විවාහය සාර්ථක වේද බිඳ වැටේද
නැන්දම්මා දේවදත් යක්‍ෂණියක්ද, දේව මාතාවක්ද, දෙදෙනා බන්ධනාගාර ගත වෙයි දැයි කියා බලපාන ග්‍රහ තත්ත්වයන් විමසමු.
ස්ත්‍රී පුරුෂ දෙපාර්ශ්වයේ කායික වූත් මානසික වූත් ලිංගික තෘප්තියක් සුවයක් ලැබීමට පමණක් විවාහය ප්‍රමුඛ නොවේ. ඔවුනගේ විවාහය ඉදිරියේදී සාර්ථකවේද බිඳ වැටේද යන්න ඔවුන් දෙදෙනාගේ ජන්ම කේන්ද්‍රයන් නිරීක්‍ෂණය කර ඉතා හොඳින් ඔවුනට බලපාන ග්‍රහ තත්ත්වයන් ගැන දැන ගැනීම ඉතා වැදගත් වේ. එපමණක්ම නොවේ. ඔවුන් ජීවත්වන පරිසරය, නෑදෑ හිත මිත්‍ර පිරිස් සහ ඇසුරු කරන්නන් ගැන ද විවාහ දිවියේ සාර්ථකත්වය හෝ බිඳවැටීම ගැන ද දත යුතුයි.
කේන්ද්‍රයක විවාහය ගැන නිරීක්‍ෂණය කරන විට රාශි වශයෙන් 7වැන්න ප්‍රමුඛ වේ. ග්‍රහයා වශයෙන් සිකුරු හා 7 වැන්නාධිපති ද ප්‍රමුඛ වේ. තමාගේ විවාහකයා කුමන තත්ත්වයේ කෙනෙකු දැයි එම ග්‍රහයන් හා රාශියන් විග්‍රහ කරයි. කේන්ද්‍රයේ සිකුරු උච්චව හෝ වෙනත් අයුරකින් බලවත්ව සිටියේ නම් විවාහකයා බලවත් අයෙකි. එම සිකුරුම නීචව හෝ වෙනත් අයුරකින් දුබලව (පාප සංයෝග, පාප දෘෂ්ටි හෝ පාප කර්තරිව) සිටියේ නම් විවාහකයාගේ සම්මත වෙනස්කම් විය හැකිය.
එම සම්මත වෙනස්කම් යනු වයසේ වෙනස හෝ කුලය ජාතිය වැනි වෙනසකි. 7වැන්නේ බලවත් පාපීන් දෙදෙනෙකු (කුජ, රාහු, ශනි, රාහු) වෙතොත් පළමු විවාහය බිඳීයෑම, වැන්දඹු අයෙකු සමඟ විවාහවීම පෙන්නුම් කරයි. එනිසා පොරොන්දම් පරීක්‍ෂාවට පෙර ඒ තත්ත්වය අවබෝධ කර ගත යුතුයි. විශේෂයෙන්ම නීච සඳු රාහු සමඟ යෝගව 7වැන්නේ සිටියේ ද විවාහ කාරක සිකුරු ද පාප පීඩා සහිතවම වෙතොත් විවාහයේ පළමු අත්දැකීම අත්වීම, ආදරය කිලිටිකර ගැනීම වැනි ප්‍රතිඵල අත්වේ.වර්තමානයේ විවාහයේ බරපතළ බාධිකාව වශයෙන් නැන්දම්මා හැඳින් වේ. එක් අයකුට නැන්දම්මා දේව මාතාවක් වශයෙන් ද, තවත් අයෙකුට දේවදත් යක්‍ෂණියක් වශයෙන් ද වේ. නැන්දම්මා ගැන හඳුන්වන රාශිය 10 වැන්නය. තම මව ගැන කියන රාශිය 4වැන්නයි. විවාහකයාගේ මව ගැන කියන රාශිය 7න් 4 හෙවත් 10 වැන්නයි. එනිසා කේන්ද්‍ර දෙකේම 10 වැන්න පරීක්‍ෂා කළොත් නැන්දම්මාගේ කාරුණික අකාරුණික ගති ගුණ තේරුම් ගත හැකිය. 10 වැන්න පාපපීඩිත වීමෙන් ඇගේ තත්ත්වය සුබදායක නොවන බවත් 10වැන්නේ ශුභයන් වීමෙන් නැන්දම්මාගේ කාරුණිකත්වය යහපත් බව දැන ගැනීමට පුළුවන.
10වැන්නෙන් නැන්දම්මා ගැන කිව හැකිසේම 4වැන්නෙන් මාමා ගැන ද කිව හැක. ඒ පියා ගැන කියන 7වැන්නෙන් 10වැන්න නිසාය. එසේම 7න් 2වැන්න හෙවත් 8වැන්න විවාහකයාගේ ධන රාශියයි. 7න් 3වැන්න හෙවත් 9වැන්න විවාහකයාගේ සහෝදරයන් ගැන ද කියන රාශියත් 7න් 4වැන්න හෙවත් 10වැන්න විවාහකයාගේ මව ගැනත් ගේදොර, වතුපිටි, කුඹුරු, යාන වාහන ආදිය ගැන කියන රාශියයි. එසේම 7වැන්නෙන් 5වැන්න හෙවත් 11වැන්න විවාහකයාගේ උගත්කම ගැන කියන රාශියයි. 7වැන්නෙන් 6වැන්න හෙවත් 12වැන්න විවාහකයාගේ සතුරන් හා නිධන් ගත රෝග හා වෙනත් ලෙඩ රෝග කායික එක්වීම පිළිබඳව කියන රාශියයි. එවැනි බොහෝ කරුණු කේන්ද්‍ර නිරීක්‍ෂණයෙන් දැන ගැනීමට හැකිය.
එනිසා ඉහත කරුණු අනුව පොරොන්දම් 20 පමණක් බලා ශුභ අශුභ අනුව නිර්දේශ කරන්නා වගේම විවාහ වන පුරුෂයාගේ තත්ත්වය පමණක්ම නොව ස්ත්‍රීගේ කේන්ද්‍රය ඇසුරින්ද විමසා බැලිය යුතුයි.
විශේෂයෙන් දෙදෙනාගේ කායික වශයෙන් ස්ත්‍රී පුරුෂ සංසර්ගික ප්‍රභේද, කාම ආස්වාදය, ක්‍රියාකාරීත්වය, සෞඛ්‍ය තත්ත්වය, සැත්කම් වේද? යන්න ග්‍රහ පිහිටීම් අනුව විමසිය යුතුයි. කේන්ද්‍රයේ ග්‍රහයින් පිහිටි ස්ථාන බලා, විවාහ වෙන්නේ සතුටින් සමාදානයෙන්, ප්‍රීතියෙන් දවස ගත කිරීමටය. තවද නිරෝගී බුද්ධිමත් දරුවන් ලබා පරපුර පෝෂණ කිරීමටය. එනිසා විවාහ වන ස්ත්‍රී පුරුෂ දෙදෙනාම නිරෝගී අයවලුන් විය යුතුයි.
විශේෂයෙන්ම සැමියෙක් හෝ අඹුවක් හේතු ඇතිව හෝ නැතිව හිර බන්ධනාගාර වෙති. එනිසා හිර බන්ධන යෝග ද කේන්ද්‍ර තුළින් දැන ගැනීම වැදගත් වේ. එනිසා පොරොන්දම් සියල්ල ගැලපුනත් රූමත්, ගුණවත්, ධනවත්, කුලවත් හැම දෙයින්ම පූර්ණ උවත් හිර බන්ධන, නඩු හබ ආදිය ගැන ජන්ම කේන්ද්‍රයේ ග්‍රහ පිහිටීම් අනුව පෙනේ නම් එවැනි ස්ත්‍රී පුරුෂයකු සමඟ විවාහ වීමෙන් දෙදෙනාගෙන් එක් අයකු අසරණ වේ. සමහර විට දෙදෙනාම හිරබන්ධන ගත වීමට ද ඉඩ ඇති ග්‍රහබල ඇත.
ජන්ම කේන්ද්‍රයක මදනස්ථානය නොහොත් 7වැන්නේ බුධ සිකුරු සංයෝග නම්, සිකුරු පසු වන්නේ සතුරු රාශියක නම් ශනිගේ සප්තම දෘෂ්ටිය එල්ල වුවහොත් ඇයට විකෘති කාමාශාවන්ගෙන් පිරුණු මනසක් ඇත්තියකි. එවැනි අය පුරුෂ හැඩරුව ඇති තරුණියන් මොන අන්දමකින් හෝ වසඟයට ගෙන යහන් ගතවී පුරුෂාකාරව අශ්වාභාවික ලිංගික රමණයේ හැසිරී කාම ගින්න නිවා ගනී. තවත් කරුණු බොහෝ ඇත. එනිසා පොරොන්දම් ගැලපීම් පමණක් නොව ඊට වඩා ගැඹුරින් ඔවුනගේ කීමට බැරි ලජ්ජා කරුණු කුමන ඒවා දැයි විමසා නිරීක්‍ෂණය කර ඔවුනගේ විවාහ දිවිය ඉදිරියේදී සාර්ථක වේද බිඳවැටේද යන්න ග්‍රහ තත්ත්වයන්ගේ පිහිටීම් අනුව දැන විවාහ වීම දෙදෙනාගේ අනාගතයට බාධාවක් නොවේ.
ජ්‍යොතිෂ්‍ය විද්‍යාජෝති, ගුප්ත විද්‍යාකීර්ති
වාස්තු විද්‍යා උපදේශක,
සාමවිනිසුරු, දේශබන්දු රඹුක්කන ජිනදාස එදිරිසිංහ
පොලිසිය අසල – 0770730062
උපුටා ගැනීම දිවයින
