ඔබට ඉන්නේ මාතු භාර්යාවක් ද? වධක භාර්යාවක් ද?

මේ ලෝකේ කිසියම් හෝ සත්ත්වයෙක් උපන්නොත් කොතැන හෝ ඔහුට උරුම භාර්යාවක් ඉන්නවා. නමුත් එක එක සත්ත්වයාට අනුරූපව නමක් පටබැඳීම වෙනස් වෙනවා. මනුෂ්‍යයාගේ නම් භාර්යාව නැත්නම් සහකාරිය. කුකුළකුට නම් කිකිළිය වෙනවා. ඒත් මොනරාට නම් මොනරි කියන්නෙ නැහැ, ඌ සෙබඩ නමින් හැඳින්වෙනවා. ඔය විදිහට නමින් වෙනස් වෙනවා. මනුෂ්‍යයා ඉපදුණාට පස්සේ එක එක කාලවලදී විවාහ වෙනවා. ඒක ඔහු හෝ ඇය පතාගෙන ආ හැටි. ඒ ස්වකීය වර්ගයා බෝ කරන්න, ඒ ලෝකය පවත්වාගෙන යන්න. සෑම පිරිමියෙක්ම විවාහ වෙනවා තමයි. ඒත් එයාට විවාහය කැප ද කියල දැනගන්න ඕන නේද? කැප නැති කිසිම දෙයක් ළං කර ගත්තාම ලැබෙන්නෙ අකැප ප්‍රතිඵල. අපි මේක දැනගන්නෙ කොහොමද? ඒක ජ්‍යොතිෂයේ විග්‍රහ කරනවා.

පොරොන්දම් පරීක්ෂා කරල, ලකුණු මට්ටම විතරක් බලල විවාහ වූ කොච්චර අය දරුවො නැතුව එක එක පල්ලි, කෝවිල්, පන්සල්වලට යනවද? දරුවො හැදුවාම ඒ අය රටට වැඩදායි අය වේවි ද? විවාහය මැරෙනකම් කලකිරෙන්නෙ නැතුව ඉදිරියට යාවි ද? මේවා විවාහයට පෙර දැනගත්තොත් නේද වටින්නෙ. කිසියම් කෙනකුට විවාහයක් කැප නැත්නම් විවාහය කළොත් මොකද වෙන්නෙ. විවාහයට කැමැත්ත තිබුණත් සුදුසු භාර්යාව නොලැබුණොත් එතැනින් ඉදිරිය අසාර්ථකයි. විවාහය කියන්නේ ජීවිතයේ වැදගත් සන්ධිස්ථානයක්. ඔබ දැනුවත්ව හෝ නොදැනුවත්ව මේ සන්ධිස්ථානය අයහපත් වුණොත් ඉදිරි ජීවිතයේ ප්‍රශ්නවලට මුහුණපානවා. මේ විශ්වය නිතරම කුමන අයුරකින් හෝ වෙනස් වෙනවා. ඒ නිසා හරි කල්පනාවෙන් වැඩ කරන්න ඕනෑ, හිතන්න ඕනෑ.

සතුන්ටත් භාර්යාවන් ඉන්නවා. වෙනස තමයි බොහෝ අයට ස්ථිර භාර්යාවන් නැති වීම සහ ලියාපදිංචි නැතිවීම. බිරිඳ වශයෙන් භාරගන්නෙ නැහැ. මිනිසුන් හා සතුන් අතර තිබෙන එක් වෙනසක් තමයි ඒක. හැබැයි එකක් මතක තබාගන්ට ඕනෑ. මිනිසුන්ට වඩා ආදරයෙන් ඉන්න සතුන් ඉන්නවා. සත්ත්ව ලෝකයේ සමහර සතුන් ඉන්නව ඌට පුරුදු ගැහැනු සතා හැරෙන්න වෙන ගැහැනු සතුන් ළඟට යන්නෙ නැහැ. ඒ ගැහැනු සතා ළඟට වෙන පිරිමි සතකුට එන්න දෙන්නෙත් නැහැ. සමහර වනාන්තරවල “ඇත් පොර” ඇතිවෙලා එකෙක් මැරෙනකං සටන් කරනවා ඔබ දැක අසා ඇති. ඒකට මුල ඒකමයි. ඔය සටන් ඉතාම සුළුවෙන් පටන් ගන්නෙ. අන්තිමේදී එකෙක් මැරෙනකං සිදුවෙනවා. ඒකයි මම කිව්වෙ, මිනිහා කොච්චර ඔළුව දියුණු වුණත් සමහර අවස්ථාවලදී සතුන්ට වඩා පහත් වැඩ කරනවා කියලා.

