දුරකතනය සුමිතුරු ලිංගිකත්ව විසිතුරු
මිනිස්සු ජීවත් වෙන්නේ ආශාවන් එක්ක. මම ඔබ අපි හැමෝම අපිටම වෙන්වුණු එක එක ආශාවන් එක්ක ජීවත් වෙනවා කිව්වොත් හරි. ඔබ මොනවටද කැමැති කියලා මම ඔබෙන් ඇහුවොත් ඔබට ඒ වෙනුවෙන් කොයි තරම් පිළිතුරු තියෙනවද? ආශාවන් ගැන කතා කරද්දි කෙනෙක්ගෙන් කෙනෙක්ට තියෙන ආශාවන් වෙනස් වෙන්න පුළුවන්. ඒ කියන්නේ ආශාවන් තුළ තියෙන්නේ එකිනෙකාට සාපේක්ෂ කාරණාවන් කියන කාරණයට ඔබත් එකඟ ඇති. වැලි පොල්කටු අරගෙන කෝම්පිට්ටු උයන්න පුංචි කාලේ අපි ආසයි. හැබැයි අපි ටික ටික ලොකු වෙනකොට අපි තුළ තිබුණ ඒ ආශාවනුත් ඒ ආශාවන් එක්ක ගොඩනැඟිලා තිබුණ චර්යාවනුත් අපෙන් ඈත්වෙලා යන්නේ අපිටම නොදැනෙන විදියට. කාලෙන් කාලෙට අපේ ජීවිතවලට එන සමහර ආශාවන්ට සිද්ධ වෙන්නේ ඒ ඉරණම. අපේ ජීවිත තුළ ගොඩනැඟෙන ආශාවන් එක්ක අපේ චර්යාවනුත් ඒ ඒ හැඩයට වෙනස් වීම සාමාන්‍ය කාරණයක්. මම අද කතා කරන්න හදන්නේ ජෛවීය අවශ්‍යතාවක් එක්ක ගොඩනැඟුණු ආශාවක් ගැන. ලිංගිකත්වය කියන්නේ මනුෂ්‍යයන්ට වගේම සියලුම සත්ත්වයන්ට තියෙන ජෛවීය අවශ්‍යතාවක්. ඒ අවශ්‍යතාවත් එක්කම ගොඩනැඟුණු ලිංගික ආශාවන් සන්තර්පණය කරගන්න මිනිස්සු විවිධ ලිංගික චර්යාවන් ගොඩනඟාගෙන තියෙනවා. මේ ලිංගික චර්යාවන් ඒ ඒ පුද්ගලයාගේ මනෝමූලික සාධක, සමාජ පාරිසරික හා සංස්කෘතික සාධක, සහජ ආශ්‍රය හා සම්බන්ධ සාධක හා ජෛවීය හා වෙනත් ප්‍රජනන සාධක අනුව වෙනස් වීමේ ඉඩකඩ පවතිනවා. ජීවියෙක් බිහි කිරීමේ අවශ්‍යතාව වෙනුවෙන් ලිංගික ආශාවන් ඉස්මතු වුණත් එම ලිංගික ආශාවන් මම පෙර සඳහන් කරපු කාරණා එක්ක සමාජ, සංස්කෘතික, ජාතිමය, ආචාරධර්ම යන සන්දර්භයන් ඇතුළේ සාමාන්‍යකරණය හෝ අසාමාන්‍යකරණය වීමේ හැකියාව තියෙනවා. ලිංගික ආශාවන් සන්තර්පණය කර ගැනීමට විවිධ පුද්ගලයන් ගොඩනඟා ගන්නා චර්යාවන් සාමාන්‍ය කෝණය තුළ වර්ගීකරණය වීම කෙසේ වෙතත් අසාමාන්‍ය කෝණය තුළ වර්ගීකරණය වීම යම් ගැටලුකාරීත්වයක් ඉස්මතු කරනවා. විශේෂයෙන්ම මනෝ වෛද්‍ය විද්‍යාවට අනුව බැලුවොත් යම් පුද්ගලයෙක් තුළ ගොඩනැඟෙන ලිංගික චර්යාවන් කාරණා කිහිපයක් හේතුවෙන් අසාමාන්‍ය කෝණය තුළ වර්ගීකරණය වෙනවා. පුද්ගල ජීවිතයට හානිදායක වීම, පුද්ගල මානසිකත්වයට හානිදායක වීම හා සමාජයේ වෙනත් පුද්ගලයකුගේ පැවැත්මට හානිදායක වන අවස්ථා අනුව අදාළ ලිංගික චර්යාව අසාමාන්‍ය ලිංගික චර්යාවන් ලෙස වර්ගීකරණය වීම දකින්න පුළුවන්.
