ජීවිතය සාර්ථක වීමට බලපාන කරුණු තුන දන්නවා ද?
මගේ එක්‌ පුරුද්දක්‌ වේ. ඒ කරන ඕනෑ ම දෙයක්‌ මහත් වෙහෙසක්‌ දරා, දැඩි කැපවීමකින් යුතුව, උපරිම සාර්ථකත්වයක්‌ ලැබෙන ලෙසින් කිරීම ය. එහෙයින් මගේ වෘත්තිය සේම ලේඛන කලාවද මම කිසි විටෙකත් වංචා කර නැත. කම්මැලිකමකින් හෝ නුවමනා වීමකින් අඩුපාඩුවක්‌ සිදුවන ලෙසින් ඉටු කර නැත. එහි ප‍්‍රතිඵලය වූයේ, වසර 5 ක් තරම් කෙටි කලක්‌ තුළදී ග‍්‍රන්ථ 50 ක් එළිදැක්‌වීමට සේම, ඒ සියල්ල ම පාඨකයන්ගේ නොමද ආදරයට ලක්‌වීම ය. වෘත්තිය වශයෙන් ගත් විටදීද මා සේවය කළ සෑම ආයතනයකදී ම වේගවත් දියුණුවක්‌ හිමිකර ගැනීමට සමත්වීමි. කාගේත් ආදරය සේම සැලකිල්ලට ලක්‌ වූයෙමි. මේ සියලූ ජයග‍්‍රහණයන්ට හේතුව කුමක්‌ දැයි මම පසුගිය දිනයකදී සිතුවෙමි. එයට එක්‌ හේතුවක්‌ වූයේ රැකියාව සේම ලේඛන කලාවද දෙවියන්ගේ කාර්යයක්‌ ලෙසින් සිතා ඉටු කිරීම ය.
දෙවැන්න, මගේ වෘත්තිය මෙන් ම ලේඛන කලාවද මගේ විනෝදාංශය විය. විනෝදාංශයක්‌ කිසිවෙකුට කිසිඳු දිනයකදී වෙහෙසක්‌, එපා වීමක්‌ හෝ නුවමනාවක්‌ ඇති නොකරන්නකි. එයට අමතරව මට සිතෙන අන්දමට මගේ ආත්මය සතුටු කරවීමට මම තවත් දෙයක්‌ කරමි. ඒ මනසින් කරන කිසිවකට මා ණයකාරයෙකු නොවීම ය. එනම්, මා ලියන දේ කියවන අයට සේම, මගේ රැකියා ආයතනයට බොරුවක්‌ වංචාවක්‌ නොකිරීමෙන් ලද මුදලටත් වඩා උපරිමයෙන් ම සේවය කර තිබීම ය. එහෙයින් මා බොහෝ තෘප්තිමත් මිනිසෙකුය යන හැගීම මට වේ. උදාහරණයක්‌ ලෙසින් යමක්‌ ලිවීමේදී කරුණු සොයමින් අලූත්ම දෙයක්‌ අංග සම්පූර්ණව ඉදිරිපත් කිරීමට සැමවිට ම මම වෙහෙසෙමි. රැකියාවේදීද උපරිම ප‍්‍රතිඵල ආයතනයට ලැබෙන ලෙසින් කටයුතු කළෙමි. කොම්පැනියට ඕන තරම් සල්ලි තියෙනවා. මං දගලන්න ඕන නෑ. යනුවෙන් මට කෙදිනකවත් නොසිතේ. අඩු ම තරමින් යමක්‌ ලිවීමට හෝ මා අලූත් කඩදාසියක්‌ නොගෙන වරක්‌ පාවිච්චි කළ කඩදාසියක්‌ ප‍්‍රයෝජනයට ගනිමි. ඒ හැගීම මට ඇතිවූයේ "මට කොහොම සැලකුවත් මගේ දේ මම හරියට කරනවා
" යන්න සැමවිට ම සිතේ තිබීමෙනි. එසේ කරන්නෙකුට නොවරදින බව මගේ පිළි ගැනීම යි. අප අදහන බුදුන්, දෙවියන්ගේ දයාව ලැබෙන්නේ කරන දේ හරියට කරන මිනිසුන්ට ය. එය මගේ ආත්මයේ විශ්වාසය යි. සාර්ථකත්වය මිනිසෙකුගේ පිනට ලැබෙන්නේ කලාතුරකිනි. වාසනා ගුණයට ලබන සාර්ථකත්වය මඳ කලකින් අවසන් වේ. එය සදාකාලික වීමට නම් කැපවීම, උත්සාහය හා ධෛර්යය තිබිය යුතුවේ. ඇතැම් පුද්ගලයන් බොහෝ සාර්ථකව සිට, කලකදී