නියම මඟුල් නැකත මොකක්‌ද?
මංගල යන්නෙහි අරුතය වන්නේ අපායට යන මග වළක්‌වා යහපතෙහි පිහිටුවීම යන්නයි. යහපත් වාසනාවන්ත ජීවිතයක්‌ ආරම්භ කොට ඒ මගින් මතු පිංවත් වැඩදායි දරු පරම්පරාවක්‌ ලොවට සමාජයට බිහිකර වීමේ අරමුණින් ස්‌ත්‍රී පුරුෂ දෙදෙනකුගේ එක්‌වීමේ අවස්‌ථාවට මංගල්‍ය කියා ව්‍යවහාර වන්නේද ඒ නිසාය. සියලු යහපත් දෙයක ආරම්භය පුරාණයේ සිටම මංගල්‍යයක්‌ ලෙස සළකා ඇති බව අපට මෙයින් පැහැදිළිය.
මංගල්‍යයක්‌ නැතිනම් මඟුලක්‌ සිදුකරන්නේ නැකැතක්‌ අනුවයි. එයට මඟුල් නැකත යයි කියති.
මඟුල් නැකැත යනු කුමක්‌දැයි විමර්ශනය කර බැලීමේදී එහි අදහස වන්නේ විවාහ ජීවිතයට පත්වන යුවතිපතියන් මංගල යහනාවේදී එකතු කරන ශුභ මුහර්තය මංගල නැකතවේ. යුවති පති දෙපළ නිවසින් පිටවීම, පෝරුවේ නැගීමට පමණක්‌ සකසාදෙන ශුභ මුහර්තය නියම මඟුල් නැකත නොවේ. නමුත් අද සමාජය පිළිගෙන ඇත්තේත් භාවිත කරන්නේත් මනාලයා නිවසින් පිටත්වීමත් මනාලිය සමඟ පෝරුවමත නැගීම මනාලිය නිවසින් පිටවීමත් සඳහා පිළියෙල කරන නැකැත් සීට්‌ටුව පමණි. මෙය නියම මඟුල් නැකත නොවන බව ඉඳුරාම කිවහැක.
නියම නිර්මල පිවිතුරු මඟුල් නැකැත වෙන්නේ නව යුවතිපති දෙදෙනා පළමුවම මංගල යහනාව මතට ගොස්‌ මෙවුන් දම් සෙවනයේ යෙදීම සඳහා සකස්‌කර දෙන ශුභ මුහුර්තය බව දතයුතුයි. පෙර ජ්‍යොතිෂ පඬුවන් මේ නැකතට මුල්තැන දී එය උතුම්කොට සළකා සකස්‌ කර දී ඇති බව පැරැණි පොත පතෙහි සඳහන් කොට ඇත. එහිදී එදිනට බලපාන තිථිය, විෂකලාව, අමෘත කලාව ආදී දේ ගැන බලා එම වේලාව සකසයි. එම නැකත් හා මෙම කරුණු ගැන නොසලකා නැකැත් සෑදීමේදී මෙම පහත සඳහන් විපාක ලැබී ඇති බව මේ සිද්ධීන් ගැන ගවේෂණ කිරීමෙන් අපට හොඳින් දත හැක.
කඩා කප්පල් වූ විවාහයක්‌ 1928 මැයි 09 වැනිදා සිද්ධ වූ විවාහයකි. මෙදින රාත්‍රියේ අභිනව යුවල අතර ඇති වූ ඔවුනොවුන් නොරිස්‌සන ගතිය නැවත සමඟි කිරීමට බැරිවිය. මෙදින 13 පැයෙන් පසු අව විසේනිය තිථිය පැවතුනේය. අව විසේනිය තිථිය පවතින කාලයේ විෂ කලාව පුරුෂයාගේ ලිංගයේ වම්පසද ස්‌ත්‍රියගේ යෝනි දකුණු පසින්ද පැවත ඇත. ඒ නිසා ඒ විවාහය කඩාකප්පල් විය.
තවත් සිද්ධියක්‌ මෙසේය. 1934 ජූලි මාසයේ 09 වැනිදා විවාහ යුවල පසුදිනම වෙන්විය. එය සමඟි කිරීමටම බැරිවිය. මෙදින 29 පැයෙන් පසු අව තුදුස්‌වක තිථිය පැවතුනේය. අව තුදුස්‌වක දිනයේ විෂ කලාව පුරුෂයාගේ දකුණු පස ලිංගයේත් ස්‌ත්‍රියගේ වම් පස යෝනියේත් පැවතුනේය, එනිසා ඒ විවාහයද දෙදරා ගියේය. මේවා පෙර විසූ මහා පඬිවරුන් ජ්‍යොතිෂය විශාරදයන් අපට පෙන්වා දී ඇත්තේ කට කහනවටවත් නොවේ. මේවායින් වැළකී විවාහ ජීවිතයේදී ලබන කම්සැප දියුණුව, යහපත ආදිය සළකා බලා බව දනිත්වා.
