PLAN නොකිරීම යනු අසාර්ථක වෙන්න PLAN කිරීමකි
බලාපොරොත්තු තමයි මිනිස්සුන්ට ජීවත්වෙන්න දිරිය සහ ආශාව ජනනය කරන්නේ. බලාපොරොත්තු සිහින, අපේක්ෂා දැක්ම, අරමුණු, පරමාර්ථ ලෙස විවිධ නම්වලින් විවිධ අර්ථකථන ඔස්සේ හැඳින්වූවාට ඒ සෑම දෙයකින්ම කියවෙන්නේ අනාගතයේ ළඟාකරගත යුතු තත්ත්වයක්.'ඔබේ අපේක්ෂාව නීතිඥයකු වීමට නම් ඔබේ එම අපේක්ෂාවෙන් අඩකට වඩා දැනටමත් ඉටුකරගෙන ඇත. අන් සියල්ලටම වඩා සාර්ථකත්වයට පත්වීමේ තමාගේ යෝජනාව වඩා වැදගත් බව සිතේ තබාගන්න' ඒ නීතිය හැදෑරීම බලාපොරොත්තුවෙන් ශේ‍ර්ෂ්ඨ ඒබ්‍රහම් ලින්කන්ගෙන් උපදෙස් පැතූ තරුණයකුට වරක් ලින්කන් දුන් උපදෙසයි. සමහර මිනිස්සු ජීවිතය විඳිද්දි තවත් පිරිසක් ජීවිතය විඳවීමටත් එක ප්‍රධාන හේතුවක් තමයි බලාපොරොත්තු. වෙනත් වචනයකින් කියනවා නම් සිහින තියෙන මිනිස්සු බොහෝවිට ජීවිතය විඳින අතර සිහින සැබෑ කරගැනීමට නොහැකි වෙන පිරිස කලකිරීමෙන් ජීවිතය විඳවනවා ඔබ අනන්තවත් දැකලා ඇති. ඒත් සමඟම කෙනකු කියන්න පුළුවන් වඩා සතුටු වෙන්නේ සිහින නොදකින බලාපොරොත්තු රහිත පුද්ගලයන් කියලා. එහෙම නැත්නම්, සිහින ඉටුවුණත් නැතත් ජය පරාජය සමසේ විඳින්නන් කියලා. නමුත් සාමාන්‍ය මිනිස්සු විදියට කවුරුත් කැමැති අසතුටට නොව සතුටටයි. පරාජයට නොව ජයග්‍රහණයටයි. අසාර්ථකත්වයට නොව සාර්ථකත්වයටයි. සිහින නොදැක ජයග්‍රහණයේදී නිහතමානී පරාජයේදී ශක්තිමත් වීමට අවශ්‍ය පන්නරය සහිත පියාපතක සැහැල්ලුවක් ඇති ජීවිතයක් ගත කිරීමට සිතා ගැනීමත් එක්තරා ආකාරයක සිහිනයක් නොවේද? අනෙක් අතට සිහින සැබෑවීම තුළින් තමයි තව තවත් දිරිමත් වෙන්නේ. ඔබේ පළමු පියවර සාර්ථක නම් අනිවාර්යයෙන්ම දෙවැනි පියවර ඔබ තබනවා නේද? අත පෙන්නලා මිනිස්සු සාස්තර අහන්නෙත්, ජේ‍යාතිෂවේදීන්ගෙන් තරු ලකුණු පිළිබඳ විමසන්නෙත් හඳහන බලන්නෙත්, අනාගත සුබ ලකුණු සහ බාධා පැවතීදැයි දැනගැනීමට මිසක මිනිසුන්ට ඇති වෙනයම් ඔළුවේ කැක්කුමක් නිසා නොවන බව අප විශ්වාස කරනවා. අප එයින් අනාවරණය කරන්න උත්සාහ ගත්තේ අෑත අතීතයේ සිටම කවුරු කවුරුත් අනාගතය පිළිබඳ උනන්දුයි කියන වග පෙන්වන්න. ඒ වගේම කවුරුත් කැමැති සිහින සැබෑවෙනවා දකින්න. පීටර් ඩෘෘකර් නම් කළමනාකරණ උපදේශකයා පවසන්නේ අනාගතය පිළිබඳ සිහින දකින්න හොඳම ක්‍රමය එය නිර්මාණය කිරීම බවයි. පීටර් ඩෘෘකර්ගේ ඉහත කියමන ඉතා නිවැරැදියි. ඔයා සිටිය යුත්තේ තරු ලකුණු හෝ අතේ රේඛා නිර්ණය කළ අනාගතයක නොව ඔයා සැබෑකරගන්න කැමැති ඔයාට අවශ්‍ය අනාගතයක් පිළිබඳ සිහිනයක. අද දවසේදී ඔබ අනාගතය නිර්මාණය කළොත් ඔබ මතු දිනයේ එහි ඉඳියි. නොකළොත් ඔබ එහි නොසිටියි. ඉතාම කෙටියෙන් කියන්න තියෙන්නේ ඉරණම පිළිගන්න එපා. ඔබ ඉරණම තීරණය කරන්න. ඒ සඳහා ප්‍රායෝගික දවල් හීන දකින්නකු වෙන්න ඇත්තටම සැලසුමක් (Plan) කියන්නේ අන් කිසිවකට නොව ඊළඟ මොහොත ඊළඟ දිනය පිළිබඳ ඔබේ සිතේ ඇඳි මනා සිහියෙන් යුත් සිහිනයට මිසක් කොළ කැබලිවල ලියා තබා ගන්නා සටහනකට නෙවෙයි. ව්‍යාපාරයක් නම්, සැමවිටම ක්‍රියාත්මක වෙන්නේ සැලසුමකට අනුව. ඔවුන් සැලසුම් සකස්කිරීමට විශාල වියදමක් වගේම දැවැන්ත කැපවීමක් ද යොදනවා. මොකද ඔවුන් අත්දැකීමෙන්ම දන්නවා සැලසුමට අනුව වැඩ කළොත් අපේක්ෂිත ප්‍රතිඵල හෝ ඊට ආසන්න ප්‍රතිඵල නියත ලෙස ලැබෙන බව. නමුත් ජීවන සැලැස්මක් නිර්මාණය කිරීම නම් එතරම් ගණන් යන වැඩක් නෙවෙයි. නමුත් අපහසුයි. සියල්ලන්ටම පොදු ජීවන සැලසුම මේ යැයි කියන්න අප කාටවත් බැහැ. මොකද මිනිස්සු කියන්නේ යන්ත්‍රවත්, ව්‍යාපාරවත් නොවන සජීවී සංකීර්ණ සම්පතක්. නමුත් ඕනෑම දෙයකට යෙදවිය හැකි ඕනෑම පුද්ගලයකුට හෝ ආයතනයකට භාවිත කළ හැකි සැලසුමක පිළිවෙළ අපි ඔබට ඉදිරිපත් කරනවා. ජනපති මහින්ද රාජපක්ෂ සැලසුමක් සැකසුවත්, අයිබීඑම් (IBM) හෝ මයිකේ‍රාසොෆ්ට් ආයතනයන්ගේ සැලසුමක් කළත් ඒවා තුළ ඇත්තෙත් පහත පියවර ටිකම තමයි.
1. ඔබ දැන් සිටින්නේ කොහේද?(Where are you now)
ඔබ දැන් සිටින්නේ කොතැනද කියලා කියන්නේ පවත්නා තත්ත්වය අබවෝධ කර ගැනීමට තමයි. ඉතාම කෙටියෙන් කියනවා නම් යන්න ඕන තැන තීරණය කරන්න ඕන දැන් තමන් ඉන්න තැනට අනුව මිසක ඇත්තටම නොසිටින සිහින ලෝකයක සිට නෙවෙයි. නමුත් තමන් දැන් ඇත්තටම ඉන්නේ කොතැනද කියන කාරණය අපට නිතරම අමතක වෙනවා. මන්දයත් අප බොහෝ දෙනා කැමැති යථාර්ථය තේරුම් ගන්නවාට වඩා අප මවාගත් ලෝකයක ජීවත් වෙන්න. එහිදී අපේ දැන් තියෙන දැනුම කුසලතා හැකියාවන් ඇත්තටම තේරුම් ගන්නවාට වඩා මම මෙහෙම කෙනෙක් වෙන්න ඇති කියලා වරදවා තේරුම් ගැනීම ඉතාම භයානකයි. ඕනෑම සැලසුමක පළමු පියවර වන්නේ පවත්නා තත්ත්වය හෙවත් දැන් සිටින තත්ත්වය තේරුම් ගැනීම මිසක් අරමුණු පරමාර්ථ පිහිටවීම නෙවෙයි.
