කෙසෙල් කොළයේ එතූ බත්වල අතිරේක ‍පෝෂණ ගුණයක් තිබෙන බව දන්නවාද ?

කෙසෙල් කොළයක එතූ බත්පතක රස බලන්නට අද වාසනාව ඇත්තේ කීයෙන් කී දෙනාටද ? කෙසෙල් කොළේ එතූ බත් පතෙන් නික්මෙන ඉමිහිරි සුවඳ මුසුවූ රසය එයටම අනන්‍ය වූවකි. අද වන විට ලෙහෙසියටත් පහසුවටත් ලන්ච් ෂීට් නමින් හැඳින්වෙන කෑම ඔතන ඉටි කොළයක බැඳෙන බත් පතකින් කිසිදින ඒ සුවඳ හෝ රසය ලැබිය නොහැකිය. එපමණක් නොව උණු උණුවේ ඉටි කොළයක එතෙන බත නිසා දිනෙන් දිනම අපේ සිරුර තුළට ඇතුළු වන අහිතකර විෂ රසායනයන් ප්‍රමාණය කොතෙක්දැයි කිව හැකිද ? අපෙන් බොහෝ දුරස් වෙමින් පැවැතියද විශේෂයෙන් දකුණු ඉන්දියාවේ බොහෝ ප්‍රදේශවල අදටත් කෙසෙල් කොළයේ ආහාර පිසීම, පිළිගැන්වීම සුලබව සිදුවේ. කෙසෙල් කොළයෙහි ආහාර එතීම පිළිගැන්වීම නිසා ලැබෙන වාසි සියලු දෙනා දන්නා ආකාරයට ඊටම ආවේනික රස, සුවඳ හෝ සෞඛ්‍යාරක්ෂිත බව, පරිසර හිතකාමී බව පමණක්මද ?

බොහෝ අය නොදැන සිටියද කෙසෙල් කොළයක කෑම එතීම නිසා අමතර ‍පෝෂණ ගුණයක් මෙන්ම ඖෂධීය ගුණයක්ද අපේ සිරුරට ලැබේ. කෙසෙල් කොළයෙහි ඇති Polyphenols නම ශාඛ මූලික සංයුතියෙහි epigallocatechin gallate නම් වන ස්වභාවික ප්‍රති ඔක්සිකාරකය අඩංගුය. මෙම ස්වභාවික ප්‍රතිඔක්සිකාරකයෙහි පවතින සුවිශේෂී සහ අති ප්‍රබල ඔක්සිකාරක ගුණය හේතුවෙන් පිළිකා, හෘද රෝග මර්ධනය කිරීමටත් වියපත්වීම පමා කිරීමටත් හේතු කාරකවේ.

කෙසෙල් කොළය කොතරම් ගුණදායක වුවද එය මිනිසාට ආහාරයට ගත හැකි ආකාරයට ආහාර ජීර්ණ පද්ධතිය සැකසී නැත. එසේ වුවද කෙසෙල් කොළයේ අඩංගු ‍පෝෂණ ගුණය සහ ඖෂධීය ගුණය උකහා ගැනීමට අපට නොහැකියාවක්ද නැත. ඒ මුලින් සඳහන් කළ ආකාරයට උණුසුම් ආහාර කෙසෙල් කොළයෙහි එතීම මගින්ය.

එවිට කෙසෙල් කොළයෙහි අඩංගු Polyphenols උත්තේජනය වී ඒවා ආහාරයට උරා ගන්නා අතර කෙසෙල් කොළයක උණුසුමට එතෙන ආහාර කෑමට ගැනීම තුළින් පෙර කී වාසි අත්පත් කර ගත හැකිය. ඊට අමතරව කෙසෙල් කොළයෙහි අහිතකර බැක්ටීරියාවන්ට විරුද්ධව ක්‍රියාත්මකවීමේ විශේෂ හැකියාවක්ද පවතී.

කෙසෙල් කොළයෙහි කෑම එතීම නිසා එහි අඩංගු විටමින් ඒ, සිට්රික් ඇසිඩ්, කැල්සියම් සහ කැරොටීන් වැනි විටමින් සහ සිරුරට අත්‍යාවශ්‍ය ‍පෝෂණ කොටස්ද නිරායාසයෙන්ම අපේ සිරුරට එකතු වන බව බොහෝ විට ඔබ මතෛක් නොදැන සිටින්නට ඇත.

උත්පලා සුභාෂිනි ජයසේකර අන්තර්ජාලය ඇසුරිනි