සැමියාට පණසේ සැලකුවත් ඔහුගේ හීනමානය නිසා පීඩා විඳි ගැහැණියක්...
මාධවී, ළහිරු එක්ක ප්‍රේම සම්බන්ධයක් ගොඩ නගා ගත්තෙ ඉස්කෝලෙ යන කාලෙදී. ළහිරු ඒ වන විටත් තමන්ගේම පුංචි ව්‍යාපාරයක් කරගෙන යමින් හිටියෙ. මාධවීලට ඒ තරම් වත්කමක් තිබුණේ නෑ. මාධවීගේ තාත්තා පෞද්ගලික ආයතනයක රියැදුරු රැකියාවක් කළේ. අයියයි අක්කයි දෙන්නාත් සුළු රැකියාවක් කරපු නිසා ඔවුන්ට ගෙදර දොර බරට උරදෙන්න වැඩි හැකියාවක් තිබුණේ නෑ. මාධවීගෙ මල්ලිත් අධ්‍යාපනය ලබමින් හිටියෙ. උසස් පෙළින් පස්සෙ තොරතුරු තාක්ෂණය පිළිබඳව උසස් පාඨමාලාවක් හදාරන්න මාධවීගේ හිතේ ලොකු කැමැත්තක් තිබුණත් ඒ වෙනුවෙන් රුපියල් ලක්ෂ කීපයක් වැය කරන එක මාධවීගේ තාත්තාට නම් සිහිනයක් විතරක් වුණා. ඊට පස්සේ මාධවීගේ අධ්‍යාපනයෙ බර කරට ගත්තෙ ළහිරු. සාමාන්‍ය පෙළ යන්තමට සමත් වෙලා අධ්‍යාපනය අත හැර දමල ව්‍යාපාර පැත්තට යොමු වුණු ළහිරු කවදා හරි තමන් විවාහ කර ගන්නා තරුණිය උසස් අධ්‍යාපනය ලබපු ඉංග්‍රීසි කතා කළ හැකි අයකු වනු දැකීමට කැමැත්තෙන් පසු වුණා. මාධවීගෙ අධ්‍යාපන කටයුතුවලට විතරක් නමෛයි ඇඳුම් පැළඳුම්වලට පවා ළහිරු විශාල වශයෙන් මුදල් වැය කළා. මේ හැම දෙයක්ම කළේ ඔහුගේ දෙමාපියන්ට නොදැනෙන්නටයි. තමන්ට ආදරය කරන, තමන් වෙනුවෙන් අසීමිත විදිහට මුදල් වියපැහැදම් කරන ළහිරුට මාධවී ද්‍රෝහි වුණේ නෑ. බලවත් උත්සාහයෙන් අධ්‍යාපන කටයුතු කළ මාධවී තොරතුරු තාක්ෂණික උපාධිධාරිනියක් වුණා. ඉන් පසු මාධවීට පෞද්ගලික ආයතනයක ඉතා ඉහළ වැටුපකට රැකියාවක් ලැබුණා. ඊටත් ටික කාලෙකට පස්සෙ ළහිරුගෙයි මාධවීගෙයි විවාහය සිදුවුණා. මාධවී කසාද බැන්දෙ සාමාන්‍ය සිල්ලර කඩයක් කරන කෙනෙක්ව බව දැන ගත්තම මාධවි වැඩ කරන ආයතනයෙ අයට පුදුමයි. මූණට නොකිව්වත් ඒ අය “වහෙන් ඔරෝ” කිව්වෙ “ළහිරු මාධවීට කොහෙත්ම ගැළපෙන කෙනෙක් නෙමේ” කියන එකයි. ඒත් තමාට මේ තැනට එන්න අත දුන්නෙ ළහිරු බව ඒ වෙලාවේ ඒ අයට පැහැදිලි කරල දෙන්න මාධවීගෙ දිව නැමුණේ නෑ. ඒ මදිකමට නමෛයි. තමන් දිළිඳු පවුලක කෙනෙක් බව කිව්වොත් ඒ අය තමන්ව කොන් කරයි කියලයි.
