මුල් මාස කිහිපයේදී දරුවකු සේ ගම්මිරිස් පැළ රැක බලා ගත යුතුයි!

ආහාර රස ගන්වනයක් සේ ම ඖෂධයක් ලෙසින් භාවිතයට ගැනෙන ගම්මිරිස් අපට නැතිවම බැරි කුළුබඩුවකි. සාමාන්‍යයෙන් අප දිනපතාම ආහාර පිසීමේ දී ගම්මිරිස් භාවිත කළද වැඩි ප්‍රමාණයක් පාවිච්චි නොවේ. එබැවින් බොහෝ දෙනකුට තමන්ගේ දෛනික පරිහරණය සඳහා අවශ්‍ය ගම්මිරිස් ටික නිවෙසේදීම සකසා ගත හැකිය. ඒ සඳහා ඔබව දැනුවත් කරන්නට මෙලෙස අප උත්සාහ දරන අතර පසුගිය සතියේ දී අපේ අවධානයට යොමු වූයේ වගාවට සුදුසු ගම්මිරිස් පැළ තෝරාගන්නේ කෙසේද යන්නයි.

ගම්මිරිස් පැළ සිටුවීම

ගම්මිරිස් පැළය වැඩීම සඳහා සිටුවා ගත් ආධාරකය වූ ග්ලිරිසීඩියා දණ්ඩ සිටුවා මාස හයක් ගත වූ පසුව ගම්මිරිස් පැළ සිටුවා ගත යුතුයි. ඒ සඳහා අඩි 2 × 2 × 2 ප්‍රමාණයේ වළක් ආධාරකය ආසන්නයෙන් කපාගන්න. මෙලෙස තරමක් විශාල වළක් අවශ්‍ය වන්නේ ගම්මිරිස් වැලෙහි මූල පද්ධතිය නිදහසේ වැඩීම සඳහයි. අනතුරුව වියළි ගොම හෝ කොම්පෝස්ට් , මතුපිට පස් සමඟ මිශ්‍ර කර වළ පුරවා ගත යුතුයි. මේ මිශ්‍රණයට රොක් පොස්පේට් ග්‍රෑම් 100 ක් බැගින් එක් කරගන්න. වියළි දේශගුණයක් සහිත ප්‍රදේශයක නම් වළ ඇතුළට පොල් ලෙලි දැමීමෙන් පැළයට අවශ්‍ය තෙතමනය රඳවා තබා ගන්න පුළුවනි.ඔබට ඇත්තේ බෑවුමක් සහිත ඉඩමක් නම් බෑවුමට විරුද්ධව ඉහළ පැත්තෙන් වළවල් දෙකකට පොල්ලෙලි අසුරා ගැනීම සුදුසුය. ඉන්පසුව අපට ගම්මිරිස් පැළය සිටුවා ගත හැකිය. පැළ සිටුවීමට වඩාත් ගැළපෙන්නේ හොඳින් වැසි වැටෙන කාල පරිච්ඡේදයයි.එමෙන්ම පැළය සිටුවා පොල් අත්තකින් හෝ වෙනත් සුදුසු ආවරණයකින් සෙවණ සපයන්නත්, පසට ග්ලිරිසීඩියා කොළවලින් වසුනක් යොදන්නත් අමතක කරන්න එපා. මුල් මාස කිහිපයේදී දරුවකු රැකබලා ගන්නවා සේ ඔබේ අවධානය පැළයට අවශ්‍ය වේ. වැළ ආධාරකය දෙසට යොමුකර ළපටි මුල් ඇදෙන ගැට සහිත ස්ථාන කුඩා රෙදි පටියකින් ගැට ගසන්න. හොඳින් සෙවණ හා පසට වසුන් යොදා පැළය සහ පස වියළී යාම වළකාගන්න.

