පහසුකම් සියල්ලම සහිත ශාලාවක් තෝරා ගන්න
මංගල උත්සවයක් සංවිධාන කිරීමේදී අප වැඩි අවධානයක් ලබාදෙන්නේ උත්සව ශාලාව වෙතය. එකල නම් මනාල යුවළගේ නිවෙස මෙම කටයුතු සඳහා යොදාගනු ලැබීය. නමුත් එහි ඉඩකඩ පහසුකම් අඩු වීම හා වෙනත් අපහසුතා නිසාම මේ සඳහා සුදුසුම ස්ථානය ලෙස උත්සව ශාලාව තෝරා ගැනීමට පෙලැඹිණි. නැකැත්පත සෑදීමෙන් පසු මුලින්ම අප කරන්නේ සුදුසු උත්සව ශාලාවක් තෝරා වෙන්කර ගැනීමය. නැකැත් වැඩි වශයෙන් යෙදෙන කාලයක නම් උත්සව ශාලාව වෙන්කර ගැනීමට තරමක් අපහසුය. එම නිසා උත්සව ශාලාව කල්තියාම වෙන්කර ගැනීම ඔබටද පහසුවක් වේවි.
ශාලාව තෝරාගැනීම :
මෙහිදී ඔබ සැලකිලිමත් විය යුතු කරුණු කාරණා රාශියකි. උත්සව ශාලාවක් තෝරා ගැනීමේදී එහි කීර්තිනාමය හා ඉතිහාසය පිළිබඳත් තරමක් දැනුම්වත් වන්න. මීට පෙර එම ශාලාවේ පැවැති උත්සවයන් ගැනත් ලැඛෙන සේවා ගැනත් අන් අයගෙන් අසා දැන ගැනීම මෙහිදී වැදගත් වනු ඇත. එවිට ඔබට ඔවුන්ගේ කාර්යයන් පිළිබඳ විශ්වාසය තබා ගනිමින් කටයුතු කළ හැකිය.
පහසුකම් :
විවාහ උත්සවය ශාලාවේ ඇතුළත පවත්වන්නේ නම් වායුසමීකරණ පහසුකම් ආදිය ගැනත් සලකා බැලිය යුතුය. එළිමහනේ උත්සවය සංවිධාන කරන්නේ නම් ඒ සඳහා සුදුසු පරිසරයක් පිහිටා තිබීමත් වැදගත්ය. තවද වාහන නවතා තැබීමේ පහසුකම්ද මේ අතරට සලකා බැලියයුතු වේ.
වසර එකහමාරකට පෙර අඩුම තරමින් විවාහ දිනයට වසර 1 1/2කට පෙරවත් උත්සව ශාලාව වෙන්කර ගන්න.
කාලය :
ඉන්පසු විවාහ උත්සවය පවත්වන්නේ උදේ කාලයේද නැතහොත් සන්ධ්‍යා කාලයේද යන වග තීරණය කරන්න. උත්සවය පවත්වන්නේ කොපමණ කාලයක් තුළද යන බවත් තීරණය කර ගනිමින් උත්සව ශාලාව වෙන්කර ගන්න.
පසුතල :
මංගල උත්සවය වැඩි වශයෙන් ඡායාරූප ගත වන්නේ ශාලාව තුළය. එම නිසා එහි අලංකාරත්වය හා පසුතලය පිළිබඳත් සැලකිලිමත් විය යුතුය. උද්‍යාන අලංකරණ සහිත පරිසරයක් උත්සව ශාලාව සතුව ඇත්නම් එය ඔබටත් පහසුවක් වේවි. මන්ද එවිට ඡායාරූප ගැනීමට වෙනත් ස්ථානයකට යෑමට අවශ්‍ය නොවන බැවිනි. එය ඔබේ මුදල් මෙන්ම කාලයද ඉතිරි කරයි. ඇතැම් උත්සව ශාලා සතුව මේ සඳහාම වෙන්වූ Art Gallry නිර්මාණය කර තිබීමත් දැකිය හැක්කකි. ඔබේ මංගල්‍යයට පැමිණෙන නෑ හිතවතුන් පිරිස සාමාන්‍යයෙන් 200-250ක් අතර විය හැකිය. ඒ බවද සිහිතබා ගනිමින් උත්සව ශාලාව සැලැසුම් කර ගත යුතුවේ.
