පේස් බුක් අවුලක් නිසා ජීවිතයෙන් සමුගත් සිසුවියගේ කතාව
මුහුණු පොත නැතිනම් ෆේස්බුක් මේ වන විට ලංකාවේද තරුණ තරුණියන් අතර ජනප්‍රියතම සමාජ වබේ අඩවියක් බවට පත්ව අවසන්ය. හොඳට මෙන්ම නරකටද මෙම සමාජ වබේ අඩවිය මිලියන ගණනක් වූ ෆේස්බුක් ගිණුම් හිමියන් භාවිත කරන අතර නරකට එම වබේ අඩවිය භාවිත කිරීම හේතුවෙන් ඇති වූ විවිධ තත්ත්වයන් මත සිත්තැවුලට පත්වූ තරුණ තරුණියන් සියදිවි හානිකර ගැනීම් ද දැන් සුලබය. ඒ වැඩිපුරම ෆේස්බුක් මගින් කෙරෙන මඩ ගැසීම් සහ චරිත ඝාතනයන් හේතුවෙනි. ෆේස්බුක් හේතුකොටගෙන ඇතිවන සිත් තැවුල් සහ ආරවුල් මුල්කරගෙන ලෝකයේ කොතරම් සිය දිවි හානිකර ගැනීම් සිදුවුවත් මෙරටින් පළමු සියදිවි හානිකර ගැනීම වාර්තා වන්නේ ඉකුත් වසරේ නොවැම්බරයේදීය. ෆේස්බුක් හේතුවෙන් දැන් දෙවැනි මරණයද මෙරටින් වාර්තා වී හමාරය. මෙවර ෆේස්බුක් මාරයාට ගොදුරුවන්නේ පාසල් සිසුවියකි. මෙවර අධ්‍යයන පොදු සහතික පත්‍ර සාමාන්‍ය පෙළ අධ්‍යාපනය ලැබිමට සූදානමින් සිටි ඇය කුරුණෑගල පිහිටි ප්‍රධාන මිශ්‍ර පාසලක අධ්‍යාපනය ලබමින් සිටි යුවතියකි. සිසුන් පන්දහසකට ආසන්න පිරිසක් අධ්‍යාපනය ලබන එම පාස‍ලේ දීප්තිමත් ශිෂ්‍යාවක් වන ඇය ෆේස්බුක් මාරයාට ගොදුරුවන්නේ ඇය ෆේස්බුක් මගින් අනිසි සම්බන්ධයක් පැවැත්වීම හෝ නරක ක්‍රියාවක නිරතවීමක් හේතුකොටගෙන ඇති වූ යම් ගැටලුකාරී තත්ත්වයක් නිසා නොව. ඇය පාසල් නිල ඇඳුමින් සිටින ඡායාරූපයක් ෆේස්බුක් පිටුවක ඇතැයි ඇය අධ්‍යාපනය ලද විදුහ‍ලේ විදුහල්පතිවරයාට කවුරුන්දෝ දුන් ලණුවක් නිසා ඔහු ඇයට ඒ සම්බන්ධයෙන් නොසෑහෙන්නට දොස් නගා, ඉතා පහත් වචනයක් කියමින් බැණ වැදීම හේතුවෙන් ඇති වූ සිත්තැවුලක් හේතුවෙන් බව පැවසේ. ඇය නමින් වෙනූෂා ඉමන්දි බණ්ඩාරය. ඇය පදිංචිව සිටියේ කුරුණෑගල තෝර යායේය. ඇගේ පියා ව්‍යාපාරිකයෙකි. මව සෞඛ්‍ය දෙපාර්තමේන්තුවේ පෙර පාසලක සේවය කරන්නීය. ඇයට වැඩිමහල් සහෝදරියක්ද බාල සහෝදරියක්ද සිටියි. වැඩිමහල් සහෝදරිය ගුවන් හමුදාවේය. බාල සහෝදරිය ඇය ඉගෙනුම ලැබූ පාස‍ලේම නව වන ශේ්‍රණියේ අධ්‍යාපනය ලබන්නීය. පාස‍ලේ කැපී පෙනෙන දක්ෂ සිසුවියක වූ වෙනූෂා සිය නිවසේ කාමරයක් තුළදී සාරියකින් ගෙල වැලලාගෙන සිය දිවි හානිකරගන්නේ ඉකුත් 05 වෙනිදාය. ඒ නිවසේ කිසිවෙකුත් නොමැති අවස්ථාවකදීය. එදා පාසල් නොයන ඇය එසේ සියදිවි හානි කරගන්නේද තමා ඒ තීරණය ගැනීමට හේතුවූ කාරණා පිටු දෙකක් පුරා ලියා තැබිමෙන් අනතුරුවය. ෆේස්බුක් කතාවත්, විදුහල්පතිවරයා ඇයට ඉතා පහත් ආකාරයෙන් බැණ වැදී ඇති බවත් හෙළිවන්නේ ඒ අනුවය. එම ලිපියේ අඩංගු කාරණාද, ඇගේ පියා වන පී.වී. අනුරසිරි කියන කාරණාද, ඇගේ මරණය සම්බන්ධයෙන් මතෛක් කර ඇති පොලිස් විමර්ශනවලින් අනාවරණය වන කාරණාද සැලකිල්ලට ගත් කල ඇගේ සියදිවි හානිකර ගැනීමට හේතු වන කාරණා සුළුවෙන් තැකිය හැකි ඒවා නම් නොවේ. මෙහිදී ඇගේ මරණයට විදුහල්පතිවරයාද යම් තරමකට වගකීමක් දැරිය යුතු බව පෙනේ. ඒ ඔහු නිසි සොයා බැලිල්ලකින් තොරව ඇයට ඉතා පහත් ආකාරයෙන් බැණ වැදී ඇති බව පෙනී යන නිසාය. එම විදුහල්පතිවරයා හමුදා සේවයේ නිරතව සිට පැමිණි අයෙකු බවද සඳහන්ය. ඔහු පාසල තුළ දැඩි පාලනයක් ගෙන යන්නට සිතා එසේ ඇයට බැන්නාද නැතිනම් ඇය සම්බන්ධයෙන් විදුහල්පතිවරයා යම් වෛරයකින් සිටියේදැයි ඇත්තේ ගැටලුවකි.
මේ කියන සිසුවියට ෆේස්බුක් ගිණුමක් ඇති බව අන්තර්ජාලය තුළ සෝදිසියක් කළහොත් ඕනෑම අයෙකුට සොයා ගන්නට පුළුවන. හැබැයි ඇගේ පියා නම්, ඇය මිය යන තුරුම, ඇයට ෆේස්බුක් ගිණුමක් ඇති බව දැන සිට නැත. එය එසේ යැයි කියා එම සිසුවිය එම ෆේස්බුක් ගිණුම අනිසි ආකාරයට භාවිත කර ඇති බවක් පෙනෙන්නට නැත. 2011 වසරෙන් පසු එය යාවත්කාලීන කරද නැත. ඇගේ ඡායාරූපයක්, සහෝදරියන් සමග ගාල්ලේ ඥාති නිවසකට ගිය අවස්ථාවක මුහුදු වෙරළක බෝට්ටුවක් අසල දී සහ මුහුදේ දිය නාමින් සිටියදී ගත් ඡායාරූපයක් ඇතුළු ඡායාරූප හතරක් පහක් හැරුණු විට ඇයගේ ෆේස්බුක් ගිණුමේ වෙනත් කිසිදු ඡායාරූපයක් හෝ විස්තරයක් දක්නට නැත. එය එසේ වුවත් විදුහල්පතිවරයා ඇයට ඉකුත් 03 වෙනිදා පාසල තුළදී බැණ වදින්නේ ෆේස්බුක් හී පාසල් නිල ඇඳුමින් ඇය සිටින ඡායාරූපයක් ඇති බව සඳහන් කරමිනි. ඒ සම්බන්ධයෙන් තමා ඇයව කාර්යාලයට කැඳවා අවවාද කළා මිස නරක අයුරකින් බැණ වැදුනේ නැති බවක් මේ වන විටත් විදුහල්පතිවරයා පොලීසියට