එයා මගේ කෑල්ලවත්, බඩුවවත් නෙවෙයි, එයා මගේ Sweety

“මම තව කෑල්ලක් කරනවයි කියලා මගේ අනිත් කෑල්ල දැනගත්තොත් ඉවරයි”

“මම අලුත් බඩුවක් සෙට් කරගත්තා මචං”

“මම අද කෑල්ල බලන්න යනවා”

“අර කෑල්ලක් එක්ක තිබ්බ සීන් එක මගේ බඩුවට මාට්ටු වුණානේ!”

“වයිපරේව ෂේප් කරගන්න එක තමයි ලොකුම අවුල”

“අරූ මාර කෑල්ලක්නෙ දාගෙන ඉන්නෙ”

“මගේ බඩුවත් එක්ක මම ෆිල්ම් එකක් බලන්න යනවා”

“උඹ තාම කරන්නේ පරණ කෑල්ලද?”

“මගේ වයිපරේ එක්ක කිසි දෙයක් කරන්න බෑ”

“මගේ පරණ කෑල්ලගේ සීන් එක වයිපරේට මාට්ටු වුණානෙ”

ඔන්න මචංලා අදත් අපි පටන්ගමු පැඟිරි විසේ ඇවිස්සෙන විසේකාර පිස්සුව LOVE SICK!!. මම පහුගිය සතියක කිව්වනේ ‘ක්ලාස් එකට යං’ වැඩේට මමත් එනවා කියලා. ඒක කිව්වා විතරයි FB එකෙන් මට මැසේජ් කරන අයයි Gmail එකෙන් මට මේල් එවන අයයි වැඩිපුරම කිව්වේ මම අවුරුදු 7ක් තිස්සේ එකම කෙල්ලෙක් එක්ක ලව් එකක් කරගෙන හිටපු විදිය ගැන ‘ක්ලාස් එකට යං’ වැඩේට ආවහම කියන්න කියලා. හරි... බැරිවෙලාවත් මම ආවොත් මම ඒ අවුරුදු 7 ගැනත් කියන්නම්කො. ඊට අමතරව LOVE SICK වලිනුත් මම ඒ ගැන ලියන්නම්. මචං... අවුරුදු 7ක් එකම කෙල්ලෙක් එක්ක ඉන්නවා කියන එක මහලොකු මැජික් එකක් නෙවෙයි බං. ඒක හරි සිම්පල් ප්ලෑන් එකක්. ආදරේ කරනවා කියන්නෙත් එක්තරා විදියක විද්‍යාවක්. ඒ විද්‍යාව ඇතුළෙ තියෙන්නෙ පිස්සු පීකුදු බොක්ක පිරිසුදු සරලම සරල විද්‍යාත්මක කරුණු ටිකක්. පට්ට සරලයි! ඒත් අපේ අයියලා ඒ සරල දේවල් සංකීර්ණ කරගෙන දඟලන නිසා තමයි පැඟිරි විසේ පුපුරලා යන්නේ. මේ පැඟිරි විසේ ඇවිස්සෙන විසේකාර පිස්සුව හරියට මැනේජ් කරගන්න පුළුවන් නම් ඉතින් අවුරුදු 7ක් නෙවෙයි... අවුරුදු 77ක් වුණත් සිරාම ලව් එකක් කරගෙන යන්න පුළුවන්. අන්න එතකොට තමයි දෙල් දොදොල් වෙන තොල් තොදොල් වෙන ලල් ඉගිල්ලෙන ආතල් එකක් බොක්කට දැනෙන්නෙ. අදත් මම මේ කියන්න යන්නෙ ලව් එක ගොඩදාගන්න පුළුවන් ඉතා සරල දෙයක් ගැන. ආ... ඊට ඉස්සෙල්ලා දෙයක් කියන්න තියෙනවා. යක්‍ෂාවේශ වූ පෙම්වතියන්ගේ ජනප්‍රිය වැකි මොනාද කියලා මම ගිය සතියේ උඹලට කිව්වනේ. අනේ ඉතින් මම ඒ ආර්ටිකල් එක උඹලා වෙනුවෙන් ලියන්න ඕන නිසාම මගේ අහිංසක කෙල්ලව මාසයක් තිස්සේ ඇවිස්සුවා. මම එයාට කෝල් කරලා, ඕනම කෙල්ලෙක්ව මල පන්නන්න පුළුවන් දේවල් ටිකක් කිව්වා. එතකොට ඉතින් අසූහාරදහස් පන්සිය අසූ නවයටම විසේ අවුස්සගෙන එයා මට ෆෝන් එකෙන් ගිසි... ගිසි... ගිසි... ගාලා බැනගෙන බැනගෙන බැනගෙන ගියා.