මම මේ පෙළ ගස්වගෙන ආ කාරණා එක්ක මිනිස් ආශාවන් තුළ ලිංගික ආශාවන්, ඒ තුළ විවිධ චර්යාවන් හා ඒ චර්යාවන් තුළ සාමාන්‍ය පැවැත්ම අතික්‍රමණය කළ අසාමාන්‍ය ලිංගික චර්යාවන් තුළ ජීවත්වෙන මිනිස් ජීවිත විවරණයක් කරන්න මේ ලිපිය වෙන් කරගන්න හිතුවා. මම මුලින් කියපු මිනුම් දඬුවලින් කිරලා මැනලා තෝර ගත්ත එක අසාමාන්‍ය චර්යාවක් විදියට අශ්ලීල දුරකතන ඇමතුම් හඳුන්වන්න පුළුවන්. මේ කියන චර්යාව මගේ මිනුම් දඬු ඇතුළේ, සමාජමය මිනුම් දඬු ඇතුළේ අසාමාන්‍ය වුණාට තවත් කෙනකුට යම් යම් කාරණා ඉස්මතු කරමින් සාමාන්‍ය චර්යාවක් ලෙස අර්ථ ගන්වන්නත් පුළුවන්. සාමාන්‍ය මුහුණුවරට එහා ගිය ලිංගික චර්යාවන්ට තමන්ගේ ජීවිතයේ ඉඩ වෙන් කරපු ජීවිත අපේ රටේ කොයිතරම් ජීවත් වෙනවාද? ඒ අසම්මත චර්යාවන් නිසා තෘප්තිමත් වෙන පාර්ශ්වයක් වගේම එයින් අතෘප්තියට, පීඩාවට පත්වෙන පාර්ශ්වයකුත් ඉන්නවා. මේ කියන කතාව ඇතුළේ ඒ පාර්ශ්ව දෙකම ජීවත් වෙනවා. ඒ ජීවිත කියවලා ඒ ජීවිත තේරුම් ගැනීම වෙනුවෙන් ඔබට ඒ ජීවිත අත්දැකීම් ඉදිරිපත් කරන්න හිතුවා. පත්මා කියන්නේ අවිවාහක මැදි වයස ඉක්මවූ කාන්තාවක්. ඇයටත් ඇය හුඟක් ආදරය කරපු සුන්දර තරුණ කාලයක් තිබුණා. ඈ ඒ සුන්දරත්වය විඳිමින් ඒ තුළ ජීවත් වුණා. පද්මා තරුණ කලෙදි මසාජ් සෙන්ටර් එකක රැකියාව කළා. ඇගේ තාරුණ්‍යයේ සුන්දරත්වය මසාජ් සෙන්ටර්වලදී ඇයටත් නොදැනීම දියාරු වෙලා ගියා. කාලය කොයිතරම් ඉක්මන්ද? ඇසිපිය හෙළන සැණෙකින් ජීවිතේ කොයි තරම් දේවල් වෙනස් වෙනවද? පද්මගේ ජීවිතේ සුන්දරත්වයත් ඒ ඉරණමත් එක්ක ගෙවිලා ගියා. ඇය මසාජ් සෙන්ටර් එක තුළ ගෙවපු ජීවිතයට සමුදුන්නේ ඒ කරළියේ ඇයට රඟන්න තිබුණ කාලය නිමවුණ නිසා කිව්වොත් හරි. දියාරු වුණ ජීවිතය තුළ ඇයට ඇගේම කරගන්න ලෝකයක් හදාගන්න අමාරු වුණා. ඒ නිසා මසාජ් සෙන්ටර් එකෙන් එළියට බැහැලා ඇය හදා ගත්තේ වෙනස් ලෝකයක්. එදා මසාජ් සෙන්ටර් ලෝකය කරගත්ත පද්මා අද ක්ලබ් ස්පා සංස්කෘතිය තමන්ගේ ජීවිතය කරගත්ත. තරුණියන්ට නේවාසික පහසුකම් දෙන්න ගත්තේ ඇයට ඇගේ ලෝකයේ හුරු පුරුදු සුවඳ ඒ තරුණියන්ගෙන් විඳගන්න ලැබෙන නිසාමයි.
