ඔබ සහ ඔබේ විවාහය
ඔබේ බිරිඳ හෝ ස්‌වාමි පුරුෂයා පිළිබඳව ඔබ සිතන්නේ කුමක්‌ද? විවාහයෙන් පසුව මේ වන විට ගත වූ අතීතය තුළ මුහුණ දීමට සිදු වූ විවිධ සිදුවීම් ගැන සිතන විට ඇය හෝ ඔහු ඔබේ ලෝකය තුළ ඇති කර තිඛෙන්නේ කෙබඳු තත්ත්වයක්‌ද? දෛවය පිළිබඳව විමසන ඔවුන්ගේ කතාන්තර නිතර කියවීමට අවස්‌ථාවක්‌ අපට උදා වේ. තම සැමියා ගැන සුජාතා කියන්නේ මෙවැනි කතාවකි.
"අපි දැං කසාද බැඳල අවුරුදු විස්‌සක්‌ වෙනවා. ලොකු දුව ගුරුවරියක්‌. පොඩි දුව වෛද්‍යවරියක්‌. ළමයින්ට උගන්නන්න අපි ලොකු මහන්සියක්‌ ගත්තා. මගෙ මහත්තය ටිකක්‌ බොනවා. ඒ වගේ පාලනය කරගන්න එයාටම අමාරු වෙලාවල මම එයාට කෑගහල ඇදගෙන ගිහිං නිදි කරවනවා. බැනලත් තියෙනවා. හැබැයි මම හැමදාම අලුත් අවුරුද්දට එයාට බුලත් අතක්‌ දීලා දණගහල වඳිනවා. සුජාතා ඔයා නං කවදා හරි බුදුවෙන කෙනෙක්‌ කියල මේ වඳින අවස්‌ථා කීපෙකදිම මට කියල තියෙනවා. මහත්තයා හරි හොඳයි. ඇත්තටම අපි ඉන්නේ හරි සතුටින්."
සුජාතාගේ සැමියා ව්‍යාපාරිකයෙක්‌ මෙන්ම නිර්භීත කඩවසම් මිනිසකු බව මම දනිමි. වරෙක මම ඔහුගෙන් පවුල් ජීවිතය ගැන විමසුවෙමි. "මහත්තයා මං ගොඩාක්‌ මහන්සි වෙලා මේ තත්ත්වෙට ආවේ. සමහර විට මං හොඳටම මහන්සි වෙලා බඩගින්නෙ ගෙදර යන්නෙ. එතකොට සුජාත මට සලකන්නෙ හරියටම මගෙ අම්ම වාගේ. මං හිතන විදිහ තේරුං ගන්න සුජාතට තියෙන්නෙ පුදුම ඉවක්‌. එයා බිස්‌නස්‌ දන්නෙ නෑ. ඒත් මගේ ජීවිතේ මේ තත්ත්වෙට ආවේ එයා දුන්න දහිරිය හිංද. මම ගෙදර යනකොට ඉස්‌සරට ඇවිත් මගේ අතේ තියෙන දෙයක්‌ අරං දරුවොත් එක්‌ක ගෙට යනකොට මගෙ මහන්සිය නිවිල යනවා. සුජාතා නැති ලෝකයක්‌ ගැන මට හිතන්න බෑ. "
සුජාතා සහ ඇගේ සැමියා තරම් වාසනාවන්ත විවාහ ජීවිත ගත කරන අය මෙකල බොහෝ දුර්ලභ බව මගේ හැඟීමයි. බොහෝ අය කේන්දර බලන්නේ "මේ කසාදෙ කොච්චර කාලයක්‌ තියෙයිද?" යන ප්‍රශ්නය හිතේ ඇතිවය. "මේ දෙන්න ඩිවෝස්‌ වෙයිද?" යන ප්‍රශ්නය අසන මවුපියන් බොහෝ ය. විවාහය අපායක්‌ කර ගත් තම දරුවන් ගැන තැවෙන වියපත් මව්පියන් බහුලය.
මේ අතර තවත් නිවසක මෙවැනි අප්‍රසන්න පරිසරයක්‌ නිර්මාණය වෙයි.