බිඳ වැටීමකට ලක්‌වීම ඔබත් දැක ඇතුවාට සැකයක්‌ නොවේ. එසේ වන්නේ වාසනාව ගැන විශ්වාස තැබීමෙන්, වෙහෙසක්‌, කැපවීමක්‌ නොයොදා සැහැල්ලූවෙන් සිටීමෙනි. පැහැදිලි වට්‌ටෝරුවක්‌ සාර්ථකත්වයට පත්වීමට පැහැදිලි වට්‌ටෝරුවක්‌ තිබේ. එයට අනුගත වූවොත් ඔබට කෙදිනකවත් නොවරදී. මුලින්ම කරන දේ හරියට කිරීමට සිතීම අවශ්‍ය ය. විශේෂයෙන් ම ඔබේ ජීවිතයේ ආදායම් මාර්ගය රැකියාව හෝ ව්‍යාපාරයක්‌ නම් එයට දැඩිව කැපවීම, වෙහෙසීම තුළත් සියල්ල ඉහළින් ම ඉටු කිරීමට උත්සාහ කළ යුතුය. රැකියාව සම්බන්ධයෙන් මේ සමාගම "මගේ නෙමෙයි
" යැයි නොසිතන්න. එය ඔබේ ය. මන්ද, ඔබව ජීවත් කරවන්නේ සේම, ඔබව දියුණුවට පත් කරවන්නේ එයයි. එහෙයින් උපරිමයෙන් ම සියලූ වගකීම් ඉටුකළ යුතු ය.
නාස්‌තියක්‌ සිදු නොකළ යුතුය. එම පුරුද්ද ඔබ තුළ තිබියදී එයින් පැහැදිලි වන්නේ, නිවැරදි පුද්ගලයෙකු බව ය. සැමවිට ම නිවැරදි පුද්ගලයන්ට ඉස්‌මතුවීමට ඉඩක්‌ ලැබේ. එය කවදාක කොතැනක හෝ සිදුවේ. එය වැළැක්‌වීමට නොහැක. සාර්ථකත්වයට පත් ඕනෑ ම පුද්ගලයෙකුගේ අභ්‍යන්තරය හඳුනා ගැනීමට ඔබට ඉඩක්‌ ලදොත් ඔහු බොහෝ කැපවීම, ප‍්‍රබල ධෛර්යය, නොනවත්වා ම ඉදිරියට කරගෙන යැම හා තමාගේ ම දෙයක්‌ ලෙසින් සියලූ දේ කිරීම ඔබට දක්‌නට ලැබේ. අවංක හා කැපවීමකින් ඔබ යමක්‌ කළොත් එයට ප‍්‍රතිඵල හිමිවීම කිසිවෙකුට හෝ වැළැක්‌වීමට නොහැක. රැකියාව සම්බන්ධයෙන් බොහොමයක්‌ ම රැුකියාව සම්බන්ධයෙන් සිතන්නේ එය අනුන්ට අයිති තැනක්‌ ලෙසිනි. නැතිනම් ගන්න ගානට සේවය කිරීම සෑහෙන බවකි. මෙම පදනමෙන් සිතන අය සැම විටම තමාගේ කාර්යය සිදු කරන්නේ නුවමනාවෙන් හා කිසිදු කැපවීමකින් තොරව ය. නමුත් යමෙකු හම්බ කරන් කන දෙයට වංචා කළොත්, එයට වැරදියට සැලකූවොත් ස්‌වභාව ධර්මය හෝ අනුකම්පා නොකර යි. එහෙයින් ඔබ සැමවිට ම ඔබේ කාර්යය මැනවින් ඉටු කළ යුතුය. එය අනුන්ට නොව, තමාට කරන ප‍්‍රයෝජනයකි. මන්ද යමෙකුට තම රැකියාව නිවැරදිව ඉටු කිරීමටත් සිදුවන්නේ යනු එම විෂයය පිළිබඳව මනා දැනුමක්‌ ලැබීම ය. තම වෘත්තීය නිවැරදිව හැදෑරීමෙන් යමෙකුට එයට අදාළ ඕනෑ ම තැනක කැපී පෙනීමට හැකි ය. මන්ද මෙහිදී වඩාත් ම වැදගත්වන්නේ, ඔබට යමක්‌ කැපවීමෙන් හා ආදරයෙන් සිදුකිරීමට ඇති පුරුද්ද ය. එයට ලොවෙහි සැමදාම මිලක්‌ තිබේ. එහෙයින් ඔබ නිවැරදිව රැකියාව කිරීම යනු, අන්‍යයෙකුට සේවය කිරීමක්‌ නොව, තමාට ම සේවය කිරීමකි. එම ආයෝජනයෙන් මතුදාක ප‍්‍රතිඵල ලබන්නේ ඔබම ය.