ජීවිතයේ වැඩි කාලයක් ස්පා සහ ක්ලබ් වෙනුවෙන් වැය කරපු තරුණියන්ට නේවාසික පහසුකම් ලබා දුන්නා වගේම ඔවුන්ගේ ජීවිතේටත් පද්මා විවිධ මුහුණුවරින් ළංවෙලා හිටියා. ඉනචවල ඛ්තභඡවල රැකියාව කරන තරුණියන්ට එළැඹුණ රාත්‍රිය අපිට හුරු පුරුදු රාත්‍රින්ට වඩා වෙනස්. ඔවුන්ගේ ජීවිතවල ගෙවිලා ගියපු ඒ රාත්‍රි ගණන ඔවුන්ටත් මතක නැති තරම්. ඒ අඳුරු රාත්‍රින්වල ගෙවන හැම මොහොතක්ම ඒ තරුණියන්ගේ ජීවිතේ සාමාන්‍යකරණය වුණ මොහොතක්. රාත්‍රිය තුළ සැරිසැරුව මේ ජීවිත නිදහසේ හුස්ම ගත්තේ උදෑසන සිට ගෙවෙන හෝරා කිහිපයක් විතරයි. ඒ හෝරා කිහිපයෙදි ඒ ජීවිතවලට නිදිවදින්න තියෙන හොඳම තැන තාවකාලික නැවතුම්පොළ. ඒ සුන්දර තරුණියන් රාත්‍රියෙදි හදා ගත්ත ලෝකය හිමිදිරි පාන්දර සිට ගෙවෙන හෝරා කිහිපයෙදිත් දකින්න කැමැති නැහැ. ගෙවපු රාත්‍රින් තුළ සිදුවුණ හැම දෙයක්ම ක්ලබ් තුළ අතහැර ඔවුන් නවාතැනට ඉගිළෙන්නෙ ඒ ජීවිතවලට නිදහසේ හුස්ම ගන්න. පෙර දින සිදුවුණ හැම ගනුදෙනුවක්ම ඔවුන් නිදහසේ හුස්ම ගන්න හෝරා කිහිපයෙදි පවත්වගෙන යන්න භාර කරන්න නවාතැනේ හිමිකාරියට. ඒ කියන්නේ පද්මට. පෙරදින රාත්‍රියෙදි තරුණියන්ගේ දුරකතන අංක ගනුදෙනුකරුවන් අතරේ හුවමාරු වීම සාමාන්‍ය දෙයක්. උදෑසන නවාතැනට විත් නිදිවදින තරුණියන්ගේ දුරකතන ඇමැතුම්වලට එතැන් සිට සම්බන්ධ වෙන්නේ පද්මා. ඇයට තරුණියන්ගේ ජීවිත චක්‍රය හුරුපුරුදු නිසා ඊළඟ දිනයටත් තරුණියන්ට අවශ්‍ය ගනුදෙනුකරුවන් ආරක්ෂා කරලා දෙන්න පද්මා උපරිම සාධාරණයක් කරනවා. නවාතැනට ගෙවන මුදලට අමතරව දුරකතන ඇමැතුම්වලට පිළිතුරු බඳින, ගනුදෙනුකරුවන් ආරක්ෂා කර දෙන පද්මට විශේෂ සන්තෝසමක් දෙන්නත් තරුණියන් අමතක කරන්නේ නැහැ. පද්මා තමන්ගෙ නවාතැනේ කල්ගෙවන තරුණියන්ගේ ගනුදෙනුකරුවන් ආරක්ෂා කරනවා වගේම ඇයගේ වුවමනාවකුත් ඉටුකර ගන්න දෙපාරක් හිතන්නේ නැහැ. පද්මා තරුණියන්ට එන දුරකතන නොම්මර පරිස්සම් කරගන්නේ ඊට එහාට පද්මටත් ඒ ගනුදෙනුකරුවන් එක්ක වාචික ගනුදෙනුවක් තියෙන නිසා කිව්වොත් හරි. ඇය සුරක්ෂිතව තියා ගත්ත දුරකතන නොම්මරවල හිමිකරුවෝ ඇයගේ ආශාවන් තෘප්ත කළ හැකි පුද්ගලයෝ කියන එක ඇයට රහසක් නොවෙයි. ඒ නිසා ලිංගික ක්‍රියාවලියක සිදුවෙන සියල්ල දුරකතන සංවාදයකට මුදා හරින පද්මා ඇයගේ ආශාවන් වචනවලින් තෘප්ත කර ගන්න