තවත් කඩවූ විවාහයක්‌ මොවුන් ක්‍රිස්‌තු භක්‌තිකයෝය. 1937 ඔක්‌තෝබර් 02 වැනි සෙනසුරාදා විවාහ සම්බන්ධයට ඇතුළු වුවද වෙන්වීම සිද්ධවිය. මෙදින 27 පැයෙන් පසු අව තුදුස්‌වක ලැබුවේය. අව තුදුස්‌වක දිනයේ විෂ කලාව පුරුෂයින්ගේ දකුණු ලිංගයේද ස්‌ත්‍රීන්ගේ වම් යෝනියේද පැවැතුනේය, ඒ නිසාම එය එසේ සිදුවිය. මේ නිසා මඟුල් නැකැත් සෑදීමේදී යුවතිපතියන් මොවුන් දම් සේවනයේ යෙදෙන එකතුවන වේලාව උසස්‌ නැකතක්‌ විය යුතුය. මෙම වේලාව සාදා ගැනීමේදී ආලය, ආදරය, ඇතිවී රාගාධික කාමාශාවන් උද්දීපනය කරවන අන්දමට උදා කළ ලග්නයේ ග්‍රහයින් පිහිටුවා නැකැත් කරණයේදී පිළිපදින සියලුම නීති රීතිවලට අනුකූලව සිරි සැප ඇතිවන ලෙස ඉතා ශුභ අන්දමින් සකස්‌කරවා ගත යුතුයි. මංගල නැකතට යොදා ගන්නා ලග්නය ඉතා සුපරීක්‍ෂා කිරීම සකස්‌කර ගත යුතුයි. ලග්නයේ 7 වැන්න නර රාශියක්‌ වීම ඉතා ශුභයි. හොඳයි. මිථුන, කන්‍යා ආදී ලග්නයක්‌ වීම ඉතා සුදුසුවන අතර තුලා, ධනු, කුම්භ වීමද සාමාන්‍යයෙන් ගැළැපේ. මිථුන ලග්නයේ තේරුම මෛථුනය යන අරුතය බැවින් මෙවුන්දම් සේවනය සඳහා සැරසෙන වෙලාවට උදාවෙන ලග්නයේ හත්වැන්න මිථුන රාශි භාවයට අයත් වීම ඉතා හොඳ කාම සම්පත් උදාකර දෙන්නෙකි. විශේෂයෙන් හත්වැන්නේ පාප ග්‍රහයන් සිටීම හෝ දැකීම හොඳ නැත. ශුභ ග්‍රහයන් දැකීම හා සිටීම හොඳයි.
අපි නිවසක්‌ හදනවිට පළමුවෙන්ම කරන්නේ මුල් නැකතට නූල් ඇදීම සඳහා කුඤ්ඤචයක්‌ පොළවේ සිටුවයි. එය තමයි ආරම්භය. ඒ හා සමානයි මංගල යහනේදී මෙවුන්දම් සේවනය සඳහා එකට එක්‌වන නැකත. එය යහපත් කම්සැපයෙන් පිරි විවාහ දිවි පෙවතක්‌ බවත් දිවි ඇති තෙක්‌ රන් රස සේ කිරි පැණි සේ එකට එක්‌වී බැඳී සිටින බව සිතට ගනිත්වා. එනිසා ක්‍රමවත් ලෙස මංගල නැකත සකස්‌කරවා ගත යුතුයි. මේ සඳහා ලග්නයද ලග්නයෙන් හත් වැන්නද යහපත් වීමත් ලග්නයේ ග්‍රහ පිහිටීම යහපත් වීමත් අවශ්‍යවන අතර සිකුරු ගුරු ආදී ග්‍රහයකුට අයත් නැකැතක්‌ තෝරා ගැනීමද උචිත වන්නේය. නැකැත ගැනීමේදී ස්‌ත්‍රියගේ හෝ පුරුෂයාගේ ජන්ම නැකතට සීහෙන අයුරින් ගැනීමද සිහි කටයුතු කරුණක්‌ වන්නේය. එ ලෙස සකසා ගන්නා නැකතකින් ස්‌ත්‍රී පුරුෂ දෙදෙනාගේ කාම ඉන්ද්‍රියන්ගේ ක්‍රියා කාරිත්වයන් වර්ධනය වී කාම නිල ඇවිස්‌සීමෙන් දෙදෙනා දිවි ඇති තෙක්‌ ආදරයෙන් බැඳී අනංග රංගනයෙන් මත්වන බව කිව යුතුයි. එමෙන්ම තරුණියක්‌ කොටහළුවීමේ නැකතින් පසු ඇයට උදාවන අවසානම ප්‍රබල නැකත විවාහ බන්ධනයට ඇතුළුවීමේ නැකත බව දැනගෙන විවාහ නැකත සාදා ගැනීම යහපත් වේ.
රඹුක්‌කන ජිනදාස එදිරිසිංහ
උපුටා ගැනීම දිවයින
