Facebook සෙල්ලම් සල්ලම් වන්නේ මෙහෙමයි
මුහුන පොත නොහොත් ෆේස්‌ බුක්‌ යනු හොඳ හා නරක එකට කැටි වූ පොතක්‌ බඳුය. ලොකු කුඩා වයස්‌ භේදයකින් තොරව මෙරට බොහෝ දෙනෙක් ෆේස්‌ බුක්‌ සමාජ වෙබ් අඩවිය භාවිත කරති. එම නිසා ෆේස්‌ බුක්‌ වෙබ් අඩවිය උගතුන්ගේ, බුද්ධිමතුන්ගේ මෙන්ම නූගත් බූරුවන් සහ නරුමයන්ගේද පාරිදීසයක්‌ වී තිබේ. එම නිසා ෆේස්‌ බුක්‌ හරහා සිදුවන අපරාධ ද වැඩිවී තිබේ. මෑත කාලය තුළ සිදුවූ සිදුවීම් දෙස නිරීක්‍ෂණය කිරීමේදී අපට එය මනාව පැහැදිලිs වේ. ෆේස්‌ බුක්‌ සමාජ වෙබ් අඩවිය ඔස්‌සේ ළමයින් අපයෝජනය වන බවට ලද තොරතුරක්‌ මත ජාතික ළමාරක්‍ෂක අධිකාරියේ අන්තර්ජාල අවේක්‍ෂණ ඒකකය මගින් ඉකුත් ජනවාරි මාසයේ පරීක්‍ෂණයක්‌ ආරම්භ කෙරුණි. එහිදී මාස හයක පමණ කාලයක්‌ තුළදී ෆේස්‌ බුක්‌ හරහා ළමයින් අපයෝජනය කිරීමට උත්සාහ ගත් පුද්ගලයන් දෙදහසකට අධික පිරිසක්‌ හඳුනා ගැනීමට හැකිවිය.
මොරටුව ප්‍රදේශයේ විවාහකයකු තම බිරිඳ හා දරුවන් ගිනි තබා මරා දැමුවේ ෆේස්‌බුක්‌ හරහා යාළු වූ තරුණියක්‌ නිසාය. කෑගල්ල ප්‍රදේශයේ ප්‍රසිද්ධ පාසලක සිසුවියක්‌ ගෙල වැලලාගෙන මියගියේ තමාගේ ෆේස්‌බුක්‌ වෙබ් අඩවියේ තිබූ ඡායාරූපයක්‌ විදුහල්පතිවරයා දැක එයට බැණ වැදීම නිසා ඇතිවූ කණස්‌සල්ල නිසාය. මීගොඩ ප්‍රදේශයේ විවාහක එක්‌දරු මවකට සිය ජීවිතයෙන් සමුගැනීමට වූයේ ෆේස්‌ බුක්‌ හරහා හඳුනාගත් අනියම් පෙම්වතා නිසාය. මෑත කාලය දෙස බැලීමේදී මෙරටට ෆේස්‌ බුක්‌ වෙබ් අඩවිය නිසා සිදුවූ අපරාධ ගණන ඉතා විශාලය. එයට තවත් එක්‌ උදාහරණයක්‌ වනුයේ පසුගිය 25 වැනිදා කොළඹ අලුත්කඩේ රථවාහන අධිකරණය ඉදිරිපිට මාර්ගයේදී සිදුවූ මිනී මැරුම් සිද්ධියයි. එය සැකෙවින් මෙසේය.
මොරටුව සොයිසාපුර නිවාස සංකීර්ණයේ පදිංචි ඇඩෝන් නිරෝෂන් විස්‌ පස්‌ හැවිරිදි අවිවාහක තරුණයෙකි. ඇඩෝන් නිතරම අන්තර්ජාලය භාවිත කිරීමට පුරුදු වී සිටි අයෙකි. ඔහුගේ නමින් ෆේස්‌බුක්‌ ගිණුමක්‌ද තිබුණි. මොහු නිතරම තම ෆේස්‌බුක්‌ ගිණුම හරහා තරුණියන් යාළු කර ගැනීමට උත්සාහ කළේය. කාලයක සිට මොහු කොටහේන ප්‍රදේශයේ පාසල් යන තරුණියක සමග මිතුරුකමක්‌ ඇති කර ගත්තේය. ඇඩෝන් මෙම තරුණිය කෙරෙහි විශේෂ උනන්දුවක්‌ දැක්‌වීය. එම පාසල් යන තරුණියද ඇඩෝන් කෙරෙහි විශාල උනන්දුවක්‌ දැක්‌වූවාය. මොවුන් ෆේස්‌බුක්‌ ගිණුම