රෝමියෝ - ජුලියට් ආදර කතාවක් නොවූ හැරී - මාග්‍රට් පෙම් කතාව
රෝමියෝ - ජුලියට් ආදර කතාවක් නොවූ හැරී - මාග්‍රට් පෙම් කතාව :
සිය මවගේ හදිසි අභාවය නිසා ඇගේ ආදරය නොලැබි යාම, දෙමවුපියන්ගේ යුග දිවියේ අවුල් වියවුල් ආදී බොහෝ කාරණ හැරී කුමරුගේ සිත ඇතුළත පීඩනයන් ඇති කළා විය හැකිය. හිතුවක්කාර ලෙස හැසිරෙමින් සෙල්ලක්කාර ජීවිතයක් ගත කරමින් කුමරු ඒ චිත්ත පීඩාවන් බාහිරයට මුදා හැරියා වන්නට ද පුළුවන. එට්න් විද්‍යාලයයේ ඉගෙනුම ලබමින් සිටි හැරී කුමරු තම පළමු පෙම්වතිය සොයා ගත්තේ සිය වයස අවුරුදු 19 ක්ව තිබියදී 2003 වසරේය. ඇය නමින් ලෝරා ජෙරුර්ඩ් ලෙන් වූවාය. ලෝරු රජ පවුලට අමුත්තියක වූයේ නැත. එලිසඛෙත් රැජනගේ සැමියා වූ ෆිලිප් කුමරුගේ හොඳම මිතුරකු වූ කර්නල් විලියම් ජෙරුර්ඩ් ලෙන් ගේ මිනිබිරිය වූයේ ලෝරාය. ඇගේ පියා බ්‍රිතාන්‍යයේ කෝටිපති වෙළෙඳ ව්‍යාපාරිකයකු විය. පෝලෝ ඇතුළු විවිධ ක්‍රීඩා උත්සව හා තරගවලදී ද, වෙනත් උත්සව අවස්ථාවන්හිදී ද, ට්විකෝහැම් හි එම වසරේදී පැවැත්වුණ අන්තර් ජාතික රග්බි තරගාවලියකදී ද හැරී - ලෝරා යුවළ එකට දැක ගන්නට ලැබිණි. ඔවුන්ගේ සේයාරූ බ්‍රිතාන්‍යයේ ටැබ්ලොයිඩ් පුවත්පත්වල පළවූ අතර දෙදෙන පෙමින් වෙළී සිටින බව ද ඒවායින් පැවසිණි. හැරී කුමරු හෝ ලෝරා කිසි විටෙක තමන් පෙම්වතුන් නොවේ ය යන්න මාධ්‍ය වෙත ප්‍රකාශ කළේ ද නැත. ලෝරා විනෝදයට, ප්‍රිය සාදයන්ට ඛෙහෙවින් කැමැති යුවතියක වූවාය. ඇගේ දෙමවුපියන්ට අයත් නිවෙසක ද හැරී හා ලෝරු නිතර මුණගැසෙන බව සමකාලීන එම නිවෙසේ අසල්වැසියෝ මාධ්‍ය වෙත ප්‍රකාශ කළහ. ඒ වුණත් ලෝරා ළඟ හැරී සෙවූ ප්‍රේමය තිබුණේ නැහැ ඊට දෙවසරකට පමණ පසු ලෝරා ගේ මිතුරියක මාධ්‍ය වෙත ප්‍රකාශ කළාය. හැරී හෙවුවේ සැබෑ ආදරයක් වෙන්නැති. ලෝරුට නිතරම අවශ්‍ය වුණේ විනෝදය විතරයි. ඒ එක්කම ඇය හැරීට වඩා හොඳින් ඉගෙනීම් කටයුතුවලට කැපවුණා. තමා සොයන ආදරය ලෝරා ළඟ නැති වග වටහා ගෙන වෙන්නට ඇති හැරී මාග්‍රට් වෙත සමීප වන්නට ඇත්තේ. ඇත්තෙන්ම ලෝරා හැරීට වඩා ඉගෙනීමෙහි දක්ෂ වූවාය. 2007 වසරේදී ඇය බ්‍රිස්ටල් සරසවියෙන් උපාධිය ලබා ගත්තාය. ලෝරාගේ මිතුරිය පැවසූ හැරීට සමීප වූ මාග්‍රට් කවුරුන් ද? ඇය එට්න් වීදියේ සාප්පුවක සේවය කළ යුවතියක වූවාය. එට්න් විද්‍යාලයයේ නේවාසිකව උගත් සිසුන් අතිරේක ආහාර මිලට ගන්නට එම වීදියට ඒමට පුරුදුව සිටි අතර හැරී කුමරු මාග්‍රට් දැක ඇත්තේ ද එසේ පැමිණි අවස්ථාවකදීය. මාග්‍රට් දුටු වහා ඇය පිළිබඳ සිතක් ඇති කරගත් කුමරු එතැන් පටන් ඇයට සිය ආදරය හඟවමින් කාඩ්පත් යැවීම අරඹා තිබේ. මාග්‍රට් ද පාසල් සිසුවියක වූ අතර ඇය මුදල් උපයා ගැනීම සඳහා පාසල් කාලයෙන් පසු එම සාප්පුවේ සේවය කර තිබිණි. රජ කුමරුවකුට සාමාන්‍ය පවුලක යුවතියක හා විවාහ විය හැකි ද? හැරී කුමරු එම ප්‍රශ්නය ගැන නොසිතූ එදා මාග්‍රට් ඒ ගැන සිතන්නට ඇත. දෙදෙන අවස්ථා කීපයකදී සිසිල් බීම පානය සඳහා එට්න් වීදියේම වූ අවන්හල් වෙත ගොස් තිබේ. හැරී නොදැන සිටියත් මාග්‍රට් ඒ වන විට බරපතළ ගැටලුවකට මුහුණ දී සිටියාය. රජ කුමරු තම ප්‍රේමය පතමින් තමා ඇසුරු කළ ද, තමන් තවත් යෞවනයකුට හද පුදා තිබීම මාග්‍රට් මුහුණ දී සිටි ගැටලුවයි. එය රෝමියෝ - ජුලියට් ආදර කතාවක් වූයේ නැත. මාග්‍රට් ඉතා කල්පනාකාරී ආකාරයට කටයුතු කළාය. මාධ්‍යවලින් ඇය මාග්‍රට් ලෙස හැඳින්වූ අතර ඇය සිය සම්පූර්ණ නම අද වනතුරු ද මාධ්‍ය වෙත ලබා දී නැත. ‘මාග්‍රට්’ යන්න ඇගේ සම්පූර්ණ නමේ මැද එක් නමක් බව පැවසෙයි. මාස කීපයක් තිස්සේ හැරී කුමරුට සමීප වී සිටි මාග්‍රට් සෙමෙන් කුමරුට පැහැදිලි කර දුන්නේ තමන් අනෙකකුගේ පෙම්වතියක බවය. අවසානයේ හැරී කුමරු මාග්‍රට් වෙතින් ඉවත් වූයේ ද හදවත බිඳගෙනය. කුමරු මා එක්ක හැසිරුණේ ඉතාම ආචාරශීලී ආකාරයටයි. කුමරු මට ළං වීමත් එක්කම මා මැදි වුණේ ප්‍රේම ත්‍රිකෝණයකට ඊට අවුරුදු දෙකකට පෙර පටන් මම පෙම්වතියක වී සිටියා. රජ කුමරු මට සමීප වුණා කියා එම පෙම්වතා අතැර දමන්න මම සූදානම් වුණේ නැහැ. මාග්‍රට් එසේ පවසා තිබුණේ මෑතකදී හැරී කුමරුගේ චරිතාපදානය ලියූ ක්‍රිස් හචින්ස්ටය. ඇය ඔහු වෙත මෙසේ ද පවසා තිබිණි. මම කුමරුට කරුණු පහදා දී ඔහු වෙතින් ඉවත් වුණා. ඊට මාස කීපයක් ගතවූ බව ඇත්ත. මා කරුණු පහදා දෙන්නට ගත් ඒ කාලයේ බාහිර ලෝකය අපිව දකින්නට ඇත්තේ පෙම් යුවළක් හැටියටයි. මා ඔහුට කරුණු පහදා දී වෙන් වූවාට පස්සෙත් ඔහු කීප වතාවක්ම මට දුරකථනයෙන් කතා කළා. මගේ ආදරය පතා ආයාචනා කළා. ඒත් මම මගේ තීරණය වෙනස් කළේ නැහැ. කොහොම වෙතත් හැරී කුමරු වෙනුවෙන් මගේ දෑසට කඳුළු නැඟුණේ නැහැ කීවොත් ඒක බොරුවක්. ක්‍රිස් හචින්ස් පවසන ආකාරයට අද මාග්‍රට් සිය පෙම්වතා හා විවාහ වී සාර්ථක යුග දිවියක් ගෙවන දෙදරු මවකි. මාග්‍රට්ගේ වෙන්වීමෙන් පසු යම් කාලයක් හැරීගේ ජීවිතය යළි බිඳ වැටුණු බවක් පෙනී යයි. සහභාගි වූ බොහෝ සාදවල දී ඔහු පමණට වඩා මත්පැන් පානය කළ බව වාර්තා වූයේය. 2004 පෙබරවාරියේ දී බ්‍රිතාන්‍ය ටැබ්ලොයිට් පුවත්පත් වාර්තා කළේ රාත්‍රී සමාජ ශාලාවකදී ඔහු උඩුකය නිරුවතින් රඟන නළඟනකට හාදු දුන්නා කියාය. එම නළඟන 20 හැවිරිදි ලෝරන් පෝප් බව ද මාධ්‍යවලින් පැවසිණි. 