ලොව අප නොදන්නා සුනඛ වර්ග
මානවයාගේ හිතවත්ම මිතුරා සුනඛයා බැව් ඈත අතීතයේ පටන් පැවත එන සත්‍යයකි. එහෙත් සුනඛ වර්ග අති විශාල ප්‍රමාණයක් ලෝ පුරා වෙසෙතැයි යන්න බොහෝ දෙනා නොදන්නා කරුණකි. ජර්මන් ෂෙපඩ්, ලැබ්‍රඩෝ, බුල්ඩොග්, කොකර්ස්පැනියල්, රිජ්බැක්, පොමනේරියන් ආද සුනඛ වර්ග රැසක් ගැන දැන සිටින නමුත් ලෝපුරා ප්‍රසිද්ධියක් නොමැති සුනඛ වර්ග 340ක් පමණ සිටිතැයි වාර්තා වේ.
එස්ටෙලා මවුන්ටන් සුනඛයා :
වෘකයින් ගෙන් බැටළුවන් ආරක්ෂා කර ගැනීමට යොදාගන්නා පෘතුගාලයේ උපත ලද සුනඛ වර්ගයකි. ඉතාම ප්‍රියජනක පෙනුමක් ඇතත් නොසෙල්වී සිට ගෙරවීමෙන් කෙනෙකු තුළ භීතියක් ඇතිවේ.
ලැන්කැෂියර් හීලර් :
හරකුන් ගාල් කිරීමේ යොදාගනු ලබන මෙම සුනඛ වර්ගය එංගලන්තයෙන් බිහිවූ අතර ඔවුන් ඩොබර්මන් හා කෝර්නි යන සුනඛ දෙවර්ගයේ මිශ්‍රණයකි. නිතර ලෙඩ රෝගවලට ගොදුරුවේ.
හොවාට් :
හොවාට් යනු වතු ආරක්ෂා කරන සුනඛයා යන්නයි. මධ්‍යතන යුගයේ බිහිවූ බවට එම යුගයේ පැවති චිත්‍ර වලින් පෙන්නුම් කරන අතර හොවාට් සුනඛයා බ්ලැක් ෆොරස්ට් ප්‍රදේශයේ උපත ලැබූ බැව් වාර්තා වේ.
කායිකෙන් :
ජපානයේ උපත ලැබූ මෙම සුනඛ විශේෂය දැකගත හැකි වන්නේ ඉතාම කලාතුරකිනි. ජපානයේ මෙම සුනඛයාට උපහාර දැක්වීම සඳහා පිළිරුවක් පවා ඉදිකොට ඇති අතර ජපානයෙන් බිහිවූ ඉතාම පෞරාණික එසේම පිරිසුදු සම්බවයක් ඇති සුනඛයා ලෙස කායිකෙන් සලකයි.
මුඩි :
බොහෝ කලාතුරකින් දැකිය හැකි සුනඛ වර්ගයක් වන මොවුන් හංගේරියාවේ සතුන් ගාල් කිරීම සඳහා යොදා ගනු ලැබූ බව කියති.
කොකේසියානු ඔවචර්ක (එ‍ෙඬ්ර සුනඛයා) :
මෙම යෝධ සුනඛයා කොකේසියානු කඳුකර සුනඛ වර්ගවලින් දැනට ඉතිරි වී සිටින එකම සුනඛ වර්ගය යැයි කියනු ලැබේ.
ග්‍රෑන්ඩ් බැසට් ග්‍රිෆෝන් වෑන්ඩීස් :
නාමය දිග වුවත් මෙම සුනඛ වර්ගය පෙනුමෙන් අතිශයින් මිටිය. හවුන්ඩ් ගනයට අයත් මෙම සුනඛ වර්ගය ප්‍රංසයෙන් බිහිවූවා යැයි කියනු ලැබේ. ඔවුනට ස්වභාවයෙන්ම පිහිටා ඇති දැඩි ඉව ඇල්ලීමේ හැකියාව නිසා දඩයමට ඇති කරනු ලබයි. මේ සුනඛ වර්ගය මිනිසුන් හා බලු රෑනක් සමඟ සිටීමට ප්‍රිය කරයි.
පුමි :
මුලින් සඳහන් වූ මුඩි සුනඛ වර්ගයට නෑකම් කියන පුමි මුඩිට වඩා ටෙරියර් ගනයට ළංවන ජවසම්පන්න සතෙකි. මප්‍රඩල් හා ටෙරියන් සුනඛ වර්ගයේ මිශ්‍රණයක් ලෙස ද සැලකිය හැකිය.
රුසියන් ටෝයි :
ඉංග්‍රිසින් අතර ජනප්‍රිය සුනඛයෙකු වන ඉංග්ලිෂ් ටොයි ටෙරියර් සුනඛයාට සමානකම් ඇති රුසියන් ටෝයි ලෝකයේ සිටින කුඩාම සුනඛයින්ගෙන් කෙනෙකි. කොමියුනිස් ධර්මයේ නැඟීමත් සමඟම මෙම සුනඛ විශේෂය විනාශ කර දැමීම කෙරේ යොමුවුණ ඔවුන් හා රදළ පන්තිය අතර පැවති සබඳතාවය නිසා යැයි කියනු ලැබේ.
ස්ටැනිෂ් මැස්ටිෆ් :
මුර බල්ලකු ලෙස යොදාගනු ලබන ස්පැනිෂ් මැස්ටිෆ් නම් වූ මොහු ස්පාඤ්ඤයේ උපත ලැබූ යෝධ සුනඛයෙකි. ඉතාමත්ම ශක්තිමත්ය. ග්‍රීකයන් යුද්ධ කටයුතුවලදී යොදා ගත් සුනඛයින් ගෙන් පැවතෙන්නෙකු ලෙස සැලකේ.
වයර්හෙයාර්ඩ් සවිස්ලා :
දඩයම් බල්ලෙකු ලෙස විස්ලා බොහෝ විට හන්ගේරියානුන් විසින් යොදා ගනු ලැබීය. බොහෝ කලාතුරකින් හමුවන මෙම සුනඛ වර්ගය ජර්මන් වයර් හෙයර්ඩ් පොයිටන් හා හන්ගේරියානු විස්ලා සුනඛ වර්ග දෙක එකතු කොට 1930 දී පමණ මෙම සුනඛ විශේෂය ලබාගනු ලැබීය. මොවුන්ගේ විශේෂ ලක්ෂණයක් ලෙස හැඳින්විය හැක්කේ රතු පැහැති සමයි.
ඇපෙන්සෙලර් සෙන්නෙන්හුන්ඩ් :
සෙල්ලම් බඩුවක් ලෙස ගත හැකි මෙම කුඩා සුනඛ විශේෂ ස්විට්සර්ලන්තයේ ඇතිවූ අතර මෙම සුනඛ වර්ගය රෝම අධිරාජ්‍ය සමයේ සිට පැවතෙන බව ද සොයාගෙන ඇත.
අසාවක් :
අප්‍රිකානු සුනඛ වර්ග ගැන බොහෝ විට වාර්තා ලැබී නැත. එහෙත් කාන්තාර පරිසරයට හැම අතින්ම ගැළපෙන අසාවක් සුනඛයා මාලි, නයිගර්, ඇල්ජීරියා රටවල එ‍ඬේරුන් විසින් මුවන් වැනි සතුන් දඩයම් කිරීමට යොදා ගනු ලැබිණ.
උපුටා ගැනීම සිළුමිණ පුවත්පත