කප්පාදු කිරීම

ආධාරක ශාකයත් ගම්මිරිස් වැළත් නිසි කලට වේලාවට කප්පාදුකර සකසා ගැනීම අනිවාර්යයෙන් කළ යුත්තකි.මෙහිදී ගම්මිරිස් වැළ පුරුක් දහයක් පමණ ඉහළට වැඩුණු විට පොළොවේ සිට පුරුක් තුනක් ඉහළින් වැළ කපා දමන්න. එවිට අලුතින් අතු බෙදී පැළය ඉතා සාර්ථකව වර්ධනය වේවි. පසුව ගැටවලින් හට ගන්නා රිකිලිත් ආධාරකයට යොමු කරන්න. ප්‍රධාන කඳේ සිට දෙපසට වර්ධනයවන හරස් අතු ද අපි ආධාරකයට යොමුකළ යුතුයි.මෙලෙස කිරීමෙන් ගම්මිරිස් පැළය සිලින්ඩරයක හැඩයට ඉතාමත් අලංකාරව සහ ක්‍රමානුකූලව ඉහළට මෙහෙයවා ගත හැකිය.

මෙලෙස ගම්මිරිස් වැළෙහි හටගන්නා හරස් අතු ප්‍රමාණය මත තමයි ඔබට ලැබෙන අස්වනු ප්‍රමාණය තීරණය වන්නේ.ගම්මිරිස් වැළ පරිණත වද්දි පොළොව මත දුවන පාවැලුත් , ආධාරකය කෙළවර සිට පහළට වර්ධනයවන ගැරඬි වැලුත් ඉවත් කර දැමීම අනිවාර්යයි.

එමෙන්ම ආධාරකය ලෙස සිටුවා ගන්නා ග්ලිරිසීඩියා දණ්ඩ ද සෑම මාස හයකට වරක් කප්පාදු කරන්න. ඔබට මතක ඇති මේ දණ්ඩ සිටුවා ගනිද්දී අග්‍රස්ථ කෙළවර තෙත පස් ටිකකින් ආවරණය කළ හැටි.එමගින් පහළින් හටගන්නා රිකිලි ඉවත්කර ඉහළ කෙළවර පමණක් අතු බෙදීම උත්තේජනය කරගත හැකිය.මේ ආකාරයට ආධාරකය අඩි පහළොවක් පමණ උපරිම උසකට සකසා ගන්න. ඔබ ආධාරක ශාකය කප්පාදුවෙන් ඉවත් කරන කොළ සහ ළපටි දඬු ගම්මිරිස් පැළ සඳහා වටේට වසුනක් ලෙස යොදාගන්න පුළුවනි.

පොහොර සැපයීම

වැඩුණු ගම්මිරිස් පැළයකට නොමසුරුව ග්ලිරිසීඩියා කොළ සහ ළපටි දඬු, දිරාපත් වූ ගොම පොහොර හෝ කුකුළු පොහොර යොදනවා නම් රසායනික පොහොර අවශ්‍ය වන්නේ ඉතාමත් අඩුවෙනි. වසර තුනක් පමණ වයසැති හොඳින් වැඩුණු පරිණත ගම්මිරිස් පැළයක් සඳහා වසරකට දිරාපත් වූ ගොම පොහොර කිලෝග්රෑම් 16 ක් , කුකුළු පොහොර නම් කිලෝ ග්‍රෑම් 12 ක් හෝ ආධාරක ග්ලිරිසීඩියා ගසේ කොළ හා ළපටි දඬු නම් කිලෝ ග්‍රෑම් 10 ක් පමණ ගසට එකතු කිරීම ඉතාම වැදගත්. මෙම පොහොර වර්ග යෙදීමේ දී සියල්ලම එක්වරම ලබා නොදී වසර පුරාම වරින් වර ලබාදෙන්නට මතක තබා ගන්න.

ඔබට කාබනික පොහොර යොදන අතරතුරේ උපරිම අස්වැන්නක් ලබා ගැනීමට රසායනික පොහොර ද යෙදිය හැකිය. ගම්මිරිස් පැළ සිටුවා පළමු මාස හය ගත වූ පසුව පළමු පොහොර යෙදීම සිදු කරන්න. පැළයේ මුල සිට අඩියක දුරින් ගස වටේට ඉතා කුඩා කාණුවක් සකසා එයට පොහොර යොදා පස සමඟ හොඳින් මිශ්‍ර කරන්න. පැළය සිටුවා තුන්වන අවුරුද්ද වනවිට පැළයෙහි මුල සිට අඩි එකක් දෙකක් අතර පරතරයකින් පොහොර යෙදීම උචිතය සෑම මාස හයකට වරක් මෝසම් වර්ෂාව ආරම්භවීමත් සමඟම පොහොර යෙදීම සිදු කරන්න.

