මාගෙ පුතුට මල් යහන හදන්නයි
ඔබගේ දැන ගැනීම සඳහා ඒ ඒ ලග්නවලට 5 වැන්නාධිපතියා පහත සඳහන් පරිදි පෙන්වා දෙමි.
- මේෂ - රවි තුලා - ශනි
- වෘෂභ - බුධ වෘශ්චික - ගුරු
- මිථුන - සිකුරු ධනු - කුජ
- කටක - කුජ මකර - සිකුරු
- සිංහ - ගුරු කුම්භ - බුධ
- කන්‍යා - ශනි මීන - සඳු
ඉහත 5 වැන්නාධිපතියා කවුරුන්ද යන්න පෙන්වාදුන් නමුත් ඔබගේ කේන්දරය තුළ පිහිටි ග්‍රහයන්ගේ බල දුබලතාව හා නැකැත්, ග්‍රහ දෘෂ්ටි පිළිබඳ යම් අවබෝධයකින් තොරව තීන්දු තීරණ ගැනීම තුළින් අයහපතක් සිදුවිය හැකි බැවින් ඒ පිළිබඳව ප්‍රවේසම් වෙන්න. විවාහයට ප්‍රථම පොරොන්දම් පරීක්ෂා කිරීමේදී වෘක්‍ෂ පොරොන්දම සුබ වූ විට ඉතා හොඳින් දරුඵල ඇති බවටත් වෘක්‍ෂ පොරොන්දම දුර්වල වූ විට දරුඵල අහිමි බවටත් මතයක් පවතී. එය එසේ නොවන බව තරයේ සිතට ගන්න. මෙම පොරොන්දම අසුබ වී දරුවන් සිටිනා අයත් මෙම පොරොන්දම සුබ වී දරුවන් නොමැති අයත් ඕනතරම් සොයාගත හැකිය. එබැවින් අන් සෑම කරුණකටම වඩා විවාහ වීමට සිටින ස්ත්‍රී/පුරුෂ දෙදෙනාගේ කේන්දර දෙකෙහි දරුඵල පරීක්ෂා කිරීමෙන් පැහැදිලි තීරණයකට කලින්ම එළැඹිය හැකිය. තවත් නොගැළපෙන අදහසක් අප සමාජයේ මුල් බැසගෙන ඇත. එනම් දරුවන් නොමැති නම් එම වගකීම සම්පූර්ණයෙන් ස්ත්‍රිය මත පැටවීමයි. එය මුළුමනින්ම වැරැදි තීන්දුවකි. දරුඵල ඇති / නැති බවට පුරුෂයාත් ස්ත්‍රිය තරමටම වගකිව යුතුවේ. ඉහත දැක්වූ සියලු කරුණු පුරුෂ කේන්දරය තුළින්ද පරීක්ෂා කර බලා නිගමනවලට එළැඹිය යුතු වෙයි. ඉහත කරුණුවලට අමතරව කේන්දරයේ 7 භාවය පිළිබඳව ඉතා විමසිලිමත් විය යුතු වෙයි. එයට හේතුව නම් දෙදෙනාගේ කායික ගැළපීම නිවැරැදිව තිබේද යන්න පරීක්ෂා කරන්නේ මෙම භාවයෙන් වන බැවිනි. 7 වැන්න අධිපති, එයට වැටෙන අසුබ ග්‍රහ දෘෂ්ටි එහි තැන්පත් ග්‍රහයන් මේ තුළ රාහු, කේතු, රවි, ශනි, බුධ වැනි ග්‍රහයන් ඉතා දුර්වලව පිහිටීම තුළින් ඒ සඳහා වන උනන්දුව අඩුවන බැවින් දරු පිළිසිඳගැනීමක් සිදුවිය නොහැකිය.
පින්වත් නිරෝගී දරු උපතක් සිදු කර ගන්නේ කෙසේද?
* මේ සඳහා හැකි තරම් උෂ්ණාධික ආහාර පානවලින් වැළකී ශරීරය සිසිල් කරන ආහාරපාන ගැනීම මඟින් ඔබේ බලාපොරොත්තු සඵල කරගත හැකිය. හැකි තරම් උදය වරුවේ ස්නානය කිරීම යහපත්වේ. ස්නානයෙන් පසුව සුවඳ වර්ග ඇඟ ගැල්වීම ඉතා සුදුසුය. එමඟින් ගන්ධබ්බයන් එම ශරීරයට ආකර්ෂණය වේ.
* දරුවන් එක් අයකු හෝ ලබාගන්නා තෙක් හැකි තරම් උපත් පාලනය නොකළ යුතු වේ. දීර්ඝ කාලයක් එම බෙහෙත්වලට හුරු වූ විට වඳභාවයට පත්වීමට ඉඩ තිබේ.
* සතියකට වරක් හෝ කොහොඹ කොළ කොටා එළකිරි සමඟ උදෑසන පානය කිරීම යහපත් වේ.
* ජලය පානය කිරීම යහපත් වේ.
* පුරුෂයා හැකි තරම් තැඹිලි මදය සමඟ පානය කිරීම ඉතා සුදුසුය.
