නිල් චිත්‍රපටි බලන්න වැඩි පිරිසක් ඇබ්බැහි වන්නේ සමාජයේ ලිංගික තහංචි වැඩි නිසා ද?
නිරුවත් දසුන් සහ ලිංගික ජවනිකා රැගත් වීඩියෝ දර්ශන නරඹන පිරිස් ප්‍රමාණාත්මකව ඉහළ යෑම අද වන විට පුළුල් සමාජ ප්‍රශ්නයක්ව පවතින බව අමුතුවෙන් කිව යුතු නොවේ. කලකට ඉහත VHS, CD සහ DVD ඔස්සේ සමාජයට කාන්දු වූ මෙවැනි වීඩියෝ දර්ශන අන්තර්ජාලයේ පැමිණීමත් සමග වඩාත් පහසුවෙන් නැරඹීමේ අවස්ථාව උදා වී තිබේ. 2013 වසර නිම වන විට අන්තර්ජාලය ඔස්සේ නිරුවත හා ලිංගිකත්වයට අදාළ වෙඩ් අඩවිවලට වැඩිපුරම පිවිස ඇත්තේ ශ්‍රී ලාංකිකයන් බවත්, එහි වඩාත් විමසුම් ඉදිරිපත් වූ ප්‍රදේශය බවට නුගේගොඩ ප්‍රදේශය පත්ව ඇති බවත් වාර්තා විය. උපකාරක පන්ති සඳහා පාසල් සිසුන් දහස් ගණන් රැස්වන නුගේගොඩ වැනි නගරයක් මෙවැනි තත්ත්වයකට පත්වීම සැලකිය යුතු අවධානයක් යොමුවිය යුතු තත්ත්වයකි. කොතරම් සංස්කෘතික වාරණ පැනවී තිබුණද අසම්මත මාර්ග ඔස්සේ ලිංගිකාස්වාදය සොයා යන්නන් ප්‍රමාණාත්මකව අඩුවී නැති බව ඉන් වටහා ගත හැක. අන්තර්ජාලය ඔස්සේ ලිංගිකත්වය සහ නිරුවත හඹා යන්නන් මානසික රෝගීන් ලෙස ඇතැමුන් හඳුන්වා දුන්නද එය එතරම් දුරට නිවැරදි නොවේ. ශ්‍රී ජයවර්ධනපුර විශ්ව විද්‍යාලයේ ප්‍රධාන වෛද්‍ය නිලධාරී වෛද්‍ය ශාන්ත හෙට්ටිආරච්චි මහතා පවසන ආකාරයට ලිංගිකත්වය සහ ඊට අදාළ තොරතුරු සොයා යෑම මානසික රෝගයක් නොවේ. එය මිනිසුන් තුළ ස්වභාවයෙන්ම සැඟව ඇති කුතුහලය මතුකර පෙන්වන්නකි. එමෙන්ම ලිංගිකත්වය යනු මානව අවශ්‍යතාවකි. එය තහනම් කළ යුත්තක් හෝ පාප ක්‍රියාවක් හෝ අපරාධයක් හෝ නොවේ. අන්තර්ජාලයෙන් ලිංගික දසුන් නරඹන ප්‍රමාණය වේගයෙන් ඉහළ යෑමට මිනිසා තුළ (විශේෂයෙන් යෞවනයන් තුළ) හට ගන්නා ලිංගික කුතුහලය හේතුවෙයි. වෛද්‍ය හෙට්ටිආරච්චි පෙන්වා දෙන ආකාරයට මෙහි වඩාත් බියකරු ගැටලුව වනුයේ එවැනි දසුන් නැරඹීම නොව එම දර්ශනවලින් ඉදිරිපත්වන දේ සත්‍ය බවට වරදවා වටහා ගැනීමයි. අන්තර්ජාලයේ පළවන වීඩියෝ දසුන් සහ චිත්‍රපට බොහොමයක් අතිශයින් විකෘති කරන ලද ඒවාය. ඊට අමතරව ඒවා සංස්කරණ උපක්‍රම මගින්, හැඟීම් වඩාත් ඇවිස්සෙන ආකාරයෙන් ප්‍රති නිර්මාණය කරන ලද ඒවා බවද සැක නැත. මෙවැනි විකෘති දසුන් සත්‍ය තත්ත්වයන් සේ වැරදි ලෙස වටහා ගනිමින් එමගින් ලිංගිකත්වය ගැන ඉගෙන ගන්නා තරුණ පරපුර අවසානයේ නතර වනුයේ ඉතා බරපතළ තැනක බව වෛද්‍ය හෙට්ටිආරච්චි පෙන්වා දෙයි.
