අනුන්ගේ අනුකම්පාවට නොව ඊර්ෂ්‍යාවට ලක්විය යුතු ජීවිතය සාර්ථකයි
සිවුපාවුන්, උරගයන්, පක්‍ෂීන්, මත්ස්‍යයන්, කෘමීන් අතරින් මානවයා මේ පෘථිවි තලයේ බිහි වූයේ සිතන්න, කියවන්න, කතා කරන්න, අසන්න, දකින්න, සිනහවෙන්න, හඬන්න, හඬනඟන්න හැකියාවකුත්, බුද්ධිමත් භාවයකුත් උපතින්ම දායාද කරගෙනයි. පෙර කරන ලද කුසල, අකුසල කර්ම පල විපාක නිසා හෝ ඍතු විපර්යාස නිසා හෝ මවු - පිය පාරම්පරික ජාන ලක්‍ෂණ සංයෝග නිසා හෝ දේශගුණ - කාලගුණ දෝෂ නිසා හෝ අනියත හේතූන් නිසා හෝ මේ ජනිත වන මිනිසාගෙන් සමහරකු මන්දබුද්ධිකය. සමහරු බිහිරෝය. ඇතැම්හු අන්ධයෝ වෙති. තවත් එකකු ගොළුවෙකි. තවත් අයකු කොරෙකි. එහෙත් ඔබ දන්නවාද මේ හැම කෙනකුටම ආවේණික වූ අනන්‍යතාවක් තිබෙනා වග! මන්දබුද්ධික දරුවකු රඟන රැඟුමක් දෙස බැලුවහොත්, බිහිරකුගේ සිතුවමක් දෙස බැලුවහොත්, අන්ධයකුගේ බට නළා සංගීත රාවයක් වෙත සවන් දුනහොත්, කොරෙකු අඳිනා චිත්‍රයක් විමසුමකට ලක්කළ හොත් එය ඔබට මොනවට පැහැදිලි වේ. එසේ වෙතත් ඔබ මන්දබුද්ධිකයකුද නොවී, බිහිරකුද නොවී, අන්ධයකුද නොවී, ගොළුවකුද නොවී, කොරකුද නොවෙතත් ඇයි අද ඔබ ළතැවිල්ලේ? ඒ ඔබ ඔබ ගැනම අවතක්සේරුවකින් සිටිනා නිසා නොවේද? ඔබ දන්නවාද යම් ආබාධිත පුද්ගලයකුගේ ඒ ආබාධිත ඉන්ද්‍රිය තත්ත්වය නිසා ඔහුගේ ශරීරයේ වෙනත් ඉන්ද්‍රියක් හෝ කීපයක් වඩා තීව්‍රයෙත් ක්‍රියාත්මක වන බව? ඒ තමයි සොබාදහම! ඒ තමයි විශ්වයේ, විස්මය! ඉදින් ඔබටත් මේ ඉන්ද්‍රිය ශක්ති නොමැත්තේද? සොබා දහමේ ආශීර්වාදය නොම ලැබේද? සබඳ! ඔබ ඔබ ගැන නොදන්නෙහිය. එය හරියට ඇතා, අලියා තම ශක්තිය, තරම ගැන නොදන්නා සේය. යම් විදියකින් උෟ සිය ශක්තිය, තරම දැන ගතිනම්, අර හෙණ්ඩුවේ පුංචි අංකුශයට බියවේද? ඒ හස්තියාට හොඳ මතක ශක්තියක් තිබුණද, උෟ උගේ තරම නොදන්නා නිසාය. එයද සොබාදහමේ අපූරු නිර්මාණයකි! එබැවින් මා ඔබට වටහා දෙන්නේ ඔබ ඔබේම ශක්තියක් නොවී ඔබ අනුන්ගේ ශක්තියක් වෙන්න එපා කියාය. ඔබට ඔබේම ශක්තියක් ඇත. හැකියාවන් නැතිවා නොවේ. අනන්‍යතාවක් තිබේ. නිර්මාණශීලී ස්වභාවයද තිබේ. ඒ ශක්තිය, හැකියාව, අනන්‍යතාව, නිර්මාණශීලී ස්වභාවය පුබුදුවාගතහොත් ඔබට අනුන්ගෙන් යැපීමට, යැදීමට හේතුවක් නොවනු ඇත. යාචකයකුගේ තත්ත්වයට පත් නොවනු ඇත. අන්න එවිටයි ඔබ අනුන්ගේ ඊර්ෂ්‍යාවට පාත්‍ර වන්නේ. එසේ නොමැතිව අනුන් උරාබොන සිගරැට් කොටයක් ඉල්ලා හෝ අනෙකාගේ අතේ ඇති තේ වීදුරුවෙන් භාගයක් යැදීමට හෝ වියදමටය කියා සුළු මුදලක් ඉල්ලා ගැනීම නිසා ඔබේම අභිමානය රැකගෙන ජීවත්වීමට නොහැකි වෙනවා. ඔබේ ප්‍රතිපත්තීන් දිවි හිමියෙන් රැකගෙන ජීවත් වීමට පුරුදු පුහුණු වීම් ඇති කරගතහොත් ඔබට අනුන් ඊර්ෂ්‍යා කරනවා නොඅනුමානයි.