උත්සාහ කරනවා. පද්මා කාන්තාවක්. කාන්තාවකට මෙවැනි දෙයක් කරන්න පුළුවන්ද කියලා ඔබට හිතෙනවා ඇති. ඒත් ඇය ඉලක්කය ගන්නේ නිවැරැදිම අයට. රාත්‍රි සමාජ ශාලා ඇසුරු කරන තරුණියන් ජීවිතේ කොටසක් කරගත්ත, ලිංගික චර්යාවන්ට ලොල් වූ පිරිමි පාර්ශ්වය තමන්ගේ ගෘංගාරාත්මක වචනවලට අවනත කරගැනීම ඇයගේ ජීවිතේ සාමාන්‍යකරණය වූ තත්ත්වයක්. ඇයගේ මානසික පසුබිම අශ්ලීල දුරකතන ඇමැතුම් හරහා සිදුවන ගනුදෙනුව ඉල්ලා සිටිද්දී ඇය ඇගේ මානසික පසුබිම චර්යාත්මකව මුදා හරින්න දෙපාරක් හිතන්නේ නැහැ. ඇය ඇගේ ජීවිතයේ සියලු ආශාවන් මුදා හරින්නේ මේ දුරකතන සංවාද හරහා කිව්වොත් එය නිවැරැදියි. ඇයගේ ජීවිතයේ ඇයට උරුම වුණ මේ චර්යාවට ඇය දැනටමත් ඇබ්බැහි වී අවසන්. ඇයට ඒ ජීවිතයෙන් මිදෙන්න සිතෙනා මොහොතක් නැතැයි කිව්වොත් ඒක බොරුවක්. ඇගේ ජීවිතයට ඇහුම්කම් දුන් කෙනකුට ඇගේ ජීවිතේ චර්යාත්මක ඇබ්බැහි වීම ගැන කියන්නට කාරණා බොහෝමයක් ඉතිරි වෙලා තිබුණා. කාරණා ඔස්සේ ඇය මිදෙන්න උත්සාහ කරන ලෝකයක හිරකාරියක් කියන දේ ඇයගේ ජීවිතය කියවපු මොහොත තුළ අපිටත් තේරුම් ගන්න ලැබුණා. ලිංගික ආශාවන් වෙනුවෙන් අසාමාන්‍ය චර්යාවල යෙදෙන එකම පද්මා කෙනකු නොවෙයි. පද්මාගේ කතාව මෙහෙම නිම කරද්දි ර්ථීඩධදඥ ඉඥය නිසා පීඩාවට පත්වුණ. ඇය ගැනත් නොකියම බැහැ. දුරකතන සංවාදයකින් ලිංගික ආස්වාදය ලබද්දි ඒක පාර්ශ්වීයව ඒ තෘප්තිය විඳින අනෙක් අතින් ඒ චර්යාවට හසුවුණ අය ලෙස පීඩාවට පත්වෙන අයත් ඕන තරම්. නිලූ කියන්නේ අපේ මිතුරියක්. ඇයට පෙම්වතෙක් ඉන්නවා. නමුත් මේ සම්බන්ධයට දෙපාර්ශ්වයෙම මවුපියෝ අකැමැති නිසා මේ දෙන්නටම දුරකතනය ඔස්සේ කෙරෙන ගනුදෙනුත් කරගෙන යන්න වුණේ හොර රහසේ. පෙම්වතාගේ මවුපියන් මේ සම්බන්ධය නතර කරන්න පෙම්වතාගේ දුරකතනය අත්අඩංගුවට අරන් තිබුණ නිසා මිතුරන්ගේ දුරකතනවලින් ඇමතුම් ලබාදෙන්න නිලූගේ පෙම්වතා හුරුවෙලා හිටියා. කාලය ඔය විදියට ගත වෙද්දි දිනක් රාත්‍රියෙදි නිලූට දුරකතන ඇමැතුමක් ලැබුණා. තිරයේ දිස්වුණ දුරකතන අංකය හුරුපුරුදු දුරකතන අංකයක් නොවුණත් තමන්ගේ පෙම්වතාගෙන් ලැබෙන දුරකතන ඇමතුමක් යැයි සිතා ඒ දුරකතන ඇමතුමට නිලූ සම්බන්ධ වුණා. ඒත් දුරකතනයේ එහා කෙළවරින් සම්බන්ධ වුණ පුද්ගලයගෙන් ඇයට අසන්න ලැබුණේ සියුම් කෙඳිරුම් හඬක් විතරයි. ඉන් අනතුරුව