අනවශ්‍ය ගැබ් ගැනීම්වලින් වැළකී ආරක්ෂිතව සිටින්න තරුණ දූවරුන්ට වෛද්‍ය උපදෙස් කිහිපයක්
අද තරුණ දූවරුන්ට නොලැබෙනම අධ්‍යාපනය තමයි “විධිමත් ලිංගික අධ්‍යාපන” දැනුම. ඒ නිසාම ඒ අය බොහෝ විපත්වලට ඇදවැටෙනවා. අද අපේ මාතෘකාව එවන් දැනුවත් නැති තරුණ දූවරුන්ට විශේෂ දැනුමක් ලබා දෙන්නයි. තරුණ මවකට, තරුණියකට, තරුණ දුවකට තමන් ගත කරන භද්‍ර යෞවනය වගේම ඉන්පසු පෙම් සබඳතාවේදී, විවාහ ජීවිතයේ ලිංගික ක්‍රියාකාරකම්වලදී ලිංගික අධ්‍යාපනය හරිහැටි ලබා තිබුණේ නම් බොහෝ අත්වැරදි, අනවශ්‍ය ගැබ් ගැනීම් හා කරදරවලට පත් වෙන්නේ නෑ.
විශේෂයෙන්ම අනවශ්‍ය ගැබ් ගැනීම් වළක්වාගෙන ඉතා හොඳින් ලිංගික චර්යාවේ විශ්වාසයෙන් නිරතවන්නට කාන්තාවකට “අන්තර් ගර්භාශිත තැන්පතුව“ ඉතා වැදගත් වෙනවා. මෙය සරලව කීවොත් “ලූපයක් පලඳවා ගැබ් ගැනීම් පාලනය කිරීමක්” ලෙස හඳුන්වන්න පුළුවනි. මොකක්ද මේ ලූපය? කොහොමද අප ලිංගිකව එක් වුණත් ලූපය පැලඳ තියෙන නිසා ගැබ් නොගෙන තියෙන්නේ? ඔබ එහෙමත් විමසනවා ඇති.
මොකක්ද මෙහි ඇති විශේෂය. ඇත්තෙන්ම කියනවා නම් මෙය ඉතා ආරක්‍ෂිත සහ වඩාත් ඵලදායී පවුල් සැලසුම් ක්‍රමයක්. එය ලොවම පිළිගත් දෙයක්. මෙම ලූපය සෙ.මී. 2.5ක් තරම් වූ ටී අකුරක හැඩයකින් යුතු තඹ සහ ප්ලාස්ටික් මිශ්‍රව හැදූ නැවෙනසුලු කුඩා උපකරණයක්. එය සුදුසුකම් ඇති වෛද්‍යවරයකු විසින්ම ගර්භාශය තුළ තැන්පත් කළ යුත්තක්. එය ඔබට කළ නොහැක්කක්. ලූපය තැන්පත් කිරීමේදී යම් අපහසුතාවක් ඇති වුණත් ගර්භාශයේ තැන්පත් කළාට පස්සේ එය ගර්භාශ කුහරය තුළ සිර වී පවතිනවා. අඟල් 1-2ක් පමණ වූ දිගට, ගර්භාශයේ ඉඳලා යෝනි මාර්ගය තුළට සිහින් වූ නූල් පට දෙකක් ලෙස එය එල්ලී තියෙනවා.
ලූපය තැන්පත් කරගත යුතු කාලය වෛද්‍යවරයා හා ඔබේ තොරතුරු දැන්වීමෙන් පසුව තීරණය කළ යුතුයි. ඒ අනුව ඔසප් වීම පටන් අරන් මුල් දින 12 ඇතුළත මෙය තැන්පත් කළ යුතුයි. එසේ නොමැති නම් දරුවා ප්‍රසූත කළ පසු සති 6කින් ලූපය තැන්පත් කළ යුතුයි. ඒ සියල්ල ගැන විශේෂඥ වෛද්‍යවරයකුගෙන්ම දැනගත යුතුයි.