2 ඔබ සිටීමට අපේක්ෂා කරන්නේ කොහේද? (Where do you want to be)
ඉන්න තැන හරියටම තේරුම් ගත්තට පස්සේ යන්න ඕන තැන තීරණය කරන්න අවශ්‍යයි. එතැනදී ආසන්නම අරමුණක සිට දිගුකාලීන දැක්මක් දක්වා ඔබගේ සිහිනයේ මාර්ග සිතියම අඳින්න අවශ්‍යයි. O/L සමත් වෙන්නේ නැතිවA/L කරන්න බැහැනේ. අන්න ඒ නිසා පළමු අරමුණ පළමුව ඉටු කරගන්න අවශ්‍යයි. ඒ වගේම සමස්ත ජීවිතය සම්බන්ධයෙන් දිගුකාලීන දැක්මක්ද තියෙන්න අවශ්‍යයි.
3. ඔබ එතැනට ළඟාවෙන්නේ කොහොමද? (How do you get there)
රමුණු පරමාර්ථ වෙත ඕපපාතිකව ළඟාවෙන්නේ නැහැ. ඒ සඳහා කැපවීමෙන් ළඟාවිය යුතුයි. එම නිසා අරමුණු පරමාර්ථ වෙත ළඟාවෙන්න කරන දේවල් ගැන අදහස් ඔළුවේ තියෙන්න අවශ්‍යයි. සාමාන්‍යයෙන් ව්‍යාපාර ආයතනයක් නම් තම වාර්ෂික අරමුණ වෙත ළඟාවෙන්න මාසෙන් මාසෙට උපක්‍රම හදලා තියෙනවා. මගේ අරමුණට මම යන්නේ කොහොමද? ඒ සඳහා කළ යුත්තේ මොනවාද? නොකළ යුත්තේ මොනවාද? මම වෙනස්ව කළ යුත්තේ මොනවාද? ආදී වශයෙන් අරමුණ පරමාර්ථ වෙත ළඟාවෙන්නේ කොහොමද කියන කාරණය ගැන හිතන්න අවශ්‍යයි. ඒ වගේම ඒ සඳහා ළඟා වෙන්න ක්‍රම සහ විධි නිර්මාණය කරන්න.
4. ඔබ සිටිය යුතු තැනට ළඟාවෙමින්ද ඉන්නේ? යන්න තහවුරු කරගැනීම (Are you getting there)
සැලසුම් කළ අරමුණකට අනුව සැලසුම් කළ වැඩපිළිවෙළක් ඔස්සේ ළඟාවීමේදී වැඩ කරලා විතරක් ප්‍රමාණවත් වෙන්නේ නැහැ. තමන් කරන කියන දේවල් ගැන නිරන්තර අවබෝධයෙන් ඉන්න අවශ්‍යයි. ක්‍රිකට් තරගයක් පටන් ගන්න කලින් ක්‍රීඩකයන් ලකුණු 300ක ඉලක්කයකට යන්න තීරණය කරනවා. එහිදී ඔවුන් ඒ සඳහා කිසියම් උපක්‍රමයක් ද සකසනවා. නමුත් පන්දුවට පහර දෙන්න එන සෑම ක්‍රීඩකයෙක්ම තමන් ලකුණු 300 අවසාන ඉලක්කයට ළඟාවෙමින්ද ඉන්නේ. එසේත් නැත්නම් ඒ වෙත ළඟා වෙන්න පන්දුවට පහරදීමේ වේගය වැඩි කරන්න අවශ්‍යද වශයෙන් කිසියම් පාලනයකින් යුතුව හිතන්න අවශ්‍යයි. අරමුණක් සහ උපක්‍රමයක් පමණක් තිබීමෙන් පමණක් සැලසුමක් සාර්ථක වෙන්නේ නැහැ. ඒ සඳහා නිවැරැදි සිහියෙන් සිට වැඩ කරන්න ඕන.
කැලුම් වැලිගම
උපුටා ගැනීම මව්බිම