හරහා තමන්ගේ ඡායාරූප පෞද්ගලික තොරතුරු ආදිය හුවමාරු කර ගත්තේය. ඇඩෝන් මේ හරහා එම තරුණිය සමග විශාල මිතුදමක්‌ ඇතිකර ගත්තේය. අවසානයේ එය නතර වුණේ දෙදෙනා පෙම්වතුන් බවට පත්වීමෙනි. ඇඩෝන්ගේ සිතේ තිබුණේ මෙම තරුණිය ගැන වෙන අදහසකි. එනම් කෙසේ හෝ ඇය රවටාගෙන ලිංගික සම්බන්ධතාවක්‌ පවත්වා ගැනීමටය. ඔහු ඒ සඳහා අවශ්‍ය වටපිටාව ඇඟට නොදැනීම එම තරුණිය සමග ගොඩනගා ගත්තේය. සමාජයේ සිදුවන සිදුවීම් ගැන දැනුමක්‌ නොතිබුණ එම පාසල් සිසුවිය ඇඩෝනව තමන්ටත් වඩා විශ්වාස කළාය. මේ අතර ඇඩෝන් මාන බැලුවේ තමන්ගේ සිතේ තිබෙන ආශාව ඉෂ්ට කර ගැනීමටය. දිනක්‌ ඇඩෝන් එම තරුණියට පැවසුවේ මට ඔයත් එක්‌ක නිදහසේ දවසම ගත කරන්න ඕනා. ඒක නිසා අපි කොහේ හරි ගිහින් නිදහසේ කාලා බීලා එමු කියාය. ඇඩෝන් ගැන ලොකු විශ්වාසයක්‌ තිබුණු නිසා එම පාසල් සිසුවියද ඇඩෝන්ගේ යෝජනාවට කැමති වූවාය. දෙදෙනා කතා කරගත් පරිදි දිනයක්‌ යොදාගෙන මුණගැසුණි. ඇඩෝන් එම තරුණියව යම් ස්‌ථානයකට රැගෙන ගොස්‌ තම සිතේ තිබුණු ආශාවන් සියල්ල ඉටුකර ගත්තේය. ඉන්පසු ඇයගේ නිරුවත් ඡායාරූප කිහිපයක්‌ද ලබා ගත්තේය. තමාගේ නිරුවත් ඡායාරූප ගන්න එපා කියා එම තරුණිය ඇවිටිලි කළත් ඇඩෝන් කෙසේ හෝ ඇය රවටා එම ඡායාරූපද ලබා ගත්තේය. පසුව සිදුවූ සිදුවීම දෙස කල්පනා කිරීමේදී එම තරුණියගේ සිතට විශාල ලැඡ්ජාවක්‌ සහ බයක්‌ ඇති වූවත් ඇඩෝන් ඇයගේ සිත සෑදීමට පවා දක්‍ෂයකු විය. ඇඩෝන් දැන් එම තරුණියගෙන් තමන්ට අවශ්‍ය දේ ලබාගෙන හමාරය. එම නිසා ඔහු සිතුවේ එම තරුණියව තමන්ට වුවමනා ආකාරයට නැටවිය හැකි බවයි. ඇඩෝන්ට යළි වුවමනා වූයේ ඇය සමග ලිංගිකව හැසිරීමටයි. මේ සඳහා ඔහු කිහිප වරක්‌ එම තරුණියට එම යෝජනා ඉදිරිපත් කළේය. එම තරුණිය එකහෙළාම එම යෝජනා ප්‍රතිෂේප කළාය. එයින් කේන්තියට පත්වූ ඇඩෝන් ඇයට තර්ජනය කරමින් පැවසුවේ තමන් සමග එක්‌වීමට නාවොත් ලබාගත් නිරුවත් ඡායාරූප සියල්ලම අන්තර්ජාලයට මුදාහරින බවයි. මෙයින් තරුණිය භීතියට පත්වූවාය. කරන්නේ කුමක්‌දැයි සිතා ගැනීමට ඇයට නොහැකි විය. තමන්ගේ යහළුවකුට පවා මෙම සිදුවීම කීමට නොහැකිය. ඇය දස අතේ කල්පනා කළාය. විටෙක ඇය සියදිවි නසා ගැනීමටද කල්පනා කළාය. නැවත ඇය කල්පනා කළේ මෙම ප්‍රශ්නය කෙසේ හෝ විසඳ ගන්නා බවයි. ඒ අනුව ඇය මුළු සිද්ධියම මුල සිට අගට තම පියාට පැවසුවාය.