එහෙත් ඔබ අභිමානයෙන් දිවි ගෙවනවා වෙනුවට කිසිම විටෙකවත් ආඩම්බරකාරයකු හෝ කාරියක ලෙස ජීවත් නොවිය යුතුය. මන්ද? අනුන්ටත් යම් අභිමානයක් තිබෙන නිසාය. ඒ අය ඔබේ ආඩම්බරකම අලුයම හෙලූ කෙළ පිඬක් සේ පිළිකෙව් කරාවි. ඒ ආඩම්බරකම වෙනුවට අභිමානයෙන් දිවි ගෙවන මිනිසා දියමන්ති කැටයක් සේ දිදුලයි. බබළයි. කිසිම අවස්ථාවක අනුන්ගේ අනුකම්පාවට පත්වන්න ඔබ සිතන්නවත් පෙලඹිය යුතු නැහැ. එය අසුබ සිතිවිල්ලකි. අනුන්ගේ අනුකම්පාව, සානුකම්පිතභාවය ලබනුයේ, යාචකයන්ය. නොඑසේ නම් කිසිවක්ම කර කියාගත නොහැකි තත්ත්වයක් තමන්ට ඇතැයි සිතා අඳුරෙන්, අඳුරට යන අවාසනාවන්තයෝය. නැතිනම් හුස්ම වැටෙන මළ කඳන් වැනි ජීවිතය. ඔබ යමකුගේ ඊර්ෂ්‍යාවට කාර්යාල පරිශ්‍රයේදී හෝ නිවාස සංකීර්ණයේදී හෝ ක්‍රීඩා භූමියේදී හෝ පන්ති කාමරයේදී හෝ ව්‍යාපාරික ස්ථානයකදී හෝ වෙන යම් ආයතනයකදී හෝ ලක්වේ නම් ඔබ සතුටුවන්න අවිහිංසාවාදීව. මන්දයත් ඒ ඔබ සාර්ථක නිසාය. ඔබට බහුශ්‍රැතයෙක්, කවියෙක්, දක්‍ෂ ගීත රචකයෙක්. මනබඳිනා කථිකයෙක්, ගායකයෙක් විය හැකිය. අනෙක් අයගේ පවුල් ජීවිතවලට වඩා සාමකාමී සාර්ථක දරු පවුලක් සමඟ දිවි ගත කරන්නෙක්, ජයග්‍රහණය කරා හඹා යන්නෙක්, අනුන් විසින් ඔබ සොයා අවවාද, උපදෙස් ලබා ගන්නට එන තත්ත්වයේ පරිණතයෙක් විය හැකිය. එබැවින් මිතුර, යෙහෙළිය ඔබ අනුන්ගේ ඊර්ෂ්‍යාවට ලක්වූවාට බිය නොවන්න. ඔබ බියවිය යුත්තේ අනුකම්පාව ලැබ ජීවත්වන්නේ නම් පමණි. ඔබ නොකළ යුත්තේ අනුනට ඊර්ෂ්‍යා කිරීමය. පළමුව ඔබ ඔබටම පහනක් වන්න. ඒ පහන් ආලෝකය ඔබ ඔබේම නිවෙසටත්, දෙවැනුව ගම් පියසටත්, රටටත් පතුරුවාලන්න. එවිට සොබා දහමත්, විශ්ව ශක්තියත් ඔබට සැප, බල, ප්‍රඥා, යසස, කීර්ති, දීඝායු පරිත්‍යාග කරනු ඇත. නිසැකයි ඔබ පසුබට නොවන්න. මන්ද අගාධ අඳුරකට ඉක්බිත්තෙන් ආලෝකවත් කන්දක්ද, තැන්නක්ද ඔබට හමුවනු ඇත ! සෑමදාම සෑමවිටෙකම අඳුරු අගාධයම ඔබට උරුම නොවේ!. මම ඒ සඳහා ඔබට ආශීර්වාද කරමි!
දේශමාන්‍ය ශරත් ශ්‍රී බන්ධුසේන 0718 345689
උපුටා ගැනීම මව්බිම