දරුඵල අහිමි අයට සරල කෙම් ක්‍රමයක් :
දරුඵල අහිමි වී බලාපොරොත්තු කඩකරගෙන සිටින අය මෙම කෙම් ක්‍රමයද අත්හදා බලන්න. පසළොස්වක පෝය දිනක සියඹලා ගසකින් දළු මිටක් කතා නොකර රහසේ කඩාගෙන සපා ගිලින්න. (මේ සඳහා සියඹලා ගස තෝරාගෙන ඇත්තේ ජන වහරේ සඳහන් අන්දමට කතරගම දෙවියන්ගේ බිරියක් වන වල්ලි අම්මාගේ වාසභවන සියඹලාගස බවට විශ්වාසයක් පවතින බැවිනි.) මේ සඳහා හිතේ චකිතයකින් අවිශ්වාසයකින් තොරව දැඩි විශ්වාසයකින් කරන සියලු කටයුතු සිදුකිරීම තුළින් ලැබෙන ප්‍රතිඵල ද ඉතා යහපත් වෙයි. වල්ලි අම්මා දේවාලයට (කතරගම) භාරවීම තුළින්ද යහපතක් උදාකර ගත හැකිය.
නිවෙසේ නිදන කාමර පිළියෙල කරගත යුතු අන්දම
* නිවෙසේ නිරිත දිශාවේ ප්‍රධාන නිදන කාමරය ස්ථානගත කළ යුතු වේ.
* ඇඳේ හිස නිතරම නැඟෙනහිර දිශාවට යොමු වී තිබීම යහපත් වේ.
* ඇඳ ඉදිරිපසින් කණ්ණාඩියක් තබා තිබීම අයහපත් වේ.
* කාමරය තුළ ළා වර්ණයක් ආලේප කර තිබීම මඟින් සිතට සැහැල්ලුවක් ඇතිවේ.
* සජීවී මල් පැළයක් සහිත කුඩා පෝච්චියක් තබා තිබීම මඟින් ඇතුළත වාතය පිරිසුදු වේ.
* කුඩා දරුවකුගේ පින්තූරයක් ඇඳට දර්ශනය වන ලෙස එල්ලා තැබීම යහපත්වේ.
දරුවන් බලාපොරොත්තුවෙන් සිටින අය නිතරම ගැබිනි මාතාවන්ට මුළු හදින්ම උදවු උපකාර කර ආහාර පාන ආදිය ලබාදිය යුතුවේ. කුඩා දරුවන්ටද අසීමිත ලෙස ආදරය කරුණාව දැක්විය යුතුවේ. ඔවුන්ට තෑගි බෝග ලබාදී සතුටු කළ යුතුවේ. ඒ සෑම ක්‍රියාවක් අවසානයේම ඔබ හටත් එවැනි සම්පතක් ලැබේවායි ප්‍රාර්ථනා කරන්න. පින්වත් දරුවන් බලාපොරොත්තුවෙන් සිටින අය පහත සඳහන් ක්‍රමය අනුගමනය කිරීමෙන් නිරෝගී බලවත් දරුවකු ලබාගත හැකිවේ.
ස්ත්‍රිය ඔසප් වීමෙන් පසු පහත සඳහන් දිනයන්වල එක්වීම තුළින් ඉදිරියෙන් දක්වා ඇති ගති ගුණ පිහිටි දරුවන් ලැබෙන බවට පොත පතේ සඳහන්වේ.
- 06 වැනි දින රාත්‍රි - පරපුර ඉදිරියට ගෙන යන දරුවෙක්
- 08 වැනි දින රාත්‍රි - රුවැති පුතෙක්
- 09 වැනි දින රාත්‍රි - රුවැති දුවෙක්
- 10 වැනි දින රාත්‍රි - බලවත් දරුවෙක්
- 12 වැනි දින රාත්‍රි - වාසනාවන්ත පුතෙක්
- 14 වැනි දින රාත්‍රි - ධාර්මික ගුණැති පුතෙක්
- 15 වැනි දින රාත්‍රි - වාසනාවන්ත දුවෙක්
- 16 වැනි දින රාත්‍රි - ප්‍රඥාවන්ත පුතෙක්
ඉහත සඳහන් නොකළ දිනවල එක්වීමෙන් නොයෙක් ආබාධ සහිත දරුවන් බිහිවීමට ඉඩ ඇති අතර අල්පායුෂ ඇති දරුවන්ද බිහිවීමට ඉඩ ඇති බැවින් ඒ පිළිබඳ සැලකිලිමත් වී නිරෝගී දරුවකු බිහිකර ගැනීම ඔබගේ වගකීම වේ. දරු පිළිසිඳ ගැනීමක් සඳහා එක්වන මොහොතේ තත්කාල ග්‍රහ පිහිටීම බලවත් වූ විට ඉතා බලසම්පන්න නිරෝගී දරුවකු ජනිත වනු ඇත. අතීතයේදී ඒ සඳහා සුබ මුහුර්ත සකස්කරවාගෙන ඒ කටයුතු සිදුකිරීම තුළින් ඉතා ප්‍රබල දරු උපත් සිදුකළ බවට සාධක තිබේ. දරුඵල අහිමි යුවතිපතීන්ට දෙන අවවාදය නම් හැකි තරම් පින්දහම්වලට යොමු වන්න. ඒ අතරම වෛද්‍ය උපදෙස්ද පිළිපදින්න. අනුරාධපුර ජය ශ්‍රී මහා බෝ සමිඳු අබියසට ගොස් අලුයම් කාලයේ බෝධි පූජාවක් තබා දෙවියන්ට පින් අනුමෝදන් කර පින්වත් දරුවකු ලබාදෙන ලෙස ප්‍රාර්ථනා කරන්න. ඔබගේ පැතුම් ඒ අයුරින්ම සඵල වේ.
ජේ‍යාතිෂවේදී ජේ.ජී.එස්.ආර්. ජයරත්න ගැටහැත්ත
උපුටා ගැනීම මව්බිම පුවත්පත
