මංගල ඡායාරූපයකි මනාල යුවළ නැති!

ගාල්ල නගරයේ මනාලයෙකි. හෙතෙම තම විවාහ මඟුලට සියල්ලම සංවිධානය කෙළේ කිහිපවරක් කල්පනා කර හැම විටම ලාභය උපරිම කර ගන්නාවූ දැඩි ස්ථාවරයේ සිටයි. මනාලියට ඇඳුම් පැලඳුම් ගැනීමේ සිට හෝටලයේ කාමර වෙන් කරවා ගැනීම, උත්සව අවස්ථාවේ ඡායාරූප ගැනීම හා මනාලිය විසින් මනාලයාගේ නිවෙසට ගෙන එන දෑවැද්ද වෙළෙඳසල්වලින් මිලදී ගැනීමේදීද මනාලයා සහභාගි කර ගැනීමට මනාලියගේ පාර්ශ්වයේ ඥාතීන් පියවර ගෙන තිබුණේ මනාලයාගේ ගති ලක්ෂණ කල්තියාම හඳුනා ගැනීම නිසාය. මනාලයා ඒ අනුව දෑවැද්දට ලී බඩු ගන්නට නගරයේ ලී බඩු සාප්පුවකට යන්නේ මේ සම්බන්ධයෙන් පළපුරුද්ද, දැකපුරුද්ද ඇති මහා වියතකු බව පෙන්වමිනි. මේ අනුව ලී බඩු මිලදී ගෙන වෙළෙඳ සලෙන් පිටව යන මනාලයාට වෙළෙඳසල් හිමියා කියා සිටියේ ඕනෑම අවස්ථාවක පැමිණ, ලී බඩු හා ඕනෑම උපකරණයක් මාරු කර ගැනීමට ද හැකිය යන්නයි. එසේම මංගල උත්සවය වෙනුවෙන් තමාගෙන් අවශ්‍ය උදව්වක් වෙතොත් පවසන ලෙසද වෙළෙඳසල් හිමියා පැවැසුවේය. එවිට මනමාලයාට මතකයට ආවේ තම විවාහ දිනයේ මංගල උත්සවය ඡායාරූප හා වීඩියෝ කර ගැනීමයි. මේ සඳහා කිහිප දෙනකුගෙන් විමසුවද විශාල මුදලක් වැය වන බව පැවැසූ නිසා මනාලයාට සිත්වූයේ තම පින්තූර ගැනීමේ කටයුත්තට සහයෝගයක් ලී බඩු වෙළෙඳසල් හිමියාගෙන් ඉල්ලා සිටින්නටය. ඒ අනුව තම අවශ්‍යතාව තරුණයා ඔහුට හෙළි කෙළේය. ඔහු පැවැසුවේ ඉතාම දක්ෂ, මිල ගණන් අඩු ඡායාරූප ශිල්පියකු මංගල උත්සවය ආවරණය කිරීමට ලබා දෙන්නට හැකි බවයි.මේ අනුව අදාළ දිනයේදී ඡායාරූප ගැනීම, රූගත කිරීම් ආදිය මහා ඉහළින් ඡායාරූප ශිල්පියා හා රූගත කිරීම් ශිල්පියා සිදු කළහ. දින කිහිපයකට පසුව, ඡායාරූප හා රූගත කළ ඩී.වී.ඩී. තැටියක් රැගෙන පෙර දිනයක ලබාගත් අත්තිකාරම් මුදලට අමතරව, රුපියල් පනස්දහසක් ලබාගෙන ඡායාරූප ශිල්පීන් වහා මනාල යුවළගේ නිවෙසින් පිටත්ව ගියේ හදිසි වැඩකට ගොස් ආපසු පැමිණෙන බව පවසමිනි. සියලු ඥාතීහු එක්ව ඡායාරුප බැලූහ. මහා පුදුමයකි. මංගල ඡායාරූපවල සමහර ඒවායේ හිස විතරකි. අනෙක් ඡායාරූපවල අත්පා විතරකි. සමූහ ඡායාරූපවල සමූහයක් නැත. සිටිනුයේ දෙතුන්දෙනෙකි. මංගල ඡායාරූපයේ මනාලිය හෝ මනාලයාගේ මුහුණු නැත. පින්තූර නැරැඹීම නතර කර වීඩියෝව නැරැඹීමට ඩී.වී.ඩී. යන්ත්‍රයක් ගෙන තැටිය දමා නැරැඹීය. ‘අහෝ පුදුමයකි. දර්ශන ඒමේ අත කැරකෙන අතර, සියල්ලම නියමිත පරිදි කර නොමැත. ලීබඩු වෙළෙඳ ආයතනයේ හිමිකරු මංගල උත්සවයේ ඡායාරූපකරණයට මනාලයාගේ නිවෙසට එවා ඇත්තේ බොරුකාරයන් පිරිසකි. ඔවුන් මංගල සාදයේ තිබූ මත්පැන් පමණ ඉක්මවා පානය කිරීම නිසා සියල්ල කණපිට හරවා ඇත.දැඩි මසුරුකම නිසා තමාට වටිනා දේ පවා අහිමි කරගත් මෙම කතාන්දරය සියල්ලන්ටම හොඳ පාඩමකි. 

(සත්‍ය කතාවකි.) 

ඉමදුව - ටී. විතානවසම් 

උපුටා ගැනීම මව්බිම