තමන්ගෙයි ළහිරුගෙයි ලොකු වෙනසක් මාධවීටත් පෙනුණා. මාධවීට ඇසුරු කරන්න වුණේ ඉංග්‍රීසි කතා කරන සමාජය. ඒත් ළහිරුට ඉංග්‍රීසි කතා කිරීමේ හැකියාවක් තිබුණේ නෑ. මේ හින්ද මුලදී මාධවී එක්ක විවිධ උත්සවවලට සහභාගි වුණු ළහිරු තමන් ඒ තැන්වලදී කොන් වෙන බව තේරුම් ගත්තට පස්සෙ හිතා මතාම මාධවී ඇසුරු කරන සමාජය මග ඇරියා. හැම තැනකටම තමන්ගේ වාහනය පැදගෙන මාධවී ගියේ තනිවමයි. මාධවීට ඉහළට ඉගෙන ගන්න අත දීමෙන් තමන් තමන්ටම විශාල අවැඩක් කර ගත්තු බවක් ළහිරුට හිතෙන්නට වුණා. මාධවී කිසිම විදිහකින් තමා ඉදිරියෙ කිසිම ලොකුකමක් පෙන්නුවේ නැති වුණත් ඇය ඉස්සර වගේම තමන්ට සලකන බව පෙණුනත් කොයි මෙහොතක හෝ ඇය වෙනස් වෙයි කියන බය ළහිරුගේ හිතට වද දෙන්න පටන් ගත්තා. රැකියාවෙන් ඉවත් වෙන්න කියලා මාධවීට කියන්න ළහිරුට වුවමනාව තිබුණා. ඒත් මාධවී ඒක නොකරන බව ළහිරු දැන සිටියා. ඒ වගේම ඇගේ රැකියාව නිස ළහිරුගේ පාර්ශ්වයේ අයගෙන් ළහිරුට ලොකු පිළිගැනීමක් තිබුණා. ඒක ඔහුගේ ජීවිතයට ආලෝකයක් වුණා. ඒක නැති වෙනවටත් ළහිරුගෙ කැමැත්තක් තිබුණේ නෑ. මොනව වුණත් ඒ වන විට ඔවුන්ගේ නිවසේ පදිංචිව සිටි මාධවීගේ මව්පියන් දෙන්නා නම් ළහිරුට හුඟක් හොඳට සැලකුවා. මාධවීට හැම වාසනාවක්ම ගෙනාවේ ළහිරු බව ඒ දෙන්නා අමතක කළේ නෑ. විවාහ වෙලා වසර හතරක් යනකොට මාධවී දෙදරු මවක්. ඒ දරුවන් දෙන්නව බලා ගත්තේ මාධවීගේ අම්මයි තාත්තයි. මාධවීට රාජකාරි වැඩකට සිංගප්පූරුවට යන්න අවස්ථාව උදා වුණේ ඔය අතරතුරදීයි. මේ ගමනට මාධවී ළහිරුව කැඳවා ගන්න උත්සාහ කළත් ළහිරු මුලදී ඒකට අදිමදි කළා. ඒත් මේ ගමන මාධවී යා යුතුම එකක් වුණු නිසා ඇය තනියම යවන්න බැරිකමට ළහිරුත් ඒකට සම්බන්ධ වුණා. මාධවීගේ කාර්යාලයේ තවත් උසස් නිලධාරියෙක් සහ ඔහුගෙ බිරිඳත් මේ ගමනට එකතු වෙලා හිටියා. ඒ අයත් එක්ක ඉන්න කොට ළහිරුට හිතුනෙ තමන් ඔවුන්ට කිසිසේත්ම ගැළපෙන්නෙ නෑ කියලයි. එක වතාවකදී මාධවී සමග ගිය අනිත් පිරිමි කෙනාගෙ බිරිඳ ළහිරු සමග ඉංග්‍රීසි භාෂාවෙන් කතා කළා ඒ වෙලාවේ මාධවී ඉක්මනට ඉදිරිපත් වෙලා. ඒ වෙනුවෙන් පිළිතුරු දුන්නෙ තමන්ට වගේම මාධවීට වෙන මදිපුංචිකමෙනුත් වළක්වා ගන්න බව ළහිරුට වැටහුණා. ඒ ගමන ගිහින් ආවට පස්සෙ මාධවීට ඕන වුණා ළහිරුව ඉංග්‍රීසි පන්තියකට යවලා ඉංග්‍රීසි කතා කරන්න උගන්වන්න. ඒත් ළහිරු ඒ ඉල්ලීම තරයේම ප්‍රතික්‍ෂේප කළා. “කූඩැල්ලා මෙට්ටෙ උඩට ගන්න බෑ” කියනව වගේ ළහිරුවත් කවදාවත් තමාගේ සමාජයට එකතු කර ගන්න බැරි බව මාධවීට හොඳින්ම පැහැදිලි වුණා. ඒනිසා මාධවී නිශ්ශබ්ද වුණා. ඒත් එන්න එන්නම ළහිරු මාධවීව සැක කරන්න පටන් ගත්තා. ඒවට හේතු තිබුණේ නෑ. හැම දෙයක්ම ළහිරුගෙ අනුමාන සහ සිහිනයි. මේ නිසා මුලින් සුළු සුළුවෙන් ඇති වුණු නොහොඳ නෝක්කාඩුකම් ලොකු දබර බවට පත්වූයේ කෙටි කාලයක් තුළදීමයි. ළහිරුගෙ මානසික තත්ත්වය හොඳින්ම හඳුනා ගෙන සිටි මාධවී, ළහිරු තමන් එක්ක කේන්තියෙන් ඉන්නේ ඇයි කියන එක ගැන අවබෝධයෙන් හිටියෙ. ඒ නිසාම ළහිරු එක්ක දබරවලට පැටලෙන්නෙ නැතිව ඉන්න උත්සාහ කළත් තමන්ගෙ පවුල් ජීවිතය තුළ මාධවී විශාල මානසික පීඩනයකට ලක්වී සිටියා. මාධවී එක්ක අනියම් සම්බන්ධතා ඇති කර ගන්න කැමැත්තෙන් හිටපු අයත් ඕනෙ තරම්. ඒත් මාධවී ඒ කිසි දේකට නැමුණේ නෑ. එහෙම හොඳින් හිටියා කියලා ළහිරුගෙන් ලැබුණු සහනයකුත් නෑ. අන්තිමේ මාධවී විශාද රෝගියෙක් බවට පත් වුණා. ඇය තවමත් විශාදයට මනෝ වෛද්‍ය ඖෂධ ප්‍රතිකාර ගන්නවා. ඒත් ළහිරු කිසිම ප්‍රතිකාරයක් නොගන්නා නිසා ළහිරුගෙ සැකය එහෙම්මයි. තමන් කර ගත්තේ නොගැළපෙන විවාහයක්ද කියලා මාධවීට තවමත් හිතා ගන්න බෑ. මේ තත්ත්වයට තමන් ආවෙ ළහිරු නිසයි. එහෙම නම් ළහිරු නොගැළෙපෙනවා කියලා හිතන්නේ කොහොමද? ඒ ප්‍රශ්නයට මාධවීට පිළිතුරු නෑ.
උපුටා ගැනීම ලක්බිම
