මඟුල් පෝරුවේ වාස්තු දෝෂ නිසා සිදුවන කරදර
වාස්තු ශිල්පය නමැති ඍෂි දහමින් සෑම විටම හුදී ජනයාගේ ලෞකික ජීවිතය යහපත් කර ගැනීම උදෙසා වූ සාර්ථක ක්‍රියා පිළිවෙත පිළිබඳ උපදෙස් දෙනු ලබයි. වාස්තු ශිල්පය තුළින් පුද්ගලයකුගේ ජීවිතයේ මූලික අවස්ථා තුනක් පිළිබඳ විශේෂ සැලකිල්ලක් දැක්විය යුතු අතර එම අවස්ථා තුන පුද්ගලයාගේ ජීවිතයේ මංගල කාරණා වශයෙන් නම් කර තිබෙනවා. මෙම මංගල කාරණා තුන යම් පුද්ගලයකුගේ ජීවිතයේ ගමන් මඟෙහි සාර්ථක භාවය හෝ අසාර්ථක භාවය තීරණය කරන්නා වූ ප්‍රධාන සන්ධිස්ථාන තුනක් වශයෙන් පෙන්වා දී තිබෙනවා එනම්,
- ජන්ම (ඉපදෙන අවස්ථාව)
- විවාහ (විවාහ වන අවස්ථාව)
- ගෘහය (ගෘහයන් ඉදිකර හා පදිංචි වීම)
ඉහතින් පෙන්වා දී ඇති ජන්ම, විවාහ හා ගෘහ යන අවස්ථාවන් තුන පුද්ගල ජීවිතයේ යහපත් හෝ අයහපත් බව තීරණය කරන්නා වූ මූලික හැරවුම් ලක්ෂ තුනක් ලෙස පෙන්වා දී ඇති අතර එම අවස්ථා තුන ඔබගේ ජීවිතය සඳහා යහපත් ලෙස යොදා ගැනීමට අවැසි උපදෙස් වාස්තු ශිල්පය තුළ ලබා දී ඇත්තේ පුද්ගලයාගේ ලෞකික ජීවිතය යහපත් සුවපත් කර ගැනීම උදෙසා වෙයි. මෙම ලිපියෙන් ඔබගේ අවධානය යොමු කරනු ලබන්නේ විවාහ අවස්ථාව උදෙසා ඔබට අවැසි වාස්තු ශිල්පීය දැනුම සම්භාරයෙන් බිඳක් ලබා දීමටයි. වාස්තු ශිල්පය තුළ විවාහ අවස්ථාව මුල් කර ගන්නා වූ වාස්තු සිද්ධාන්ත රාශියක් පෙන්වා දී ඇති අතර ගෘහය තුළ වාස්තු එකඟ කිරීමේදී පුද්ගලයාගේ විවාහ ජීවිතය නැත්නම් ගෘහ ජීවිතය සාර්ථක කර ගැනීම උදෙසා අවශ්‍ය වන පිහිටීම් සිදු කරනු ලබයි. මෙම අවස්ථා අතරින් අභිනව මංගල යුවළ උදෙසා ගෘහයක් ආශ්‍රිතව "මඟුල් සභාව" තුළ "මංගල පීඨය" නැත්නම් "මංගල පෝරුව" වාස්තු ශිල්පයට අනුකූලව ඉදිකර ගන්නා ආකාරය ඔබට පෙන්වා දෙන්නම්.
වාස්තු ශිල්පයට අනුව පෝරුව :
මෑතක් වන තුරුම විවාහ චාරිත්‍ර වාරිත්‍ර සිදු කරනු ලැබුවේ ගෘහයන් ආශ්‍රිතව වුවත් නූතනයේදී බොහෝ පිරිස් තමන්ගේ මංගල උත්සවය නිවෙසින් බැහැරව හෝටලයක හෝ උත්සව ශාලාවක සිදු කරනු ලබයි. වර්තමානයේ පවතින තරගකාරී වෙළෙඳ ලෝකය හමුවේ මෙවැනි හෝටල් සහ උත්සව ශාලාද විශාල වශයෙන් නිර්මාණය වී පවතිනවා. කාර්යබහුලත්වය හා ගෘහයන් තුළ පවතින ඉඩකඩ සීමා සහිත බව කියා මිනිසුන් වඩාත් පහසු ලෙස මංගල උත්සවය උදෙසා ගෘහයෙන් පිට පරිශ්‍රයන් තෝරා ගැනීමට පෙලැඹී සිටීම වාස්තු ශිල්පයට අනුව නිවැරැදි නොවන බව පෙන්වා දෙනවා. ජීවිතයේ වැදගත්ම අවස්ථාව තමන්ගේ ගෘහ පරිශ්‍රයේ සිදුකිරීම තුළින් විවාහ ජීවිතය සාර්ථකභාව වඩාත් වැඩි කර ගත හැකි අතර පිට ස්ථානයක එම කටයුත්ත සිදු කිරීම තුළින් අපගේ ජීවිතයේ වැදගත්ම අවස්ථාවට හිමිවීමට තිබූ විශ්ව ශක්තීන් අහිමි වී යෑම සිදුවිය හැකියි.