2004 ජූලි 25 දා වින්ඩ්සර් හි පැවැති පෝලෝ තරගයකින් අනතුරුව වූ සාදයට සහභාගි වූයේ රාජකීයයන් හා ජනප්‍රිය පුද්ගලයන්ය. හැරී කුමරු ඊට සහභාගි වෙමින් ‘රෙඩ්බුල්’ කෑන් පානය කරමින් නෙත් හෙළූයේ ඊට සහභාගි වෙමින් සිටි හොලිවුඩ් නිළි ස්කාලට් ජොහැන්සන් දෙසය. ‘ලොස්ට් ඉන් ට්‍රාන්ස්ලේෂන්’ සහ ‘ගර්ල් විත් ද පර්ල් ඉයරිං’ වැනි චිත්‍රපටවල රඟපා ජනප්‍රියත්වයට පත්ව සිටි ස්කාලට් මැසිවිලි නඟමින් සිටියාය. මම පෝලෝ තරගයක් නැරඹුවේ පළවැනි වතාවට. මටනං ඒ සෙල්ලම තේරෙන්නේම නැහැ. හැරී කුමරු ඇයට පෝලෝ ක්‍රීඩාව හා එහි නීතිරීති හඳුන්වා දෙන්නට සූදානම් වූවත් ඒ වහා ඔහු ස්කාලට්ගෙන් සමාව යදිමින් ගමන් කළේ තවත් යුවතියක වෙතය. එම යුවතිය කවුරුන් ද? කෙන්යාවේ සංචාරයකින් අනතුරුව එංගලන්තයට පැමිණ හුන් හැරී කුමරුගේ පළමු පෙම්වතිය ලෝරා ජෙරාර්ඩ් ලෙන් ගාඩිස් පෝලෝ සමාජ ක්‍රීඩාගාරයට ඇතුළු වෙමින් සිටියේ සාදයට සහභාගි වනු පිණිසය. හැරී කුමරු ස්කාලට් වෙතින් ඉවත්ව පැමිණියේ ලෝරු පිළිගන්නටය. කුමරු වහා ඇගේ ඉඟ වටා සුරත යවා ඇය තමා වෙත ළං කරගත්තේ තව දුරටත් ඇය තම පෙම්වතිය යැයි අඟවන්නට මෙනි. සාදයට සහභාගි වෙමින් සිටි සියලු දෙනාගේ නෙත් එම යුවළ වෙත යොමු වූ බව අමුතුවෙන් කිව යුතු නැත.
ඇයි... ඔයා තරගය නරඹන්න ආවෙ නැත්තෙ? කුමරු විමසුවේය.
වැඩක් නෑ... මම ආවත් නාවත් ඔයාලා පරදින වග මම දැනගෙන හිටියා ලෝරා වහා පිළිතුරු දුන්නාය. කුමරුගේ මුහුණ අඳුරු විය. සාදයට පෙර පැවැති පෝලෝ තරගයේදී කුමරු ද ක්‍රීඩා කළ ඔහුගේ පියාට හිමි ‘ප්‍රින්ස් ඔෆ් වේල්ස්’ කණ්ඩායම හර්ලින්ග්පැම් පෝලෝ කණ්ඩායම ඉදිරියේ පරාජය ලබා තිබිණි. කුමරු වහා කතාව වෙනතකට හැරවූයේය.
ඊළඟට ඔයා මොනවා ද කරන්න යන්නෙ? තව ටික දවසකින් මම බ්‍රිස්ටල් සරසවියට ඇතුළු වෙනවා. ලෝරා පිළිතුරු දුන්නාය. දේශපාලන විද්‍යා උපාධිය හදාරන්න.
කුමරුට අධ්‍යාපනය සම්බන්ධයෙන් ද වැඩිදුර කතා කිරීමේ හැකියාවක් තිබුණේ නැත. ඔහුට වැඩිදුර ඉගෙනීමේ වුවමනාවක් හෝ උනන්දුවක් ද නොතිබිණි. කෙසේ වෙතත් පසුව යුවළ එක්ව නර්තනයේ යෙදෙනු ද දැකගන්නට ලැබිණි. එහෙත් එම සාදයෙන් පසු යළි හැරී - ලෝරු යුවළ නැවත එකට දැකගන්නට ලැබුණේ නැත. එහි අරුත වූයේ දෙදෙනාගේ ප්‍රේමය එම සාදයේදී නැවත අලුත් නොවීය යන්නයි.
උපුටා ගැනීම සිළුමිණ පුවත් පත
