හදිසියකට කොරොස් කටට වත් අත දැමිය නොහැකි
පුවත්පතකට මංගල දැන්වීමක් දැමූ පසු පිළිතුරු ලිපි ලැබෙන තුරු ඇඟිලි ගනිමින් සිටීම සාමාන්‍යයෙන් සිදුවන දෙයකි. දැන්වීම පළකොට දෙසතියක් පමණ ඉවසා සිටිය හැකි වුවද පිළිතුරු ලිපි ලැබුණු පසු ඉවසිල්ල නැතිවී ගොස් මහා කලබලයක් ඇති වනුයේ ලැබුණු ජන්ම පත්‍ර තමාට, තම දුවට හෝ තම පුතාට ජේ‍යාතිෂමය වශයෙන් ගැළපේ දැයි පරීක්‍ෂා කරවා ගැනීමටය. හේතුවක් නොපෙනෙන කලබලයක් මෙහිදී ඇතිවනුයේ පහු වුණොත් අවාසියක් වේ යැයි සිතමින්ය.
පවුලේ ජේ‍යාතිර්වේදියාට හෝ සුදුසුකම් ඇති වෙනත් ජේ‍යාතිර්වේදියකුට හෝ පොරොන්දම් පරීක්‍ෂාවකට ජන්ම පත්‍ර සමූහයක් ලබාදී හැකි ඉක්මනින් වහාම ඒ සියල්ල පරීක්‍ෂා කොට සුදුසු ජන්ම පත්‍ර තෝරා දෙන ලෙස ඉල්ලා සිටීම සාමාන්‍යයෙන් දැකිය හැකි දෙයකි. මෙය ඉතා වැරැදි අනුවණ කාර්යයකි. ජන්මපත්‍ර යුගලයක් පරීක්‍ෂා කිරීම වූ කලී ඉතා වැදගත්, වගකිවයුතු කාර්යයකි. දෙදෙනකුගේ ජීවිත ඉරණම තීන්දු කරන කාර්යයකි. මේ කාර්යයේදී ජේ‍යාතිර්වේදියාට අනවශ්‍ය, නුසුදුසු බලපෑමක් කරමින් ඉතා ඉක්මනින් ප්‍රතිඵල ඉල්ලා සිටීම කිව නොහැකි තරම් වරදකි. ඒ මඟින් තමාගේ, තම දියණියගේ හෝ තම පුතාගේ අනාගතය අවදානමකට ඇද දැමීමක් තමා අතින්ම සිදු වන බව බොහෝදෙනාට නොතේරෙන අමිහිරි සත්‍යයකි.
ඇතැම් අය දුරකතනයෙන් අමතමින් ජන්ම පත්‍ර යුගලයක උපන් නැකැත් දෙක පවසා පොරොන්දම් කීයක් ගැළපේ දැයි එම මොහොතේම දැනුම් දෙන ලෙස ඉල්ලා සිටී. මේ අයට තිබෙන හදිසිය දුටු විට පුදුම සිතේ. ජේ‍යාතිර්වේදියාටද ගැළපේ හෝ නොගැළපේ යන වචන දෙකෙන් එකක් දුරකතනයෙන් කියා දමන්නටද බැරිකමක් නැත. එහෙත් වගකිවයුතු, විශ්වසනීය, පලපුරුදු ජේ‍යාතිර්වේදීන් කිසි දිනක එබඳු හදිසි තීන්දුවක් ලබා නොදේ. දුරකතන මාර්ග ඔස්සේ හදිසි තීරණ ඉල්ලා සිටින සෑම අයකුටම තමා කරන්නේ මෝඩ වැඩක් බව සිහි තබාගත යුතුය.
ජන්ම පත්‍ර යුගලයක ජේ‍යාතිෂමය ගැළපීම නිර්ණය කිරීමට සූදානම් වන ජේ‍යාතිර්වේදියා පළමුකොටම ජන්ම පත්‍ර යුගලයෙහි ග්‍රහ පිහිටීම් පිළිබඳව අංගසම්පූර්ණ පරීක්‍ෂණයක් කරයි. කුජ දෝෂය පළමුවද, රාහු දෝෂය හා ශනි දෝෂය ඉන්පසුවද පරීක්‍ෂා කරයි. ඒ හැරුණුවිට රවි, කේතු දෝෂද පරීක්‍ෂා කරයි. ඒ සියල්ල ගැළපේ නම් කුජ, සිකුරු සම්බන්ධය, විවාහයට පොදු අසුබ යෝග, පුරුෂ නාශක යෝග, අසාර්ථක විවාහ යෝග, විෂ කන්‍යා යෝග, විවාහ සැප සුනුවිසුනු කරන දශා දෝෂ ආදී වූ ප්‍රධාන දෝෂ පිළිබඳව පරීක්‍ෂාවක් කරයි.
මේ සියල්ල අතරින් කිසියම් දෝෂයක් පැනනැඟෙයි නම් එය භංග වන සාධක තිබේ දැයි ඉන්පසු පරීක්‍ෂා කෙරේ. ඒ සියල්ල යථා පරිදි ගැළපී ගොස් ග්‍රහ පිහිටීම් සම්බන්ධ හෝ වෙන යම් අසුබ යෝග හෝ දක්නට නොලැබේ නම් පමණක් විසි පොරොන්දම් පරීක්‍ෂාවට යොමුවේ. විසි පොරොන්දම් පරීක්‍ෂා කරන පළපුරුදු ජේ‍යාතිෂවේදියා ඉන්පසු දශ පොරොන්දම් හා අෂ්ටකූටය පිළිබඳව ගැඹුරු පරීක්‍ෂාවක යෙදේ.