ලිංගික ගනුදෙනුවක් ලෙසින් දිග හැරෙන වචන නිලූව සලිත කළා. තමන්ගේ පෙම්වතා යැයි සිතා දුරකතන ඇමතුමට අවනත වී හිටියත් සිදු වූයේ කුමක් දැයි නොදන්න තැන ඇය දුරකතනය විසන්ධි කළා. නිලූ ඒ වෙන කොටත් ලිහා ගන්න බැරි සිද්ධි දාමයක පැටලිලයි හිටියේ. ඇයගේ දැඩි විශ්වාසය වුණේ ඇයට දුරකතන ඇමතුම ලබා දුන් පුද්ගලයා තමන්ගේ පෙම්වතා බවයි. රහසිගතව පෙම් පිළිසඳරේ යෙදෙන පෙම්වතාගේ හඬ එය නොවේ යැයි සොයා ගන්නට ඇයට පුළුවන් වුණේ නැහැ. මිතුරන් සමඟ එකතු වී මෙතරම් පහත් විහිළුවක් කරන කෙනකු තමන්ගේ පෙම්වතා කර ගැනීම ගැන නිලූ තමන්ට සාපකර ගත්තා. ඔය අතරේ වෙනත් දුරකතන අංකයකින් ඇයට නැවත ඇමතුමක් ලැබුණා. ඕන දෙයක් වෙන්න සිතා ඇය නැවැත දුරකතන ඇමතුමට පිළිතුරක් සැපයුවා. ඒ දුරකතන ඇමතුමෙනුත් ගලාගෙන ආවේ ලිංගික උත්තේජනය ඇති කරන වචන මාලාවක්. පෙම්වතාගෙන් මෙවැනි දෙයක් බලාපොරොත්තු විය නොහැකි තැන ඇය දුරකතන ඇමතුම වගේම දුරකතනයත් විසන්ධි කර දැමුවේ ඉහ වහා ගිය කේන්තියකින්. එවැනි බාල ක්‍රියාවක් නිලූ පෙම්වතාගෙන් බලාපොරොත්තු වුණේ නැහැ. ප්‍රේම සම්බන්ධයට වසර දෙකක් ගත වෙලත් අයුතු යෝජනාවක් නොකරපු කෙනා මෙලෙස හැසිරේවි යැයි ඇය කවදාවත්ම ප්‍රාර්ථනා කළේ නැහැ. පෙර දින රාත්‍රියේ පැමිණි දුරකතන ඇමතුම්වලින් වියවුල් වූ මනසින් සිටි ඇය නිදිවර්ජිතව ගෙවපු ඒ රාත්‍රිය අමතක කරන්න උත්සාහ කළා. උදෑසනම දුරකතනය ක්‍රියාත්මක කළ ඇයට නොහඳුනන දුරකතන අංකයකින් ඇතුළුව ඇය පිළිතුරු ලබාදුන් දුරකතන නොම්බරවලින් ඇමතුම් ලැබී ඇති බවට කෙටි පණිවිඩ එන්න ගත්තා. මේ සියල්ල එසේ තිබියදී ඇය ලක ලැහැස්ති වී රැකියාවට පිටත් වුණා. ඇය එනතුරු ඇගේ පෙම්වතා ස්ටේෂමට වෙලා මඟ බලන් හිටියා. ඒත් පෙම්වතා දැකපු ගමන් ඇගේ මුහුණේ ඇඳෙන සිනා රැල්ල එදා අතුරුදන් වෙලයි තිබුණේ. තමන් දැක්කත් නොදැක්කා සේ යන නිලූ බලහත්කාරයෙන් නතර කර ඇයට සිදු වුණේ කුමක්ද යන්න පෙම්වතා විපරම් කළා. ඇය තමන්ගේ කේන්තිය විදුලිසර වැනි වචනවලින් පෙම්වතාට මුදා හැරියා. සිදුවූ සියල්ල තමන් සිදුකළ දේ නොවන විත්තිය පෙම්වතා නිලූට පැහැදිලි කළා. තමා රෑ වැඩ මුරය අතරතුර දුරකතන ඇමැතුම ලබා ගනිද්දි නිලූ දුරකතනය විසන්ධි කර තිබූ බවත් ඒ දුරකතන ඇමතුම ලබා ගත්තේ තමන්ගේ මිතුරාගෙන් බවත් වෙනත් කිසිදු