ඒ බනින දේවල් මම පට්... පට්... පට්... ගාලා ෆෝන් එකෙන් අහගෙන ලියාගත්තා. මාසයක් තිස්සේ මම පට්ට පරිප්පුවක් කෑවා. ආදරේ මෙපමණයි වියදම අපමණයි කිව්වලු!! මාසයක් තිස්සේ මගේ කෙල්ලව අවුස්සලා අහගත්ත ඒ වැකි ටික තමයි ගිය සතියේ පැඟිරි විසේ ඇවිස්සෙන විසේකාර පිස්සුව විදියට උඹලට බලාගන්න පුළුවන් වුණේ. එක වෙලාවකට මම මේ කරන දේවල් හරිද කියලත් හිතෙනවා. මගේ Sweety මට ගිසි ගිසි ගිසි ගාලා බනිනවා. මම හිනා වෙවී ඒවා ලියාගන්නවා. ඒකෙත් පොඩි ලල් එකක් තියෙනවා. හරි හරි... දැන් මම කියන්න යන්නේ ලව් කරද්දී අනුගමනය කරන්න ඕන සරල විද්‍යාත්මක කරුණු ගැන පැහැදිලි කරන්න. මචං... සමහර කොල්ලෝ තමන්ගේ කෙල්ලට කතා කරන්නේ... ඒකි, මේකි, අරකි, කෑල්ල, බඩුව, වයිපරේ කියලා. මම හිතන විදියට මේක කොල්ලන්ගේ අතින් වෙන ලොකු වැරැද්දක්. අපේ ජෙනරේෂන් එකේ ඉන්න කොල්ලෝ මේ වැරැද්ද කවදාවත් කරන්න නරකයි. ඒත් මෙතැන තියෙන ලොකුම අවුල තමයි බොක්කෙන් ලව් කරන්නේ නැතිව හක්කෙන් ලව් කරන එක. එතකොට ඉතින් හක්කෙන් ලව් කරන කෙල්ල ගැන බොක්කෙන් එන ඇත්ත හැඟීමක් ඒ කොල්ලන්ට නෑනෙ. ඒ නිසා බඩුව, කෑල්ල වගේ නම්වලින් තමයි තමන්ගේ කෙල්ල වගේ තියාගෙන ඉන්න කෙල්ලට කතා කරන්නේ. ඒත් වෙන එකෙක් වුණත් උගේ කෙල්ලට කෑල්ල, බඩුව වගේ නම්වලින් කතා කරනකොට මට මාර අප්සට්. තමන්ගේ කෙල්ලට එහෙම කතා කරන්න එපා මචං කියලා කියන්න මට හිතෙනවා. ඒත් ඒ මගේ කෙල්ල නෙවෙයිනේ...