සැමියා පරිපාලන නිලධාරියෙකි. බිරිඳ ප්‍රසිද්ධ පාසලක දක්‍ෂ ගුරුවරියකි. දෙදෙනාගේම මුදල් පවුලේ දියුණුවට වැය කරයි. එහෙත් දෙදෙනා අතර කතා බහ අඩුය. ඊට ද හේතුවක්‌ තිබේ.
"නිමල් ම්ම්.. ඔයා අද කොහෙද හවස ගියෙ?"
"විසිට්‌ එකක්‌ තිබුණා ගාල්ලෙ ඇයි?"
"තනියමද ගියෙ?"
"ඇයි අහන්නෙ?"
නිමල් ගේ බිරිඳ අචලා කතා කරන්නේ නුරුස්‌සන ගතියෙනි.
"අහන්නෙ මම ගෑනි හිංද? ඉස්‌කෝලෙ අය කියන එක එක කතා මට අහගෙන ඉන්න බෑ. ලැජ්ජයි. ඒකයි. අර පට්‌ට...... ත් එක්‌ක එක එක තැන ලගිනව කියල මුළු ඉස්‌කෝලෙම දන්නව."
මෙයින් පසුව නිමල් කියන දේ ඇහෙන්නේ අචලාට පමණක්‌ නොව ගමටමය.
"ඉතිං...... ඉතිං උඹ පුළුවන් දෙයක්‌ කරපං. මාව පාලනය කරන්න එන්න එපා. මම කරන්නෙ මට ඕන දේ. උඹට බැරි නං ඕන දිහාක මකබෑවියං. උඹ වාගේ ඕන එකක්‌ කරගන්න කියල මල මිනියක්‌ වගේ බුදියගෙන ඉන්න වාහෙලාට වඩා ඕන තරං රටේ ගෑනු ඉන්නව."
"ඔව් ඉතිං තමුසෙට ඕන හැම වෙලේම බුදියන එක තමයි."
"මොකක්‌ද කීවේ පර බැල්ලි"
නිමල්ගේත් අචලාගේත් ලෝකය මෙවැනි අඩදබරවලින් බහුලය.
ඉහත සඳහන් කළ සිදුවීම් දෙකේ සුජාතා ජ්‍යෝතිෂයේ පිහිට පතන්නට එන්නේ තම සැමියාගේ ව්‍යාපාර දියුණුවට අදාළ කටයුතු කර ගැනීමටය. එහෙත් අචලා එන්නේ තම සැමියා හැර දමා දරුවන් සමඟ විදේශ රටකට යැමට වාසනාව තිබේදැයි දැන ගැනීමටය.
සුජාතලා අද දුර්ලභය.
අචලලා සෑම ගෙදරකම පාහේ බිහිවෙමින් සිටිති.
විවාහ සහකරු හත් දෙනකු ගැන ධර්මයේ සඳහන් වේ. මේ හත් දෙනා හඳුනාගන්නා ආකාරය ගැන ජ්‍යෝතිෂයේ ද සදහන් වේ.
මාතූ, භගිනි, ස‚, දාසි යන භාර්යාවරු ස්‌වකීය පවුල නැතහොත් සැමියාට සහනය හා සැපත උදා කරන බවත් ස්‌වාමි, චෝර, වධක යන භාර්යාවරු සැමියා දුකට පත් කරන බවත් කියෑවේ. මේ තත්ත්වයම භාර්යාවට පමණක්‌ නොව සැමියාටත් පොදුය.
ඉහත උදාහරණ දෙකෙන් අප පෙන්වූයේ මාතු භාර්යාවක්‌ හා මුරණ්‌ඩු ස්‌වාමිපුරුෂයකු ගැනය.
කේන්ද්‍රයක හත්වැන්නෙන් විවාහ සහකරු පිළිබඳව සොයා ගත හැකි වේ. හත්වැන්න අධිපතියාගේ තත්ත්වය, හතට දෘෂ්ටි දෙන ග්‍රහයෝ. විවාහ තාරක ගුරු හා කාමයට අධිපති සිකුරු ඕනෑම පුද්ගලයකුගේ විවාහය පිළිබඳ තත්ත්වය විදහා පෙන්වයි.
