ලව් ජෙලස්
ඩෙබී වූඩ්, ලොව ඊර්ෂ්‍යා සහගතම ස්ත්‍රිය ලෙස සැලකිය හැකි ද? 42 හැවිරිදි ඇය මේ වන විටත් 30 හැවිරිදි තරුණයකු සමඟ විවාහ ගිවිසගෙන තිබේ. ඇය ඔහුට ඛෙහෙවින් ම ආදරය කරයි. එහෙත්, ස්ටීව් වූඩ් නම් ඔහුට එකී ආදරය දැවැන්ත හිසරදක් බවට පත්ව ඇති බව සත්‍යයකි. මේවන විට ඇය විසින් ඔහුට ටෙලිවිෂන් නැරඹීම, පුවත්පත් හෝ සඟරා කියවීම තහනම් කර තිබේ. එයට හේතුවී ඇත්තේ ටෙලිවිෂනයෙන් හෝ සඟරාවල පෙනී සිටින තරුණියන් දැකීමෙන් ඔහුගේ සිත ඔවුන් කෙරේ ඇදී යාවි යැයි ඇය කල්පනා කරන බැවිනි. ඒ විතරක් ද නොවේ. යම් හෙයකින් ඔහු නිවෙසින් බැහැර ගොස් යළි පැමිණි අවස්ථාවේදී මුසා ග්‍රාහකයක් ඇසුරු කරගෙන ඔහුගෙන් කෙළවරක් නැති ප්‍රශ්න අසමින් ඒවාට ලබාදෙන පිළිතුරු පරීක්ෂා කර බලයි. යම් මානසික විකෘතිතාවකින් පෙළෙන ඇය නිරන්තරයෙන් ඔහුගේ ඊමේල්, ජංගම දුරකථනය, බෑගය, මුදල් පසුම්බිය පරීක්ෂා කර බලයි. එසේ කරනු ලබන්නේ තමන්ගේ අනාගත සැමියා තමාට හොරෙන් අන් කිසිවකු ඇසුරු කරන්නේද යන්න සැකහැර දැන ගැනීමට ය. කිසිදු සාධාරණ හේතුවක් හෝ සාක්ෂියක් සොයාගැනීමට නොහැකි වුව ද ඇයගේ සැකය කිසිසේත්ම දුරුවන බවක් පෙනෙන්නට ද නැත. "කිසිම වගවිභාගයක් හෝ සාධාරණ හේතුවක් නැතිව ඇය මේ තරමට මාව සැක කරන්නේ ඇයි?” ස්ටීව් වූඩ්, අවසානයේ වෛද්‍යවරුන් හමුවී පිළිතුරක් බලාපොරොත්තු වෙයි. ප්‍රශ්න කිරීම් හා පරීක්ෂා කිරීම් කිහිපයකට පසුව වෛද්‍යවරයකු යම් තීරණයකට එළැඹෙයි. ඒ ඩෙබී වූඩ් ඔතෙලෝ සින්ඩ්‍රොම් නමැති මානසික රෝගී තත්ත්වයට භාජනය වී ඇති බවයි. මා සමඟ ඇති වැරැද්ද මොකක්ද කියලා දැන ගැනීම අවසානයේදී මට සහනයක් . ඒත් මං එහිම දිගු ගමනක් යමින් ඉන්නවා. මිනිත්තු පහළොවකට කිරි පනිට්ටුවක් ගැනීමට ස්ටීව් පොප් එළියට ගියත් මං මුසා ග්‍රාහකය සූදානම් කරගෙන ඔහු එනකල් බලාගෙන ඉන්නවා ඩෙබී පවසයි. ඇය එතරම්ම සැක සංකාවෙන් පෙළෙයි. ඔහු සාප්පු සහකාරවරයකු ලෙස ඇහිපිය නොහෙලා බලාගෙන ඉඳීද්දී මං හරියට දුකට පත්වෙනවා. මට ඒ වෙලාවෙම ඇත්ත දැන ගන්න ඕන කරනවා. ඔහු ප්‍රතාපවත් කෙනකු බව මං දන්නවා. ඔහු තනිවම එළියට ගියාම අන් ස්ත්‍රීන් දිහා බලානවද නැද්ද කියන කාරණයට එයම ප්‍රමාණවත් වෙන්නේ නෑ. ඔහු එයාලා ගැන නැවුම් විදිහට හිතනවා දකින්න මට අවශ්‍ය නෑ. ඔබ සම්බන්ධතාවක් පවත්වනවානම් ඔබ ඔබේ සහකරුවා සමඟ සතුටින් ඉන්නේ. ඔබ බැලිය යුත්තේ ඒ පුද්ගලයා දිහා පමණයි ඇය අවධාරණය කරයි. බ්‍රිතාන්‍ය ජාතික ඩෙබී වූඩ් වසර දහයක කාලයක් අමෙරිකා එක්සත් ජනපදයේ ගත කොට යළි මවුබිමට පැමිණියාය. ඒ දීර්ඝ කාලයක් පුරා පැවති ඇයගේ ආදර සබඳතාව බිඳී යමින් ඇගේ ජීවිතය අඳුරු වූවාට පසු ය. ඇගේ රෝගී තත්ත්වයට හේතුව සෙවූ වෛද්‍යවරුන් විසින් අනාවරණය කරගනු ලැබුවේ ද බිඳුණු ප්‍රේමයේ වේදනාව ඇයට හැඟීම්බර ක්ෂිතිමය අත්දැකීමක්ව ඇති බවයි. ඇය යළිත් කිසිදු දිනෙක ආදර සම්බන්ධයක් නොපවත්වන බවට ඇයටම සපථ කොට සිටියාය. මෙලෙස කාලය ගතවෙද්දී ඉකුත් වසරේ ඇයගේ උපන් දේශය වන ස්කොට්ලන්තයේ සිටියදී ඇයගේ මිතුරියක විසින් ෆෙස් බුක් මගින් ස්ටීව් වුඩ් හඳුන්වා දී ඇත. ෆෙස් බුක් මගින් පණිවිඩ කිහිපයක් හුවමාරුවීමෙන් පසු දෙදෙනා තවදුරටත් දැන හැඳීන ගෙන තිබේ. අනතුරුව ඇය ලන්ඩන් සංචාරයක නිරතවන අතරතුරදී දෙදෙනා හමුවීමට තීරණය කර ඇත. තමන්ගේ පළමු හමුවීම ගැන ඇය අදටත් ආදරයෙන් සිහිපත් කරයි. අපගේ පළමු සිපගැනීම ලන්ඩන් පාලම යට සිදුවෙද්දී අප හමුවෙන්නේ යුවළක් වීමට බව මං දැනගෙන හිටියා. මගේ ආදරය බිඳවැටුණාට පසු ආයෙම ආදරය කරන්නේ කොහොමද කියලා මං දැනගෙන හිටියේ නෑ. ඒත් ස්ටීව් මගේ හදවත සොරාගත්තා.. ඇය සැබවින්ම ඔහුට ආදරය කරන වග අමතුවෙන් කිව යුතු නොවේ.
ඒත් ඒ ආදරයට අවිශ්වාසය හා සැකය නිරන්තරයෙන් එකතු වන්නේ කෙසේද? එකම ප්‍රශ්නෙ අපි එකිනෙකාගෙ පදිංචිය දුරයි. අපි අපේ සම්බන්ධය පටන් ගත්තේ සහ සැලසුම් කළේ එකට ඉන්නයි. දුර යන්නයි. ඒත් අපි හමුවූ පළමු දිනේ සිටිම ස්ටීව් වෙන ගැහැනුන් දිහා බලනවා මට දැනිලා තියෙනවා. වෙනත් අය ගැන හිතන්නේ නැති බව ඔහු තහවුරු කර තියෙනවා. ඒත් අපේ දුරස් බව නිසා ඔහු විශ්වාසදායි නැත්දෝ කියලා වෙලාවකට විචිකිච්චාවක් ඇති වෙනවා. මානසික රෝගී තත්ත්වයට අමතරව ඇය බයිපෝලා නමින් හඳුන්වන එකිනෙකට ප්‍රතිවිරෝධී අන්ත දෙකක ස්ථාවර දරන මානසික රෝගී තත්ත්වයෙන් හා සහ සුළු ශරීරික විකෘති තත්ත්වයකින්ද පීඩා විඳීන බවත්, ඒ නිසාම ඇය තමන්ගේ සහකරු දැඩිව පාලනය කරන පිළිවෙතක් අනුගමනය කරන බවත් වෛද්‍යවරුන්ගේ මතයයි. ළමුන් අනවශ්‍ය දේ පරිගණකය හරහා දැකීම වැළැක්වීමට යොදා ගන්නා ෆිල්ටර් උපකරණයක් ඇය විසින් ඔහුගේ ලැප්ටොප් පරිගණකයේ සවිකර ඇත. ඒ ඔහු , පරිගණකය තුළින් තමාට වඩා ප්‍රිය ස්ත්‍රීන් හඳුනා ගැනීම වැළැක්වීමටයි. ටෙලිවිෂනයේ තරුණියන් විසින් ඉදිරිපත් කරන