ගෘහයෙන් බැහැරව විවාහ කටයුතු සිදුකිරීමේදී ඔබට අහිමි වන දෑ :
- ඔබගේ ගෘහයේ ඇති විශ්ව ශක්තීන් ඔබගේ ජීවිතයට නොලැබෙනු ඇත.
- ගෘහය ආශි්‍රතව ජීවත් වන භූමි ඥාතීන්ගේ ආශීර්වාදය අහිමි වනු ඇත.
- ගම්තුලාන භාර ගම්භාර දෙවියන්ගේ ආශීර්වාදය අහිමි වනු ඇත.
- ඔබගේ සංසාර ගත දිව්‍ය ඥාති සමූහයාගේ ආශීර්වාදය අහිමි වනු ඇත.
නිවෙසින් පිටත විවාහය සිදුකිරීම් අවාසි :
ඔබගේ ගෘහයේ තමන්ගේ මංගල උත්සවය සංවිධාන කිරීමේදී ඔබගේ ගෘහ පරිශ්‍රයේ පවතින තත්ත්වයන් ඔබට යහපත් ලෙස සෑම විටම බලපානු ඇත. එසේ වුවද ඔබ නොදන්නා උත්සව ශාලාවක හෝ හෝටලයක සිදු කරනු ලබන විවාහ උත්සවයකදී එහි තිබෙන වාස්තු එකඟ වීම් ඔබට සැමවිටම අයහපත් ලෙස බලපාන බව ඔබ දන්නවාද? උත්සව ශාලා සහ හෝටල් ආශ්‍රිතව සිදු කරනු ලබන මංගල උත්සව රාශියක් මා විසින් නිරීක්ෂණය කොට ඇති අතර එහිදී පහත සඳහන් විශේෂ අවස්ථා රැසක් හඳුනා ගත හැකි විය.
- සමහර උත්සව ශාලාවල වැසිකිළි වළවල් හෝටලය තුළ යෙදෙන අතර මංගල පෝරුව ඉදිවන්නේ වැසිකිළි වළ මත වෙයි.
- සමහර හෝටල්වල වහලයේ කැණිමඬල සහ සොහොන් පරාල මෙන්ම තනි පලයේ වහල යෙදෙන අතර වහලයේ යෙදෙන ජල කානු යට මංගල පෝරුව ඉදිවී තිබේ.
- පැරැණි සොහොන් යටකොට ඉදිකර ඇති හෝටල් සහ ළිං වසා ඉදිකර ඇති හෝටල් ආශ්‍රිතව මංගල පෝරුව ඉදිවන්නේ ඒවා උඩ වෙයි.
- මුළු පරස් සහිත හෝටල් සහ වැරැදි හැඩතල සහිත හෝටල් ආශ්‍රිතව මංගල පෝරුව එම වැරැදි තරංග ගමන් ගන්නා රේඛාවන්ට හසු වී ඉදිවී ඇත.
- සමහර හෝටල්වල ඉහළින් හෝ පහළින් යෙදෙන වැසිකිළි හෝ උඳුන් මත හෝ යට පෝරුව ඉදිවන බව පෙනී යයි.
මේ ආකාරයට ඔබගේ ජීවිතයේ වැදගත්ම හෝරාවේ යෙදෙන මංගල නැකැත සහ චාරිත්‍ර ඉටු වන්නේ ඉහතින් සඳහන් කළ පරිශ්‍රයක බව ඔබ දන්නේ නැහැ. එසේ වුවද ඒ තුළින් උදාවන්නා වූ අයහපත් ප්‍රතිඵල ඔබගේ ජීවිත කාලයටම ඔබට භුක්ති විඳීමට සිදුවනු ඇත. එම අයහපත් ප්‍රතිඵල පහත පරිදි හඳුනා ගනිමු.
- දරුපල අහිමි වීම
- ස්වාමි භාර්යා අසමඟිය
- දික්කසාදය
- මානසික පීඩනය සහ ලෙඩ දුක් බහුල වීම
- නිරෝගී නොවූ දරුවන් ලැබීම
ඔබගේ ජීවිතයේ වැදගත්ම මංගල කාරණයක් වන විවාහ අවස්ථාව ඔබගේ උරුමකරු ගෘහය තුළ සිදු කර විවාහ ජීවිතයේ වාසනාව උදාකර ගැනීමට ඔබත් බුද්ධිමත් වන්න.
