පේස් බුක් හරහා පෙම්වතාට නිරුවත් ඡායාරූප යැවූ පෙම්වතියට සිදු වූ ඇබැද්දිය....
දැන ගියොත් කතරගම නොදැන ගියොත් අතරමග යැයි කතාවක් තිබේ.මුහුණු පොත නැතිනම් ෆේස්බුක් ගැනද සඳහන් කරන්නට ඇත්තේ මේ කතාවමය.මේ වනවිට ලෝකයේ ජනප්‍රියතම සමාජ වබේ අඩවිය බවට පත්ව තිබෙන්නේද ෆේස්බුක්ය. ෆේස්බුක් ගිණුමක් නොමැති පුද්ගලයෙකු සොයා ගන්නවා යනු නොමල ගෙදරකින් අබ මිටක් සොයා ගන්නවා බඳු අසීරු කටයුත්තකි. ඒ තරමටම ෆේස්බුක් උන්මාදය අද සමාජය ගිලගෙන හමාරය. නවීන තාක්ෂණයේ අපූරු සොයා ගැනීමක් ලෙස සැලකිය හැකි ෆේස් බුක් වැනි සමාජ වබේ අඩවි ඇතැම් අවස්ථාවල හිසරදයක් බවට පත් වන අවස්ථාද නැතුවා නොවේ. ඇතැම් රටවල ෆේස් බුක් තහනම් කිරීම් හෝ අවහිර කිරීම් පවා ක්‍රියාත්මක වන්නේ එබැවිනි.
තුන්වැනි ලෝකයේ රටක් වන ශ්‍රී ලංකාවේද පසුගියදා ෆේස් බුක් තහනමක් ගැන කසුකුසුවක් පැතිරුණු බව අපි දනිමු. ඒ වෙන කිසිවක් නිසා නොව, හරිහැටි අවබෝධයකින් තොරව ෆේස් බුක් භාවිතා කරන්නට ගොස් අමාරුවේ වැටෙන්නන්ගේ ගොඩ දිනෙන් දින වැඩිවීමට පටන්ගෙන ඇති බැවිනි. ෆේස්බුක් මුල් කරගත් සිදුවීම් හේතුවෙන් මේ වන විට ලංකාවේ වාර්තා වී ඇති මරණ ගණන හතරකි. වෙනත් අකටයුතුකම් මතෛකැයි සඳහන් කරන්නට බැරි තරම්ය. ෆේස්බුක් සම්බන්ධයෙන් දැනගෙන ගියොත් කතරගම නොදැන ගියොත් අතරමගපැරණි කියමන ගැළපෙන්නේ ඒ හේතුවෙනි. එසේ නොදැන ගොස් අතරමංවූ ෆේස්බුක් සමාජ ජාලයේ සාමාජිකයන්ගේ ගොඩට අලුතින්ම එක්වන්නේ බැංකු සේවිකාවකි. තවමත් විසි හතර වැනි වියේ පසුවන ඇය ග‍ලේවෙල පැත්තේය. ඇය අමාරුවේ වැටෙන්නේ ෆේස්බුක් මගින් දැන හඳුනාගත් දහනව වියැති පෙම්වතා නිසාය. ඒ ලොවක් ඉදිරියේ ෆේස්බුක් හරහා ඔහු ඇයව නිරුවත් කරන්නට වූ බැවිනි. මෙහි කතා නායිකාවගේ පියා වෘත්තියෙන් රියැදුරෙකි. මව ගෘහණියකි. මේ දෙදෙනා ඇයව උස් මහත් කරන්නේ අනාගත බලා‍පොරොත්තු රැසක් පොදි බැඳගෙනය. ඒ ඇය ඒ පවු‍ලේ එකම දරුවා වූ බැවිනි. දෙමාපියන්ගේ ඒ බලා‍පොරොත්තු ඇය කිසිවිටෙකත් කඩ නොකළාය. පාසල් කාලයේ අධ්‍යාපන කටයුතුවලට මුල්තැන දුන් ඇය උසස් අධ්‍යාපනයෙන්ද දස්කම් පෑවාය. බැංකු සේවිකාවක් ලෙස පත්වීමක් ලබන්නට ඇය වාසනාවන්ත වන්නේ දෙමාපියන්ගේ බලා පොරොත්තුද මල්ඵල ගන්වමිනි. දහනව හැවරිදි පෙම්වතාව ඇයට මුණ ගැසෙන්නේ බැංකු සේවිකාවක් ලෙස ඇය රැකියාව