නැකැත් නැතුව මොන විභාගද?
"දුවේ, පුතේ මීට පස්සෙ උඹලා ඔය විභාග වලට ඉල්ලුම් පත්තර දානවා හෙම නෙමෙයි." රැකියාවට ගොස් පැමිණි චන්ද්‍රසිරි බ්‍රිප් කේසය මේසය මත දමා පුටුවක් උඩ වාඩි වී, දෙපා වල මේස් ගලවමින්, සාලයේ වාඩිවී රූපවාහිනිය නරඹමින් සිටි තම දියණියට සහ පුතාට කීවේ ය. ඔහුගේ මේ අපභ්‍රංස කතාවෙන් විපිලසර වූ ශාන්ති තම සැමියා දෙස පුදුමයෙන් බලා මෙසේ ඇසීය.
"පුදුම කතාවක් නෙ ඔයා කියන්නෙ. ඇයි මේ ළමයි විභාගවලට යන්ඩ ඕනෙ නැත්තෙ?"
"ඇයි ඔයාට මතක නැද්ද මේ දෙන්නා ගිය හැම විභාගයකදීම ඔයා හිමිදිරි පාන්දර ගිහින් කළුතන්තිරි දෛවඥ මහත්තයා මුණ ගැහිලා සුබ දිසාවක්, වෙලාවක් අරගෙන ආවා..." චන්ද්‍රසිරි කියා ගෙන යන්නට විය.
"ඉතින්...?" ශාන්ති හරස් කැපුවේ විමතියෙනි.
"ඉතින් කියන්නෙ? මීට පස්සෙ කවුද ඒ හරිය කරන්නෙ. අන්න කළුතන්තිරි මහත්තයා හාට් ඇටෑක් එකක් හැදිලා මැරිලා..." චන්ද්‍රසිරි කීවේ ය.
