කාමාතුරයන්ගේ පහසු ගොදුර දරුවෝ
අද අපේ රටේ බරපතළ විදියට ලිංගික අපයෝජන වෙනවා. මීට බොහෝ දුරට ගොදුරු වෙන්නේ ළමයි. ඒ නිසා අපි අද කියලා දෙන්න හදන්නේ ඔබේ දරුවා ලිංගික අපයෝජනවලට ලක් වෙන්න තියෙන ඉඩ වැඩියි කියන එක. අපි අපයෝජන වර්ග 4ක් ගැන කතා කළා ඔබට මතක ඇති. ඒ හතරෙන් අපි අද කතා කරන්නේ ලිංගික අපයෝජන කියන එක ගැන. සාමාන්‍යයෙන් ලිංගිකත්වය සම්බන්ධ වැරැදි ඕනෑම සමාජයක තිබෙනවා. ඒත් අපේ රටේ අවාසනාවකට වගේ අහන්න ලැබෙන්නේ කුඩා ළමයි සම්බන්ධ ලිංගික අපයෝජන තත්ත්වයන්මයි. මේක බරපතළ හා ඛේදනීය තත්ත්වයක්. විශේෂයෙන්ම දරුවන් ඉලක්ක කරගෙන ලිංගික අපයෝජන වීම ලොකු ඛේදවාචකයක් වගේම ලොකු හානියක්. ඒ තුළ දරුවට ළමා අවධිය අහිමි වෙනවා වගේම මිනිසකු ලෙස වර්ධනය වෙනකොට අපචාරමය චර්යාවලට යොමු වෙනවා. ඒ නිසා විශේෂයෙන්ම දරුවන් ලිංගික අපයෝජනවලට ලක් වෙන හේතුව හොයා බලලා, තම දරුවන් ඊට ගොදුරු වෙන්න තියෙන ඉඩකඩ ඔබ හඳුනා ගත යුතුයි. ඒවගේම තමයි ඊට ගොදුරුවුණු ළමයකු හඳුනාගන්නත් ඔබට හැකියාවක් තියෙන්න ඕනේ. ඒ වගේම එහෙම ගොදුරක් බවට පත්වුණ ළමයකු ගැන දැනගන්නත් ඔබට හැකියාව තිබිය යුතුයි.
එහෙම වෙන්නෙ ඇයි?
අපි මුලින්ම බලමු ඇයි දරුවන් ලිංගික කටයුතුවලට යොදා ගන්නේ කියලා. එහෙම වෙන්න කරුණු 4ක් තියෙනවා.
- බය කිරීම පහසුයි : දරුවන්ගේ වයස එක්ක ඒ අය කුඩා නිසා ඉක්මනින් බය කරගන්න පුළුවන් තර්ජනය කරලා. ඒ නිසා වැඩිහිටියකුට වඩා ඉක්මනට ඉතාම සුළු දෙයකින් ළව බයකරන්න පුළුවන්. සමහරවිට අම්මා මරනවා, පාසල් යන්න දෙන්නේ නෑ කියලා බය කරගන්න පුළුවන්.
- නොදැනුම්වත්කම : ළමයින් දන්නේ නෑ මේක අපයෝජනයක් කියලා. ඒ නිසා ළමයින්ව රවටන්න පුළුවන්. හුඟක් අපයෝජන වාර්තා නොවෙන්නේ ඒනිසා. වැඩිහිටියකු කළ දෙයක් නිසා ළමයා ඒක වරදක් කියලා හිතන්නේ නෑ.
- පහසු ගොදුරක් : දිගින් දිගටම මේවට දරුවන්ව යොමු කරගන්න පුළුවන්. දරුවා නොදැනුම්වත්වම ඊට ගොදුරක් වෙනවා වගේම ඊට දරුවා පෙලඹෙන්නත් ඉඩ තියෙනවා.
- විකෘති මානසිකත්වය : අනෙක් කරුණ තමයි විකෘති මානසික තත්ත්වයක් තිබෙන අයට වැඩිහිටියන්ව ගොදුරු කරගන්න බෑ. ඒ නිසා ඊට දරුවන් යොදා ගන්නවා.මේ නිසා වැඩිහිටියන්ට ලොකු වගකීමක් තියෙනවා තම දරුවන් රැකගන්න. තමන්ගේ පවුලට සමීප වැඩිහිටියෝ, තමන් ගරු කරන අය හා හුඟක්ම විශ්වාස කරන අය තමයි මේ දේවල් වැඩිපුර කරන්නේ. මවුපියෝ හිතන්නෙත් නෑ එහෙම වෙයි කියලා. මේවා ප්‍රයෝජනයට අරන් තමයි අපයෝජනයට ලක්කරන්නේ. දැන් මේ නිසා ඔබේ සුපරීක්ෂාව වැඩි වෙන්න ඕනේ. ඒ පරිස්සම් වීමේදී මවුපියන් කළ යුතු දෙයක් වගේම ඔබේ දරුවාට ඇති කළ යුතු නිපුණතා රැසකුත් තියෙනවා.