ඌ උගේ කෙල්ලට කෑල්ල, බඩුව බැරි නම් ඕන XXXX කියාගත්තදෙන් කියලා මම කටවහගෙන ඉන්නවා. මම කවදාවත් මගේ කෙල්ල ගැන කතා කරනකොට කෑල්ල, බඩුව කියලා එයාට කියලා නෑ. සමහරු මගෙන් අහනවා ‘මචං උඹ තාම කරන්නේ පරණ කෑල්ලද” කියලා. එතකොට මම කියනවා “එයා මගේ කෑල්ල නෙවෙයි, එයා මගේ Girlfriend කියලා. එතකොට ඉතින් උන්ටත් මාර අවුල්... ඒත් ඉතින් කරන්න දෙයක් නෑ. ඔව්... මට කෙල්ලෙක් ඉන්නවා... ඒත් එයා මගේ කෑල්ලවත්, බඩුවවත් නෙවෙයි!! මම මගේ කෙල්ලට කතා කරන්නේ ‘Sweety’ කියලා. එයාගේ නම වෙනුවට මම මගේ ෆෝන්බුක් එකට දාලා තියෙන්නේ ‘Sweety’ කියලා. ඉතින් මචං... එයා මට කෝල් කරනකොට මගේ ෆෝන් එකේ වැටෙන්නෙත් ‘Sweety Calling’ කියලා. ඒකෙත් පොඩි ලල් එකක් තියෙනවා. ඉතින් මචං... අවුරුදු 7ක් තිස්සේ ලව් එක කරගෙන යද්දී මේ වගේ පොඩි පොඩි දේවල් ගැනත් පට්ට විදියට හිතන්න ඕන. සමහරු මේ වගේ දේවල් කරන්නේ ලව් එක පටන් ගත්ත අලුත. ඒත් අලුත් අලුත් දෑ නොතනන ජාතිය ලොව නොනඟී කියලා කුමාරතුංග මුනිදාස මහත්තයත් තියලා තියෙනවනේ. ලව් කරනකොටත් හැමතිස්සෙම අලුත් අලුත් දේවල් කරන්න ඕන. කායිකව සහ මානසිකව සිද්ධ වන ඒ දේවල් නිර්මාණාත්මක වෙන්නත් ඕන. එතකොට තමයි කාලය කොච්චර ගත වුණත් ආදරේ වයසට යන්නෙ නැත්තේ. තමන්ගෙ කොල්ලා තමන්ට කතා කරන්නේ මොන විදියටද කියන එක කෙල්ලො මාර විදියට හිතනවයි කියලා කොල්ලො දන්නෙ නෑ.

කොල්ලොන්ට මේවා පොඩි දේවල් වුණාට කෙල්ලොන්ට මේ දේවල් පට්ට සයිස් දේවල්. කෙල්ලෝ මේ ගැන මහා ලොකුවට හිතනවා. ඒ නිසා තමන්ගේ Girlfriend ව අමතන්න පුළුවන් ආදරණීය වචනයක් උඹලත් හදාගනිල්ලා. කෑල්ල, බඩුව වගේ නම් කියන්න එපා. ඒත් සමහර චාටර් කෙල්ලො ඉන්නවා... උන්ට නම් ඇත්තටම කියන්න ඕන බඩු කියලම තමයි!! කොච්චර හොඳ වචන කියලා කතා කළත් ඉතින් සමහර කෙල්ලො ඉන්නවා යක්‍ෂණියො වගේ... මචං... ඕනම කෙල්ලෙක්ට මල පැන්නහම යක්‍ෂණියක් වගේ තමයි!! මමත් මේ දවස්වල බයෙන් ඉන්නේ මගේ Sweety ට ළඟදීම මල පනීද කියලා. ඒ මොකද දන්නවද? LOVE SICK කියවන එක නංගි කෙනෙක් මට කිව්වා එයා මාව හීනෙන් දැක්කා කියලා. මේ කතාව මගේ Sweety දැනගත්තට පස්සේ මොකකින් මොකක් වෙයිද කියලා බැරක් ඔබාමවත් දන්නෙ නෑ.

ලක්මිණ රණසිංහ lakmina.ranasinghe@gmail.com උපුටා ගැනීම මව්බිම