වෙඩින් එකට මෙනු එකක් තෝර ගන්න හොඳ විදිහක්
අපේ ජීවිතයේදී ආහාර පානවලට ප්‍රධාන තැනක් ලැඛෙනවා. ආහාර ගැනීම අභිමානයකින් යුතුව කළ යුත්තක්. කිසිම විදියකින් එය අවමානයටවත් හීනමානයකටවත් හේතුවක් කර නොගත යුතුයි. අනෙක විවාහ මංගල්‍යයක් වගේ සදානුස්මරණීය මොහෙතකට එකට එකතු වන පිරිස විශේෂයි. එයාලා පැමිණෙන්නේ නව යුවළට ආශිර්වාද කරමින් සුබාශිංසන පිරිනමන්නයි. තමන් වෙනුවෙන් පැමිණෙන එම පිරිස ආහාරපානවලින් සංතෘප්තියට පත් කිරීමේ වගකීම පැවරෙන්නේත් නව යුවළටමයි.
හෝටලයේදී විවාහ මංගල්‍යය පවත්වද්දී එයින්ම ලබාදෙන ආහාරපානම අප ලබාගත යුතුය කියලා නියමයක් නෑ. එහෙත් මෙනු එක බලද්දි එක එක ආකර්ෂණිය නම්වලින් ආහාර වර්ග හඳුන්වා තිබේ. සමහර විට අපිට නොතේරෙන්නටද ඉඩ තිඛෙනවා.
ඉංගී‍්‍රසි භාෂාවෙන් හැඩ වැඩ දමලා තබාපු එහෙම ඒවායේ තේරුම අපට විමසා දැනගත හැකිය. අපි කාටවත් අලහොදි අමුතුවෙන් හඳුන්වා දෙන්න ඕනෑ නැහැනේ. ඒත් මුලින්ම හෝටලයෙන් අපට ලැඛෙන මෙනු එකේ එහෙම හොදි වර්ග කියලා නම් කරන්නේ නැහැ. අල හොදි "ක්‍රීම් කොකන්ටස් විත් පොටැටෝස්" කියල හඳුන්වන්න පුළුවනි. එහෙව් අපට නොතේරෙන දේවල් අපට විමසා පහසුවෙන්ම දැනගත හැකියි.
කිසිම විදියකින් ඊට පැකිලෙන්නට අවශ්‍ය නැහැ. හෝටල් සේවක මණ්ඩලය සැබැවින්ම ඊට බැඳී සිටිනවා.
විවාහ මංගල්‍යයක ආහාර වට්ටෝරු කිහිපයක්ම හෝටලය මගින් හඳුන්වා දෙනවා. එහි අරමුණ විවිධාකාර රසට පි‍්‍රයකරන අමුත්තන් හැමෝටම සරිලන ආකාරයට ආහාර සැපයීමයි. ඉතින් අපි කළයුතු වන්නේ ඒවායේන් වඩාත් අපට ගැළපෙන වට්ටෝර ඇණවුම් කිරීමයි. මංගල දිනයේදී ආහාර මේසයට බත් වර්ග තුනක් තෝරා ගැනීම හොඳින්ම සෑහේ. ප්‍රයිඩ් රයිස්, හැරුණු විට සුදු හා රතු බත් ආදිය ඒවා සැකසිය හැකියි.
අද හුඟදෙනෙකු තෙල් අඩුවෙන් ආහාරයට එක්කර ගැනීමට පි‍්‍රයකරන බවත්, අප අමතක නොකළ යුතුයි. කෑම මේසයට මස් වර්ග හුඟක් අවශ්‍යද? සැබවින්ම මස් වෑංජන තුනක් පමණ හොඳින්ම සෑහෙනවා නොවේද ? මස් වර්ගයක් සමග එක් මාළු වර්ගයක් තෝරාගත්තද එයද සෑහේවි. එළවළු වෑංජන කිහිපයක්ම මංගල සාදයට අවශ්‍යමයි. ඒවා අතරට අල, පරිප්පු ආදිය එකතු කිරීම් අවශ්‍යතාව තදින් දැනෙයි. කෑම මේසෙට අලංකාරය වගේම බත් පතේ රසය තියුණු කරන්නට සලාද වර්ග දෙක තුනකින් පුළුවනි. බැදුම් වර්ගයකුත් එකතු වුණු විට තවත් අඩුවක් කාටවත් නොදැනෙනු ඇත.
