හැමදාමත් සැමියාට මනාලියක් වෙන්න
මම ඔබට හැමදාමත් කිව්වෙ රුව ලස්සන ගැන. රුව ලස්සන කරන ආලේපන ගැන. මේ දේවල් ලස්සනට ඉන්න හරිම වැදගත් තමයි. නමුත් ඒ සියල්ලටම වඩා වැදගත්වන ඔබ එතරම් නොසිතන, කාන්තාවක් වශයෙන් සිතිය යුතු කරුණු කාරණා කීපයක් ගැන මෙතැන් සිට ඔබට කතා කරන්න මට සිතුණා. බලන්න මංගල දිනයට සුදානම් වෙන යුවතියක්, මනාලියක් වෙන යුවතියක් ඒ දවසේ මොන තරම් ලස්සන ද පිවිතුරු ද? මංගල දිනයේ කාගෙත් ආකර්ශනයට ලක්වෙන්න ඔබ මොනතරම් උත්සාහ කරනවද? විශේෂයෙන්ම තමන්ගේ පෙම්වතාට සහකරුට පේන්න ඔබ කොතෙකුත් වාරයක් හැඩවන්නට ඇති. නමුත් මංගල දිනයෙන් පසුව ගෝම්කමිං එකත් ඉවර වුණාට පස්සේ ඔබ ලස්සනට හිටියා නේද කියලවත් ඔබට මතක නෑ. ඒ කියන්නේ අලුත බැඳපු ජෝඩුව පරණ වෙනකොට ඔබ ජීවත්වෙන්න හදන්නේ ඔහේ ඉන්නන් වාලේ ඕනැවට එපාවට වගේ. කලින් ලස්සනට ඉන්න ගත් උත්සාහය ඔබට මතක නෑ. ටිකක් හිතන්න වෙඩිං එක දවසේ ලස්සනට ඉන්න අනිත් අයගේ ඇස් තමන් දිහාවට යොමුකර ගන්න ඔබ වඩාත් උනන්දු වුණා නේද? ඒ උනන්දුව මුළු ජීවිත කාලයටම තියාගන්න ඕන කියලා නොසිතන එක මොනතරම් අවාසනාවක්ද?
විවාහයෙන් පස්සේ රැකියාව ගැන සැමියට කෑම එක හදලා දෙන එක, ළමයින් පාසලට යවන එක, ගෙදර උයන පිහන එක ගැන විතරයි හුඟ දෙනෙක් හිතන්නෙ. ජීවිතේ කියන්නේ ඔය ටික විතරද? නැහැ. එතැනින් ඔබ්බට හිතන්න හුඟක් දේ තියෙනවා. හැමදාමත් තමන්ගේ ළඟින් ඉන්න සැමියා ගැන ඔහුට දක්වන ආදරය සෙනෙහස ගැන ඔබ හිතන්නම ඕන. මේ හැමදේත් එක්කම සැමියාගේ ආදරය තමන් ළඟ තියාගන්නේ කොහොමද කියන එක ඔබ සිතිය යුතුයි නේද? ඔබ ඒ සඳහා උත්සාහ කරන්නට ඕන කැපවීම් කරන්නට ඕන. මේ බැඳීම් නැතිවුණහම තමයි ගොඩාක් අඹුසැමියන් අතර ප්‍රශ්න ඇතිවෙන්නෙ, පවුල් ජීවිතේ නිරස වෙන්නෙ. බලන්න දෙන්නා දෙමාල්ලන් අතර බැඳීම් නැති වූ විට ආදරය නැති විට දැනෙන එපා වීම. මේ එපාවීමත් එක්ක ඔහුගේ සිතත් වෙනස්වන එක අහන්නත් දෙයක්ද?
ඔහුගේ ආදරය ඔහුගේ අවධානය හැමදාමත් ඔබ ළඟ තියාගන්න මොනවද කරන්න ඕන. සැමියාගේ ඇස් වෙනතක නොයා ඔබ ළඟම රඳවගන්න නම් ඔබ ඔහු ඉදිරියේ හැමෝටම වඩා ලස්සන කාන්තාවක් වෙන්න ඕන. ලස්සනට ඉන්න ඕන. ඔබට පුළුවන් ඔබේ ලස්සන ගැන හිතන්න. ඒ කියන්නේ නිළියක් වගේ වෙන්න ඕන කියන එක නෙමෙයි. ටිකක් හිතන්නකෝ විවාහයට කලින් ඔහු පෙම්වතාව සිටියදී ඔහුව හමුවෙන්න ඔබ යන්නේ මොන තරම් හැඩවෙලාද? රුව ලස්සන කරගන්න ඔබ මොන තරම් දේවල් කරන්නට ඇත්ද? ඒ හැමදේම කළේ ඔහුගේ අවධානය වගේම ආදරයත් ඔබ ළඟ තියාගන්නනෙ. එහෙමනම් ඇයි විවාහයෙන් පස්සෙ ඒ දේවල් වෙනස්කර ගන්නෙ? විවාහයෙන් පසුවයි ඔබ වැඩියෙන්ම ලස්සනට ඉන්න ඕන.
