සුන්දර හඳහනක සැඟවුණු ගින්දර
තරුණයකුගේ හෝ තරුණියකගේ විවාහය පිළිබඳ සුබ සිහින අපමණය. තමනට හිමිවන පෙම්වතා පෙම්වතිය අනාගත සහකරු සහකාරිය ලෙස ගලපා ගැනීමට තරුණ තරුණියන් විමසුම් සහගතය.
අනෙකාගේ යුගදිවි බන්ධනය පිළිබඳව ගොනු කිරීම් නිරීක්‍ෂණය වැදගත්ය. එය තමන්ගේ යුගදිවිය සමග සාපේක්‍ෂව දැකීම වැදගත් සේම හරවත්ය. තම කේන්ද්‍ර සටහන විමසුම් කිරීමෙන් තමන්ටම මේ පිළිබඳව මනා අවබෝධයක්‌ ලද හැකිය.
තරුණ දියණියක හෝ පුතණුවකු සිටින දෙමාපියනගේ එකම ප්‍රාර්ථනය ඇයට හෝ ඔහුට යහපත් විවාහයක් කරදීමය. යහපත් දරු පරපුරක්‌ දැකීම දෙමාපියන්ගේ ඒකායන පැතුමය.
ප්‍රේමය සාමය සමගිය සමග බැඳුණු අර්ථවත් යුග දිවියක්‌ තම දිවිය පුරා ගත කිරීම විවාහ අපේක්‍ෂකයන්ගේ සුන්දර ප්‍රාර්ථනයකි. දිවිමග දුක සැප සම ලෙස බෙදා ගැනීම තුළින් සාර්ථක යුගදිවියක්‌ උදාකර ගත හැකිය.
විවාහයෙන් පසු එක්‌ අයකුගේ රෝගී වීමක්‌ අනෙකාට දැඩි මානසික පීඩාවක්‌ විය හැකිය. රෝගී සහකරු හෝ සහකාරියට වඩා ඇයට හෝ ඔහුට ආර්ථික පීඩා - ආදායම් මාර්ග නැතිවීම අනෙකාගේ සිත් තැවුලට පත්වීමට හේතුවකි. ඉතා අවාසනාවන්ත ලෙස තම සහකරු මියයැමද මෙහි ශෝචනීය උරුමය උපරිම ලෙස හිමිවීමකි.
අනෙකා මියයැම තුළ එකෙකු කණවැන්දුම් බවට පත්වෙයි. ස්‌ත්‍රිය කණවැන්දුම් විම තුළ ඇයට ජීවන ගැටලු රැසක්‌ හිමිවෙයි. තම යුගදිවිය තුළ පමණක් නොව සමාජය තුළින්ද ද එවන් කාන්තාව පීඩාවට පත්වෙයි. අසරණ වූ කාන්තාවකට තම බුද්ධිය තුළින් ජීවිතය ජයගත හැකිය. සුකොමළ කාන්තාවකට නිවැරැදි බුද්ධිය හෝ සමාජමය පීඩනය දරා ගැනීමට නොහැකි වුවහොත් නිසැකවම එම කාන්තාව අසරණ වෙයි. වැඩිහිටියකුගේ නිවැරැදි මග පෙන්වීමක්‌ නොලදහොත් පීඩාවට, අපේක්‍ෂා භංගත්වයට පත්වෙයි. එහි අවසානය දිවියෙන් සමුගැනීමද වරදට පෙළඹීමද?
මේ පිළිබඳව තරුණ තරුණියන් මනා අවබෝධයක්‌ ලැබිය යුත්තේ තම කේන්ද්‍ර සටහන අනුවය. තම කේන්ද්‍ර සටහනෙන් අනෙකාගේ ගති සොභාවයන් විනිවිද දැකිය හැකිය. එපමණක්‌ නොව රැකියාව යස අයස පිළිබඳවද විග්‍රහ කොට දැකිය හැකියි. නොගැලපෙන කේන්ද්‍ර සටහන් දෝෂ භංග කිරීම් තුළින් ගැලපීම් ගොනුවෙයි. පොරොන්දම් පරීක්‍ෂණය කේන්ද්‍ර සටහන් නිරීක්‍ෂණය එයට අත්වැලක්‌ සපයයි.
කේන්ද්‍ර සටහනක තම සහකරු සහකාරිය පිළිබඳ සටහන් වන්නේ එපමණක්‌ නොවේ. සහකරුගේ දෙමාපියන්, සහෝදර සහෝදරියන් සහ ඥති වර්ගයා පිළිබඳවද ඔහුගේ ඇයගේ කර්මය කුසලය රෝග නිධාන පිළිබඳව ද තම කේන්ද්‍ර සටහනෙන් නිවැරැදිව හඳුනාගත හැකිය.
තමනට කණවැන්දුම් යෝගයක්‌ තිබේද නැතහොත් අනෙකාට කණවැන්දුම් යෝගයක්‌ තිබේ දැයි විවාහ අපේක්‍ෂකයන්ට තම තමන්ගේ කේන්ද්‍ර සටහන් පරීක්‍ෂාවකින් අවබෝධයක්‌ ලැබිය හැකි වෙයි.