සමහරු මංගල්‍යයට තුන්සියයකට ආරාධනා කරනවා. ඒත් කෑම ඇනවුම් කරන්නේ දෙසිය හැත්තෑපහක් තරමේ අඩු ගණනකටයි. පුංචි ළමයි එහෙමත් එනවනෙ කියලා එයාල සිතනවා. නමුත් එය වැරදියි. අමුත්තන්ට ආහාර මදිවී අපහසුතාවට පත්වන්නට එය හේතුවක් විය හැකියි. එය එසේ වන්නේ හැම විටම හෝටලය මගින් ආහාර සපයන්නේ ඇණවුම් කරන සංඛ්‍යාවට සමාන පිඟන් සංඛ්‍යාවකට පමණක් වන නිසයි. තවත් සමහරු ආරාධනා කරනවාට වඩා වැඩි ගණනක් පිඟන් ප්‍රමාණයක් මිලදී ගන්නවා. මේ නිසා සිදුවන්නේ ආහාර නාස්තියකි.
හෝටලයකදී උත්සව වේලාවක එකවරකට වඩා කෑම ඛෙදාගත නොහැකියයි සිතන පිරිසක් අප අතර සිටිනවා එය වැරදි සිතිවිල්ලකි. අපට එහිදී ඕනෑතරම් වාර ගණනක් කෑම ඛෙදාගන්නට පුළුවනී. එහෙත් ඒ හැම වාරයකදීම එකම පිඟානකට ඒවා ඛෙදාගැනීමට අප වගබලා ගතයුතු වෙනවා. නුහුරු, නුපුරුදු ආහාරවල රස හඳුනන්තේ නැතිකම තවත් ගැටලුවක්. ඊට පිළියම වන්නේ ඇබිත්තක් ගෙන රසබලා අකමැති නම් ඉවත දමන්නට භාජනයක් ආහාර බඳුන්වලට පසෙකින් තබා තිබීම නිසා ඕනෑතරම් ආහාරවල රස පරීක්ෂා කර කැමති වර්ගය තෝරා ගන්නට කාටත් පුලුවනි.
අයිස් ක්‍රිම්, පුඩින්, ජෙලි වලට එහෙම කොයිකවුරුත් කැමතියි. ඒනිසා පළතුරු වර්ග බොහොම අඩුවෙන් ඇණවුම් කරනවා. නමුත් අද වන විට ස්වභාවික පළතුරු කැබැල්ලක රසය අතුරපස විදියට රසවිඳින්නට හුඟදෙනෙක් කැමති බව පෙනෙවා. ඉතින් අපට අපුරුවට බන්දේසියක් විදියට පළතුරු හෝටලයේදී වුවත් සැකසිය හැකියි.
එහි අඹ, දොඩම්, ගස් ලබු, මිදි, පෙයාර්ස් ආදිය සිත් ඇදගන්නා අයුරින් සකසන්නට පුලුවනි. කිසිම හෝටලයකදී හැඳි ගෑරුප්පු වලින්ම ආහාර ගතයුතු යැයි නියමයක් නොවේ. අපට අතින් ගෙන ඒවායේ රස බැලීමට හැකියි. ඒ සඳහා දෑත් සෝදන්නට වතුර භාජනයක් පිරිනමන්නට ඕනෑම මහ හෝටලයක කාර්ය මණ්ඩලය සූදානමින් සිටියි.
ගොඩාක් ඛෙදාගෙන ටිකක් රසබැලීම සමහරු විලාසිතාවක් කොටගෙන සිටිනවා. එයාලා සිතන්නේ එය නියම නෝනාමහතුන්ගේ ගතියක් බවය. එහෙත් නියම මහත්මයෙක් නැතිනම් නෝනා කෙනෙකු ආහාර නිරපරාදේ ඉවත නොදමයි. ආහාර නාස්තිය අපරාධයක් මිසෙක මහත්මාගතිය පෙන්වන්නක් නොවෙයි.
උපදෙස් ප්‍රවීණ සුපවේදී දොන් ෂර්මන්