තමන්ගේ බිරිය තමන් ඉදිරියේ ලස්සනට ඉන්නවා දකින්න ඕනෑම ස්වාමිපුරුෂයෙක් කැමැතියි. නමුත් කියන්න කනගාටුයි අපේ ලංකාවේ කාන්තාවන් විවාහයෙන් පස්සේ තමන් ගැන දක්වන්නෙ අඩු සැලකිල්ලක්. සමහර කාන්තාවන් වැඩියෙන්ම අවලස්සන වෙන්නෙ විවාහයෙන් පස්සෙ. වැඩි දෙනෙක් හිතන්නෙ විවාහ වෙනතුරු විතරයි ලස්සනට ඉන්න ඕන කියලා. අපිරිසුදුකම අපිළිවෙළ මුළු ජීවිතයම වෙළාගෙන. මෙහෙම වෙන්න එපා රූපලාවණ්‍ය ශිල්පිනියක් හැටියට මම ඔබට උපදෙස් දෙන්නෙ ඔබ පිළිවෙළට පිරිසුදුවට ලස්සනට ඉන්න. සැමියගෙ ආදරය ඔබ ළඟම තියාගන්න කියලයි. මෙහිදී ඔබ අංක එකට සැලකිලිමත් විය යුත්තේ ඔබේ පිරිසුදුකම ගැනයි. පිරිසුදුකම නැති තැන ඔබේ රුව ලස්සන රැකෙන්නෙ නෑ.
උදේට නැගිට්ට ගමන් නයිටිය පිටින් කුස්සියට ගිහින් උයන එක නෙවෙයි ඔබේ රාජකාරිය විය යුත්තේ. පාන්දරින් නැගිටින්න, දතකට මැද මුහුණ සෝදා හිස පීරාගන්න. පිරිසුදු ඇඳුමක් අඳින්න. ඉන්පසු දවසේ වැඩ කටයුතු ආරම්භ කරන්න. නැගිට්ට ගමන් කණ්ණාඩියෙන් බලන්න ඔබේ ස්වරූපය දිහාව. එම පෙනුම වෙනස්කර ගන්න. නිදිබර මුහුණ අවුල් වූ කෙස්වැටිය, අපිළිවෙළ දකින ඕනෑම කෙනකුට සසර කලකිරෙන්න වැඩිවෙලාවක් ගතවෙන්නෙ නෑ. ඔය විදිහට නම් උදේට සැමියා ඉස්සරහට යන්න එපා.
මං ඔබට පොඩි කතාවක් කියන්නම්. ඔහු ළඟදී විවාහ වූ අයෙක්. ඔහු තම බිරිය උදේට ඉන්න ආකාරය දකින්න අකැමැති බව කොයිතරම්ද කියනවනම් ඔහු ඇඳෙන් නැගිට්ට ගමන් බලන්නේ ඉදිරියේ තිබෙන කැලැන්ඩරයේ ලස්සන කාන්තාව දිහාවලු. උදේට තම බිරිය දිහා බලන එකත් ඔහුට පිළිකුලක්ලු. බලන්න ඒ බිරියගෙ ස්වරූපය ගැන මෙයින් හිතාගන්න පුළුවන් නේද? රෑට අඳින නයිට් ගවුම කාමරේට විතරක් සීමා කරගන්න. එය ඇඳගෙන එහාට මෙහාට යන්න එපා. අපේ කාන්තාවන් කී දෙනෙක් නයිටිය පිටින් දවසේ වැඩ ආරම්භ කරනවද? උදේට කෑම හදන්නේ, දරුවන් පාසලට යවන්නේ නයිටිය පිටින්මයි. සමහර විට දවල් වෙනතුරුත් නයිටිය මාරුකර නැහැ. නැවත රෑට අඳින්නෙත් එම නයිටියමයි. බලන්න කොයිතරම් අපිරිසුදු ද අවලස්සන ද? එවන් ක්‍රියා කලාපයක් නිසා ඔබ විසින්ම ඔබේ ජීවිතේ අවලස්සනකර ගන්නවා. මම දැන් කාට පේන්න ලස්සන වෙන්නද? විවාහයෙන් පස්සෙ මෙහෙම කියන අය ඕනෑතරම්. ඇයි මෙහෙම හිතන්නේ. ඔබ ලස්සනට ඉන්න ඕන කාටවත් පේන්න නෙමෙයි. ඔබේම සැමියාට පේන්නයි. විවාහයට පෙර සිටි ඔබේ රුව මෘදු බව පි‍්‍රයමනාප බව පිළිවෙළ දකින්නටයි ඔහු කැමැති.
උපුටා ගැනීම තරුණී