ආහාර :
මංගල උත්සවයේ වැදගත්ම අංගයක් වනුයේ ආහාරපානය. ඔබේ ආරාධනය පිළිගෙන පැමිණි නෑ හිතවතුන් සෑහීමට පත්වන අයුරින් ආහාරපාන පිළිගැන්වීම ඔබගේ යුතුකම වන්නේය. එම නිසා ඔබගේ දැඩි අවධානය ඒ සඳහා යොමුකළ යුතුමය. ප්‍රණීත රසයෙන් යුතු ආහාරපාන අතුරුපස ආකර්ෂණය ආකාරයට පිළිගැන්වීම ගැනත් සැලකිලිමත් වන්න.
ඔබේ උත්සවයට සහභාගි වන පිරිස අනුව ආහාර පිළියෙල විය යුත්තේ බටහිර පන්නයටද, චීන ක්‍රමයටද නැතිනම් සිංහල ආහාරපානවලින්ද යන්න ඔබ තීරණය කළ යුතුය. රාත්‍රි සාදයකදී නම් විවිධ අයුරින් පිසගත් බත්වලට අමතරව නූඩ්ල්ස්ද එක්කර ගත හැකිය. මෙලෙස විවිධ රසයෙන් යුත් ව්‍යංජනයන් හා සලාද අතරට කජු ව්‍යංජනයට හිමිවන්නේ වැඩි කැමැත්තක්. ඒ නිසා එයද අනිවාර්ය අංගයකි.
ප්‍රධාන ආහාරය ගැනීමෙන් පසු දිව පිනායන අතුරුපස වර්ග කිහිපයක් තිබීමත් වැදගත්ය. විශේෂයෙන් මංගල මේසයක අතුරුපස වර්ගීකරණයෙන් වැඩි අලංකාරයක් ගෙනදීමටද හැකිවේ. එමෙන්ම එහිදී අමුත්තන්ගේ රුචිකත්වය අනුව ආහාර තෝරාබේරා රසවිඳීමටද ඉඩකඩ හිමිවේ. එම අංග අතර ජෙලි, කිරි, පුඩින්, සැලඩ්, බිස්කට්, කේක් ආදිය වේ.
සියල්ලම එකම ස්ථානයෙන් :
විවාහ මංගල උත්සවයක් සඳහා කටයුතු රාශියක් සංවිධාන විය යුතුවේ. මේ සියල්ල විවිධ ස්ථානයන්ගෙන් සිදු කරගත යුතු නිසා ඔබගේ වගකීමත් වැඩි වේ. අද වන විට ඔබේ පහසුව තකා මේ සෑම අංගයක් පාහේම උත්සව ශාලාව විසින්ම සපයන අවස්ථා ඇත. එම අංග අතර මගුල් ඛෙර, අෂ්ටක, ජයමංගල ගාථා, කේක් ආකෘති, සංගීත හා නැටුම් කණ්ඩායම් ආදිය වේ. මෙම අංග සියල්ල එකම ස්ථානයකින් ලබාගැනීමේදී ඔබට සහනදායී මිලක්ද ලබාගත හැකිය. එමෙන්ම එය ඔබේ කාර්යයන්ටද පහසුවකි.
කාමර පහසුකම් :
මංගල උත්සවයේදී ඔබ සැදෑ ගමන සඳහා වෙනත් ඇඳුමකින් සැරසෙන අවස්ථාද ඇත. එහිදී ඔබට හැඩගැන්විය හැකි පරිදි කාමර පහසුකම් තිබේදැයි සලකා බැලීමත් වැදගත්ය.
ශාලිකා රංගනී සමරදිවාකර
උපුටා ගැනීම මව්බිම