ලද මුල් කාලයේදීමය. ඒ මෙයට මාස දහයකට පමණ ඉහතදීය. තමන් අතවූ ජංගම දුරකථනයෙන් ෆේස්බුක් මිතුරන් සමග සම්බන්ධකම් පවත්වමින් සිටියදී අහඹු ලෙස ඇයට මුණ ගැසෙන එම පෙම්වතා රත්නපුරයේ මැණික් ව්‍යාපාරිකයෙකුගේ පුතෙකි. මුලින් ඔහු සමග සම්බන්ධකම් ඇතිකරගන්නේ මිතුරෙකු ලෙසිනි. නමුත් කාලයක් ෆේස්බුක් හරහා සිදු වුණු ආශ්‍රයෙන් පසු ඔහු ඇගේ පෙම්වතා බවට පත් විය. ඇය ඒ තරුණයා සමග ආදර සම්බන්ධය ගොඩනගා ගන්නේ ඔහු තමාට වඩා අවුරුදු පහක් වයසින් බාල බව දැනගෙනමය. පාසල් කාලයේදී අධ්‍යාපනයටම පමණක් හිත යොමුකර තිබිම හේතුවෙන් පිරිමි මිතුරන් ඇසුරු නොකළ ඇයට මේ ලද ෆේස්බුක් පෙම්වතා දුර්ලභ සම්පතක් වන්නට ඇත. දෙදෙනා ෆේස්බුක් මගින් මුණ ගැසී මාසයක් හමාරක් යන්නටත් පෙර එකිනෙකා මුණ ගැසුණෝය. තනිවී පෙම්බස් දෙඩුවෝය. හය හත් සැරයක්ම රාත්‍රි කාලයේ ඇගේ කාමරයට ද ඔහු රිංගා ඇති බව සඳහන්ය. ඒ රත්නපුරයේ සිට ග‍ලේවෙලට පැමිණය. අනාවරණය වී ඇති ආකාරයට අනුව, ඔය අතරතුර ෆේස්බුක් පෙම්වතාගේ ඇවිටිල්ල මත ඇය තම ජංගම දුරකථනයේ කැමරාවෙන් තමාගේම නිරුවත් ඡායාරූප ගනිමින් පෙම්වතාගේ ජංගම දුරකථනයට එම් .එම්. එස් කරනු ලැබුවේ ඒ ගැන එතරම් බරපතළකමක් ගැන නොසිතාය. ඒ ඔහුද තමන්ගේ නිරුවත් ඡායාරූප ඇයට එසේ එවන්නට වූ බැවිනි. කෙසේ හෝ වේවා කිසියම් හේතුවක් මත ඔය අතරතුර ඇගේ සිත තවෙකෙකු වෙත ඇදී ගියේය. ඒ අනුව ඇය ෆේස් බුක් පෙම්වතාගෙන් ඈත් වන්නට තීරණය කළාය.ඇය එසේ ෆේස්බුක් පෙම්වතාගෙන් වෙන්වන්නට තීරණය කළද ඊට ඔහුගෙන් ලැබෙන්නට වූයේ එතරම් යහපත් ප්‍රතිචාරයක් නොවේ. තර්ජනයකි. තමාව අතහැරියහොත් මරා දමන බවට ඔහු ඇයට තර්ජනය කර ඇති බව පැවසේ. එකී තර්ජනයත් සමග මරණ බිය ඇයට දැනෙන්නට විය. බිය තුනී කරගන්නට ඇය යන්නේ ග‍ලේවෙල පොලීසියටය. ඔහු ගැන පැමිණිල්ලක් කරන්නට ගියත්, ඇය ෆේස්බුක් පෙම්වතා ගැන දැන සිටියේ ඔහු රත්නපුරයේ අයෙකු බව පමණය. ඉන් එහාට ඔහු ගැන යමක් දැනගන්නට ඇයට තිබුණේ ෆේස්බුක් ගිණුම් විස්තරයත්, දුරකථන අංකයකුත් පමණි. ඉකුත් වසරේ දිනක ඇය ඒ පැමිණිල්ල ග‍ලේවෙල පොලීසියට කරන විට කිසිම විටෙක ෆේස්බුක් පෙම්වතා තමන්ගේ කාමරයට රාත්‍රි කාලයේ රිංගූ බවක් හෝ දෙදෙනා අතර නිරුවත් ඡායාරූප හුවමාරුකරගත් බවක් හෝ කියන්නට ගියේ නැත. එය රහසක් ලෙස තබා ගන්නට ඇය වගබලා ගත්තාය.
