ඔබට හමුවන පුද්ගලයන් ඉදිරියේ ඔබේ පෞරුෂය නිවැරදිව තබා ගන්නේ කොහොමද?

ඔබට යම් පුද්ගලයෙකු මුල් වරට මුණ ගැසීමේදී ඔබේ සිතට යම් සැක සහිත බවක්‌ හෝ නොසන්සුන් බවක්‌ දැනෙන්නේ ද? බොහෝ පුද්ගලයන් හට බොහෝමයක්‌ අවස්‌ථාවලදී මෙවැනි නොසන්සුන් බවක්‌ ඔවුන්ගේ සිත තුළ ඇතිවේ. ඔබ ඔවුන් සමග සිදුකරන සාකච්ඡා, සංවාද හෝ ඔවුන් සමග ගැවසීම ඔබට සුවපහසු වන්නේ නම් මෙවැනි නොසන්සුන් බවක්‌ ඔබේ සිතට නොනැගෙනු ඇත. ඔබ ඔබේ සංවාදශීලී පුද්ගලයා සමඟ කුමන ආකාරයේ සබඳතාවක්‌ ගොඩනගා ගත්තද ඔබ සිත තුළ ඇතිවන මෙම නොසන්සුන් බව ඔබේ එම සබඳතාවයට යම් ප්‍රතිරෝධයක්‌ ඇති කරයි. ඔබගේ ව්‍යාපාර ස්‌ථානයේදී, කාර්යාලයේදී හෝ ඔබ සහභාගීවන ප්‍රිය සම්භාෂණයකදී හමුවන පුද්ගලයන් සමග චකිතයකින් තොරව කථාබස්‌ කිරීම පෞරුෂය සම්පන්න පුද්ගලයෙකුට ඉතා වැදගත් වේ. මෙම සැක සහිත බව හෝ චකිතය ඇතිවීමට ප්‍රධාන සාධකය ලෙස සැලකිය හැක්‌කේ ඔබ, ඔබ ගැන සිතීම නිසා ඇතිවන සබකෝලය යි. ඔබ පිටස්‌තර පුද්ගලයන් සමග වන ගැලපුම කුමන ආකාරයේ වුවත් ඔබ සිත තුළ පවතින චකිතය අවම කරගැනීමට පහත කරුණු උපකාරී වනු ඇත.

• පෙර සූදානම සෑම අවස්‌ථාවකදී ම ඔබට මනා සහයක්‌ ලබාදෙනු ඇත. ඔබ සංවාදයේ කල් ගත කිරීමට බලාපොරොත්තු වන පුද්ගලයාගේ රුචි අරුචිකම් ඔවුන්ගේ මිතුරන්ගෙන් හෝ දැනගෙන සිටීම, ඔබේ නිහැඬියාව බිඳ ඔබ ඔවුන් සමග සංවාදයේ යෙදිමට මහඟු දායකත්වයක්‌ සපයනු ඇත.
• ඔබ, ඔබේ දිනය සැලසුම් කරන්න. එදිනට ඔබ කරන කියනා දේ පිළිබඳව නිවැරදි අවබෝධයකින් හා දැනුවත් විමකින් යුතුව කටයුතු කරන්න.
• ඔබට සුව පහසු ඇඳුම් අඳින්න. අවට සිටින පුද්ගලයන් ඉදිරියේ ඔබත් අන් අයත් අපහසුතාවයට පත්වන ආකාරයේ ඇඳුම් පැළදුම් තෝරාගැනීමෙන් වළකින්න. එලෙස ම මෘදු සුවඳ විලවුන් වර්ගයක්‌ ගත ගැල්වීමටද අමතක නොකරන්න. එය ඔබේත් අන් අයගේත් සංවාදය ඉතා සුහද හා මිත්‍රශීලි ස්‌වභාවයකට මංපෙත් විවර කරදෙනු ඇත.
• ඔබ අන් අය ඉදිරියේ පවසනා දේ පිළිබඳව දෙවරක්‌ සිතා බලන්න. අතිශෝක්‌තියෙන් කතා බස්‌ කිරීමෙන් හැකිතාක්‌ වැලකී සිටින්න.
• ඔබ වඩා හොඳ සවන් දෙන්නෙකු ලෙස කටයුතු කරන්න. එය ඔබගේ පෞරුෂය වඩාත් ඔප් නංවනු ඇත.

ඉහත සඳහන් පරිදි කටයුතු කිරීමෙන් ඔබට පෞරුෂත්වයෙන් පිරිපුන් පුද්ගලයෙකු ලෙස චකිතයකින් තොරව සමාජයේ හැසිරීමට හැකිවනු ඇත.