ඔයින් ගියා මදිද?

දිනක් සවස සෙනෙවිරත්න නිවෙසට පැමිණෙන තෙක් බලා සිටි තුෂාරි ඔහු දුටු වහාම දත්මිටි කමින් බැණ වැදී තම සැමියා සමඟ ලොකු හබයක පැටලුණා ය. පසුදා උදේම ඇඳුම් බෑගයක් ද රැගෙන තම මෑණියන්ගේ නිවෙසට ගොඩ වැදුණු ඇය මහ හඬින් හඬා වැටුණා ය.

“අනේ බුදු අම්මේ, මට නං අදින් පස්සෙ ඔය මිනිහගෙ මූණ බලන්ඩවත් ඕන කමක් නැහැ. එක දිගට පඩි පෙළ වගෙ ළමයි 5 දෙනෙක් හම්බ වුණායින් පස්සෙ දැන් මේකා කියනවනෙ මට කවදාවත් ආදරේ කළේ නැහැ කියල” කඳුළු පෙරමින් ඈ කියවන්නට වූවා ය.

ඇය දෙස තියුණු බැල්මක් හෙළූ මව මෙසේ කීවා ය. “ඉතින් බං, උඹ මොන එහෙකට ද එකාගෙ ඔය කතාව මහා ලොකුවට ගණන් ගන්නෙ? ඌ උඹට ආදරේ නොකරපු එක කොච්චර ලොකු දෙයක් ද? නිකමට හිතලා බලපං, සෙනෙවියා ඔය කියන විදියට ආදරේ කළා නං එහෙම ඔය ළමයි ගණන පහකින් නතර වෙයිද? මව ඇසුවා ය.