ගැහැනු වශියේ නම්බර් වන් - කැසනෝවා
මේ ලෝකයේ ගැහැනියක වසඟ කර ගැනීමේ කලාව වඩාත්ම ප්‍රගුණ කර තිබූ තැනැත්තා ලෙස ඔහු සැලකෙයි. ඔහු සමඟ යහන්ගත වූ ගැහැනුන් ගණන ඔහු පවා නොදැන සිටියේ ය. රාගාධික ගැමි තරුණියන් සහ කන්‍යා සොයුරියන්ගේ සිට ධනවත් මහලු කාන්තාවන් දක්වා හැම කෙනකුගේ ම පෙම්වතකු වන කෙටි ක්‍රම ඔහු දැන සිටියේ ය. "මා උමතු ගැහැනුන්ට පවා ආදරය කරන්නට පටන් ගෙන තිබේ" යැයි කැසනෝවා සිටුවරයා සිය දිනපොතේ ලීවේ ය. එහෙත් ඔහු සැබවින් ම සියලූ ගැහැනුන්ට වඩා සිය නිදහසට ආදරය කළේ ය. මේ ලෝකයේ ගැහැනියක වසඟ කර ගැනීමේ කලාව වඩාත්ම ප්‍රගුණ කර තිබූ තැනැත්තා ලෙස ඔහු සැලකෙයි. ඔහු සමඟ යහන්ගත වූ ගැහැනුන් ගණන ඔහු පවා නොදැන සිටියේ ය. රාගාධික ගැමි තරුණියන් සහ කන්‍යා සොයුරියන්ගේ සිට ධනවත් මහලු කාන්තාවන් දක්වා හැම කෙනකුගේ ම පෙම්වතකු වන කෙටි ක්‍රම ඔහු දැන සිටියේ ය. ඔහු අවස්ථා කිහිපයකදී ම විවාහ වනු පිණිස අල්තාරය ඉදිරියට ගොස්, අල්තාරය පෙනි පෙනීම අතුරුදන් විය. ලෝකයේ හොඳම රැවටිලිකාරයන්ගේ ප්‍රයෝග ඒ සඳහා අනුගමනය කෙරිණි. මනාලිය ඔහු එන තෙක් බලා සිට හති වැටෙන තෙක් ම වහං වී සිටින අයුරු කැසනෝවා දැන සිටියේ ය. යම් හෙයකින් ඔහු තමන් මඟ හැරි බව මනාලිය සොයාගත හොත්, ඔහු කළේ, විවාහය මඟහැරීම ගැන තමන් අතිශයින් ම පසුතැවිලි වන බව හැඟවීමයි. ඉන්පසු ව, ශෝකයෙන් පීඩිත වූ කැසනෝවා කෙනෙක් සුපුරුදු පරිදි ඇගේ යහන වෙත ඇදෙන අයුරු දැකගත හැකි වනු ඇත. කැසනෝවාගේ අත් අකුරින් ම ලියූ ඔහුගේ සමරු සටහන් ලෝකයේ මුලින් ම පළ වූයේ 1960 දශකයේ ය. තරුණ වියේ සිටිය දී තමන් ස්ත්‍රියකට උහුලාගෙන සිටිය නොහැකි තරමට කඩවසම් අයෙක් විණැයි කැසනෝවා ලියා ඇත. එහෙත් විචාරකයන් කියන්නේ, 18 වැනි සියවසේ සිටි සාමාන්‍ය ඉතාලි පිරිමියකුගේ පෙනුමට වඩා සුවිශේෂ පෙනුමක් ඔහු සතුව නොතිබුණු බවයි. ඔහුගේ උස අඩි හයයි, අඟල් භාගයක් විය. කදිම කේශකලාපයෙන් අලංකාර වූ ශෝභන මුහුණ වසූරිය කැළැල් තුනකින් අවලස්සන වී තිබිණි. සමහරවිට ඔහුගේ අසාමාන්‍ය බව ප්‍රකට වූයේ පෞරුෂය සහ ප්‍රයෝගකාරීත්වය තුළින් විය හැකිය. ගැහැනියක සමඟ පෙමෙන් බැඳෙන්නට ඔහු අනුගමනය කරන උපායක් විය. මුලින් ඔහු ඇය සමඟ දබරයකට පැටලෙයි. එහෙත් නිතර ම දබරය අවසන් වූයේ ඇය කෙතරම් සුන්දර ද සහ ඇයට තමන් කෙතරම් වසඟ වී සිටින්නේදැයි පැහැදිලි කර දීමෙනි. සමකාලීන පුරුෂ ලෝකයේ මෙය සැලකුණේ කලාවක් හෝ දස්කමක් ලෙසිනි. ඒ නිසා ම අදටත් කැසනෝවා, හුදු දුරාචාරියකු ලෙස නොව, අනගි ම පෙම්වතකු ලෙස සැලකුම් ලබයි.