දරුවාට දැනුම දෙන්න :
තමන් හඳුනන කෙනෙක් වුණත් අයුතු යෝජනා කරන්න එනවානම් ඒවා ප්‍රතික්ෂේප කරන්නත් ඔබ (අම්මා, තාත්තා) හැර පිටස්තර අයව හුඟක් සමීප කර නොගන්නත් පිට අයට ඔබේ දරුවගේ ඇඟ අත පත ගාන්න ඉඩ නොදෙන්නත් වගේම එවැනි නොගැළපෙන යෝජනාවකදී කෑගසන්න, ප්‍රතික්ෂේප කරන්න හා එපා කියන්නත් දරුවාට පුරුදු කරවන්න. මේ නිසා දරුවාව ශක්තිමත් කරවීම අත්‍යවශ්‍යයි. ඉන් ඔබට ඔබේ දරුවා අපයෝජනයට ලක් වීම වළක්වන්න පුළුවන්. මවුපියන් විදියට ඔබ එවැනි අයගෙන් නිරතුරුව ඔබේ දරුවා අෑත් කර තබන්න. ඒ වගේම තමයි සෑම පුද්ගලයකුම එසේ නොවුණත් බහුතරයක් පුද්ගලයන් එසේ වන බව දැනගත යුතුයි. අද හුඟක්ම ළමා අපයෝජනයන් වෙන්නේ ඔබ හුඟක්ම විශ්වාස කර ඔබේ ළමයින්ව භාර දෙන අයගෙන්. ගුරු, විදුහල්පතිවරු වගේම පූජ්‍ය පක්ෂයේ අයත් ඉන්නවා. මේක හරිම භයානකයි.
අපයෝජනය වූ දරුවා :
ඊළඟට ඔබ දැනගන්න ඕනේ අපයෝජනයකට ලක්වුණු දරුවකු හඳුනාගන්නා අයුරු. හුඟක් ළමයි තමන්ට අපයෝජනයක් වුණාම ඒක කිසි කෙනකුට නොකියා තමන්ම විඳගන්නවා. තමන්ට තියෙන ලැජ්ජාව, බය විතරක් නෙවෙයි තවත් මානසික හේතු ගණනාවක් නිසා ළමයා ඒ දේ ගිලගන්නවා. කිසි කෙනකුට කියන්න එයාට ශක්තියක් නැතිව යනවා. එතෙන්දි දරුවාගේ ආත්ම අභිමානය බිඳ වැටෙනවා. නැතිවෙනවා. දරුවට යාළුවෝ එක්ක සබඳතා පවත්වන්න බැරි වෙනවා. තවත් එවැනි අපයෝජනයන්ගේ ගොදුරක් බවට ළමයා පත්වෙනවා. මේ නිසා දරුවන්ට වෙනත් හදිසි ආවේග ඇති වෙන්න පුළුවන්. ළමයා ලිංගිකත්වයට නැඹුරු චර්යාවලට යොමු වෙනවා. අසභ්‍ය පොත පත බලන්න යොමු වෙනවා. ලිංගිකත්වයට අදාළ වචන විහිළු කරන්න වගේම ප්‍රචණ්ඩත්වයටත් අපරාධ කරන්නත් යොමු වෙනවා. ඒ හැඟීම් ආක්‍රමණ දක්වා වර්ධනය වෙන්න පුළුවන්. ඒ අය දිගින් දිගටම ගිහින් ළමා අපයෝජකයන් බවට පත්වෙන්න පුළුවන්.
ශරීරයේ තුවාල :
මේ දරුවන්ගේ ලිංගික අවයවවල තුවාල තියෙන්න පුළුවන්. දරුවාට ලිංගික රෝග ඇතිවෙන්න පුළුවන්. ළමයා ගැහැනු දරුවකුනම් ගැබ් ගන්නත් ඉඩ තිබෙනවා. ඒත් ඒක ළමයා දන්නෙත් නැහැ. අන්තිම වෙනකම්. මේ වගේ තත්ත්වයන්, හැසිරීම් තිබෙනවානම් ඔබේ දරුවා ගැන ඉක්මනින් කටයුතු කරන්න ඕනේ. ඔබ ඒ ගැන සැලකිලිමත් වෙන්න ඕනේ.. දරුවා ලිංගික අපයෝජනයට ලක්වෙලාද කියලා දැනගන්න ඔබට ඉවක් තිබිය යුතුයි.
වසන්ත හේරත්, සම්බන්ධීකරණ නිලධාරි අධ්‍යාපන දෙපාර්තමේන්තුව වයඹ
උපුටා ගැනීම මව්බිම
