බල්ලාට අහුවුණා නං

කැන්ටිමේ තේ බොමින් සිටි අනුලා, චම්පා එක්ක මෙහෙම කියන්නට පටන් ගත්තා.

"සුනාමියක් එනවයි කියලා කලබලයක් ඇති වුණු දවසෙ ඔයා ඔෆිස් ආවේ නැහැනෙ. ඔය කලබලේ ඇති වෙන කොටත් මං හිටියේ කැන්ටිමේ, හැලප කකා තේ බිබී. ඒ කතාව ඇහුවා විතරයි, මමත් මෙලෝ සිහියක් නැතුව ඔෆිස් එකට දිව්වා බෑග් එකත් අරගෙන පුළුවන් ඉක්මනින් ගෙදර දුවන්ඩ. ඔෆිස් එකේදියි දැන ගත්තෙ මගෙ බොරු දත් කුට්ටම කලබලේට කොහේ හරි වැටිලයි කියල. ආපහු දිව්වා කැන්ටිමට."

"ඉතින් අනේ දත් කුට්ටම කැන්ටිමේ තිබුණද?" චම්පා කතාව මැද්දට පැන්නා.

"ඔයාට කියන්ඩ චම්පා, මම ඉඳගෙන හිටිය පුටුව යට හැලප කෑල්ලකුත් හපා ගෙන දත් කුට්ටම හිනැහි හිනැහි තිබුණා අනේ." අනුලා සිනාසෙමින් කිව්වේ චම්පගෙ උරහිසට පාරකුත් ගසමිනි.

"කැන්ටිමේ බල්ලා ඒක නොදැක්කෙ ඔයාගෙ වාසනාවට. ඌත් හපන්නෙ නැති ජරාවක් නෑනෙ අනේ." චම්පා කිව්වේ සමච්චල් සිනාවක් නගමිනි.