ඒ අනුව විවාහයකදී අත්‍යවශ්‍ය පෙරොන්දම් කොපමණ සංඛ්‍යාවක් ගැළපේ දැයි විනිශ්චය කරයි. එහිදී වැදගත්ම පොරොන්දම් ගැළපී තිබේ නම් සහ ප්‍රමාණවත් පොරොන්දම් සංඛ්‍යාවක් ගැළපී තිබේ නම් විවාහයට සුදුසු යැයි නිර්දේශ කෙරේ. මෙහිදී අෂ්ටකූට පරීක්‍ෂණයට ඉතා ප්‍රමුඛත්වයක් ලබාදෙනුයේ එය ඉතා විද්‍යානුකූල නිර්ණායක පදනම් කොටගෙන සකස් කර ඇති බැවිනි. විවාහයකට සුදුසු ගැළපීම පිළිබඳ අංගසම්පූර්ණ සවිස්තර වාර්තාවක් ලබාදීම පළපුරුදු, වැදගත් ජේ‍යාතිර්වේදීන්ගේ ක්‍රමය වේ.
ඉහත දැක්වූ ක්‍රියාවලිය සඳහා කෙතරම් කාලයක් ගතවේ දැයි ඔබට සිතාගත හැකි විය යුතුය. ක්‍ෂණිකව ප්‍රතිඵල ඉල්ලීම් කෙතරම් අනුවණ ඉල්ලීමක් දැයි දැන් ඔබට පැහැදිලි වනු ඇත.
ක්‍ෂණික පොරොන්දම් පරීක්‍ෂණයක් යනු විසි පොරොන්දම් උඩින් පල්ලෙන් බලා ලබාදෙන විනිශ්චයක් මිස කිසිසේත්ම අංගසම්පූර්ණ පරීක්‍ෂණයක ප්‍රතිඵලයක් නොවේ.
ඔබට, ඔබගේ දුවට හෝ ඔබගේ පුතාට එබඳු ප්‍රතිඵලයක් ලබාගෙන පලක් නැති බව ඔබ තේරුම්ගත යුතුයි. ජීවිතයටම බලපාන, විවාහය වැනි ඉතා වැදගත් කාරණයකදී පොරොන්දම් පරීක්‍ෂණය ඉතාම විධිමත් හා නිවැරැදි පරීක්‍ෂණයක්ම විය යුතු බව ඔබ දැන් පිළිගන්නවා ඇත.
ඔබට අවශ්‍ය වනුයේ ඉහත සවිස්තරව දක්වා ඇති ආකාරයේ අංගසම්පූර්ණ ජන්ම පත්‍ර පරීක්‍ෂාවක් නම් ඔබ කිසිදු අවස්ථාවක අනවශ්‍ය, බොරු හදිසියක් ජේ‍යාතිර්වේදියාට නොපෙන්විය යුතුය. ඔහුට තම කාර්යය නිසි පරිදි කාල වේලාව අරගෙන ඉටුකර දීමට අවශ්‍ය පසුබිම ඔබ සකස් කර දිය යුතුය.
ඔබේ වගකීම වනුයේ ජේ‍යාතිර්වේදියාට ජන්ම පත්‍ර සමූහය ගෙනගොස් බාරදී හෝ ලියාපදිංචි තැපෑලෙන් යවා හෝ
ගැළපුම් නිර්ණය කිරීමක් ලබා දෙන ලෙස ඉල්ලා සිටීම පමණි. ඒ හැරුණු විට අසවල් දිනයට, අසවල් වේලාවට ප්‍රතිඵල අවශ්‍ය යැයි බලපෑම් කිරීම නොවේ. බලපෑමකින් තොරව ජන්ම පත්‍ර පරීක්‍ෂාවක යෙදෙන ජේ‍යාතිර්වේදියා ඉහත සවිස්තරව දැක්වූ සියලු අංග පරීක්‍ෂා කොට ඔබ ලබාදුන් ජන්ම පත්‍ර අතරින් ගත හැකි ඒවා ඉතා නිවැරැදිව තෝරා දෙනු ඇත. මේ සඳහා ඇතැම් විට දින කීපයක් ජේ‍යාතිර්වේදියා ලබා ගනු ඇත. ඔබ එය ගැටලුවක් කරගත යුතු නැත. විවාහයක් සම්බන්ධ කිසිදු තීරණයක් හදිසියට ගතයුතු නැත.
හදිසියට තීරණ ගෙන හදිසි විවාහයන්ට ගිය බොහෝදෙනා නිස්කලංකව පසුතැවිලි වේ. ඔබට, ඔබගේ දුවට හෝ ඔබගේ පුතාට එම ඉරණම අත්විය යුතු නැත. එබැවින් ජන්ම පත්‍ර පරීක්‍ෂාව සියුම්ව කරන්නට ජේ‍යාතිර්වේදියාට ඉඩ දෙන්න.
බුලත් අතක් සමඟ සාධාරණ මුදල් පරිත්‍යාගයක්ද ජේ‍යාතිර්වේදියාට ලබාදී ඔබගේ කාරණාව ඉටුකර දෙන ලෙස ඉල්ලා සිටීමෙන් ඔබ සිතුවාටත් වඩා හොඳින් ජන්ම පත්‍ර පරීක්‍ෂා කොට නිර්දේශ ලබාදීමට ජේ‍යාතිර්වේදියා ක්‍රියා කරනු නියතය.
පාඨශාලාචාර්ය
අසෝක විජයසේකර
තලාව, ගා/වඳුරඹ
076 6827325
උපුටා ගැනීම මව්බිම
