ජෝන් බණ්ඩා නැමැති පරිගණක වෛරසය
වැවිගම්පත්තුවේ කතා ජෝන් බණ්ඩෙ මාමා රැකියාව විදිහට කෙරුවේ ඉස්කෝලෙයක මුර කිරීම. ඉස්කෝ‍ලේ වේලාව ඇතුළතදී ඉස්කෝ‍ලේ ප්‍රධාන ගේට්ටුව ගාව හදලා තිබුණ මුරකුටියට වෙලා පාරේ යන එන උදවිය සමගත් ඉස්කෝ‍ලේට පැමිණෙන දෙමවුපියෝ සමගත් කයිවාරු ගහමින් ජෝන් මාමා දවස ගත කළා. ජෝන් බණ්ඩෙ මාමා ගැන මුළු පළාතෙම අය දැනගෙන උන්නු එක් විශේෂ කාරණාවක් තිබුණා. ඒ කාරණාව තමයි ජෝන් බණ්ඩේ මාමා පරිගණකවලට දක්වාපු අමුතුම භීතිකාව. පරණ මිනිස්සු කවුරුත් අලුතින් එන දේවල් එක් වරම බාරගන්න කැමැති නෑ. හණ මිටිඅදහස් කරපින්නාගත්තු මිනිස්සු කියන්නේ ඒ වගේ ඈයොන්ට. අපේ ජෝන් බණ්ඩෙ මාමත් ඒ වගේ. උන්දැට පරිගණකයක් නිකම් දුන්නත් ඒක පොළොවේ ගහලා කුඩු පට්ටම් කරලා දමාවි. ඉස්කෝ‍ලේ මුර කරන වැඩේට අමතරව ඉස්කෝ‍ලේ ළමයින්ව ගෙදර එක්ක යන්න යන එන දෙමව්පියන්ට පරිගණකය කියන මහා අවලං යන්තරේ නුගුණ කියන එක ජෝන් මාමාගේ නිල නොලත් රැකියාව වුණා.
‘අනේ මහත්තයෝ, නෝනෝ කවමදාකවත් තමන්ගේ ළමයින්ට කොමිපීතර නම් අරන් දෙන්න එපා. ඔවුවා මහ භයානක මැෂින්. මේ ඉස්කෝලෙටත් ඕං ළඟදීම කොම්පීතර වගයක් එනවාලු. මේ වසංගතේ ළමයින්ට හුරු කරන්ඩ හොඳ නෑ. පරිගණක යන්ත්‍රවලින් සිදු කරන අයථා වැඩ ගැන පත්තරවල ටී.වී. එකේ ගියපු හැම ප්‍රවෘත්තියක්ම බලලා හොයලා මතක තියාගන්න එක ජෝන් මාමා කරපු තවත් එක වැඩක්. උන්දැගේ සාක්කුව කවුරු හරි ඇදලා බැලුවොත් පරිගණක මගින් සිදු කරපු අපරාධ ගැන වංචා ගැන ලියැවුණු පත්තර පිටු ගොන්නක්ම හොයාගත හැකියි. ජෝන් බණ්ඩෙ මාමාටත් ඉස්කෝ‍ලේ යන වයසේ පොඩි එවුන් දෙන්නෙක්ම උන්නා. පරිගණක විෂය ඉස්කෝලෙන් ඉගෙන ගන්න බොහෝම ආසාවක් දක්වාපු ඒ පොඩි එවුන් දෙන්නා ඒ ආසාව හිත ඇතුළේම හංගාගෙන ජෝං බණ්ඩෙ මාමට බොහොම බයෙන් ළිඳේ උන්නු ගෙම්බෝ වගේ මුලු ගැන්නිලා උන්නා.
‘ජෝන් බණ්ඩේ මේ අහනවා අපේ කාලෙ වගේ නෙවෙයි මේ කා‍ලේ වෙනස්. අනාගතයේදී එන්නේ තනිකරම පරිගණක යුගයක්. අපි අපේ ළමයින්ව ඒකට හුරු නොකළොත් උන් කොන් වෙලා යාවි’ ඒ විදියට බොහොමයක් දෙනා ජෝන් මාමාට පරිගණක ඉගෙනීමේ වටිනාකම තේරුම් කර දෙන්න උත්සාහ කළත් වැඩක් නෑ.
‘මගේ පොඩි එවුන් දෙන්නාට නම් මම මළත් ඔය කොම්පීතර වසංගතේ නම් හුරු කරන් නෑ. ඔයා මහ ලොකු කොම්පීතර නේද ළමයින්ගේ විභාග ප්‍රතිඵල මාරු කරලා පුළුවන් ළමයි විභාගෙ පේල් කරලා බැරි එවුන්ව පාස් කෙරුවේ..?’ ජෝන් බණ්ඩේ මාමා එහෙම මෝඩ කතා කියද්දි එයාටම දිනුම දීලා කවුරුත් හෙමීට මාරු වෙලා ගිය නිසාම ඇත්ත මොකක්ද කියලා ජෝන් බණ්ඩේ මාමා කවදාවත් තේරුම් ගත්තේ නෑ. ඒ නිසාම ජෝන් බණ්ඩේ මාමාට ලොකු කරදරයකට මුහුණ දෙන්නත් සිද්ධ වුණා.
පසුගිය දවසක ජෝන් බණ්ඩේ මාමා වැඩ කරපු ඉස්කෝලෙට මෑතකදී ලැබුණු පරිගණක විද්‍යාගාරයේ ජනේලෙකින් ඇතුළු වෙච්ච කෙනෙක් ඒ පරිගණක සෑහෙන ගාණකට හානි කරලා තිබුණා. කිසිම බඩුවක් මුට්ටුවක් හොරකම් කරලා නැති නිසාත් ජෝන් බණ්ඩේ මාමාගේ පරිගණක භීතිකාව මුළු ගමම දන්නා නිසාත් පොලීසිය අවුදින් ජෝන් බණ්ඩේ මාමාව කුදලාගෙන පොලීසියට ගෙනිච්චා. පොලීසිය ඉදිරියේ පා‍පොච්චාරණය කළ ජෝන්මාමා තමන්ගේ වරද පිළිගත්තා. කඩල, බිඳල, දාපු පරිගණකවලට සෑහෙන මුදලක් ගෙවලා කාලයක් තිස්සේ කරගෙන ආපු මුරකාර රස්සාවත් නැති කරගත්තු ජෝන් බණ්ඩේ මාමා දැන් පරිගණකවලට තවත් බයෙන් වැව්ගම්පත්තුවේ පුංචි ගමක ජීවත් වෙනවා. මේ සේරම සිදුවීම් දිහා නිහඬව බලාගෙන උන්නු ඉස්කෝ‍ලේ විදුහල්පති තුමා කියන විදිහට නම් ජෝන් බණ්ඩේ මාමා කියන්නේ බොහෝම දරුණු පරිගණක වෛරසයක්.
සඳරුවන් ජයවික්‍රම උපුටා ගැනිම ලක්බිම පුවත්පත