මේ සඳහා ඔබට වෙළෙඳසලෙන් ගම්මිරිස් පොහොර මිලදී ගත හැකියි. එලෙස ගම්මිරිස් පොහොර මිලදී ගත්තා නම් පළමු අවුරුද්දේ දී එක් පැළයකට ග්‍රෑම් 125 බැගින් දෙවරක් යොදන්න. දෙවැනි අවුරුද්දේ දී ග්‍රෑම් 250 බැගින් දෙවරක් ද තුන්වෙනි අවුරුද්දේ දී ග්‍රෑම් 350 බැගින් යොදන්න. මේ ආකාරයට ක්‍රමානුකූලව ජලය ,පොහොර, වසුන් ආදිය යොදා ආදරයෙන් ගම්මිරිස් වැළ රැකබලා ගතහොත් ඉතා හොඳ අස්වැන්නක් නෙළා ගත හැකි බව අමතක කරන්න එපා.

අස්වනු නෙළීම

ශ්‍රී ලංකාවේ දී වසරකට දෙවරaක් ගම්මිරිස් අස්වැන්න නෙළීම සිදු කෙරේ. එනම් නොවැම්බර් සිට ජනවාරි අතර කාලයේ දීත්, මැයි සිට ජුලි යන කාලයන්හි දීත් ගම්මිරිස් අස්වැන්න නෙළීම සිදු කෙරේ. සාමාන්‍යයෙන් ගම්මිරිස් රෑන් ඇදෙන අවස්ථාවේ සිට හොඳින් පරිණත වීම සඳහා මාස අටක් නවයක් අතර කාලයක් ගතවේ. ගම්මිරිස් කරලක ඇට කිහිපයක් රතු පැහැයට හැරෙන අවස්ථාවේ දී වැලට හානියක් නොවන පරිද්දෙන් අතින් අස්වනු නෙළීම සිදු කළ යුතුය. කෙසේ වෙතත් අස්වනු නෙළීමේදී පැසුණු සහ ඉදුණු කරල් පමණක් තෝරා නෙළා ගැනීමට සැලකිලිමත් වීම ඉතා වැදගත් වේ. මෙසේ නෙළා ගත් ගම්මිරිස් අස්වැන්න පිරිසුදු බෑගයකට හෝ බඳුනකට එකතු කරගන්න.මීට අමතරව බිම පතිත වූ කරල් වෙනම අහුලා එකතුකර සෝදා ගන්න.

අනතුරුව නෙළාගත් ගම්මිරිස් කරල්වලින් ඇට වෙන් කරගත යුතුයි. සාමාන්‍යයෙන් ගම්මිරිස් නිෂ්පාදන අතර කළු ගම්මිරිස් ,සුදු ගම්මිරිස් ආදී වශයෙන් පවතින අතර ගෘහණියන් අතර බෙහෙවින් ජනප්‍රිය කළු ගම්මිරිස් ය. හොඳින් මේරූ පැසුණු ගම්මිරිස් ඇටවලින් කළු ගම්මිරිස් සකස් කරගනියි.

ගම්මිරිස් කරල්වලින් ඇට වෙන් කිරීම

නෙළාගත් ගම්මිරිස් කරල් පැය 12 ත් 24 ත් දක්වා කාලයක් පිරිසිදු ස්ථානයක ගොඩගසා තිබීමෙන් ඇට වෙන් කරගැනීම පහසු වේ. නිවෙසේ පරිභෝජනය සඳහා පමණක් මෙම කාර්යය සිදු කරන්නේ නම් එය අතින් සිදු කිරීම වඩාත් සුදුසුය. නමුත් ව්‍යාපාර මට්ටමින් ඔබ ගම්මිරිස් නිෂ්පාදනය කරන්නේ නම් මෙම ගම්මිරිස් බීජ වෙන් කිරීමට යන්ත්‍ර උපයෝගී කරගත හැකිය.