කෙන්ද්‍රයක සඳුගේ සුබ බලපෑම හත් වැන්නට වැටුන තරමට ඔහු හෝ ඇයගේ විවාහ සහකරුවා සඳුගේ බලය සහිත බව පෙනේ. එනම් කාරුණික බවයි. එය වෙනත් ආකාරයකින් කිව්හොත් මව් ගුණයයි. අම්මා කෙනෙකු තම දරුවකු ගැන පිළිපදින්නේ කෙසේද? ඇය බොහෝ ඈත වසර ගණනකට පසු ළඟා කර ගත යුතු ඉලක්‌ක ගැන කතා නොකළද, තම දරුවාගේ මහන්සිය, බඩගින්න, නිදිමත, කේන්තිය ආදී කරුණු ගැන ක්‍ෂණිකව අවධානය යොමුකර ඒ අවශ්‍යතාවයෙන් දරුවාට සහනය ලබා දෙයි. සඳුගේ බලය පෙන්වන බිරිඳ ද එසේය.
බිරිඳගේ ආදරය, කරුණාව නොඅඩුව ලබා ගත සිත සනසා ගන්නා සැමියා තමන්ගේ රැකියා කේන්ද්‍රයේ ජය කෙහෙළි නංවමින් ඉදිරියටම යැම නතර කළ හැක්‌කේ කාටද?
වෘශ්චික ලග්නය වී හත්වැන්නේ සඳු තැන්පත් වීම ඉතා උසස්‌ විවාහ සහකරුවකු ලබා දෙයි. හත්වැන්නේ සඳු උච්ච බලය ලබන අතර, භාග්‍ය ස්‌ථානාධිපති ද වේ. බලවත් පුරසඳු ලග්නය පහ, හත, නමය, දහය යන ස්‌ථානවල තැන්පත් කෙනෙකුට වෙනත් අශුභ යෝග යෙදී නැත්නම් සඳුට හිමි ගුණාංග සහිත මාතු භාර්යාවන් හෝ එවැනි සැමියෙකු ලැඛෙනු ඇත.
එහෙත් මෙම සඳු අව පක්‍ෂයට අයත්ව දුර්වල, බලහීන තත්ත්වයක පවතී නම් එසේ ලැඛෙන භාර්යාව නිතර සෙම් රෝග වලින් පෙළෙන අලස, කම්මැලි, චින්තන ශක්‌තියෙන් දුර්වල කෙනෙකු වීමට ඉඩ තිබේ. එවැනි සැමියකු කිසිදු ප්‍රයෝජනවත් රැකියාවක්‌ නොකරන බිරිඳ උපයන දෙයින් ම යෑපෙන නමුත් අහංකාර ගති ගුණ ඇති නිද්‍රාශීලී අමනයකු වීමට ඉඩ තිබේ.
මෙකල බොහෝ පවුල්වල චණ්‌ඩ, සැර පරුෂ ගති ඇති සහකරුවන් දක්‌නට ලැබේ. එවැනි අය ප්‍රශ්න විසඳන්නට යන්නේ පරුෂ වචන වලින් හා අවි ආයුධ වලින් පමණි. මෙවැනි චරිත නිර්මාණය වන්නේ නරක ලෙස කේන්ද්‍රයක පිහිටා ඇති කුජ ග්‍රහයාගෙන් බව පෙනේ. මෙවැනි අය කාමුක බව අධිකව ඇති අයයි. හත්වන භාවයේ හෝ හතට සම්බන්ධයක්‌ ඇතිව කුජ ශුක්‍ර යෝගය නරකට පිහිටා ඇති විට අධි කාම යෝග යෙදේ.
එක්‌තරා ව්‍යාපාරික මැදිවියේ පුද්ගලයකු තම විවාහය ගැන කෝපයෙන් කතා කළේ මෙසේය.
