගල කටයුතු කිසි අතපසුවීමක් නැතිව සිදු වන්නේ දැයි ඔබ වඩාත් සැලකිලිමත් වෙයි. නමුත් ඔබගේ විවාහ දිනයෙන් ඔබ්බට එළැඹෙන කාලය පිළිබඳ සැලකිලිමත් වන්නේ අල්ප වශයෙනි. එබැවින් ඔබගේ විවාහ දිවිය සාර්ථකව ගත කිරීමට අවශ්‍ය වන කරුණු කිහිපයක් පිළිබඳ අපි පහත සාකච්ඡා කරමු.
අලුතින් විහායට පත් වූ යුවළකට පළමු දරු උපත පමා කිරීමට අවශ්‍ය නම් පහත ක්‍රම භාවිත කළ හැකිය.
- හෝර්මෝනමය ගිලින පෙති
- කොන්ඩම්/ කොපු
- සමට යටින් තැන්පත් කරන කරල් (ජඩෙල්/ ඉම්ප්ලනෝන්)
සම්මත දින ක්‍රමය ඉහත ක්‍රමය නැවැත්වූ වහාම දරුපල ලැබීමට ඔබට අවස්ථාව ඇත. මේ සඳහා අදහසක් ඇති නම් වෛද්‍යවරයකු හමු වී සාකච්ඡා කරන්න. විවාහයෙන් පසු ඉක්මනින් ගැබ් ගැනීමක් බලාපොරොත්තු වන්නේ නම්, මතක තබා ගත යුතු දේ,
- දරු ගැබ දෙදෙනාටම අවශ්‍ය එකක් වීම.
- කාන්තාව රුබෙල්ලා එන්නත ලබා තිබීම.
- අඛණ්ඩ අනාරක්ෂිත ලිංගික සංසර්ගයේ යෙදීම (සතියකට 4-5 වරක් වත්)
- සරු කාලය පිළිබඳ වැඩි අවධානය යොමු කිරීම (ක්‍රමවත් ඔසප් චක්‍රයක් ඇති කාන්තාවකගේ මාසික ඔසප් වීම ආරම්භ වී 8 වැනි දිනයේ සිට 20 වැනි දිනය දක්වා)
- අනෙක් කායික රෝග නිසි පරිදි පාලනය කිරීම (දියවැඩියාව /අධි රුධිර පීඩනය)
- ගැබ් ගැනීමට පෙර සිට දිනපතා පෝලික් අම්ලය පෙති ගැනීම
- උසට සරිලන බර පවත්වා ගැනීම
- යහපත් පුරුදු පුහුණු කිරීම.
- දුම්පානයෙන් වැළැකීම.
- මත්පැන් පානයෙන් වැළැකීම.
- වෙනත් මත්ද්‍රව්‍ය භාවිතය නැවැත්වීම. (පිරිමි පුරුෂ ධාතු වැඩිවීමට ඉහත යහපත් කරුණු බලපායි)
- ලිංගාශ්‍රිත ප්‍රදේශයේ සනීපාරක්ෂාව පිළිබඳ සැලකිලිමත් වීම.
- මානසික ආතතිය නිසි ලෙස පාලනය කිරීම.
- නිවෙස තුළ ගෘහස්ථ හිංසනයෙන් තොර වීම.
වැදගත්
- මාසික ඔසප් චක්‍රය නැවත දින 14කින් පමණ පසු මුත්‍රා පරීක්ෂාවක් මඟින් හෝ ස්කෑන් පරීක්ෂාවක් මඟින් ගැබ් ගෙන ඇත්දැයි තහවුරු කර ගත හැකිය.
- ඊට පෙර දැන ගැනීමට අවශ්‍ය නම් රුධිර පරීක්ෂණයක් කර ගන්න.
තම සහකරු / සහකාරිය අතර තිබෙන බැඳීම ශක්තිමත් කර ගැනීම දිගු කාලීන විවාහයකට අඩිතාලම වෙයි. ඒ සඳහා,
- තම පෞද්ගලික සෞඛ්‍යය ආරක්ෂා කර ගන්න.
- දෙදෙනා අතර අදහස් හුවමාරුව/ කතා කිරීමට පුරුදු වන්න.
- ගෙදර දොර වැඩ කටයුතු අනේ‍යාන්‍ය අවබෝධයකින් දෙදෙනාම බෙදාගෙන කිරීමට එක් වන්න.
- ප්‍රශ්න නිරාකරණය සඳහා නිතරම යොමු වන්න. පසුවට කල් නොතබන්න. අවශ්‍ය නම් උපදේශනයට යොමු වන්න.
- ආවේගශීලී ගති අවම කරන්න. විශ්වාසය ගොඩනඟන්න. කේන්තිය අවම කරන්න.
- ගැහැනිය හා පිරිමියා කායික/ මානසික අතින් වෙනස් දෙදෙනකු බව හොඳින් මතක තබා ගන්න.
- හිංසනය ප්‍රශ්න විසඳන මාර්ගය නොවන බව හොඳින් සිහි තබා ගන්න.
- දෙදෙනා අතර සාකච්ඡා කර තම ගැටලු අතපසු වීම් විසදා ගැනීමට හැමවිටම පෙලඹෙන්න.
ඔබට මේ පිළිබඳ වැඩිදුර විස්තර දැන ගැනීමට අවශ්‍ය නම් 2 588488 දුරකතනයට අමතන්න. නැත්නම්, පවුල් සෞඛ්‍ය මධ්‍යස්ථානය 37/27, බුලර්ස් පටුමඟ, කොළඹ 07 වෙත පැමිණෙන්න. (සතියේ දිනවල උදේ 8.30 සිට සවස 4.00 දක්වා)
මව්බිම