මිනිස්සු වසළයන් වන්නෙත්, බ්‍රාහ්මණයන් වන්නෙත් ක්‍රියාවෙන් බව බුද්ධ දර්ශනේ “නදජ්ජා වසලෝ හෝති, නදජ්ජා හෝති බ්‍රාහ්මණෝ” යනුවෙන් සඳහන් වෙනවා.

හොඳට කල්පනා කරල නියම භාර්යාවම තෝරා ගත යුතුයි. විවාහ වෙලා රටට යහපතක් කරන, යහපත් දරුවොම හදන්න ඕනෑ. අපි බොහෝ අය හදන්නෙ ලොකු මිනිසුන් කරන්න. මේ ලෝකෙට අවශ්‍ය යහපත් මිනිසුන් මිස ලොකු මිනිසුන් නොවේ. අපි ඉස්සෙල්ල රටට ආදරය කරන්න ඕනෑ. එවිට රට දියුණු වුණාම අපි නිකම්ම දියුණු වෙනවා. අපේ රටේ මුදල් අපේ රටේම රැඳෙන්න වැඩ කරන්න ඕනෑ.

ඔබ දන්නවද ඇමෙරිකාවේ විකිණීමට ඇති ලොතරැයි පත්‍රයක්වත් ඒ රටින් පිට කිසිවකුට මිලටවත් දෙන්නෙ නැහැ. ඒ මොකද දන්නවද? ඒක ඇදුණොත් ඒ මුදල් රටින් පිට යන නිසා. මේ ක්‍රම අපිත් භාවිත කරන්න ඕනෑ.

ඔබ විවාහවන්ට කලින් පොරොන්දම් පරීක්ෂාවක් කළාට කාරි නැහැ. ඒක හොඳයි. ඒ ටික මදි වගේ මට දැනෙන්නෙ. ඔබේ කේන්දර/පොරොන්දම් පරීක්ෂාවේදී 7 වැන්න කාටද? කවුද ඉන්නෙ? එයාගේ තත්ත්වය කොහොමද? ඒ ග්‍රහයා කාත් සමග හරි යෝග වෙලා ඉන්නව ද? මේ ටික ඉස්සෙල්ල බලල ඊළඟට කාම ත්‍රිකෝණය පරීක්ෂා කරන්නත් ඕනෑ. ඒක ගොඩක් වැදගත්. ඒ කිව්වේ 3, 7, 11 කාට ද අයිති? මොන ග්‍රහයද ඉන්නෙ? යෝග තිබෙනවද? මෙන්න මේ විස්තර ඔක්කොම නිවැරදිව බැලුවොත් ඔබට, ඔබේ දරුවගේ ඉදිරි විවාහය ගැන නිවැරදි බොහෝ විස්තර ලැබෙයි. හැබැයි දක්ෂ ජොතිර්වේදී කෙනෙක් ළඟට නම් යන්න වේවි. ඔබ යන ජෝතිර්වේදී මහතාගේ ගෙදර බෝඩ් එක විශාල වුණාට බැහැ. කොළේ බලාගෙන රූපවාහිනියේ එකේ විස්තර කිව්වට බැහැ. ජ්‍යොතිෂය ගැන දැනුම පුළුල් වන්න තමයි ඕනෑ. මේවා ලියනකොට පුංචි ගුරුමුෂ්ටියක් ද හෙළි කරන්නම්. මම කලින් කියපු විස්තර මත කිසියම් දෝෂයක්, නපුරක්, නුසුදුසුකමක් තිබුණොත් එකපාරටම තීරණයකට එන්ට එපා. ඒ නපුර දීප්තිමත් චන්ද්‍රයාට හෝ දීප්තිමත් බ්‍රහස්පතිට පෙනෙනව නම් විශේෂයෙන් සප්තම දෘෂ්ටියට අසුවෙනව නම් ඒ දෝෂය, නපුර භංග වෙනවා. මේවා “දෝෂ භංග” වශයෙන් තමයි හඳුන්වන්නේ. මේ දෝෂ භංග ගැන නොදත්කමින් ගොඩක් පොරොන්දම් වරද්දා ගන්නවා. බොහෝ විට ලැබෙන්න සුදුසු එක නොලැබී යනවා, නුසුදුසු කෙනා ලැබෙනවා. එතකොට විවාහය අවුල් ජාලාවක් වෙනවා. ඒ වගේ අවස්ථා ගොඩක් මට දැනුම් දීලා තිබෙනවා. ඒවා ඉවත් කරන්න ඉතින් ගුරුකම් කරන්න වෙනවා. මුලින් ටිකක් සැලකිලිමත් නොවූ නිසා මේ කරදරවලට මුහුණ දෙන්න වෙනවා.

ජ්‍යොතිෂය සමග අත්වැල් බැඳගෙන ඉදිරියට යන්නෙ බුද්ධාගම. ගැහැනිය නැත්නම් භාර්යාව ගැන මනාව පැහැදිලි කරල තිබෙන්නෙ අංගුත්තර නිකායේ 10 වැනි සූත්‍රයේ (සප්ත භාරියා සූත්‍රය). මේක දේශනා කළේ අපේ බුදුහාමුදුරුවො, සුජාතා සිටු දේවියට ජේතමනාරාමයේදී. මේවා විස්තර කරල තිබෙන්නෙ “පූජාවලිය” පොතේ. විස්තර කරල තිබෙන්නෙ මෛත්‍රිපාද හාමුදුරුවො.

සප්තභාරියා කිව්වේ, භාර්යාවන් හත්දෙනා ගැන. ඔබේ භාර්යාව මෙයින් මොන ගණයට ද වැටෙන්නෙ. කවුරු වුණත් පළමු පස්දෙනාට වැටුණොත් ඔබ දිනුම්. අන්තිම දෙකට වැටුණොත් ඉවරෙටම ඉවරයි. භාර්යාව ලැබුණට පස්සේ මේවා ගැන හිතන්න එපා. අවසාන දෙදෙනා නරක් වුණාට පස්සේ අත්හරින්න ද. බැඳගත් බෙරේ ගහන්න එපායැ. දැන් ඔබ හිතාවි ඒ අය විවාහ වන්නෙ නැද්ද කියලා. ඒ අයටත් විවාහයක් තිබෙනවා. ඒකනේ විවාහ සැසඳීම කරන්නේ. කාක්කට කාක්කි මිස ගිරවෙක් ලැබුණොත් මොකද වෙන්නේ. දෙන්නම පක්ෂීන් වුණාට හොඳට කල්පනා කරන්න මේ වගේ ප්‍රශ්න ගැන. ඉතාම අමාරුවෙන් මිනිස් ආත්මයක් ලබාගෙන ඇයි කරදරයේ වැටෙන්නේ.

ඔබ ළඟ තිබෙන මිනිස් මොළය පරිගණකය කියන යන්ත්‍රයට වඩා කාර්යක්ෂමයි. ඒක පාවිච්චි කරන්න. සප්ත භාරියා කිව්වේ, 1. මාතු භාර්යා, 2. ස්වාමි භාර්යා, 3. දාසි භාර්යා, 4. සකිනි භාර්යා, 5. භගිනි භාර්යා, 6. වධක භාර්යා, 7. චෝර භාර්යා.

ජ්‍යොතිෂයේ සඳහන් වන සරාගි යෝග – නවාංශක දෝෂ ගැන දැනගන්න එක වැදගත්. ඒවා දැනගන්නෙ මොන හේතුවකටවත් චෝර භාර්යාවක් හෝ වධක භාර්යාවක් නොලැබගන්න බව අමතක කරන්න එපා.

පෙර භවයක කරපු අකුසල කර්මයකින් හෝ චෝර භාර්යාවක් හෝ වධක භාර්යාවක් ලැබුණොත් ඔබ, ඔබටම බැණගත්තොත් මිස කොහේවත් ඉන්න සෙනසුරු ඒරාෂ්ටකවලට බණින්න එපා. ඔබ පොරොන්දම් බලනකොට ලෙහෙසියට ළඟ ඉන්න නිසා, ප්‍රසිද්ධ නිසා, මිත්‍ර නිසා හෝ වෙනත් කම්මැළි කමකින් නොදන්නා කෙනා ළඟට යන්ට එපා. දැඩි දක්ෂතාවයක් ඇති ජ්‍යොතිෂවේදියා හමුවන්න.

අනික තමයි ඔය පාපාංශක නැති කේන්දරවල ප්‍රශ්න ගොඩයි. ඒවා ගැන දැනුවත් වන්න. දෘශ්‍ය ගුණ චන්ද්‍රයා ගැන තිබෙන දැනුම මදි. නියමාකාරයට පොරොන්දම් සසඳලා, ග්‍රහ පිහිටීම් ගැන බලන්න. විවාහයේදී ලිංග පොරොන්දම – යෝනි පොරොන්දම – වෘක්ෂ පොරොන්දම විශේෂයි.

පාරම්පරික ජ්‍යොතිෂවේදී/ ගුප්ත විද්‍යාධර මීපේගණිතගේ රන්ජිත් විද්‍යාරත්න. මොරටුව
0722174553, 0779870007

උපුටා ගැනීම දිවයින