සිකුරු දුර්වලව හෝ පාපයන් දැකීමෙන් සතුරුගතව පස්‌වැන්නේ සිටීම සහකරුට බලවත් ලෙස අපලකාරි වෙයි. සහකරු හදිසි අනතුරකින් හෝ විශාල ලේ වැගිරීමකින් මියයැම එහි ප්‍රතිඵලයකි. කුජ නීච රාශියක සිටීම සහ එය හත්වැන්න ලෙස සෙනසුරු සමග රාශිගතවීම යහපත් නැත. පාපයන් විසින් දකිනු ලබන හත්වැන්නේ සතුරුගත රාහුද ස්‌ත්‍රී කේන්ද්‍රයකට යහපත් නොවෙයි. ඇය සැමියා විසින් අතහැර දැමීම සිදුවිය හැකිය. නැතහොත් කණවැන්දුම් වෙයි. රාහු බලවත්ව හත්වැන්නේ සිටීම විවාහ දිවියට යහපත්ය. කේන්ද්‍ර සටහනක හත්වැන්නෙන් යුගදිවිය පිළිබඳ විමසුම් කළද යුගදිවියේ පැවැත්ම පිළිබඳව කියෑවෙන්නේ කේන්ද්‍ර සටහනේ දෙවැන්නෙනි. දෙවැන්නට සතුරු ග්‍රහයකු සත්වැන්නේ සිටීම විවාහය බිඳීයැමක්‌ නොවේ. යුගදිවිය ආරක්‍ෂා වනනේ දෙවැන්නේ බලවත්වීම අනුවය. එයට දෙවැන්නාධිපතිගේ බලවත්වීම යෑයි සඳහන් කිරීම වඩාත් නිවැරැදිය. අටවැන්න අධිපති දෙවැනිභාවයේ සිටීමද විවාහයට යහපත් නොවෙයි. එය විවාහය බිඳී යැමකි. අඟහරු සහ සිකුරු නවාංශක මාරුකර ගෙන සිටීම එම ස්‌ත්‍රීන් හෝ පුරුෂයන් වරදට පෙළඹී අනියම් පහස පතා යන යෝගයකි. එම පිහිටීම ස්‌ත්‍රියක සතුවීම ඇය බලවත් කාමිනියක බව සටහන් කිරීමකි. අතිධාවන කාමවේගය මිනිසා අන්ධ කරවයි. එවැන්නකු හට තම තෘප්තිය උදෙසා වෙලාවක්‌ කලාවක්‌ නොමැත. රවි සමග කුජ හත්වැන්නේ යෙදී මකර ලග්නයෙන් උපන් ස්‌ත්‍රිය තම සහකරුට අවනත නොවෙයි. පර පුරුෂයන් සොයා යයි. යමකුගේ කේන්ද්‍ර සටහන ලග්නය හත අට යන ස්‌ථානයන්හි පාප ග්‍රහයන් සිටීම කාම වේගී හැඟීම් බහුල වීමකි. එය අතෘප්තිකර ලිංගිකත්වය තුළින් යුගදිවිය දෙදරා ගැනීමකි. පාපයන් විසින් දකින ලද හත අධිපතියා අටෙත් අට අධිපතියා හතෙත් සිටියදී උපන් ස්‌ත්‍රියද ස්‌වාමියා මියයැමෙන් වැන්දඹුව බවට පත්වෙයි. ලග්නය පහ හත අට දොළහ යන තැනක පාපයකු සමග කුජ සිටියදී උපන් ස්‌ත්‍රියකගේ විවාහය අසාර්ථකය. ඇය තම ස්‌වාමියා අතහැර ගොස්‌ වෙනත් පුරුෂයන් සමග ජීවත් වන්නීය. අටවැන්නේ පාපග්‍රහයන් සිටීමත් සුබ ග්‍රහයන් දෙවැන්න තුළ සිටීමත් ස්‌ත්‍රියකට බාධක වන්නේ එයට යොමුවන විසිදෙවන දෙර්කාණාධිපති හෙවත් මාරක ග්‍රහයාගේ බලපෑම අනුවය. එවන් ස්‌ත්‍රියකගේ ස්‌වාමියා ජීවිතය විනාශ කර ගැනීම මත ස්‌ත්‍රිය කණවැන්දුම් වෙයි. මෙහි සඳහන්ව ඇත්තේ යුගදිවියට අසුබව බලපෑම් ගෙන එන යෝගයන්ගෙන් ස්‌වල්පයකි. දෙදෙනකුගේ පොරොන්දම් යහපත්ව ගැලපීම පමණක් විවාහය සඳහා සුදුසුකමක්‌ නොවෙයි. දෙදෙනකුගේ ප්‍රේමය සමගිය සහ විවාහයෙන් පසු ඉදිරිය කෙලෙස දැයි විග්‍රහ කළ හැකිවන්නේ කේන්ද්‍ර සටහන් විමර්ශනාත්මකව බැලීමෙන් පමණය. විවාහය තුළ ස්‌ත්‍රියකගේ වගකීම වාසනාව වටිනාකම සහ අවදානම බලවත්ය. පොරොන්දම් බැලීමේදී සිට විවාහයේදී ස්‌ත්‍රිත්වයට ජ්‍යෙතිෂයෙන් මූලික තැනක්‌ හිමිකර දෙන්නේ එබැවින්ය.
ජ්‍යෙතිෂවේදී මතුගම ජයනෙත්ති
උපුටා ගැනීම දිවයින