ලූපය තැන්පත් කිරීම මඟින් ශුක්‍රාණු ඩිම්බය වෙත ළඟා වීම වළක්වනවා. එනිසා ශුක්‍ර සංසේචනය වීමත් වැළකෙනවා. කිසියම් විධියකින් ඩිම්බයක් සංසේචනය වූවොත් එය ගර්භාශය තුළ අධිරෝපණය වීමද වළක්වනවා. මේ වෙද්දි සොයාගෙන තිබෙන පර්යේෂණ තොරතුරු අනුව ලූපයේ තිබෙන තඹ මඟින් ශරීරයේ ප්‍රතිශක්තිකරණ පද්ධතියෙන් යම් ගැබ් ගැනීමක් වළක්වාලන්නට උත්තේජනයක්ද සිදු කෙරෙනවා. මේ පිළිබඳව කරුණු වෛද්‍ය පර්යේෂණයන්ට අනුව ලූපය භාවිත කරන්නන් ගැබ් ගන්නා ප්‍රතිශතය 2%ක් තරම් අඩු අගයක් ගැනීම විශේෂයි.
එක් ලූපයක් වසර 10ක පමණ කාලයක් භාවිත කරන්නට පුළුවන් බව කියැවෙනවා. නමුත් වසර 10ක කාලය අවසානයේදී නැවත අලුත් ලූපයක් තැන්පත් කිරීමක් අනිවාර්යයෙන් කරගත යුතුයි. මෙය දිනපතා පවුල් සැලසුම් පෙත්තක් ගන්න අපහසු, එය අමතක වන අයට ඉතා හොඳ ආරක්‍ෂණ ක්‍රමයක් වෙනවා. ඔබට ලිංගික ක්‍රියාවලිය බාධාවකින් තොරව එක දිගටම කරගෙන යා හැකි අතරම ලිංගිකව එක්වීමකදී ඇති විය හැකි රෝගවලින්ද ආරක්‍ෂා වීමක් මින් සිදු කෙරෙනවා. ලූපය තැන්පත් කළ මුල් කාලයේදී යටි බඩෙහි යම් වේදනාවක් ඇති විය හැකියි. යම් තරමක කුඩා රුධිරය වහනයක්ද විය හැකියි. පළමු මාස කිහිපය තුළදී ඔසප් තත්ත්වයකදී වැඩිපුර රුධිරය වහනය වෙන්නත් ඉඩ තිබෙනවා.
ඇතැම් අත්දැකීම් අනුව කලාතුරකදී ලූපය නොදැනීම ඉවතට එන්නත් පුළුවන්. තැන්පත් කළ මුල් දින 20 තුළ යම් ආසාදනයක් ඇති වන්නටත් පුංචි ඉඩක් පවතිනවා. විශේෂයෙන් ඔබට ශේ‍රා්ණි කුහරය තුළ යම් ආසාදනයක් ඇති වී තිබුණේ නම් මෙවැනි ලූපයක් භාවිත කිරීම සුදුසු නම් නැහැ.
අද විද්‍යාත්මක සොයා ගැනීම් වඩාත් දියුණුයි. ඔබට ඔබේ ජීවිතය යහපත්ව, සතුටුදායක ලෙස පවත්වාගෙන යන්න අවශ්‍ය දැනුම ලබා ගන්නත් මාර්ග බොහෝමයි. පිළිගත් නාරිවේද වෛද්‍යවරයකු හමුවී මේ ගැන පූර්ණ අවබෝධයක් ලබාගෙන මෙය පැලඳ ගන්නත් පුළුවන්. ඒ නැතත් රජයේ රෝහල්වල නාරිවේද වෛද්‍යවරු සිටිනවා. ඔබ ඔබේ ගැටලුව නොසඟවා ඒ අයට කීවොත් ඔවුන් ඔබව දැනුවත් කරාවි. යහපත් ලිංගික ජීවිතයක් ගත කරන්නත්, අනවශ්‍ය ගැබ් ගැනීම්වලින් වැළකෙන්නත් පුළුවන්.
උපුටා ගැනීම මව්බිම