වැඩ සටහන් කිසිවක් නැරඹීම ඔහුට තහනම්ය. එහෙත් නිරන්තරයෙන්ම ඇයට ඔහු ගැන පළවන සැකසංකා දුරකරගත නොහැකිය. තමා අසලම නොසිටින කිනම් හෝ මොහොතක තමාට හොරෙන් ඔහු තරුණියක දෙස බලන්නට ඇත්ද? මෙය ඇගේ හිතට වද දුන් සිතිවිල්ලක් විය. ඇය අවසානයේ එයටද පිළියම් යෙදුවාය. ඊට පස්සේ මං මුසා ග්‍රාහකයක් අන්තර්ජාලය හරහා ඇණවුම් කොට ගෙන්වා ගත්තා. ඒ මගින් ඔහු මං කියන දේ නොඅසා වෙනයම් දේවල් කරනවද කියල දැනගන්න පුළුවන් වුණා. ඇත්තම කියනවානම් එයා වෙනත් ගෑනු ළමයි දිහා බැලුවෙ නෑ කියලා මට මුලදී කීව බොරු කීපයක්ම අල්ල ගන්න පුළුවන් වුණා ඩෙබී කියන්නේ ආඩම්බරයෙනි. ඔතෙලෝ සින්ඩ්‍රොම් නම් මේ මානසික රෝගී තත්ත්වය, මනෝ විශ්ලේෂණ විෂය ක්ෂේත්‍රය තුළ නමක් ලෙස අර්ථ ගැන්වී ඇත්තේ ලෝක පූජිත නාට්‍යකරුවකු වන විලියම් ශෙක්ෂිපියරේගේ ඔතෙලෝ නාට්‍ය ආශ්‍රයෙනි. එහි ඔතෙලෝ තම බිරිය කෙරෙහි පළකරන සැක සංකාව අවසානයේ බිරියට තියුණු ආයුධයකින් පහරදී ඝාතනය කොට තමාද සියදිවි නසාගනියි. සමීක්ෂකයන් පෙන්වාදෙන්නේ මෙවැනි මානසික හේතු නිසා බ්‍රිතාන්‍ය තුළ මේවන විට 15%ක පමණ ප්‍රතිශතයක් තමන්ගේ සම්බන්ධතා තුළ ප්‍රචණ්ඩකාරී ලෙස හැසිරෙන බවයි. කෙසේ වෙතත් ඩෙබී -ස්ටිව් යුවළ එළඹෙන වසරේ විවාහ දිවියට ඇතුළත්වීමට බලාපොරොත්තුවෙන් පසුවෙති. ඩෙබ් මේවන විට වෛද්‍ය ප්‍රතිකාර ගැනීමෙන් සාමාන්‍ය තත්ත්වයට පත්වී ඇත. ඊට සහකරුවා විසින් ලැබුණු සහයත්, තමා නිසි ලෙස අවබෝධ කර ගැනීමත් පිළිබඳ ඇය ඉමහත් සතුටට පත්ව සිටියි. ඒසා සතුටකින්ම සිටින ස්ටිව් වුඩ් තම කටුක අත්දැකීම් පිළිබඳ සිහිපත් කරවයි. සමහර විට මූසා ග්‍රාහකය නහරවලට සවිකළාම ලැඛෙන පිළිතුරු අවිනිශ්චිතයි. මොකද මං ඇයගේ ප්‍රශ්නවලින් හෙම්බත්ව හදවත දෙගෙඩියාවෙන් සිත රිදිලයි ඒ වෙලාවට ඉන්නේ. ඉතිං ලැඛෙන පිළිතුරුවලින් ඇය තවත් සැක ඇතිකර ගන්නවා. ඉතිං ඒ වෙලාවට මං ඇයව රවටන්නේ නැති විත්තිය යාඥා කර කියනවා. සෑහෙන වෙලාවකට පස්සේ ඇය මාව විශ්වාස කරනවා. ස්ටිව් පවසයි. ඩෙබ්-ස්ටිව් යුවළ මේවන විට තම දුර්වලතා හා මානසික රෝගී තත්ත්ව හඳුනා සතුටින් දිවි ගෙවති. එහෙත් තම සහකරු හෝ සහකාරිය කෙරෙහි කිසිදු වග විභාගයකින් තොරව සැක සංකා ඇතිකරගෙන රණ්ඩු දබර කරගන්නා මෙන්ම ඇතැම්විට ජීවිත හානි කරගන්නා බොහෝ පිරිසක් ලෝකයේ සිටිති.
ප්‍රියාන් .ආර් විජේබණ්ඩාර
උපුටා ගැනීම දිනමිණ
