විදුලි බිලි අඩු වෙන්න Fridge එක මේ විධියට Organize කරන්න
ශීතකරණය කියන්නේ අද වන විට සෑම නිවෙසකටම අත්‍යවශ්‍ය විදුලි උපකරණයක්නේ. නමුත් ශීතකරණ භාවිත කරන බහුතරයක් දෙනා හට ශීතකරණය නිවැරදිව භාවිත කරන ආකාරය හෝ ශීතකරණයක නිවැරදි ලෙස ආහාර වර්ග ඇසුරුම් කළ යුතු ආකාරය පිළිබඳව නිසි අවබෝධයක් හෝ දැනුමක් නැහැ. අද අප කතා කරන්නේ ශීතකරණය තුළ නිවැරදි ආකාරයට බඩු බාහිරාදිය ගබඩා කළ යුත්තේ කෙසේද යන්න පිළිබඳවයි. ප්‍රධාන වශයෙන්ම ශීතකරණයක් ගත් කල ප්‍රධාන කොටස් 02කින් සමන්විත වේ. එනම් අධිශීතකරණය හා සාමාන්‍ය ශීතකරණය ලෙසය. අධි ශීතකරණය
නිවෙසේ අධිශීතකරණයෙහි උෂ්ණත්වය 0oF (-180oC) හෝ ඊට අඩුවෙන් තබාගත යුතුයි. කිසිවිටෙකත් අධිශීතකරණය තුළ කඩදාසි, ඇලුමිනියම්, වීදුරු ආදී භාජන වර්ග ගබඩා නොකළ යුතුයි. ඊට අමතරව මෙවැනි දේ දිගුකාලීනව බහාලුම් ලෙස භාවිත කිරීමද සුදුසු නැත. අධි ශීතකරණය තුළ කල්තබාගෙන භාවිත කරන මස් වර්ග, මාළු වර්ග, අයිස්ක්‍රීම් වැනි අතුරුපස වර්ග, පැකට් කළ සොසේජස් වර්ග, විපින් ක්‍රීම් ආදියද ගබඩා කළ හැකියි. තවද විශේෂයෙන්ම මෙහිදී ආහාර වර්ග දිය වී කාන්දු නොවන ආකාරයටද ඇසුරුම් කිරීමටද වගබලා ගත යුතුයි.
සාමාන්‍ය ශීතකරණය ඉහළම රාක්කය :
චීස්, බටර්, යෝගට් ආදිය, කිරි නිෂ්පාදන මෙම පළමු රාක්කය මත ඇසුරුම් කළ යුතුයි.
මැද රාක්කය :
ශීතකරණයේ උෂ්ණත්වය සෙල්සියස් අංශක 4-5 අතර ප්‍රමාණයක පැවැතිය යුතුයි. මෙම රාක්කය මත පිසූ වෑංජන වර්ග, මස්, මාළු ආදිය බහාලූ භාජන ගබඩා කළ හැකියි. ඊට අමතරව බිත්තර, කිරි නිෂ්පාදන (දියර කිරි, මෘදු චීස් වර්ග) ආදියද, කේක් වර්ග, පාන් ආදී පිටි කෑම වර්ගද ගබඩා කළ හැකියි.
පහළ රාක්කය :
ශීතකරණය තුළ පහළ මට්ටමේ උෂ්ණත්වයක් පවතින එනම්, උෂ්ණත්වය සෙල්සියස් අංශක 3 අතර ප්‍රමාණයක් පවතින මෙම කොටස තුළ අමු මස් වර්ග, මාළු වර්ග වෙන වෙනම පොලිතින් උරවල ඔතා සීල් කොට ගබඩා කළ හැකියි. එමඟින් ශීතකරණයේ ඇති අනෙකුත් ආහාර වර්ග අපවිත්‍ර වීමද වැළකේ.
පහළම රාක්කය :
මෙම කොටසේ උෂ්ණත්වය සෙල්සියස් අංශක 8-10 අතර පවතී. මෙහි එළවළු, පලතුරු, පලා වර්ග, ධාන්‍ය වර්ග ආදිය ගබඩා කළ හැකියි. ඊට අමතරව බොහෝ ශීතකරණ තුළ පහළම කොටසේ ප්ලාස්ටික් වලින් සාදන ලද බාස්කට් එකක්ද දක්නට ලැබේ. එම කොටසේ ආහාර වර්ග ගබඩා කිරීමේදී වායු සිදුරු සහිත කඩදාසි හෝ ඉටි බෑග්වල බහාලන ලද එළවළු, පලතුරු, පලා වර්ග, ඖෂධ පැළෑටි වර්ග පවා ගබඩා කළ හැකියි.
ශීතකරණයේ දොර :
ශීතකරණයේ දොර තුළ ආහාර වර්ග ගබඩා කිරීමේදී දියර වර්ග, ස්මූති, ඇල්කොහොල් වැනි විවිධ පාන වර්ග ඇතුළත් බෝතල්, සෝස්, ජෑම්, චට්නි ඇතුළු මධ්‍යම ප්‍රමාණයේ පියන හොඳින් වැසිය හැකි බෝතල්, ඇට වර්ග, පාන් පිටි ආදිය ඇසුරුම් කළ කුඩා බෝතල් ආදියත් ගබඩා කළ හැකියි.
උපුටා ගැනීම මව්බිම
