සතුටටත් මම හඬනවා....

සොඳුරු පද ඇති මියුරු කවියක් කිඳුරු හඬකින් ඇහෙනවා සීතලේ දුර පිපෙන පුරහඳ හිතට රහසක් කියනවා පෙමින් ගැබ්බර හිතේ රිද්මය කම්මුලක් කිති කවනවා දෑස නොහැරම පාඩුවේ ඉමි කල්පයක් තව තියෙනවා... සුදුම සුදු ඔය කම්මුලක මුව තියද්දිත් බය හිතෙනවා කුරුළු ඇස් දෙක පියාගත්තට ආදරේ තව දැනෙනවා හීනයක් ඔබ හීනයක් මට තාම පෙම් හිත ගැහෙනවා බලන් ඇස් හැර රැය ගෙව්නට තව හුඟක් කල් තියෙනවා... පෙරත් සසරේ එකට ඉන්නැති හිතට ඒ වග දැනෙනවා ආදරේ මට කියා දුන්නට ඔබට මම ණය ගෙවනවා ඉරට වැඩියෙන් සඳට වැඩියෙන් ඇත්තමයි ඔබ වටිනවා විශ්වයම සරි ළයට තුරුළුව සතුටටත් මම හඬනවා... (තිසුම්)