හොඳින් දිවීමට ශරීරය සැකසී ඇති මිනිසාට දිවීමෙන් ලැබෙන වාසි

දිවීම සාමාන්‍ය මනුෂ්‍ය ක්‍රියාවක්. බොහෝ විට උදෑසන කාලයේ ව්‍යායාමයේ නිරත වන පිරිස් දිවීම කරනවා ඔබ දැක ඇති. ඈත අතීතයේ සිටම හොඳින් දිවීමට අපගේ ශරීරය ජීව විද්‍යාත්මකවම සකස් වී ඇති බව සඳහන් කළ යුතුයි. මෙසේ දිවීම ශරීරයට ඉතාමත්ම ගුණදායක බව පරීක්ෂණ මඟින් තහවුරු කර තිබෙනවා. ඒ නිසායී ශරීරය හොඳින් පවත්වා ගැනීමට ව්‍යායාම සිදුකරන සියලු දෙනා මද වේලාවක් හෝ දිවීම කරන්නේ.

ශරීරයේ අනවශ්‍ය කැලරි දහනය කර ගැනීමට දිවීම ඉතාමත් හොඳ ව්‍යායාමයක්. සැතපුමක් දිවීමෙන් කැලරි 100 ක් දහනය කරගත හැකි බව සාමාන්‍ය යෙන් පැවසෙනවා. මීට අමතරව දිවීම නිසා ඇතිවන වාසි කවරේ දැයි අපි දැන් විමසා බලමු.

1. ආයු අපේක්ෂාව ඉහළ යෑම.

දිනකට විනාඩි දහයක් හෝ දිවීම සිදුකරන පුද්ගලයන්ගේ ආයු අපේක්ෂාව එසේ නොකරන පුද්ගලයින්ට වඩා වැඩි බව පරීක්ෂණ මඟින් තහවුරු කර තිබෙනවා. දිවීමෙන් හොඳ ඔක්සිජන් ප්‍රමාණයක් ශරීරගත වන නිසා ශරීර කෘත්‍යයන් වඩා හොඳින් සිදුකර ගැනීමටත්, හෘද ස්පන්ධනය සහ රුධිර සංසරණය යහපත් පරිදි පවත්වා ගෙන යාමටත් හැකියාව ලැබෙනවා. ආතතිය ඇති කිරීමට හේතුවන හෝමෝන ශ්‍රාවය වළක්වා ශරීරය යහපත්ව පවත්වා ගැනීම තුළින් ආයු අපේක්ෂාව වර්ධනය කරගත හැකි බව සඳහන්.

2. මනෝභාවයන් වර්ධනය කරයි.

දිවීම නිසා ශරීරය පුරා හොඳින් රුධිරය සංසරණය වීමෙන් මොලයටත් හොඳ රුධිර සැපයුමක් ලැබේ. මේ නිසා පුද්ගලානුබද්ධ හැඟීම් විශේෂයෙන් සතුටට හේතුවන හෝමෝන ශ්‍රාවය කිරීමට හැකියාවක් ලැබෙනවා. මානසික ආතතිය දුරලා මනෝභාවයන් වර්ධනය කිරීමට දිනකට මිනිත්තු කිහිපයක් දිවීමේ නිරත වන පුද්ගලයෙකුට ලෙහෙසියෙන්ම ලබාගත හැකියි.

3. හොඳින් නිදා ගැනීමට හැකි වීම.

දිනපතා සති 03 ක් දිනකට මිනිත්තු කිහිපයක් දිවීම සිදුකරන පුද්ගලයෙකුගේ හොඳින් නිදා ගැනීමේ හැකියාව වර්ධනය වන බව පරීක්ෂණ මඟින් තහවුරු කර තිබෙනවා. දිවීම සිදුකිරීමෙන් අනතුරුව ශරීර උෂ්ණත්වය යාමනය වන නිසා සැප පහසු නින්දක් ලබා ගැනීමට ඔබට හැකියාව ලැබෙනවා. දිවීම මඟින් තයිරොයිඩ්, සෙරටොනින්, වර්ධක හෝමෝනය ශ්‍රාවය උත්තේජනය කිරීමේ හෝමෝනය වැනි හෝමෝන ශ්‍රාවය මඟින් මෙසේ පුද්ගලයෙකුගේ නිදා ගැනීමේ චක්‍රය යහපත් තත්ත්වයකට ගෙන එන බව පැවසෙනවා. සාමාන්‍යයෙන් දීර්ඝ කාලයක් තිස්සේ සුව නින්දක් ලබාගත නොහැකි පුද්ගලයින්ට රාත්‍රි කාලයේදී දිවීම සිදු කිරීමට වෛද්‍ය උපදෙස් ලැබෙන්නේ මේ නිසයි.

