පවුල් ජීවිතය සැලසුම් කරන්න

විවාහය කියන්නේ බොහොම තද ආධ්‍යාත්මික බැඳීමක් හදවතේ ඇතිවන බැඳීමක් ශක්තිමත් වෙන්න ආදරය, අන්‍යෝන්‍ය විශ්වාසය අවංක බව වැනි බොහෝ දෑ මෙන්ම පෙර සැලසුම්ද අවශ්‍ය වෙනවා. ඒ නිසා විවාහයට පෙර දෙදෙනා එකතු වෙලා විවාහ දිවිය සැලසුම් කරන්න.

දෙදෙනෙක් විවාහ වීමට පෙර තමන්ගේ විවාහ ජීවිතය සැලසුම් කරන්න අවශ්‍යයි. අඩුම වශයෙන් විවාහ වෙලා පළමු වසර 3, 4 වත් තනියම ඉන්න. පිරිමි ළමයාගේ ගෙදර ගිහින් ඉද්දී පිරිමි ළමයා ගැහැනු ළමයාගේ දේවලට උදවු කරද්දී අම්මා හිතනවා 'අන්න පුතාව වැඩකාරයෙක් කරගෙන වැඩ ගන්නවා' කියලා. අන්තිමට අම්මා මැදිහත් වෙනවා ඒ අයගේ දේවල්වලට. එතැනින් ප්‍රශ්න ඇති වෙනවා. පුතාගෙන් වැඩ ගන්නවා කියලා හිතලා අම්මා වැඩ ටික කරන්න පටන් ගත්තාට අම්මාට දිගටම කරගෙන යන්න බැහැ. සමහර දේවල් මඟහැරෙනවා. අන්තිමට පුතාත් අම්මා සේරම කරනවානේ කියලා උදව්වට එන්නේ නැහැ. පස්සේ බිරිය සේරම කරට අරන් කරනවා. කිසිකෙනකුගෙන් උදව්වක් ලැබෙන්නේ නැහැ. 

මම දන්න මගේ යාළුවෝ දෙන්නෙක් හිටියා. දැන් විවාහ වෙලා අවුරුදු 15ක් විතර ඇති. සතුටින් ඉන්නවා. පිරිමි කෙනා කැමැතියි උයන්න. මාර්කට් යන්න. ඒ දෙන්නා ගෙදර කටයුතු බෙදාගත්තා. පිරිමි කෙනා උයනවා. ගැහැනු කෙනා ගෙදර අතුගාලා ලස්සනට තියා ගන්නවා, රෙදි සෝදනවා. හදිසි අවශ්‍යතාවක් මත විතරයි මේ දේවල් වෙනස් වෙන්නේ. අනිත් වැදගත්ම කරුණ තමයි වෙනත් අයගේ අදහස්. විවාහ වෙන්න ඉන්න ගැහැනු ළමයින්ට උපදෙස් දෙනවා. නැන්දම්මලා හරි නපුරුයි. නරකයි, ඒ ගෙදරට ගියාම මේ විදියට ඉන්න, මෙහෙම ඉන්න කියලා. නමුත් ඒවා පිළිපදින්න එපා. සමහර විට හුඟක් හොඳ නැන්දම්මා කෙනෙක් ලැබුණොත් අනිත් අයගේ කතා අහලා අපි අතින් වරදක් වෙන්න පුළුවන්. මේ වගේ සැමියාගේ අම්මා, තාත්තා මම මගේ සැමියාට හුඟක් ආදරෙයි. එයාට මම එහෙම ආදරය කරන්නේ, එයා හොඳ ගතිගුණ නිසා. ඒ හොඳ ගතිගුණ එයාට ලැබුණේ එයාගේ මවුපියන්ගෙන්. මට මගේ සැමියාව ලබා දුන්නේ මේ අම්මයි තාත්තායි කියලා හිතලා සැමියාගේ මවුපියන්ට ආදරය කරන්න. ඔබ දෙදෙනාම රැකියා කළත්, එක්කෙනෙක් කළත් වියදම් ඉතාම හොඳින් කළමනාකරණය කරගන්න. ආදායමට වඩා වියදම වැඩිකර ගන්න එපා. සමහර බිරින්දෑවරු ඉන්නවා තමන්ගේ වැටුප තියෙද්දී සැමියාගේ වැටුප සියල්ලම වියදම් කරනවා. එය සුදුසු නැහැ. දෙන්නා එකතුවෙලා වියදම් සකස් කරගන්න. එයින් ආදායම අනවශ්‍ය දෙයට වැයවීම වළකිනවා. සමහර අය ඉන්නවා විවාහ වුණු ගමන්ම වාහන ගන්නවා, ගෙවල් හදනවා. ඒත් ණය වෙලා. අන්තිමට ගෙදර සාමාන්‍ය වියදම්වලට මුදල් නැහැ. ඒ නිසා නැවත ණය වෙනවා. සමහර අය බෝනස් එකෙන් ගෙවන්න ණය ගන්නවා. ඒ නිසා ණය වෙන්න පුරුදු වෙන්න එපා. හදිසියට ගන්න මුදල් ඉතිරි කරන්න. අනිත් එක තමයි මේ තරම් කල් වෙන වෙනම ඇඳන්වල නිදාගත්ත දෙන්නෙක්. එකට නිදාගන්න පටන් ගන්නවා. එවිට එකිකෙනාගේ පිරිසුදුකම ඉතාම වැදගත්. අනිත් කෙනාට අප්‍රසන්න විදියට ඉන්න එපා. ගෙදර ‍දොර පිරිසුදුකම වගේම තමන්ගේ පෞද්ගලික පිරිසුදුකමත් ඉතාම වැදගත් වනවා. දැන් අපි බලන්න කවුරුත් නැහැනේ. අපි බැඳලනේ කියලා සමහර කාන්තාවෝ තමන්ගේ කොණ්ඩයවත් පිළිවෙළට පිරාගන්නේ නැහැ. රාත්‍රි නිදන ඇඳුම පිටින්ම දවස පුරාම ඉන්නවා. එය ගෙදරටත් හොඳ නැහැ. සැමියාටත් හරිම අප්‍රසන්නයි. අඹු සැමි සබඳතා ගැනත් මෙතැනදී කතා කළ යුතුයි. එය ආදරය පිරුණු සිතින් අපි මේ ආදරය කරනවා කියන සිතිවිල්ලෙන් සම්බන්ධ වෙන්න. එහෙම නැතිව ඉතාම හිංසාකාරී විදියට තමන්ගේ ආරම්භ පිරිමහ ගන්න, අනිත් කෙනා කරන්න කැමැති නැති ලැජ්ජා සහගත දේවල් කරන්න යන්න එපා. ආදරයට ගෞරව කරමින් අනිත් කෙනාගේ ගෞරවය ආරක්‍ෂා කරමින් සබඳතා යහපත් අයුරින් පවත්වාගෙන යන්න.

ජේ‍යෂ්ඨ මනෝ උපදේශිකා එශාමා කාරියකරවන

හංසි ආටිගල

මව්බිම