හෘද සාක්‌ෂියට එකගව එයට අමතරව ඔබ සාර්ථකත්වයට පත්වීමට නම්, අනිවාර්යයෙන් ම හෘද සාක්‌ෂියට එකගව කටයුතු කිරීම අවශ්‍ය ය. එනම් රැකියාව, හෝ අන් කටයුත්තක යෙදෙද්දී වුවද එය හෘද සාක්‌ෂියට එකගව හැකි උපරිමයෙන් ඉහළම දායකත්වය ලබාදීම අවශ්‍ය ය. ඕනෑ ම දෙයක්‌ හෘද සාක්‌ෂියට එකගව සිදු කරද්දී, ඔබේ සිත සැහැල්ලූවට සේම පවිත‍්‍රත්වයට පත්වේ. අප සාමාන්‍යයෙන් පවසන පරිදි "හිත හොඳ කම
" සෑම කටයුත්තකදී ම වැදගත් වේ. මන්ද ඕනෑ ම පුද්ගලයෙකු ජයග‍්‍රාහී මාවතකට යොමු කරන්නේ, එම හිත හොඳ කමට ලැබෙන තෑග්ගක්‌ ලෙසිනි. බාධක සහ සිත් රිදවීම් සාර්ථකත්වයට පත්වන ඕනෑ ම අයෙකුට බාධක හා සිත් රිදවීම් බොහොමයකට මුහුණ දීමට සිදුවේ. නමුත් ජයග‍්‍රහණයට පත්විය හැක්‌කේ එයට දිරියෙන්, හා ඉවසීමෙන් මුහුණ දී බුද්ධිමත්ව කටයුතු කිරීමෙනි. බොහෝ අවස්‌ථාවලදී අප කරන්නේ යම් බාධකයක්‌ හෝ සිත රිදවීමක්‌ ඇති වූ විටදී, පසුගාමීවීම හෝ එම කාර්යය අත්හැර දැමීම ය. එයින් අදහස්‌ කෙරෙන්නේ ඔබට බාධා කළ පුද්ගලයා ජයගත් බව හා ඔබ පරාජය පිළිගත් බව ය. මෙහිදී අප සිතිය යුත්තේ, ඕනෑම දෙයක්‌ කිරීමේදී එය පහසුවෙන් කිරීමට ඉඩක්‌ නොලැබෙන බව ය. එමෙන්ම සැමවිට ම අවසන් ප‍්‍රතිඵලය, අංග සම්පූර්ණවීමේ ඉඩක්‌ නොමැති බව ය. මෙම කරුණු දෙක ඔබ හොදින් සිතේ රදවා ගත හොත්, අභියෝග හා බාධක ඉදිරියේ ඔබට නොසැලී සිටීමට හැකිවේ. එමෙන් ම ඕනෑ ම කටයුත්තක්‌ කිරීමේදී, බාධක මතුවීම ස්‌වභාවික දෙයක්‌ බව ය. තවද, අත්වැරදීම්, අහිමිවීම්, පාඩු ලැබීම්, බාධක හා කරදර වලට මුහුණ දීම් ගැන සිතිය යුත්තේ ඔබව තවත් ශක්‌තිමත් කරන්නක්‌ ලෙසිනි. ඔබට අලූත් අත්දැකීමක්‌ හෝ පාඩමක්‌ ලෙසිනි. එය ඔබට ඉදිරියට යෑමට අවස්‌ථාවක්‌ උදා වූ ලෙසිනි. බාධකයක්‌ හෝ අවහිරවීමක්‌ සිදු වීමේදී ඔබ තවත් ශක්‌තිමත් වීමක්‌ අවශ්‍ය ය. එයට මුහුණ දී කෙසේ හෝ ජය ගත්නවා කියලා හිතමින් ඉදිරියට යෑමක්‌ සිදුකිරීම අවශ්‍ය ය. සාර්ථකත්වයට පත්වන්නෙකු මනසින් බිඳ වැටීමකට ලක්‌ නොවේ.
ප‍්‍රදීප් කුමාර බාලසූරිය
උපුටා ගැනීම නවලිය පුවත් පත