ඇගේ ඒ පැමිණිල්ල විභාග කිරීමට පැමිණෙන්න යයි ග‍ලේවෙල පොලීසියෙන් ෆේස්බුක් තරුණයාට දුරකථනයෙන් කිහිප විටක්ම දැනුම් දුන්නද ඔහු ඒ දැනුම්දීම් තඹ සතේකට මායිම් කර නැත. පොලීසිය පැත්ත පළාතකට ආවේ නැත. මේ තත්ත්වය මත අධිකරණයෙන් නියෝගයක් ගෙන දුරකථන අංකය ඔස්සේ ෆෙස්බුක් තරුණයාගේ අනන්‍යතාව තහවුරු කරගන්නට පොලීසිය මූලික පියවර ගනිමින් සිටියදී නැවතත් ඇය පොලීසියට ආවේ හැඬු කඳුළෙනි. ඒ ඇගේ නිරුවත් ඡායාරූප ගොන්නක්ම ඇගේ නමින් සැකසූ ව්‍යාජ ෆේස්බුක් ගිණුම් හතක ඇති බව කියමිනි. එම ෆේස්බුක් ගිණුූම් ගැන ඇයට කියා ඇත්තේද අර පෙම්වතාමය. ඒ ෆේස්බුක් ගිණුම්වල ඇත්තේ ඇය ඔහුට යැවූ නිරුවත් ජායාරූපය. ඒ ඉතා පහත් ආකාරයේ වදන්ද සහිතවය. ඇගේ චරිතය විනාශ කරමින් ෆේස්බුක් පෙම්වතා ඇයට ඒ එල්ල කර තිබුනේ මරණ තර්ජනයටද වඩා දරුණු ප්‍රහාරයකි. ඒ වන විට එම ඡායාරූප ලෝකය පුරා ෆේස්බුක් ජාලයේ සිටින මිලියන ගණනකගේ ඇස ගැටී තිබුණේය. ඇගේ චරිතය විනාශ කරමින් ඒ කර තිබුණු හානියත් සමග ග‍ලේවෙල පොලීසිය එතෙක් ඔහු සම්බන්ධයෙන් කළා වූ පරීක්ෂණ වඩාත් පුළුල්කරනු ලැබිය. ඒ පොලිස් ස්ථානාධිපති පොලිස් පරීක්ෂක රුක්ෂාන් පෙරේරා මහතාගේ උපදෙසින් හා ළමා හා කාන්තා කාර්යාංශ ඒකකයේ ස්ථානාධිපතිනී උප පොලිස් පරීක්ෂිකා ශානිකා රණසිංහ මහත්මියගේ මෙහෙයවීම මතය. ෆේස් බුක් පෙම්වතාගෙන් ඇයට අපූරු දුරකථන ඇමතුමක් ලැබෙන්නේ ඔය අතරතුරදීය. එය සාම ගිවිසුමක් බඳුය. ෆේස්බුක් පෙම්වතා ඇයට යෝජනා කරන්නේ නැවතත් තමා සමග පෙම් සම්බන්ධතාවක් ඇතිකර ගන්නේ නම් ඇගේ නිරුවත් ඡායාරූප යොදා සකස්කර ඇති ෆේස්බුක් ගිණුම් වසා දමන බවටය. නැතිනම් අන්තර් ජාලයෙන් ඉවත්කරගන්නා බවටය. තමන්ගේ නිරුවත් ඡායාරූප අන්තර් ජාලයෙන් ඉවත්කර ගන්නට ඒ යෝජනාවට එකඟ වනවා හැරුණු කොට ඇයට වෙනත් විකල්පයක් තිබුණේ නැත. ඇය ඔහුගේ ඒ යෝජනාවට එකඟ වූවාය. ඒ එකඟත්වය සමග ඇගේ නිරුවත් ඡායාරූප යොදා සකස්කර තිබුණූ ව්‍යාජ ෆේස්බුක් ගිණුම් හතෙන් හයක්ම අන්තර් ජාලයෙන් ගැලවී ගියේය. ඉතිරිව තිබුණු අනෙක් ෆේස්බුක් ගිණුම ඉවත් කිරීමට ඔහු තවත් කොන්දේසියක් ඇයට ඉදිරිපත් කළේය. ඒ ඇයව මුණ ගැසී පෙම්බස් දොඩන්නටය. ඒ සඳහා ඔහු තෝරාගන්නේ කුරුණෑගල නගරයය. දිනය ඉකුත් 18 වෙනිදාය. ෆේස්බුක් පෙම්වතා සමග නැවත පෙම් සම්බන්ධයක් ඇතිකරගන්නට ඇය එකඟවන්නේ ව්‍යාජ ෆේස්බුක් ගිණුම් හතක ඇති තම නිරුවත් ඡායාරූප ඉවත්කරගන්නට ඒ හැරුණු කොට වෙනත් විකල්පයක් නොමැති වූ තැනය. නැති නම් ඔහුට ඇති ආදරයක් නිසා නම් නොවේ. කෙසේ හෝ වේවා මෙම හමුව ගැන ඇය පොලීසියද දැනුම්වත් කළ අතර මෙම හමුවීම හරහා මෙකී ෆේස්බුක් පෙම්වතා කොටු කරගන්නට හැකියාව ලැබෙන බව පොලීසිය තේරුම් ගත්තේය. ඒ අනුව නියමිත දින ඇය කුරුණෑගලට යන්නේ සිවිල් ඇඳුමෙන් සැරසුණු පොලිස් සැරයන් වීරබණ්ඩා සහ කොස්තාපල් හේරත්ද සමගිනි. ඒ ගිය ඔවුන් නැවත පොලීසියට එන්නේ හිස් අතින් නොව, ෆේස්බුක් පෙම්වතාද කැටුවය. අවසානයේ හෙළිවන්නේ ඔහු මැණික් මුදලාලි කෙනෙකුගේ පුතෙකු නොව, ඇහැලියගොඩ පැත්තේ සිටින රස කැවිලි වෙළෙන්දියකගේ පුතෙකු බවය. ඔහු මේ සියලු සෙල්ලම් දමා ඇත්තේ තම ජංගම දුරකථනයෙන් අන්තර්ජාල පහසුකම් ලබාගෙනය. විසි හතර වියැති ෆේස්බුක් පෙම්වතියට මරණ තර්ජනය කරමින්, ඇගේ නිරුවත් ජායාරූප ෆේස්බුක් මගින් අන්තර්ජාලයට මුදාහරින ලද එම ෆේස්බුක් පෙම්වතාව අධිකරණයට ඉදිරිපත් කළ පසු ඔහු තමා කළ වැරුද්ද දඹුල්ල මහේස්ත්‍රාත් ඉදිරියේ පිළිගනු ලැබුවේ බොරු බේගල් ඇද බෑවායැයි කියා නිදහසක් තමාට හිමි නොවන බව දැන ගෙන විය හැකිය. ඔහු එසේ වරද පිළිගත් බැවින් මහේත්ත්‍රාත් සංජීව රම්‍ය කුමාර රණසිංහ මහතා බරපතළ වැඩ ඇතිව ඔහුට මාස නවයක සිරදඬුවමක් නියම කළේය. ඒ බිය ගැන්වීමට මාස තුනක් සහ ඇයට ලිංගික අතවර කිරීමේ චෝදනාවට මාස හයක සිරදඬුවමක් වශයෙනි. එම සිර දඬුවම අවුරුදු පහකට අත්හිටුවීමටද එහිදී මහේස්ත්‍රාත්වරයා නියෝග කළේය.
උපුටා ගැනීම ලක්බිම පුවත්පත
