තරුණකම රැකගන්න කන්‍යාවියන්ගේ ලේ බිව් ‘රුධිර සිටුවරිය’

ස්ලෝවැකියාවේ කැච්ටිස් ගම්මානයේ කන්දක් මත පිහිටි ඒ මන්දිරය ගුප්තය. අඳුරුය. ජරාවාසය. දකින අයකුට භීතිය ගෙනෙන ඒ මන්දිරය අදත් ඇත්තේ මින් වසර 400 කට පෙර අගෝස්තුවේ එක් දිනයක තිබු පරිදිමය. ඒ අගෝස්තු 21 වැනිදාවකි. අතිබිහිසුණු මිනීමැරුම් ගණනාවක යෙදුණු කාන්තාවක ජීවත් වූ එම මන්දිරයට අගෝස්තු 21 වැනිදා සුවිශේෂ දිනයකි. එහි ජීවත්වූ ‘රුධිර සිටුවරිය’ යන නාමයෙන් හැඳින්වූ බිහිසුණු කාන්තාවගේ මරණය සිදු වූයේ එදින වීම එම විශේෂත්වයයි. රුධිරය පානය කිරීමට ඇති ආශාව නිසා ‘රුධිර සිටුවරිය’ යන අන්වර්ථ නාමයෙන් හැඳින්වුණු ඇය බැතෝරි ආදිපාදවරියයි. කන්‍යාවන්ගේ රුධිරය පානය කිරීමෙන් තරුණ භාවය ආරක්ෂා වෙතැයි ඇදහු ඇය ඉතා දරුණු කාන්තාවක් වූවාය. හංගේරියානු යුද වීරයකු හා විවාහ වීමට පෙර විවාහ කීපයක්ම කරගෙන සිටි ඇය පසුව කැච්ටිස් ප්‍රදේශයේ පදිංචියට පැමිණියාය. ඇය කැච්ටිස් ප්‍රදේශයේ පදිංචියට පැමිණීමත් සමඟ අවට ගම්වල පදිංචි තරුණ දැරියන් ක්‍රමයෙන් අතුරුදන් වීමට පටන් ගත්තේය. ගම්වල තරුණ ළඳුන් අවසන් වූ විට බැතෝරි සිටු දේවිය තමා ද අයත් රදළ පැළැන්තියේ තරුණ ළඳුන් වෙත සිය අවධානය යොමු කළාය. තරුණ ළඳුන් අතුරුදන් වීම හා බැතොරිගේ සබඳතාව පිළිබඳ තොරතුරු හංගේරියානු රජු වෙත ලැබීමත් සමඟ ඇය අත්අඩංගුවට ගැනුණු අතර ඇයට සහාය දුන් සේවිකාවන් තිදෙනකු ද ගිනිතබා මරා දමන ලදී. බැතොරි සිටු දේවිය ඉහත කී මාලිගාවේ බිත්තියකට තබා මැටි ගසනු ලැබු අතර ඇය 1614අගෝස්තු 21 වැනිදා මෙලොව අත්හැර ගියාය. සිටුවරිය ජීවත්වූ කැච්ටිස් ගම්මානය විශාල ගොඩනැඟිලි, සැටලයිට් ඇන්ටෙනා සහ නවීන මෝටර් රථ දැකිය හැකි නගරයකි. බැතෝරි සිටු දේවිය ජීවත්වූ රාජකීය විලාශයක් උසුලන විශාල මන්දිරය සංරක්ෂණය කර 2014 ජුනි මාසයේ දී නැවත විවෘත කරන ලදී. එසේ වුවද අවට වෙසෙන ගම්වාසීහු බැතෝරි සිටු දේවිය ගැන එතරම් හොඳ ප්‍රතිචාරයක් නොදක්වති. මාලිගාවේ සේවය කරන අයකු වන 18 හැවිරිදි ඇඩම් පිස්කා පවසන්නේ “අපේ ගමේ ඉන්නා වැඩිහිටියන් බැතෝරි සිටු දේවියට දැඩි අකමැත්තක් පළ කරනවා. ඇගේ පිළිරුව එහි පිහිටුවීම ගැන ද ඔවුන් දැඩි විරෝධයක් දක්වනවා” යනුවෙනි. එළිසබත් බැතෝරි ගේ මළසිරුර වළලනු ලැබුවේ කැච්ටිස් ගම්මානයේ පිහිටි ශාන්ත ලැඩිස්ස්ලාව් දේවස්ථානයේය. පසුව එම සිරුර හංගේරියාවේ ඇයගේ පෙළපත හා සම්බන්ධ ස්ථානයකට ගෙන යනු ලැබු බව පැවැසේ. ඇය මියගිය දිනය එම ගම්මානයේ ජනයා තවමත් උත්සවාකාරයෙන් සමරති. 

රෝහණ ආර්යරත්න උපුටා ගැනීම සිළුමිණ