රස්සාවකට රට යන්න කලින් නීතිය හරියට දැනගන්න
පවුලක ආර්ථික තත්ත්වය දියුණුකර ගැනීම වෙනුවෙන් බොහෝ කාන්තාවන් විදේශ රැකියා සඳහා යොමුවෙනවා. ශ්‍රී ලංකාවට වැඩිම විදේශ විනිමයක් ලැබෙන්නේද විදේශ රැකියාවල නියුක්ත වන ගෘහ සේවිකාවන්ගෙනි. අප රටේ නීතිගත විදේශ රැකියා නියෝජිත ආයතන මෙන්ම නීති විරෝධී විදේශ රැකියා නියෝජිත ආයතනද ඕනෑ තරම් දැකගැනීමට ලැබෙනවා.
නීත්‍යනුකූල නොවන මාර්ගයන්ගෙන් විදේශගතවීමෙන් සිදුවන්නේ විවිධ වංචාසහගත දෑට හසු වී ඔබ අසරණ භාවයට පත්වීමයි. එසේම විදෙස්ගත වීමට බලාපොරොත්තු වන කාන්තා ඔබ එයට අදාළ නීතිරීතින් ඇතුළු නෛතික කරුණු කාරණාවන් පිළිබඳව හොඳ අවබෝධයකින් යුක්ත විය යුතුයි. එසේ අවබෝධයකින් යුක්තව විදෙස්ගත වන්නේ නම් ඔබගේ සුරක්ෂිතතාව පවත්වා ගැනීමට ඔබට පහසු වනු ඇත.
ශ්‍රී ලංකා පුරවැසියකු විදේශ ගතවීමේදී අනුගමනය කළ යුතු ක්‍රියාපටිපාටිය හා ඔවුන්ගේ සුරක්ෂිතභාවය පිළිබඳව ශ්‍රී ලංකා රජය විසින් අවධානය යොමු කරමින් 1985 අංක 21 දරන පනත මඟින් ශ්‍රී ලංකා විදේශ සේවා නියුක්ති කාර්යාංශය ස්ථාපනය කරන ලදී.
එයට අනුව නීත්‍යනුකූලව විදේශ ශ්‍රමිකයකු ලෙස විදෙස්ගත වීමට බලාපොරොත්තු වන ඔබ විදේශ සේවා නියුක්ති කාර්යාංශයේ ලියාපදිංචි විය යුතුයි. එසේ ලියාපදිංචි වීම වසර 20කට වලංගුව පවතී.
යම් පුද්ගලයකු විදේශ රැකියා සැපයීමේ ආයතනයක් පවත්වාගෙන යන්නේද එම ආයතනයද විදේශ සේවා නියුක්ති කාර්යාංශයේ ලියාපදිංචි කර තිබිය යුතුය. ඔබ විදෙස්ගත වීමට තෝරාගන්නා රැකියා නියෝජිත ආයතනය එසේ ලියාපදිංචි වූ ආයතනයක්ද යන වග ප්‍රථමයෙන් ඔබ සොයා බැලිය යුතුයි.
එම ආයතනය විදේශ සේවා කාර්යාංශයේ ලියාපදිංචි වී තිබේද නැද්ද යන කරුණු ඔබට විදේශ සේවා නියුක්ති කාර්යාංශයෙන් දැනගැනීමට හැකියාව ඇත.
එසේම ඔබ යෑමට බලාපොරොත්තු වන රටේ නීති පද්ධතිය පිළිබඳව ඔබ නිරතවීමට යන රැකියාවේ ස්වභාවය, එම ආයතනයේ ස්වභාවය සහ එම රටේ දඬුවම්වල ස්වභාවය පිළිබඳව ඔබ මනා ලෙස දැනුවත් විය යුතු වෙනවා. එම තොරතුරු ඔබ තෝරාගත් විදේශ රැකියා නියෝජිත ආයතනය මාර්ගයෙන්ද දැනගැනීමට හැකියාව තිබෙනවා.
රැකියාවක් සඳහා විදේශගත වීමේදී පහත ලියකියවිලි නීත්‍යනුකූල භාවයෙන් යුක්ත වේදැයි විමසිලිමත් වීම වැදගත් වේ.
- වලංගු විදෙස් ගමන් පත්‍රය සහ වලංගු වීසා බලපත්‍රය
- ගුවන් ගමන් ටිකට් පත
- සේවා යෝජකයාගේ තොරතුරු සහ සේවා ගිවිසුම
- බැංකු ගිණුම් පිළිබඳව තොරතුරු
- වෛද්‍ය වාර්තා
ඔබ විදෙස් සේවයේ යෙදෙන විට එම රටේ සංස්කෘතික කාරණාවන් පිළිබඳව අධ්‍යයනයක් කළ යුතුයි. එයින් ඔබගේ නොදැනුවත්කම හේතුවෙන් සිදුවිය හැකි වැරැදි වළක්වා ගෙන නීති ගැටලුවලට මැදිවීම අවම කරගත හැකිය.
එසේම ඔබ සේවය කරන ආයතනයේ නීති රෙගුලාසීන්වලටද අවනතව කටයුතු කළ යුතුය.
එමෙන්ම විදේශයකදී ඔබට සිදුවන හදිසි අනතුරු හෝ හදිසි අවස්ථාවන්වලදී අවශ්‍ය සහනයන් ලබාගැනීම සඳහා ශ්‍රී ලංකාවේ සිටින ඔබගේ නෑ හිතවතුන් සමඟ නිරන්තර සබඳතා පවත්වාගත යුතු වේ. විදේශ සේවා නියුක්ති කාර්යාංශය පිළිබඳව සහ ඔබ විදේශගත වූ විදේශ රැකියා නියෝජිත ආයතනය පිළිබඳව ඔවුන්ව දැනුවත් කිරීම වැදගත්ය. යම් හෙයකින් ඔබ අසීරුතාවකට පත්වූයේ නම් ආසන්නම විදේශ සේවා නියුක්ති කාර්යාංශයට හෝ ආසන්නම විදේශ සේවා නියුක්ති කාර්යාංශ කාර්යාලයට හෝ ශ්‍රී ලංකා තානාපති කාර්යාලයට ඔබගේ රැකියා නියෝජිත ආයතනයට පැමිණිලි කරන ලෙස ඔවුන්ට පූර්ව දැනුම්දීමක් ලබාදිය යුතුය.
ඔබට හිමිවිය යුතු මුදල් නොලැබෙන විටද විදේශ සේවා නියුක්ති කාර්යාංශයට පැමිණිලි කළ හැකිය.
ඔබ නැවත පැමිණීමේදී යම් ආබාධයකින් හෝ රෝගයකින් පෙළෙන්නේ නම් ගුවන්තොටුපළ සිටින ශ්‍රී ලංකා විදේශ සේවා රැකියා කාර්යාංශය වෙත වහාම එය වාර්තා කළ යුතු වේ. මේ කරුණු පිළිබඳව දැනුවත්වීම තුළින් ඔබට විදේශ රැකියා සම්බන්ධයෙන් වන බොහෝ අපහසුතා වළක්වා ගත හැකිවනු ඇත.
සෙව්වන්දි හෙට්ටිආරච්චිඋපුටා ගැනීම මව්බිම