“මෙවැනි දසුන් සහිත වීඩියෝ දර්ශන සහ වබේ අඩවිවලින් දරුවන් ආරක්ෂා කර ගැනීමට ඇති හොඳම ක්‍රමය ඔවුන්ට නිසි පරිදි ලිංගික දැනුම ලබා දීමයි. මෙය ඇරඹිය යුත්තේ පාසලෙන් නොව නිවසේ සිටමය කියන එකයි මගේ නම් අදහස. එහෙත් අපේ වැඩිහිටියන්ට සහ තරුණ වියේ පසුවන දෙමාපියන්ට පවා ප්‍රමාණවත් ලිංගික දැනුමක් නොතිබිම නිසාත් ඔවුන් දන්නා දෙය පවා දරුවන්ට පහදා දීමට නොහැකි තත්ත්වයක් පැවතීම නිසාත් තමයි තත්ත්වය මේ තරම් දුරදිග ගිහින් තියෙන්නෙ. පාසල් පෙළ පොතේ ලිංගික කරුණු යම් තරමකින් සාකච්ඡා කරන බව ඇත්ත. එහෙත් ඇතැම් ගුරුවරුන් පවා පෙළ පොතේ එන කරුණු සිසු සිසුවියනට පහදා දීමට මැලිවීම කනගාටුදායක තත්ත්වයක්. සංස්කෘතික වශයෙන් ලිංගිකත්වය ගැන අපේ රටේ තියෙන ආකල්ප නිසා මෙවැනි කරුණු සාකච්ඡා කිරීමට මැලිකමක්, ලජ්ජාශීලී බවක් අප අතර තිබෙනවා. ඒ අනුව කළයුතු හොඳම දෙය ලිංගිකත්වය යනු රහසේ මුළුගැන්වී කතා කළ යුතු දෙයක් නොවන බවට සමාජ මතයක් ගොඩ නැගීමයි.” වෛද්‍ය හෙට්ටිආරච්චි පවසයි. මෙවැනි ලිංගික දර්ශන ආදිය නැරඹීමෙන් ඇති විය හැකි නරක බලපෑම අවම කළ හැක්කේ එවැනි නිසි අධ්‍යාපන ක්‍රියාවලියකින්ය යන්න ඔහුගේ අදහසයි.
