අරපිරිමැස්ම තරමටම ආරක්‍ෂාවත් වැදගත්
ඉහළ පහළ යන උද්දමනය ගැන හොඳටම කියා පාන නමුත් එපා කියලා ඉවත් කරන්න බැරි අපේ ගෘහණියට බොහොම ළඟ දෙයක් තමයි ගෑස් කියන්නේ. අවශ්‍යතාව වැඩි නිසාම ගෑස් භාවිත කළත් බොහෝ දෙනෙක් ගෑස් භාවිතයට මැළිවෙන්නේ එහි තිබෙන අනතුරුදායක බව සහ වැඩි මුදලක් වැය කිරීමට සිදුවන නිසාමයි.
ගෑස් කියන්නෙ දියරයක්
බොහෝ දෙනෙක් සිතා සිටිනවා සුළු අත්වැරදීමකින් වුණත් ගෑස් සිලින්ඩරය පුපුරා ගොස් විශාල හානියක් සිදු වෙන්න පුළුවන් කියලා. ඇත්තෙන්ම එහෙම වෙන්නේ නැහැ. ගෑස් සිලින්ඩරයක් භාවිත කරනවා නම් ඒ හා සම්බන්ධ වුණු තවත් උපකරණ තිබෙනවා. මේ කියන උපකරණවල දෝෂ නිසා හෝ ගෑස් සිලින්ඩරයේ යම් යම් කොටස් ගැලවී ඉවත්වීම මත ගෑස් සිලින්ඩරය ගිනි ඇවිළීම හෝ පුපුරායෑම සිදුවිය හැකිය. ගෑස් කියන්නේ දියරයක්. නමුත් එය වාෂ්පයක් ලෙසයි. භාවිතයට ගන්නේ. ගෑස් දියරය වාෂ්පයක්වීමට පරිසර උෂ්ණත්වය බලපානවා. ගෑස් දියරය සිලින්ඩරය තුළ විශාල පීඩනයක් සහිතව ගබඩා කර තිබෙනවා. මේ පීඩනය අවම කරලා අවශ්‍ය පීඩනය තබා ගැනීමට රෙගියුලේටරයක් ගෑස් සිලින්ඩරයට සවි කරනවා.
රෙගියුලේටරය නිවැරැදිව සවි කිරීම
ගෑස් ළිප වෙත ගෑස් ගෙනයෑම සඳහා යොදාගන්නා බටය රෙගියුලේටරයට සහ ළිපට නිවැරැදිව සවි කළ යුතුයි. එවිට කිසිසේත්ම ගෑස් කාන්දුවක් සිදු වන්නෙ නැහැ. රෙගියුලේටරයට බටය සවිවන ක්ලිප් එකක් තිබෙනවා. ඒ ක්ලිප් එකත් ගෑස් ළිපට බටය සම්බන්ධ කරන ස්ථානයේ තිබෙන ක්ලිප් එකත් නිවැරැදිව සවිකළ විට කිසිසේත්ම ගෑස් කාන්දුවක් සිදුවන්නේ නැහැ. නමුත් රෙගියුලේටරය හරියට සවිවෙලා නැත්නම් හෝ ගෑස් පරිවහනය කරන බටය කැඩිලා, පුංචි පුංචි සිදුරු හැදිලා නම්, බටය ළිපට සවිවන ස්ථානයේ ගැටලුවක් නම්, ගෑස් කාන්දුවක් සිදුවෙන්න පුළුවන්. රෙගියුලේටරයක් අවුරුදු 5ක සහ බටයක් අවුරුදු 2ක් ඇතුළත මාරු කරන්න පුළුවන් නම් මෙවැනි ගැටලු ඇතිවීම වැළකෙනවා. ගෑස් සිලින්ඩරයේ ගෑස් ඉවර වුණාම නොදැනුවත්වම ගෑස් ළිප ක්‍රියා විරහිත වනවා. ආයෙත් ගෑස් පිරවීම කරලා සිලින්ඩරය ගෙදර ගෙනැවිත් සවි කරන තුරුත් ළිප ක්‍රියාවිරහිත කළේ නැත්නම් රෙගියුලේටරය සවි කරන විටම ළිප පත්තු වෙන්න පුළුවන්. එවිට නිතැතින්ම ගෑස් කාන්දුවීමක් සිදුවනවා.
ගෑස් කාන්දුවක් හඳුනාගැනීම
මේ වගේ ගෑස් කාන්දු වීම් තිබෙනවද කියලා දැනගන්න සරල ක්‍රමයක් තිබෙනවා. ගෑස් සිලින්ඩරයේ රෙගියුලේටරයට, සිලින්ඩරයේ වෑල් එකට බටය මතු පිටට, බටය සහ රෙගියුලේටරයත්, බටය සහ ගෑස් ළිපත් එක්නෙකට සම්බන්ධ වන ස්ථානවලටත්, ගෑස් ළිප සහ සිලින්ඩරය සම්බන්ධ කරන බටයටත් සබන් වතුර ඉසින්න. ඉන් පසුව හොඳින් නිරීක්‍ෂණය කිරීමේදී සබන් පෙණ බුබුළු දමමින් විශාල වෙනවා නම් අනිවාර්යයෙන්ම එතැන ගෑස් කාන්දුවක් තිබෙනවා. රෙගියුලේටරයේ කුඩා සිදුරක් තිබෙනවා. මේ සිදුර හරහාත් ගෑස් කාන්දු වෙන්න පුළුවන්. එයට හේතුව ගෑස් සිලින්ඩරයේ වෑල් එකට සම්බන්ධව තිබෙන මුදුව පලුදුවීම හෝ වෑල් එක මුදුවක් රහිතව තිබීමයි. ගෑස් ළිප දැල්වෙන අවස්ථාවක සුළං පහර නිසා ගින්දර නිවී ගියද දාහකය හරහා සිදුවන ගෑස් කාන්දුව නතර නොවේ.