අමු ගම්මිරිස් ඇට වර්ග කිරීම

ගම්මිරිස් පරිභෝජනය සඳහා සකසා ගැනීමට පෙර එහි ඇති පැසුණු ඇට, නොපැසුණු ඇට සහ අල්පෙනෙති හිස් ආකාරයේ ඇට වෙන් කිරීම කළයුතුය. මේ සඳහා නොම්බර පහ සහ නොම්බර අට යන සල්ලඩ භාවිතය වඩාත් සුදුසුයි. මෙමගින් ඇල්පෙනෙති හිස් ආකාරයේ බොල් ඇට ඉවත් කෙරෙයි. නිවෙසේ පරිභෝජනයට නම් මෙලෙස කුඩා ඇට සහ ලොකු ඇට වශයෙන් වෙන වෙනම සකසා ගැනීම අත්‍යවශ්‍ය නොවුවද එසේ කිරීම මගින් ඒකාකාරී සහ ඉහළ ගුණාත්මක තත්ත්වයෙන් යුතු වියළි ගම්මිරිස් නිෂ්පාදනය කරගත හැකි වේ.

කළු ගම්මිරිස් නිෂ්පාදනය

උසස් ගුණාත්මක තත්ත්වයෙන් යුතු කළු ගම්මිරිස් නිෂ්පාදනය කරගැනීම සඳහා උණුවතුර ප්‍රතිකාරය අත්‍යවශ්‍යයි. මෙය ඔබට නිවෙසේ දී පහසුවෙන් සිදුකරගත හැකිය. එහිදී මුලින්ම ගම්මිරිස් ඇට සෝදන්න. ඉන්පසුව ඒවා දැල් උරයක බහා හොඳින් නටන ජලයෙහි මිනිත්තු එකක් හෝ දෙකක් ගිල්වා තබන්න. පසුව ඒවා ඉවතට ගෙන ජලය බේරෙන්නට හැර හොඳින් තුනීකර වියළා ගන්න.

ගම්මිරිස් නිෂ්පාදනයේ යෙදෙන බොහෝ දෙනෙකු නොදැනුවත්කම නිසා උණුවතුර ප්‍රතිකාරය සිදු නොකෙරේ. ඒ වෙනුවට නෙළාගත් ගම්මිරිස් අස්වැන්න අව්වේ වියළා ගැනීම සිදු කරයි.නමුත් උණුවතුර ප්‍රතිකාරය කිරීම තුළින් මතුපිට රැලි ගැසුණු ඒකාකාර, පැහැපත් කළු වර්ණයකින් යුත් ගම්මිරිස් ඔබට ලබාගත හැකිය. තවද අපද්‍රව්‍ය හා ක්ෂුද්‍ර ජීවී ප්‍රමාණය අඩුවීම, අව්වේ වියළීමට ගතවන කාලය අඩුවීම සහ ගබඩා කාලය වැඩි වීම වැනි වාසි රැසක් මෙම උණුවතුර ප්‍රතිකාරය මඟින් ලබාගත හැකිය.

ගම්මිරිස් වියළීම

සාමාන්‍යයෙන් උණුදිය ප්‍රතිකාරයත් සමඟම 75% ක් පමණ ජල ප්‍රතිශතයක් ගම්මිරිස්වල පවතී. නමුත් කල් තබා ගැනීම සඳහා මෙම ජල ප්‍රතිශතය 12% දක්වා අඩු කර ගතයුතු වේ. එය සිදු කරගත යුත්තේ වියළීම මගිනි. අස්වනු නෙළා ගත් විගස වියළා ගැනීම මඟින් ක්ෂුද්‍ර ජීවි හානි අඩුකර ,ගබඩා කාලය වැඩි කර ගත හැකියි. මෙහිදී ගෘහස්තව අව්වේ දමා වියළා ගැනීම සිදුකරන්න. බාහිර අපද්‍රව්‍ය එකතු නොවන සහ සතුන් ඇතුළු විය නොහැකි ලෙසට සකස් කරගන්නා ලද උස් වූ ස්ථානයක තබන ලද අතුරනයක් මත මෙම ගම්මිරිස් තුනී තට්ටුවක් ලෙස අතුරා වියළා ගැනීම වඩාත් සුදුසුයි.