1725 වසරේ ඉතාලියේ උපන් කැසනෝවා, නළු නිළි මාපියන්ගේ ජාන උරුමයෙන් සාටෝපය ද, රඟපෑම ද, උරුම කර ගෙන තිබුණේ යැයි කිව හැකිය. ඉතාලියේ පාදුවා විශ්වවිද්‍යාලයේ අධ්‍යාපනය ලබා, මියුරු ලෙස වයලීන් වාදනය කිරීමේ හැකියාව ද ලබාගත්තේ ය. ජීවිකාව ලෙස ඔහු තෝරාගෙන තිබුණේ පාදිලිකමයි. එහෙත් දිව්‍යමය ශුද්ධ අණටත් සිය සිත පාලනය කළ නොහැකි බව කැසනෝවා වටහාගත්තේ උසස් වැනීසි පවුලකින් පැවත ආ කන්‍යා සොයුරියන් දෙදෙනකු සිය පෙම්වතියන් බවට පත්කර ගැනීමෙන් පසුව ය. කැසනෝවා තරුණ වියේ සිට ම කට වචනයෙන් සිත් දිනාගැනීමේ මඟ දැන සිටියේ ය. පූජකාරාමයේ විනය ගැටලූ මතු වන විට, ඔහු හෙමින් සීරුවේ දේශනකාරයකු බවට පත්විය. පූජක ධුරයෙන් පන්නා දැමූවන් සඳහා දේශනා පවත්වන්නකු ලෙස ඔහු කීර්තියක් ලබාගත්තේ ය. ඔහුගේ දේශනාවලට ගැහැනු පිරිමි භේදයකින් තොරව ඉහළ ප්‍රතිචාර ලැබිණි. එහි ප්‍රතිඵලය වූයේ, ඔවුන් ලබාදුන් රෙකමදාරු ලිපි හරහා ඔහු උසස් සමාජයට පිවිසීමයි. වයස අවුරුදු 20 වන විට ඔහු සූදු කෙළියේ ද, කෙළ පැමිණියකු විය. ඒ නිසාම කලින් කලට විශාල මුදල් අගහිඟකම්වලින් ද පෙළීමට ඔහු ට සිදුවිය. ඇතැම්විට ඔහු එදා වේල සොයාගැනීම සඳහා නෘත්‍යශාලාවල වයලීන් වාදනය කළේ ය. ණය ගෙවීමට අපොහොසත් කැසනෝවා ඔහුගේ ණය හිමියන්ට පෙනුණේ වංචාකාරයෙක් ලෙස ය. වරක් ඔහු සිය ණය හිමියන්ගේ තාඩන පීඩනවලින් ගැලවුණේ තරුණ කල ලියූ ආගමික ගීතිකාවක් ඔවුන් අතට පත් කර ඔවුන්ගේ සිත මෙළෙක් කිරීම මගිනි. එහෙත් 1755 ජූලි මස ඔහු අත්අඩංගුවට ගෙන වැනිස් බන්ධනාගාරය වෙත ගෙන යනු ලැබිණි. එම බන්ධනාගාරය එනමින් හැඳීන්වුයේ එහි වහලය ඉතා බරැති උළුවලින් සෙවිළි කර තිබූ නිසා ය. අපකීර්තිමත් වැනීසි බන්ධනාගාරයේ වසර පහක් ම නඩු ඇසීමකින් තොර ව ඔහු රඳවා තැබීම වැනීසි පාලකයන්ගේ සැලසුම විය. ඇත්ත කතාව වූයේ, වැනීසි පාලකයකුගේ බිරිය සමඟ රමණයේ යෙදී හසුවූ කැසනෝවා ට අමතක නොවන පාඩමක් ඉගැන්වීම ඔවුන්ගේ අරමුණ වූ බවයි. එහෙත් ඉතිහාසයේ සම්භාව්‍යම ගෙවල් බිඳීමක් මගින් කැසනෝවා ලීඩ්ස් බන්ධනාගාරයෙන් පැන ගියේ ය. එහෙත් කොන්ස්තන්තිනෝපලයේ දී නම් ඔහු සැබවින් ම අමාරුවේ වැටුණේ ය. ඉස්ලාම් ආගම විසින් ඇති කර තිබූ ලිංගභේදය නොතකා ඔහු, එක්තරා මුස්ලිම් කාන්තාවක් මෝහනය කිරීමට තීරණය කළේ ය. එහිදී ඔහු වැඩ වරද්දාගත්තේ වේල් පට ඉවත් කරන්නට යාමෙනි. කුපිත වූ මුස්ලිම් කාන්තාව ඔහුට දිගට හරහට පහරදීමට පටන් ගත්තා ය. පසුව කැසනෝවා කීවේ, වේල් පට ඉවත් නොකර වෙනත් ඕනෑම දෙයක් කිරීමට තරම් නිදහසක් ඇය ඔහුට ලබාදී තිබූ බවයි. වරක් ප්‍රංශ ලොතරැයි සමාජයේ අධ්‍යක්ෂ්‍යවරයා ලෙස ද කටයුතු කළ කැසනෝවා පැරීසියේ ඉහළ සමාජයේ කාන්තා කවයන්ගේ නැතිව ම බැරි සාමාජිකයෙක් බවට පත්විය. සිය ගුප්ත විද්‍යා දැනුම සහ බ්ලැක් මැජික් පිළිබඳ දැනුම ද ඔහු කාන්තාවන් ආකර්ෂණය කිරීමට යොදාගත් බව ප්‍රචලිත ය. වරක් මාකොයිස් ඩි උර්ෆෙ නමැති ආර්යාව, කැසනෝවාගේ පිරිමි ආත්මය සිය කලලයක් තුළට සංක්‍රමණය කරවා දෙන ලෙස ඉල්ලා අති දැවැන්ත මුදලක් ඔහුට ලබාදුන් බව ද සඳහන් ය. වරක් කැසනෝවා පැරීසියේ චීන බඩු සාප්පුවක් ද ආරම්භ කළේ ය. ඔහු එකවර තරුණියන් විසි දෙනකු සේවයට බඳවා ගත් අතර, එසේ බඳවා ගැනීමෙන් පසුව ද දිනපතා ම එකිනෙකා බැගින් නැවත නැවතත් සම්මුඛ පරීක්ෂණවලට ලක් කළේ ය. වැඩි කල් යන්නට මත්තෙන් ව්‍යාපාරය ආගාධයට ගිය ද ඔහුගේ පැරිස් ආදර ජීවිතය නම් නව දියුණුවකට පාත්‍ර විය. නොමසුරු වියදම්කාරයකු වූ කැසනෝවා 1776 දී ඇන්ටෝනියෝ ප්රැටොලිනී යන නාමය යටතේ වැනිසි පාලකයන්ගේ ඔත්තුකාරයකු බවට ද පත්විය. ඒ වන විට ඉලියඩ් කාව්‍ය ඉතාලි බසට පරිවර්තනය කිරීම මගින් ඔහු සැලකිය යුතු කීර්තියක් ද ලබා සිටියේ ය. ජීවිතයේ අවසන් භාගය වන විට ඔහු ජීවත් වූයේ ඇඳුම් මසන්නියක සමඟ ය. ඇය සැබවින් ම ඔහු ට ආදරය කළ අතර එපමණට ම කාරුණික ද වූවා ය. එහෙත් විටින් විට කොහෙන් හෝ රූමතියක් ඔවුන්ගේ ලෝකයට කඩාපාත්වීම වළක්වාලිය නොහැකි විය. අවසානයේ කැසනෝවා ට උපන් ගම පවා විසිය නොහැකි තත්ත්වයක් ඇතිවිය. ඔහු බොහීමියාවට පලා ආවේය. බොහීමියාවේ වෝල්ඩ්ස්ටෙයින් සිටුවරයාගේ වෙළුම් හතළිස් දහසක පොත් සහිත පුස්තකාලය සිය ජීවිතයේ අවසන් කාලය ගත කිරීමට සුදුසු තැන යැයි කැසනෝවා තීරණය කළේ ය. මරණය එන තෙක් ඇඟිලි ගනිමින් සිටි ඔහුට තෘප්තිය ගෙන දුන් එකම එක කටයුත්ත වූයේ සිය අතීතය සිහි කිරීම පමණි.
උපුටා ගැනීම දිනමිණ පුවත් පත
