මං දැන් අම්මා කෙනෙක්
පුංචි පැටියගේ හඬ මට ඇහෙද්දි මම කුස්සියට ගියා විතරයි. ඒත් එක්කම වගේ මට අංජුලගේ කටහඬත් ඇහුණා. ගිය වැඩේ පැත්තක තියලා මම ආයෙත් සාලෙට එද්දි පුතා හිනාවෙවී අංජුලත් එක්ක බර කතාවක. තාම හරියකට වචන ගලපලා කතා කරන්න බැරි වුණාට පුතා කියන දේවල් තාත්තටත් හොඳට තේරෙනවා. ඇයි ඉතින් අංජුලත් ගෙදර ඉන්න හැම වෙලාවකම වගේ ඉන්නේ පුතා එක්කනේ. පුතාටත් තාත්තා නැතිවම බෑ. පුතා ලැබෙන්න ඉන්න දවස්වල ඉඳන්ම හැමවෙලාවෙම අංජුල මං ගැන හොයලා බැලුවා. අපි දෙන්නගේ අම්මලා තාත්තලා වුණත් එහෙමයි. කන්න, බොන්න කැමැති දේවල් හදලා ගෙනත් දුන්නා. අංජුලගේ අම්මා වත්තෙ වැවෙන පිරිසුදු බෙහෙත් තෙල් ගහලා නැති අලුත්ම එළවළු, පලතුරු මල්ලක් හැම සතියකම එනකොට අරන් ආවා. මම ගැබ් ගත්තා කියන පණිවිඩය දැනගත් දවසේ ඉඳලා අංජුල මාව වෙනදටත් වැඩිය ආදරෙන් බලා ගත්තා. මුල් කාලෙදි මගේ ඇඟට දැනුණු අපහසුකම් නිසා මට අංජුලගේ ආදරය කරදරයක් විදියට දැනුණත් අංජුල මාව කවදාවත් කරදරයක් විදියට දැක්කේ නෑ. එයා තවත් මට ළං වෙලා මට ආදරේ සෙනෙහස දැක්වූවා. උදේට දැනෙන අපහසුකම් නිසා ගෙදර වැඩ සමහර දවස්වලට එයාගේ කරපිටටම වැටුණා. මට නිදහසේ ඉන්න ඉඩ දීලා එයා පුළුවන් හැමදේම කළා. අංජුලට කොච්චර වැඩ තිබුණත් මම වෛද්‍ය සායනවලට යන හැම වෙලේකම වගේ එයත් මාත් එක්කම ආවා. වෛද්‍යවරයා මුණගැහිලා කතා කළා. මට ඇතිවෙන්න පුළුවන් අපහසුතා වගේම අවදානම් තත්ත්ව ගැන වෛද්‍යවරයාගෙන් කරුණු අහලා දැන ගත්ත නිසාම දරුවා ලැබෙන්න ඉන්න කාලෙ ඉඳන්ම එයාට තාත්තා කෙනෙක්ගෙ වගකීම් යුතුකම් හොඳින්ම දැනෙන්න පටන් ගත්තා. වෛද්‍යවරු, හෙදි නිලධාරීන්, පවුල් සෞඛ්‍ය සේවා නිලධාරීන් සායනවලදී දැනුම්වත් කරන හැමදෙයක් ගැනම අංජුල හොඳ අවධානයකින් හිටියා. ඒ නිසාම එයා වෙනදටත් වැඩියෙන් මගේ දුක සැප හොයලා බැලුවා. හැමවෙලේම මගේ ළඟින් ඉන්න බැරි වුණත් පුළුවන් හැමවෙලේම දුරකතනයෙන් කතාබහ කළා.