"මහත්තයා අපි සෑහෙන කාලයක්‌ දුක්‌ විඳල මැරිල මැරිල මේ තත්ත්වෙට ඇවිත් ඉන්නේ. දැන් ඕන තරං සල්ලි තියෙනවා. මම ඕන දිහාක එක්‌ක යන්නේ කාර් එකේ. ගමේ එවුනුත් බලන්නේ අපේ සල්ලි ගැන ඊර්සියාවෙන්. මහන්සි වෙලා ඉඳලා බුදිය ගන්න කොට මුංට තියෙන්නේ හොඳට නාල පිරිසිදුවෙලා ඇඳට එන එකනේ. ඒක තේරෙන්නේ නෑ. මට නං දැං අප්පිරිය වෙලා තියෙන්නේ. දැං මම නං ඔය ආගම ධර්ම ගැන බලන් නෑ. හරි ගෑනියෙක්‌ හම්බ වුණොත් අතාරින්නේ නෑ" මේ පුද්ගලයා හිතන්නේ සල්ලි යනු ජීවිතය බවත්, බිරිඳ යනු සැමියාට අවශ්‍ය විටෙක පාවිච්චියට ගත හැකි විය යුතු උපකරණයක්‌ බවත් ය. මේ සියලුදෙනාම පොරොන්දම් බලා සුබ නැකත් වලට විවාහ වූ අයයි. එසේ නම් විවාහ ජීවිත රාශියක්‌ මෙවැනි මිහිපිට අපායක්‌ නිර්මාණය කර ඇත්තේ මන්ද? මෙවැනි පවුල් ජීවිතවලින් සමන්විත සමාජයක නීති විරෝධී ක්‍රියා හා අපරාධ බහුලවීම ද පුදුමයක්‌ නොවේ.
"පොරොන්දම් සීයට හැත්තෑපහක්‌ හොඳයි. ඒ නිසා ඉතිං මේ කසාදෙ කරල දෙන්න හොඳාල යෑයි තම තරුණ දරුවන් ගැන මව හෝ පියා සිතයි." අපි යාළුවෙලා අවුරුදු තුනක්‌ වුණා. පොරොන්දමුත් සීයට හැත්තෑපහක්‌ ගැලපෙනවා. ලබන මාසෙ බඳිනවාල යෑයි කියන පෙම්වතුන් ද හිතන්නේ අනාගත යුග දිවිය සර්වප්‍රකාරයෙන් සාර්ථක වන බවයි. මෙහිදී බොහෝ දෙනා අවධානය යොමු නොකරන කාරණයක්‌ තිබේ. ඒ පොරොන්දම් පරීක්‍ෂණයේදී නොගැලපුණ සියයට විසිපහක්‌ වූ සුළු ප්‍රමාණය ගැනයි. ඒ සුළු ප්‍රමාණය නිසා විවාහ ජීවිතය තුළ ඉහත සඳහන් ගැටලු නිර්මාණය විය හැකිය. අප මේ ලිපියෙන් සාකච්ඡා කළේ විසි පොරොන්දම් වලින් එකක්‌ වූ ග්‍රහ පොරොන්දම නිසා පමණක්‌ ඇති විය හැකි බාධක හා ශුභඵල පිළිබඳවයි. එය පොරොන්දම් වලින් එකක්‌ හෙවත් සියයට පහක ප්‍රමාණයකි. එහෙත් එයම බරපතළ ගැටලු නිර්මාණය කරනු පෙනේ. ග්‍රහ බල හෝ දුබලකම් නිසා ජීවිතයට ඇතිවිය හැකි බලපෑම නැතහොත් අසුබ ග්‍රහයකු පෙන්වන විපරීත අශුභ ඵල එසේම දරාගත යුතු ද? ඒ දුක විඳිය යුතුමද? එසේ නම් කේන්ද්‍ර පරීක්‍ෂා කරන්නේ කුමකටද? මෙවැනි ගැටලු ඇති විට කළ යුතු ප්‍රධානම කාරණය විය යුත්තේ ගැටළුවක්‌ ඇති බවත් එහි සැබෑ ස්‌වභාවයන් අවබෝධ කර ගැනීමයි. එවිට විසදීම පහසුය. ඒ සඳහා පරිනත වැඩිහිටියකු සමඟ සාකච්ඡා කිරීම ප්‍රයෝජනවත් ය. ජ්‍යොතිෂ උපදෙස්‌ ලබා ගැනීම ද ප්‍රතිඵලදායකය. එය යන්ත්‍ර මන්ත්‍ර ගුරුකම් කිරීමට පෙර කළ යුතු ය. ඔබටත් ප්‍රීතිමත් විවාහ ජීවිතයක්‌ ලැබේවා! යනු අපේ පැතුමයි.
කෑගල්ලේ සුනිල් කුමාර ගම්ලත්
උපුටා ගැනීම දිවයින පුවත් පත
