වෙනස

‘මම අපේ පුතාගෙ වයසෙදි අපෙ තාත්තා මාව මගෙ කාමරේටම සීමා කරලා තිබ්බා මිසක් යාළුවෝ එක්ක සෙල්ලම් කරන්ඩවත්, පික්චර් එකක් බලන්ඩ යන්ඩවත් දුන්නෙ නැහැ. ඒකට දැන් මගෙ පුතාට එයාගෙ කාමරේ ම කලර් ටීවී එකක්, DVD ප්ලේයර් එකක්, කම්පියුටරයක්, එයටම සෙලියුලර් ෆෝන් එකක් තියෙනවා.’ සිරිමල් තම මස්සිනා වන ගාමිණී සමඟ කීවේ, මාමණ්ඩිය ගේ දානය පැවති දින නිවෙසේ පිළිකන්නේ ගසක් යටට වී හීන් අඩියක් ගසමින් සිටියදීය.

‘එහෙම තමයි සිරිමල්. දැන් අපේ කාලෙ වගෙ නෙමෙයි ලෝකෙ හරිම වෙනස්.’ ගාමිණී සිනාසෙමින් කීවේය.

‘එහෙම කියල බෑ. අපි ඕක වෙනස් කරන්ඩ ඕනෙ.’ සිරිමල් දැඩි අධිෂ්ඨාන‍යකින් කීවේය.

‘හොඳයි, කොහොමද වෙනස් කරන්නෙ?’ ගාමිණී ඇසීය.

‘මම හිතාගෙන ඉන්නෙ ලබන සුමානෙම පුතාව මගෙ කාමරේට යවලා, මම පුතාගෙ කාමරේට යන්ඩ.’ සිරිමල් කීවේය.