අනතුරක් වැළැක්වීම
මේ ආකාරයට යම් හේතුවක් මත සිදුවන ගෑස් කාන්දුවක් පිළිබඳ ඔබට දැනුනහොත් අනතුරක් සිදුවීම වළක්වා ගැනීමට කළ යුතු කාර්යයත් කිහිපයක් තිබෙනවා.
- පළමුව ගෑස් ළිප ක්‍රියා විරහිත කරන්න.
- ගෑස් සිලින්ඩරයකින් රෙගියුලේටරය ගලවා ඉවත් කරන්න.
- සිලින්ඩරයට සම්බන්ධ කර ඇති තොප්පියක් හැඩැති ප්ලාස්ටික් කොටස ගෑස්වෑල් එකට සවි කරන්න.
බොහෝවිට ගෑස් කාන්දුවීමකදී එය හඳුනාගත හැකිවේ. ගන්ධයක් දැනීම, කාන්දු වන ශබ්දය ඇසීම, සිලින්ඩරය තෙත් සිසිල් ගතියෙන් යුක්තවීම ආදියයි. මෙවන් අවස්ථාවක විදුලි උපකරණ ක්‍රියාත්මක කිරීම, දර ළිප දැල්වීම, ගෑස් ළිප ක්‍රියාත්මක කිරීම නිසා හදිසි ගිනි ගැනීම් වැනි අනතුරු සිදුවීමට ඉඩ තිබේ. එම නිසා සෑම විටම ගෑස් ළිපක් භාවිත කිරීමට පෙර අනිවාර්යයෙන්ම දොර ජනෙල් හොඳින් විවෘත කර තබන්න. ගින්නක් හෝ පිපිරීමක් සිදුවීමට වාතයේ ගෑස් අංශු 2 සිට 10 දක්වා ප්‍රමාණයක් තිබිය යුතුයි. නමුත් දොර ජනෙල් විවර කළ විට එලෙස ගෑස් අංශු එකතුවීමක් නොවන නිසා පිපිරීමක් හෝ ගින්නක් ඇති නොවේ.
අරපිරිමැස්මෙන් ගෑස් භාවිත කරන විදිය
උයන්න ඕන කරන දේවල් කලින් සකස් කරලා තියාගෙන එක දිගට උයාගෙන යන්න. ළිප ක්‍රියාත්මක කර තවත් වෑංජනයක් සෑදීමට කාලය ගන්න එපා. නමුත් ඔබට එලෙස කාලය අවශ්‍යයි නම් ළිප ක්‍රියාවිරහිත කර අවශ්‍ය වූ විට ක්‍රියාත්මක කරන්න.
- ළිපේ තබන භාජනවල අනවශ්‍ය වතුර ඉවත් කරන්න.
- පැතැලි භාජන භාවිත කරන්න. උස භාජන භාවිත කිරීමෙන් වළකින්න. ගිනි දැල් අඩියට පමණක් වැදෙන පරිදි තැබූ විට අනවශ්‍ය ලෙස අපතේ යෑම වළකී.
- නිල්පාට දැල්ල තිබිය යුතුයි. දැල්ල කහපාට නම් එයට හේතුව ඔක්සිජන් හිඟකමයි. දාහකයේ වායු පාලකය මඟින් දැල්ල සකස් කර ගන්න.
- ප්‍රෙෂර් කුකර් භාවිත කිරීම.
නොදැනුවත්ව ගෑස් අපතේ යන අවස්ථා
- රෙගියුලේටරය රාත්‍රියේදී ගලවා තබන්න එපා. එය නිතර නිතර ගලවන විට සිලින්ඩරයේ වෑල් එක ඇදෙන්න පුළුවන් එවිට ගෑස් කාන්දු වනවා.
- පරණ රෙගියුලේටර් භාවිතය ක්‍රියාකාරිත්වය දුර්වල නිසා වැඩි ආයාසයක් ගන්නා බැවින් ගෑස් භාවිතය ඉහළ යයි.
- ගිනි දැල්ල අඩු මට්ටමක තැබීම හා ළිප ක්‍රියාත්මක වී තිබියදී දැල්ල නිවා දැමීම.
- ආපනශාලා වැනි ස්ථානවල හයිප්‍රෙෂර් රෙගියුලේටර් භාවිත කරනවා. නමුත් ඒ මඟිනුත් ගෑස් අපතේ යනවා.
කල් පැවැත්ම
- පැයට 100 - 150 පමණ ගෑස් දහනය සහිත දායකයක් භාවිත කිරීම.
- අවශ්‍ය ප්‍රමාණයට දැල්ල පාලනය කිරීම.
- සෑම විටම භාජනය ගිනි දැල්ල හා ස්පර්ශ වන පරිදි තැබීම.
- සාමාන්‍යයෙන් ගෑස් සඳහාම නිර්මාණය කළ භාජන තිබෙනවා. නමුත් ගොඩක් ගනකමින් වැඩි භාජන තෝරා ගන්න එපා. තුනී භාජන, මැටි භාජන තෝරාගන්න. ගෑස් සඳහා වෙනම භාජන දැන් වෙළෙඳපොළේ තිබෙනවා.
වැදගත් :
ස්වයංක්‍රියව නොදැල්වෙන ගෑස් ළිප් දැල්වීමේදී පළමුව ගිනිකූර පත්තු කර එය දාහකය වෙත ළංකර ඉන් පසුව ගෑස් ළිප ක්‍රියාත්මක කරන්න.
උපුටා ගැනීම mawbima