වාස්තු සිද්ධාන්තවලට අනුකූලව මංගල පෝරුව ඉදිකිරීම :
ඔබගේ ජීවිතයේ ප්‍රධාන හැරවුම් ලක්ෂයක් වන විවාහ අවස්ථාවේදී ඔබ විසින් විශ්ව ශක්තීන්ට නිරාවරණය වී ඒ තුළින් අනාගත ජීවිතය සාර්ථක කර ගැනීම උදෙසා ඔබගේ ගෘහ පරිශ්‍රයේ මංගල පෝරුව නිසි පරිදි ඉදිකිරීම සහ ස්ථාන ගත කරන පිළිවෙළ හඳුනා ගන්න.
දිශාව :
මංගල පෝරුව සැමවිටම උතුර, ඊශාන හෝ නැඟෙනහිර දිශාවට මුහුණලා ඉදිකිරීම කළ යුතු වෙනවා. මෙහිදී නැකැත් යෙදෙන දිශාව අනුව උතුරු හා නැඟෙනහිර දිශාවන් තීරණය කළ යුතු අතර ඊශාන දිශාව සෑම දිනයකටම සුබ දිශාව වනු ඇත.
ස්ථානය :
ඔබගේ ගෘහයේ ඉදිවන මංගල පීඨය සෑම විටම ඉදිවන නිසි ස්ථානයක් තිබෙනවා. එහිදී ගෘහයේ පිහිටිම පරිදි එය තීරණය කිරීම කළ යුතු අතර මංගල පෝරු කිසිම විට ගෘහයේ බ්‍රහ්ම පාදය මත එය යටවන පරිදි ස්ථානගත කිරීම නොකළ යුතු වෙයි.
ගෘහයේ මංගල ද්වාරය යෙදී ඇති දිශාව අනුව මංගල පෝරුව ස්ථාන ගත කළ යුතු පිළිවෙළ පහත පරිදි හඳුනා ගනිමු.
දිශාව බලවත් කරන සැරැසිලි :
ඔබගේ මංගල පෝරුව සඳහා යොදා ගන්නා කලාත්මක සැරැසිලි සෑම විටම මනාලයාගේ හා මනාලියගේ ජන්ම නැකැතට බලවත් වන සැරැසිලි විය යුතු අතර ගෘහයේ මුහුණත දිශාවට එම සැරැසිලි බලවත් කළ යුතුය.
මංගල ද්වාරයේ දිශාව සහ සැරැසිල්ල
- උතුර - ලියවැල, හංස පූට්ටුව, පුන්කලස
- දකුණ - පුන්කලස, හස්ති රූපය, මොනර රූපය, මිදිවැල්, අන්නාසි මල
- නැඟෙනහිර - ඉර-හඳ, පුන්කලස, ලියවැල, හංස රූපය
- බටහිර - ඉර-හඳ, පුන්කලස, ඇත් රූපය
නොඉඳුල් මංගල පෝරුව සඳහා ගොක් අතු යොදා ගන්න.
ඔබගේ මංගල පෝරුව සඳහා ගොක් අතු යොදා ගැනීම ඉතාමත් යහපත් බව පෙන්වා දෙමි. කුමන ද්‍රව්‍ය යොදා ගත්තද එක ගොක් අතු කෑල්ලක් හෝ පෝරු මස්තකයට යෙදිය යුතුයි. ගොක් අතු යෙදීම තුළින් ඔබගේ පෝරුවට දේව ආකර්ෂණය ලබා ගැනීමේ හැකියාව බලවත් වනු ඇත. එසේම ඔබගේ මංගල පෝරුව නොඉඳුල් මංගල පෝරුවක් වීම ඉතාමත් වැදගත්. කුලියට ගන්නා මංගල පෝරු යොදා ගැනීම ඔබගේ අනාගත ජීවිතයට අයහපත් ලෙස බලපාන බව කිව යුතුයි. නොඉඳුල් මංගල පෝරුව ඔබගේ ජීවිතය සාර්ථක කිරීමේ මංගල පීඨිකාව වනු ඇත. ජීවිතයේ වැදගත්ම සන්ධිස්ථානයක් වන විවාහ අවස්ථාව සඳහා ඔබට අවැසි වාස්තු ශිල්පීය දැනුම එක් කළේ ඔබගේ ජීවිතය සාර්ථක කර ගැනීම පිණිසයි. විවාහ අවස්ථාවේදී මංගල පෝරුව මත සැම විටම මනාලයාට වම් පසින් මනාලිය සිටිය යුතු අතර ඊශාන දිශාව බලා තමන්ගේ විවාහ ගිවිස ගැනීම සිදු කළ යුතුයි. මෙම අවස්ථාවේදී ඔබගේ කුසල් තව තවත් උද්දීපනය කර ගැනීමේ වාස්තු පිළිවෙත් සහ උපක්‍රම පිළිපැදිය යුතු අතර මුලින් සඳහන් කළ විශේෂ කාරණාවලට අනුගතව ඔබගේ මංගල උත්සවය සංවිධාන කර ගන්න.
උපුටා ගැනීම මව්බිම