දුරකතනයකින් ඇයට කතා නොකළ බවත් පෙම්වතා නිලූට සපථ කළා. තමන් මුහුණදුන් සිද්ධිය සැකහැර නිරාකරණය කර ගන්න නිලූට වුවමනා වුණා. ඒ නිසා පෙර දින රාත්‍රියේ පැමිණි දුරකතන අංකයන්ට නැවැත ඇමතුම් ලබා ගන්න පෙම්වතා ඉදිරිපත් වුණා. ඒ වෙනකොට එම දුරකතන විසන්ධි කර තිබූ බවට පණිවුඩ ලැබෙද්දී නැවැත එම දුරකතනයට ඇමතුම් ලබාගෙන සිදුවූ දෙය සැකහැර දැන ගන්න පෙම්වතා එකඟ වුණා. දිනයේ සෑම මොහොතකම නිලූගේ පෙම්වතා මිත්‍රයකුගේ දුරකතනයකින් අදාළ දුරකතන අංකවලට ඇමතුම් ලබා ගත්තා. ඒත් දිනය පුරාම එම දුරකතන විසන්ධි කරලයි තිබුණේ. නමුත් රාත්‍රියේදී ලබා ගත්ත ඇමතුමට අදාළ දුරකතන ක්‍රියාත්මක කර ඇති බවට සංඥා ලැබුණා. නිලූගේ පෙම්වතා කාන්තාවක් ලෙස දුරකතනයට සම්බන්ධ පුද්ගලයා සමඟ ගනුදෙනු කරන්න පටන් ගත්තා. මොහොතක් යද්දි දුරකතනයට සම්බන්ධ වූ පුද්ගලයා ලිංගික කරුණු කාරණා, ලිංගික චර්යා ගැන උත්ප්‍රාසයෙන් කතා කරන්න මුල පිරුවා. නිලූගේ පෙම්වතා මේ සියල්ලට ඇහුම්කම් දී අවසානයේ තමන්ගේ සැබෑ කටහඩින් අදාළ පුද්ගලයව ආමන්ත්‍රණය කළා. තමන්ගේ කාරියට සිද්ධ වුණ දේ තේරුම් ගත්ත පුද්ගලයා දුරකතනය විසන්ධි කළා. මෙ වනවිට සියල්ල වටහා ගෙන හිටපු නිලූගේ පෙම්වතා නිලූට සියලු තතු පැහැදිලි කළා. අසම්මත දුරකතන ඇමතුමක් නිසා තමන්ගේ පෙම්වතා අවිශ්වාස කරන්නත් ප්‍රේම සම්බන්ධය නතර කරන්නත් නිලූගේ හිතේ මෝදුවෙලා තිබුණ සිතිවිලි නිවුණා. හැබැයි එදා ඉඳන් නිලූගේ පෙම්වතා, නිවෙසට හොරෙන් නිලූට අමතන්න දුරකතනයක් තියා ගත්තත් නිලූට එන නොදන්න ඇමතුම්වලට පිළිතුරු බැඳීමට තහනම් කරන්නත් අමතක කළේ නැහැ. තමන්ගේ ආශාවන් සංතෘප්තකර ගන්න මිනිස්සු නොකරන දෙයක් නැහැ. මෙවැනි අසාමාන්‍ය ලිංගික චර්යාවන් ඇතැම් පුද්ගලයන්ගේ ජීවිතයේ සංතෘප්ත කර දෙයක් විය හැකියි. නමුත් කෙනෙක්ගේ ආශාවන් තවත් කෙනකුට පීඩාවක් විය යුතු නැහැ. ඒ නිසා සාමාන්‍ය චර්යාවකට හුරුවුණ කෙනෙක්ට ඒ ජීවිතයෙන් අත්මිදිලා සාමාන්‍ය මිනිසුන් සමඟ සාමාන්‍ය විදියට ගනුදෙනු කරන්න ඕන තරම් අවස්ථාව තියෙනවා. ආශාවන් පස්සේ හඹා ගිහිල්ලා හෙම්බත් වෙනවට වඩා සාමාන්‍ය ජීවිතයේ සුන්දර මනුෂ්‍යත්වය තුළ සැරිසරන්න මොහොතක් වෙන් කරගන්න සිතුවොත් කාටත් සුවයි.
ප්‍රභාත් අත්තනායක,තිළිණි කෞශල්‍යා විජේසිංහ
උපුටා ගැනීම මව්බිම