මලක්‌ වගේ රැකබලා ගත් තම දියණිය තරුණයකු අතින් දූෂණය වූවායි ඇසීමත් සමග ඔහුගේ සිහිය විකල් විය. ඔහුගේ සිතට දැනුණ වේදනාව මහ මෙරක්‌ තරම් විශාල විය. ඇස්‌වලින් ගැලූ කඳුළු දියණියට හොරෙන් පිසදා ගත්තේය. දැන් වුණ දේ වුණා එය නැවත නිවැරැදි කරගන්න බැහැ. එම නිසා තම දියණියව කෙසේ හෝ මෙම ග්‍රහණයෙන් බේරාගත යුතුයෑයි කල්පනා කළේය. මෙම අපරාධය කළ තරුණයා කෙරෙහි ඔහුගේ සිතේ හට ගත්තේද බද්ධ වෛරයකි. දැනට කළයුතු හොඳම දේ මේ පිළිබඳ පොලිසිය දැනුවත් කර නීතියේ පිsහිට පැතීම බව තේරුම් ගත් ඔහු තම දියණිය සමග කොටහේන පොලිසියට ගොස්‌ එම සිද්ධිය පිළිබඳ පැමිණිල්ලක්‌ කළේය. ඒ අනුව ක්‍රියාත්මක වූ පොලිස්‌ නිලධාරීන් පරීක්‍ෂණ පවත්වා එම තරුණයාව අත්අඩංගුවට ගත්තේය. ඒ අනුව කොටහේන පොලිසිය මගින් අත්අඩංගුවට ගත් තරුණයාව කොළඹ අලුත්කඩේ අංක 03 මහෙස්‌ත්‍රාත් අධිකරණයට ඉදිරිපත් කිරීමෙන් පසුව 25 වැනිදා දක්‌වා රක්‍ෂිත බන්ධනාගාර ගත කරන ලෙසත් එම නඩුව යළි 25 වැනිදා කැඳවන බවත් දැන්වීය. තරුණියගේ පියා තම දුවව දූෂණය කළ තරුණයා සමග සිටියේ දැඩි වෛරයකිනි. ඔහුගේ යටිසිත කීවේ නීතියේ දඬුවම් ඔහුට මදි බවයි. තමා එම පවුලෙන්ම පලිගන්නා බවට ඔහු සිතා ගත්තේය. ඔහුට එම දිනවල හරි නින්දක්‌ පවා නොලැබුණේ මෙම සිද්ධිය නිතරම මතක්‌ වන නිසාවෙනි. මෙම නඩුව යළි පසුගිය 25 වැනිදා කැඳවනු ලැබීය. එහිදී සැකකාර තරුණයාට ඇප ලබාදීමට අධිකරණය මගින් නියෝග කළේය. දවස්‌ හතක්‌ වැනි සුළු කාලයකදී ඇප ලැබීම නිසා එම තරුණියගේ පියාගේ කේන්තිය දෙගුණ තෙගුණ විය. ඔහු දැඩි තීරණයක්‌ ගත්තේය. දියණියට කළ අපරාධය වෙනුවෙන් එය කළ තරුණයාගෙන් පළිගන්නා බවටයි. චූදිත තරුණයා ඇපමත නිදහස්‌ව සිය පියා සහ නැගණිය සමග යමින් සිටියදී දූෂණයට ලක්‌වූ තරුණියගේ පියා කොළඹ අලුත්කඩේ රථවාහන අධිකරණය ඉදිරිපිට මාර්ගයේදී එම තිදෙනාටම පිහි පහරවල් කිහිපයක්‌ එල්ල කළේය. ඔවුන් තිදෙනා ප්‍රදේශය දෙවනත් වන සේ ලතෝනි තැබුවේ මෙන්න මිනී මරනවෝ අපව බේරගන්න කියා කෑගසමිනි. තත්ත්වය දරුණු වන බව තේරුම් ගත් එම තරුණියගේ පියා එතැනින් පැන යැමට උත්සාහ කළේය. නමුත් ඊට පෙර ක්‍රියාත්මක වූ කෙසෙල්වත්ත පොලිසියේ නිලධාරීන් පිරිසක්‌ ඒ මොහොතේදීම ඔහුව අත්අඩංගුවට ගත්තේය. තුවාල ලැබූ තිදෙනා කොළඹ ජාතික රෝහලට ඇතුළත් කිරීමෙන් පසු අසාධ්‍ය තත්ත්වයේ සිටි සැකකාර තරුණයාගේ පියා මිය ගියේය. බරපතළ තුවාල ලැබූ දූෂණ සිද්ධියට සම්බන්ධ සැකකාර තරුණයා හා ඔහුගේ නැගණිය කොළඹ ජාතික රෝහලේ නේවාසිකව ප්‍රතිකාර ලබා ගත්තේය. ෆේස්‌බුක්‌ හරහා හටගත් මිතුදම අවසානයේ කෙලවර වූයේ ඒ අයුරිනි. ෆේස්‌බුක්‌ හරහා සිදුවන අපරාධ නිසා චීනය, පකිස්‌තානය ආදී රටවල් රාශියක ෆේස්‌ බුක්‌ තහනම් කර තිබේ. එසේම අන්තර්ජාලය භාවිත කරන දරුවන් සිටින දෙමව්පියන් එම දරුවන් පිළිබඳ දැඩි අවධානයකින් සිටිය යුතුය. අන්තර්ජාලය (විශේෂයෙන් ෆේස්‌බුක්‌ ආදිය භාවිත කිරීමේදී) පරිස්‌සමින් භාවිත කරන්නේ නම් මෙවැනි අපරාධ සිදු නොවනු ඇත.
ගයාන් සමරසිංහ
උපුටා ගැනීම දිවයින