මෙවැනි ලිංගික දසුන් නැරඹීම මගින් කිසියම් මානසික සහනයක් කෙනෙකුට ලැබිය හැකිදැයි ස්ථීරව පැවසිය නොහැකි නමුත් කුතුහලය සංසිඳවා ගැනීමට වේවා නරඹන කෙනෙකු තවත් වරක් එසේ කිරීමට පෙළඹිය හැකි බව ඔහු සඳහන් කරයි. එබැවින් යම් ඇබ්බැහි වීමක් මෙවැනි දේ කෙරෙහි ඇතිවිය හැක. බාල පරපුරේ ලිංගික ගැටලු විසඳා ගැනීමට අන්තර්ජාලයට වඩා හොඳ සගයෙකු ඔවුනට අධ්‍යාපන ක්‍රමය තුළින් සොයා දීම වැඩිහිටියන්ගේ වගකීම වෙයි. ඊට සුදුසු පසුබිම සැකසීමේදී ලිංගික කුතුහලය යනු අපරාධයක් නොවන බව වටහා ගැනීම මෙන්ම නිසි වයසේදී සිරුර තුළ සිදුවන හෝමෝන වෙනස්කම් නිසා විරුද්ධ ලිංගිකයන් සහ ලිංගික ක්‍රියා පිළිබඳ සක්‍රීය උනන්දුවක් ඇති වීම අතිශය ස්වාභාවික ක්‍රියාවක් බව වටහා ගැනීමද වැදගත් බව වෛද්‍ය ශාන්ත හෙට්ටිආරච්චි අවධාරණය කරයි. ජාතික ළමා ආරක්ෂක අධිකාරියේ හිටපු සභාපතිවරයෙකු මෙන්ම සමාජ විද්‍යාඥයකුද වන ජගත් වැල්ලවත්ත මහතාද මේ විෂය පිළිබඳ බොහෝ කරුණු හදාරා ඇති විද්වතෙකි. ඔහු පවසන පරිදි ලිංගික ක්‍රියාකාරකම් සහිත අන්තර්ජාල දසුන් නරඹන පිරිස ඉහළ යෑමට හේතු ගණනාවක් වෙයි. ලිංගිකත්වය යනු බොහෝ යුරෝපීය රටවල් වෙළඳ භාණ්ඩයක් කර ගැනීම සහ ශ්‍රී ලංකාව වැනි රටවල් ඊට හොඳ වෙළඳ‍පොළක් වීම මෙම තත්ත්වයට ප්‍රධාන හේතුවකි. ඊට අමතරව වත්මන් තරුණ පරපුර තුළ ලිංගිකත්වය ගැන ඇති අඩු දැනුම නිසාද ලාංකික පරපුර නිල් චිත්‍රපටවලට ගොදුරු වී තිබේ. නව යොවුන් වියේ පසුවන තරුණ තරුණියන් තුළ ස්වභාවිකව ජනිත වන ලිංගික කුතුහලය සංසිඳවා ගැනීමට සම්මත ක්‍රමවේදයක් සමාජයේ නොමැති බැවින් අන්තර්ජාලය ඔස්සේ අසම්මත අයුරින් ඔවුන් තම කුතුහලය නිවා ගැනීමට යෑම වර්තමානයේ සුලභව දක්නට ලැබෙන බව ඔහු පෙන්වා දෙයි. ලාංකීය තරුණ පරපුරට ගැටලුවක් වී ඇති ලිංගික දැනුම අඩුකමෙන් ප්‍රයෝජන ගන්නට ඉදිරිපත් වූයේ අන්තර්ජාලය පමණක් නොවේ. කලකට පෙර විවෘත ආර්ථිකය රටට හඳුන්වා දුන් මුල් අවධියේ ලිංගික ප්‍රකාශන යැයි කියා ගත් සිංහලෙන් මුද්‍රිත අසැබි පුවත්පත් විශාල ප්‍රමාණයක් සමාජ ගත විය. ලිංගික ක්‍රියා පිළිබඳ හිරිකිත ස්වරූපයෙන් පළවූ එවැනි පුවත්පත් මගින්ද විශාල ගැටලු මතුවිය. එහෙත් එවැනි පුවත්පත් බිහිවීමට හේතුව කිසිවෙකුත් නිවැරදිව වටහා නොගත් බැවින් එම පුවත්පත් යටපත් කරමින් අන්තර්ජාලය තරුණ පරපුර ආක්‍රමණය කළ බව නොරහසකි. අද වන තුරුත් සමාජයේ ලිංගික දැනුවත් බව පිළිබඳ ඇති හිස්තැන නිවැරදිව පුරවා නැති බැවින් ඉදිරියේදී තවත් ගැටලු ඇතිවිය හැකිය යන්න ජගත් වැල්ලවත්තගේ අදහසයි. මීට පිළියම ලෙස අන්තර්ජාල වබේ අඩවි තහනම් කිරීම වැනි ක්‍රියා මාර්ග ඇතමුන් යෝජනා කළද එය ප්‍රායෝගික නොවන බව ඔහුගේ විශ්වාසයයි. එහෙත් අන්තර්ජාලයේ ඇතැම් පිවිසුම් සඳහා දැනට ඇති පහසු සහ නොමි‍ලේ ප්‍රවිශ්ට වීමට ඇති ඉඩකඩ අසුරා දැමීම වැනි ක්‍රියා මාර්ග ගැනීමට අපට හැකි බවද ඔහු පෙන්වා දෙයි. නමුත් මෙම ගැටලුවලට හොඳම විසඳුමක් ඇත්තේ ගෘහ ජීවිතය තුළ බව ජගත් වැල්ලවත්තගේ අදහසයි. දෙමාපියන් තම දරුවන්ට නිසි පරිදි ආදරය, කරුණාව දක්වන්නේ නම් මෙවැනි ගැටලු වඩාත් පහසුවෙන් අවම කරගත හැකි බව ඔහු සඳහන් කරයි. ලෝකය එකවර නිවැරදි කිරීමට උත්සාහ ගැනීම කිසිසේත් ප්‍රායෝගික නොවන මුත් ඔබේ නිවසේ සිටිනා දරුවන් යහමගට ගැනීමට උත්සාහ ගැනීමෙන් ඔබට සාර්ථක ප්‍රථිපල ලබා ගත හැකි බවත්, දරුවන්ගේ ලෝකවලට යම් යම් අනිසි දේ ඇතුළු වීමට ඇති ඉඩකඩ වසා දමමින් ඔබේ සෙනෙහසින් ඔවුන්ගේ ලෝකය පුරවාලීම මෙවැනි දුසිරිත්වලින් දරුවන් රැක ගැනීමට ඇති හොඳම මාර්ගයක් බවත් ඔහු අවධාරණය කරයි.
ශ්‍රී ලංකාව වැනි ආසියානු රටවල ශීඝ්‍රයෙන් පැතිර යන නිරුවත් සහ ලිංගික ක්‍රියා සහිත වීඩියෝ දර්ශන බටහිර රටවලදී එතරම් ආකර්ෂණයකට ලක් නොවේ. මෙයට එක් හේතුවක් ලෙස බටහිර රටවල දරුවන්ට විධිමත් ලිංගික අධ්‍යාපනයක් ලබා දීමට ඇති උනන්දුව වැනි සාධක දැක්විය හැකිය. එහෙත් ශ්‍රී ලංකාව වැනි රටවල ලිංගිකත්වයට පනවා ඇති වාරණයන් හා තහංචි ආදිය නිසා ඉහවහා යන ලිංගික කුතුහලය හා ලිංගික පීඩනය ලොව පුරා පවතින කාම චිත්‍රපට හා විඩියෝ කර්මාන්තයට කදිම ආයෝජනයක් බවට පත්ව ඇති බව විද්වත්හු පෙන්වා දෙති. මෙම කාම ප්‍රකාශන කර්මාන්තය අද වන විට වාර්ෂිකව ඇමෙරිකානු ඩොලර් මිලියන 1000ක පිරිවැටුමක් සහිත කර්මාන්තයක් බවට පත්ව තිබේ. මෙම කර්මාන්තය උදෙසාම වෙන්වුන නළු නිළියන්, අධ්‍යක්ෂවරයන් විශාල ප්‍රමාණයක් බිහිවී ඇති අතර මෙවැනි නිර්මාණ සඳහා දායක වන ශිල්පීන්ට සම්මාන ප්‍රදානය කරන සම්මාන උළෙලවල් පවා පැවැත්වෙයි. පසුගිය වසරේ ඇමෙරිකාවේ පැවති 30 ඒව් සම්මාන උළෙල ඊට හොඳ නිදසුනකි. හොලිවුඩ් සහ බොලිවුඩ් නළු නිළියන් පරදා ආදායම් උපයන මෙම නළු නිළියන් ලොව පුරා වේගයෙන් බිහි වෙමින් පවතින බවද වාර්තා වෙයි.
උපුටා ගැනීම ලක්බිම