4. සන්ධි ශක්තිමත් කිරීම.

හොඳින් දිවීමේදී සන්ධි ශක්තිමත් කරන කාටිලේජ හොඳින් වර්ධනය වී සන්ධි ශක්තිමත් කිරීම සිදුකරනවා. වෙනයම් ව්‍යායාමයක නිරත වන පුද්ගලයින්ට වඩා දිනපතා දිවීම පුරුද්දක් කරගත් අයගේ සන්ධි ශක්තිමත් බව සොයාගෙන තිබෙනවා. සන්ධි ශක්තිමත් වීමෙන් ඒ අවට සන්ධි හා සම්බන්ධ පේශීන්ද හොඳින් ශක්තිමත්ව වර්ධනය වීමට හේතු වනවා.

5. ඔස්ටියෝපොරෝසිස් තත්ත්වයෙන් වැළකීමට හැකිවීම.

වයස්ගත වීමත් සමඟ අස්ථි වර්ධනයට අවශ්‍ය කැල්සියම් වැනි පෝෂක මද වීම නිසා ඔස්ටියෝපොරෝසිස් තත්ත්ව ඇති විය හැකියි. එහෙත් දිනපතා හොඳින් දිවීම කරන පුද්ගලයෙකුගේ එවැනි පෝෂක ද්‍රව්‍ය හොඳින් අස්ථිවල ගබඩා වීමක් සිදුවනවා. එබැවින් වයස්ගත වීමත් සමඟ අස්ථි දුර්වල වී ඔස්ටියෝපොරෝසිස් තත්ත්වවලට භාජනය වීමේ හැකියාව අවම කරන බව සඳහන්.

6. මතකය සහ අවබෝධය වර්ධනය කරයි.

ඉතා හොඳ මතකයක් පවත්වා ගැනීමටත්, හොඳ අවබෝධයකින් යුක්ත වීමටත් දිවීම සිදුකිරීම යහපත් යැයි පැවසුවහොත් ඔබ පුදුම වනවා ඇති. නමුත් දිවීමෙන් ස්නායු පද්ධතියේ වර්ධනයට අවශ්‍ය විශේෂ ප්‍රෝටීනයක් ශ්‍රාවය වීමට හේතු වී, එමඟින් මොලයේ ක්‍රියාකාරීත්වය මනා ලෙස හැඩගස්වා ගත හැකි වනවා. හදිසි අමතකවීම් මඟ හරවා හොඳ මතකයක් සහ අවබෝධයක් වර්ධනය කිරීමට හොඳින් දිවීමෙන් හැකියාවක් ලැබෙන බව පරීක්ෂණ මඟින් තහවුරු කර තිබෙනවා.

7. කාම ආශාව වර්ධනය කරයි.

හොඳින් දිවීම සහ ලිංගික ක්‍රියාකාරකම් එක විට කළ නොහැකි වූවත්, මෙම කාරණා දෙක අතර හොඳ සම්බන්ධතාවයක් ඇති බව සඳහන් කළ යුතුයි. හොඳින් දිවීම සිදුකරන පුද්ගලයාගේ මානසික සෞඛ්‍යයත් වර්ධනය වන නිසා හොඳ කාම ආශාවක් පවත්වා ගත හැකි බව සඳහන් වනවා. මෙයට හේතු වන්නේ දිවීම මඟින් කාන්තා පිරිමි දෙපාර්ශවයේම ටෙස්ටෙස්ටරෝන් හෝමෝන තත්ත්වය වර්ධනය කිරීමයි. මෙලෙස ටෙස්ටෙස්ටරෝන් හෝමෝනය වර්ධනය කාම ආශාව වර්ධනය වී හොඳින් ලිංගික ක්‍රියාකාරකම්වල යෙදීමට හේතුවන බව පැවසෙනවා.

ඒ වාගේම හොඳින් දිවීම සිදුකරන පුද්ගලයන් පහසුවෙන් සුරාන්තයට ළඟාවීමේ හැකියාවකින් යුක්ත වනවා. ඕනෑම දෙයක් ඕනාවට වඩා උවමනා නැත යන කියමන සනාථ කරමින් අනවශ්‍ය ලෙස දිවීමත් ලිංගික හැකියාවට අහිතකර ලෙස බලපෑම් ඇති කරන බව සඳහන් කළ යුතුයි. දිනකට පැය දෙකකට වඩා වැඩියෙන් දිවීම කළහොත් ශරීරයේ ටෙස්ටෙස්ටරෝන් හෝමෝන තත්ත්වය අවශ්‍ය ප්‍රමාණයට වඩා අඩු වී මැනවින් ලිංගික ක්‍රියාකාරකම් වල යෙදීමට ඇති හැකියාව අඩු වන බවත් සඳහන් කළ යුතුයි.