කටඋත්තරයක් දෙමින් පවසා හමාරය. එහෙත් ඇය සිය දිවි හානිකරගන්නට පෙර ලියා ඇති ලිපියේ සඳහන් කර ඇත්තේ විදුහල්පතිවරයා ඉතා නරක අයුරින් තමාට බැණ වැදුණු බවකි.. ඒ වචන පවා ඇය ඒ ලිපියෙහි සඳහන් කරන්නට අමතක කර නැත. විදුහල්පතිවරයා ඇයට බැණ වැදුනේ යැයි සඳහන් වන්නේ ඇය පිරිමි ළමයෙකු සමග සිටින ජායාරූපයක් ෆේස්බුක් හි තිබි තමාට හමුවූ බව සඳහන් කරමිනි. ඇය ඒ සම්බන්ධයෙන් එකහෙලා පවසා ඇත්තේ එය නිර්මාණය කළ ඡායාරූපයක් බවය. විදුහල්පතිවරයා ඇයට බැණ වැදුනේ යැයි පැවසෙන්නේ ඒ ගැන නිසි විමර්ශනයක් නොකරය. ඒ ඡායාරූපයට දැන් සිදුවී ඇත්තේ කුමක්දැයි අබිරහසකි. එය පොලීසියට භාරදෙන්නටවත් මෙම ලිපිය සටහන් තබන 07 වෙනිදා වන තුරුම විදුහල්පතිවරයා පියවරක් ගෙන තිබුණේ නැත. ඒ ගැන නිසි විමර්ශනයක් පොලීසිය කර තිබුණු බවක්ද පෙනෙන්නටද නොවීය. ඒ වෙනුවට පොලිස් මූලස්ථානයට කුරුණෑගල පොලීසිය වාර්තාකර තිබුණේ ප්‍රේම සම්බන්ධතාවක් ඇගේ සියදිවි හානිකර ගැනීමට මුල්වී ඇති බවය. පොලීසිය ඇගේ මරණයට තුඩුදුන් සැබෑ හේතුව සඟවන්නට උත්සාහ කරනවා නම් එසේ කරන්නේ කාගේ උවමනාවටදැයි ඇත්තේ ගැටලුවකි. ඒ විදුහල්පතිවරයා රැක ගැනීමටද නැතිනම් ඉහළින් ලැබුණු නියෝගයකට අනුව දැයි කිව නොහැක. ප්‍රශ්නයට තුඩුදෙන එම ඡායාරූපය විදුහල්පතිවරයාට ලැබෙනවානම් ලැබිය යුත්තේ දෙවැනි පාර්ශ්වයක් මගිනි. ඒ පුද්ගලයාද ෆේස්බුක් ගිණුම් හිමියෙකු විය යුතුය. නැතිනම් විදුහල්පතිවරයාට ෆේස්බුක් ගිණුමක් තිබිය යුතුය. පොලීසිය මේ කාරණා ගැන යම් අවධානයක් යොමු කළේ නම් ඇගේ මරණයට මුල්වන සැබෑ හේතුව සොයා ගන්නට වඩාත් ඉඩකඩ තිබිණි. විදුහල්පති සමන් ඉන්ද්‍රරත්න නම් මේ ගැන පවසන්නේ පාසලට අගෞරවයක් ඇතිවන ආකාරයට ඇය ෆේස්බුක් ගිණුම් 02ක් පවත්වාගෙන ගිය බැවින් ඒ ගැන ඇයට අවවාද කළ බවය. එම ෆේස්බුක් ගිණුම් ගැන තමන්ට තොරතුරු ලැබෙන්නේ විදුහ‍ලේ ඇති පැමිණිලි පෙට්ටියෙන් බවද ඔහු පවසන්නේය. ඇගේ පියා පවසන ආකාරයට සිය දියණියට ප්‍රේම සම්බන්ධයක් තිබි නැත. එවන් සම්බන්ධයක් ගැන ආරංචියක්වත් තිබි නැත. ඇය සියදිවි හානිකර ගන්නට පෙර ලියූ ලිපියේද තමාට එවන් සම්බන්ධයක් නැති බව ඇය පවසා ඇතැයිද ඔහු පවසයි. විදුහල්පතිවරයා තමාට බැණ වැදුනේ තමන්ගේ මුහුණ යොදා ව්‍යාජ ලෙස සකස්කළ ඡායාරූපයක් දැක බවත්, එය පැහැදිලි කර දෙන්නට ඔහු ඉඩ නොදී බැණ වැදුණු බවත් ඇය ඒ ලිපියෙහි සඳහන් කර ඇති බව ඇගේ පියා කියයි. “දුවට හොඳටම බැණල 05 වෙනිදාට මාව ඉස්කෝලෙට එක්ක එන්න කියල විදුහල්පතිතුමා කියල තිබ්බා. දුව ගෙදර ඇවිත් විස්තරේ මට කිව්වා. ‘අප්පච්චි ඔයා එදාට ඉස්කෝ‍ලේ යන්න එපා. මට බැණපු විදිහට අප්පච්චි කියන දෙයක්වත් එයා අහන්නෙ නැතිවෙයි. අප්පච්චි නිකම් බැණුම් අහන්න ඕනේ නැහැ. දැන් මට ඉස්කෝලෙ යන්න හිතෙන්නෙත් නැහැ’ කියල දුව මට කිව්වා. ඊට ඉස්සර දවසකත් විදුහල්පති ළමයි විශාල පිරිසක් ඉන්න තැනක දුවට හොඳටම බැණල තිබුණා. දුව පිරිමි ළමයෙක් එක්ක චිත්‍රපටයක් බලන්න ගිහින් කියල. දුව මැරෙන්න ඉස්සෙල්ල ලියල තියෙන ලියුමෙත් ඒ ගැන ලියල තියෙනව. “මම ඒ වගේ වැරදි වැඩක් කළේ නැහැ. නංගිත් ඒ ගැන හොඳටම දන්නව” කියල දුව ලියල තියෙනව.” ඇගේ පියා අරුණසිරි දුක වේදනාව හිරකරගෙන තම දියණියට එල්ලවූ පීඩනයන් ගැන “ලක්බිමට” කරුණු කියන්නට වූයේ එසේය. විදුහල්පතිවරයා පොලීසියට පවසා ඇත්තේ ඇයට අවවාද කළා මිස ඇගේ පියාට එන්නට කීවේ නැති බවය. දෙපාර්ශ්වය කියන මේ කතාවල ඇත්ත නැත්ත විමසන්නට ඇය දැන් ජීවතුන් අතර නැත. ඇය මිය යන්නට පෙර තැබූ සටහන අවසානයේ ලියා ඇත්තේ තවත් ළමයෙකුට මෙවන් ඉරණමක් අත්නොවනු පිණිස මෙලෙස සියදිවි හානිකරගන්නා බවය. ඇයගේ සිය දිවි හානි කර ගැනීම අප අනුමත නොකළද ඇගේ මරණයට තුඩුදුන් හේතූන් පිළිබඳව විධිමත් විමර්ශනයක අවශ්‍යතාවක් ඇති බව නම් පෙනී යන කාරණාවකි. ඒ ඇගේ මුහුණ යොදා ව්‍යාජ ඡායාරූපයක් සකස් කොට ෆේස්බුක් පිටුවක ප්‍රදර්ශනය කළ පුද්ගලයකු සිටී නම් ඔහු හෝ ඇය හඳුනාගෙන එම තැනැත්තාට එරෙහිව ක්‍රියාත්මක වීමටය. එසේම නිසි සොයා බැලීමකින් තොරව නොගැළපෙන වචන කියමින් විදුහල්පතිවරයා සිසුවියට බැණ වැදුණා නම් ඒ සම්බන්ධයෙන්ද යම් පියවරක් ගනිතැයි යන්න ඇගේ දෙමාපියන් ඇතුළු පවු‍ලේ ඥාතීන්ගේ අපේක්ෂාවය. ඒ තවත් සිසුවෙකුට හෝ සිසුවියකට එවන් වරදක් සිදුනොවන්නටය.
ගයාන් කුමාර වීරසිංහ
උපුටා ගැනීම ලක්බිම
