අහිමි වූ පාරාදීසය
‘ස්වීප් ටිකට් ගන්ඩ අපේ සාජන් මහත්තයට තියෙන්නේ පුදුම ඇබ්බැහිකමක්. එයා සමහර දවස්වලට ස්වීප් ටිකට් 10ක් සල්ලිවලට ගන්නවා” වසන්තා තම සැමියාගේ පුරුද්දක් ගැන අනුලා සමඟ කියමින් සිටියාය.
“ඉතින් අනේ මාසෙකට සෑහෙන මුදලක් යනවා ඇතිනෙ ඔය පුරුද්දට” අනුලා දෙබැම ඉහළ නංවමින් කීවාය.
“ඔව් අ‍ෙන්, ඒක එයාට ගාණක් නැහැ. ඒක විතරක් නෙමෙයි එයාගෙ තව පුරුද්දක් තියෙනවා. එයා පරදින හැම ස්වීප් ටිකට් ඔක්කොම ඇල්බම් එකක අලවනවා” වසන්තා කීවාය.
“ඒ මොකටද අනේ? ඒවයින් වැඩක් තියෙනවයැ” අනුලා කීවේ කට ඇද කරමිනි.
“එයාගෙ ආසාවනෙ අනේ. ඒ මදිවට ඒ ඇල්බම් එකට නමකුත් දාලා ‘අහිමි වූ පාරාදීසය’ කියල.” වසන්තා කීවේ සිනාසෙමිනි.