ගම්මිරිස් ඒකාකාරීව වියළීම සඳහා විටින් විට අතින් හෝ රේක්කයක් ආධාරයෙන් කලවම් කරන්න. මෙලෙස උදේ වරුවේ පැය දෙකක් තුනක් අව්වේ තබා වියළා නැවත පැයක් පමණ පවනේ වියළන්න. ඉන්පසුව නැවතත් සවස් කාලයේ පැය දෙකක් තුනක් පමණ අව්වේ වියළන්න. මෙලෙස දින දෙකක තුනක කාලයක් ගතවන විට ගම්මිරිස් හොඳින් වියළේ. එහිදී ගම්මිරිස්වල ජල ප්‍රතිශතය 12% ක් දක්වා අඩු වී තිබිය යුතුය. ඔබ ගම්මිරිස් ඇටයක් නියපොත්තෙන් කැඩීමට තැත් කළ විට ටකස් යන ශබ්දයෙන් ගම්මිරිස් ඇටය කැඩී යයි නම් එය හොඳින් වියළාගත් බවට සළකුණකි.

ශ්‍රේණි කිරීම

සාමාන්‍යයෙන් අපනයන වෙළෙඳ පොළට නිකුත් කිරීමේ දී ගම්මිරිස් ශ්‍රේණිගත කිරීම අත්‍යවශ්‍ය අංගයක් වුවද ඔබ නිවෙසේ පරිභෝජනය සඳහා ගම්මිරිස් සකසා ගන්නේ නම් මෙය අවශ්‍ය නොවේ. කෙසේ වෙතත් සකස් කරගන්නා ලද ගම්මිරිස් ලීටරයක පරිමාවකට පුරවා එහි බර කිරා ගත් පසු ග්‍රෑම් 550 ට වඩා වැඩි අගයක් ගනී නම් එය පළමු ශ්‍රේණියේ ගම්මිරිස් ලෙස හැඳින්විය හැකිය.

විශේෂයෙන්ම ඔබ නිවෙසේ දී සකසා ගත් ගම්මිරිස්වල ගුණාත්මක තත්ත්වය ඔබටම නීර්ණය කරගැනීමට අවශ්‍ය නම් ලීටර් 1 ක අයිස්ක්‍රීම් බඳුනක් ගෙන එහි කට මට්ටම දක්වා ගම්මිරිස් ඇට පුරවා ගන්න. අනතුරුව නිවෙසේ තිබෙන තරාදියකින් බර කිරාගන්න. එවිට එම ගම්මිරිස්වල බර ග්‍රෑම් 550 ට වැඩියි නම් ඔබේ නිෂ්පාදනය ඉතා ඉහළ ගුණාත්මක මට්ටමක පවතී.

ඇසිරීම සහ ගබඩා කිරීම

ඇසිරීම සහ ගබඩා කිරීම සඳහා යොදා ගන්නා ගම්මිරිස්වල ජල ප්‍රතිශතය 12% දක්වා අඩු මට්ටමක පැවැතිය යුතු බව ඔබ මතක තබාගන්න. ප්‍රමිතිය ග්‍රේජ් 250 /300 පමණවන පොලිතීන් හෝ පොලිප්‍රොපිලීන් මල්ලක් තුළ ඇසිරීම මගින් ගම්මිරිස්වලට ජල අවශෝෂණය වළක්වා ගත හැකියි. නිවෙසේ නම් ජීවානුහරණය කරනලද වීදුරු බෝතල් වල අසුරා කල්තබාගැනීම ප්‍රායෝගිකයි. මෙම වීදුරු බෝතල් විදුලි උදුනක සෙන්ටිග්‍රේඩ් අංශක 150ක උෂ්ණත්වයකින් විනාඩි 15 ක් හෝ ද්විත්ව උණුදිය ප්‍රතිකාරය Double boiling මගින් ක්ෂුද්‍රජීවී හරණය කරගැනීම වඩාත් සුදුසුය.

ගෘහස්ථ ඇඹරුම් යන්ත්‍රයක් භාවිත කරමින් වියළි ගම්මිරිස් කුඩු කර හෝ කැබලි බවට පත්කර වුවද ජීවානුහරණය කරනලද බෝතල් තුළ ඇසිරීම මගින් කල් තබා ගන්නට පුළුවනි.එමගින් මුළුතැන්ගෙයි භාවිතය ද පහසු කරයි. එසේම ගම්මිරිස් වැඩි අස්වැන්නක් ලැබී තිබේ නම් මෙලෙස සකසාගත් කළු ගම්මිරිස් නිෂ්පාදනය කිරීම ස්වයං රැකියාවක් ලෙසද ඔබට පවත්වාගෙන ගිය හැකිය.

තරුණී පුවත්පතේ ලිපි ඇසුරෙනි...