අපි කරන කියන හැමදේම වගේම දරුවාට ඇහෙන. දැනෙන නිසා දරුවා ලැබෙන්න ඉන්න මුළු කාලෙම මං හිටියේ හරිම සතුටින්. අපේ ගෙවල්වල අය වුණත් හැමවෙලේම මාව සතුටින් තියන්න උත්සාහ කළා. දෙපැත්තක ඉන්න දෙන්නෙක් එකට ජීවත් වෙද්දී ප්‍රශ්න නැත්තෙමත් නෑ. අපේ ගෙදරත් එහෙමයි. දරුවා ලැබෙන්න ඉද්දි අපි දෙන්නා අතරත් පුංචි පුංචි ගැටුම්, ප්‍රශ්න තිබ්බා. ඒත් ඒවා දුරදිග යන්න නොදී අපිම කතාබහ කරලා විසඳ ගත්තේ අපේ දරුපැටියගේ අනාගතේ ගැන හිතලා. නිරෝගී බුද්ධිමත් දරුවෙක් බිහිවෙන්න අම්මගේ තාත්තගේ බැඳීම ශක්තිමත් වෙන්න ඕනේ. අම්ම තාත්තා දෙන්න රණ්ඩු වෙද්දි ඒක කුසේ ඉන්න දරුවටත් බලපානවා. මගේ කුසේ පුංචි පුතා වැඩුණේ තනියම. ඒත් ඒ තනිකම අපි දෙන්නා දැනෙන්න දුන්නේ නෑ. පුළුවන් හැම වෙලේම මායි අංජුයි මගේ කුස අතගාන ගමන් දරුවා එක්ක කතා කළා. හිනා වුණා. ඒ නිසාමද කොහෙදෝ අපේ පුතා ඉපදුණාට පස්සේ අපි දෙන්නගේ කටහඬ ඇහෙද්දි ඇස්දෙක ලොකු කරලා බලන් හිටියේ. මම හරි වාසනාවන්තයි කියලා මට දැනුණේ පුතා ලැබෙන්න ඉද්දිමයි. සමහර අම්මලා තනියම සායනවලට යද්දි මම අංජුලගේ අතේ එල්ලිලා පුංචි පුතා ගැන එක එක දේවල් කිය කිය සායනවලට ගියා. කිසිම වෙලාවක තනිකමක් දැනුණේ නෑ. පුතා ලැබෙන්න ඉද්දි අංජුලට මං ළඟ ඉන්න බැරි වුණත් අනිත් හැම වෙලාවකම එයා මං ගැන හොයලා බැලුවා. මට පුතා ලැබෙන්න ඉද්දි අංජුල ගෙනත් දුන්නු පොතක මෙහෙම ලියලා තිබුණා. ඒ උපදෙස් හෙට දවසේ අම්මා කෙනෙක්, තාත්තා කෙනෙක් වෙන්න ඉන්න ඔබට හුඟාක් ප්‍රයෝජනවත් වේවි කියලා හිතුවා. තත්පරයෙන් තත්පරය, විනාඩියෙන් විනාඩිය පැයෙන් පැය, දවසින් දවස දරුපැටියා මවුකුස තුළ වැඩෙනවා. අඳුරු කුටියක් ඇතුළේ තනියම දරු පැටියා වැඩුණත් අම්මගේ හදගැස්ම වගේම තාත්තගේ කටහඬත් පුංචි පැටියගේ පාළුව මකනවා. දරුවා කුසේ තියාගෙන ඉන්න අම්මාට වගේම තාත්තාටත් වගකීම් තියෙනවා.
- මවගේ ගර්භණීභාවය හා ප්‍රසවය පිළිබඳ මනා අවබෝධයක් ලබා ගත යුතුයි.
- මව සමඟ ආදර, සුරක්ෂිත සම්බන්ධතාවකින් යුතුව නිතරම සිටිය යුතුයි.
- ඇගේ අවශ්‍යතා හා හැඟීම් හොඳින් අවබෝධ කරගෙන ඒවාට සහයෝගය දක්වන්න.
- ඇගේ ප්‍රසව දිනය දැන සිටීම හා ඇයට ඒ සඳහා සූදානම් වීමට උපකාර කිරීම.
- ප්‍රසවය සිදුවන ස්ථානය, රෝහල සම්බන්ධව ස්ථිර තීරණයකට එළැඹීම සහ ඒ සඳහා අවශ්‍ය පරිසරය සූදානම් කිරීම.
- මවට මනා පෝෂණයක් ලබාදීම.
- නිවෙසේ වැඩ කටයුතුවලදී ඇයට ඔබේ සහාය ලබාදීම.
- ඇයට අවශ්‍ය විවේකය හා නින්ද ලබා ගැනීම. අවශ්‍ය පරිසරය සකසා දීම.
- මවට යම් යම් රෝග තත්ත්ව ඇතොත් ඒ පිළිබඳ නිවැරැදිව කරුණු දැන සිටීම.
- ඇය ගන්නා ඖෂධ හා සත්කාර පිළිබඳ සොයා බැලීම මෙන්ම ඒ සඳහා අවශ්‍ය දේ සපයා දීම.
- දරුවා පිළිසිඳගැනීමට අවශ්‍ය පරිසරය සකස් කිරීම.
- මත්ද්‍රව්‍ය හා දුම්වැටි භාවිතයෙන් තොර පුද්ගලයකු වීම.
- මව වෛද්‍ය සායනවලට යන විට හැකි සෑම අවස්ථාවකදීම ඒ සඳහා සහභාගි වීම හා මවගේ හා දරුවාගේ නිරෝගී සෞඛ්‍ය රැකගැනීමට අවශ්‍ය දැනුම හා අවබෝධය ලබා ගැනීම වගකීමෙන් යුත් ලිංගික හැසිරීමක් පවත්වා ගැනීම.
- මවගේ මානසික සෞඛ්‍ය දරුවාගේ බුද්ධි වර්ධනය සඳහා බලපාන හෙයින් අඩදබර, හිරිහැරවලින් තොරව සතුටින් කාලය ගතකිරීමට ඇයට ඉඩකඩ සලසා දීම.
යූ.එල්.පී. කාරියවසම් හෙද සොහොයුරිය, ද සොයිසා කාන්තා රෝහල, 16 වාට්ටුව සවනි ශේශාධි හර්ෂා
උපුටා ගැනීම මව්බිම පුවත්පත
.jpg "මනාලිය විලාසිතා කුඩුවක් නොවේ")
